Hambiswiritano, a hi fanelanga hi va exiyin’weni lexi nga tsakisiki leswaku hi ta tiphina hi nkhathalelo wa Xikwembu wa rirhandzu. Yehovha wa khathala hi xilo xin’wana ni xin’wana lexi nga ha khumbaka ku hlayiseka ka hina ka moya ni ka mintlhaveko. Ina, a hi fanelanga hi ehleketa leswaku mintlhaveko, mianakanyo ni ku karhateka ka hina a swi nyawuli ngopfu lerova swi nge phofuriwi exikhongelweni. (Vafilipiya 4:6) Loko u ri ni munghana wa wena lonkulu, xana mi bula hi swiendlakalo leswikulu ntsena swa le vuton’wini bya n’wina? Xana a mi tlheli mi bula hi swilo leswitsongo? Hi ndlela leyi fanaka, u nga titwa u ntshunxekile ku vulavula hi xivumbeko xihi na xihi xa vutomi bya wena na Yehovha, u ri karhi u tiva leswaku “xi tikarhatela [wena].”—1 Petro 5:7.

Kavula, vunghana a byi tali ku teka nkarhi wo leha loko hinkwaswo leswi mi vulavulaka ha swona swo khumba n’wina ntsena. Hilaha ku fanaka, swikhongelo swa hina a swi fanelanga swi va swa vutianakanyi. Hi fanele hi tlhela hi phofula rirhandzu ra hina ni ku khathala ka hina hi Yehovha ni swilaveko swa yena. (Matewu 6:9, 10) Xikhongelo a hi nkarhi wo kombela mpfuno eka Xikwembu ntsena kambe i nkarhi wo vula ni marito yo nkhensa ni ku dzunisa. (Pisalema 34:1; 95:2) ‘Ku nghenisa vutivi’ hi dyondzo ya nkarhi na nkarhi ya munhu hi xiyexe swi ta hi pfuna emhakeni leyi, tanihi leswi swi hi pfunaka ku tolovelana ku antswa na Yehovha ni tindlela ta yena. (Yohane 17:3) U nga ha swi kuma swi pfuna swinene ku hlaya buku ya Tipisalema ni ku xiya ndlela leyi malandza man’wana yo tshembeka ma tiphofuleke ha yona eka Yehovha.

Xinakulobye na Yehovha hakunene i nyiko ya risima. Onge hi nga kombisa leswaku ha xi tlangela hi ku endla swikhongelo swa hina swi va swa xinghana hilaha ku engetelekeke, swi huma embilwini ni ku va swa munhu hi xiyexe. Kutani hi ta tiphina hi ntsako lowu phofuriweke hi mupisalema, loyi a nga te: “Ku katekile loyi u ṅwi hlawulaka, loyi u ṅwi ṭhinetaka ka wena!”—Pisalema 65:4.

Swivutiso Swa Vahlayi

Hi tsakisiwe hi dyondzo ya hina ya xifaniso xa Yesu xa tinyimpfu ni timbuti. Malunghana ni matwisiselo lamantshwa lama andlariweke eka “Xihondzo xo Rindza” xa October 15, 1995, xana hi nga hambeta hi vula leswaku Timbhoni ta Yehovha namuntlha ti hlanganyela entirhweni wo hambanisa?

Ina. Hilaha ku twisisekaka, vo tala va tivutisile malunghana ni mhaka leyi hikuva Matewu 25:31, 32, yi ri: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” Xihondzo xo Rindza xa October 15, 1995, xi kombise xivangelo xo va tindzimana leti ti tirha endzhaku ka ku sungula ka nhlomulo lowukulu. Yesu u ta fika eku kwetsimeni ka yena ni tintsumi ta yena kutani u ta tshama exitulwini xa yena xa vuhosi xo avanyisa. Kutani, u ta hambanisa vanhu. Hi mukhuva wihi xana? U ta endla swiboho hi ku ya hi leswi vanhu va swi endleke kumbe leswi va nga swi endlangiki emahlweni ka nkarhi wolowo.

Leswi hi nga swi fanisa ni vulavisisi bya nawu lebyi endliwaka lebyi eku heteleleni byi nga ta fikisa eku tengiweni ka nandzu ehubyeni. Ku hlengeletiwa vumbhoni ku ringana nkarhi wo leha emahlweni ko va huvo yi humesa nawu ni ku humesa xigwevo. Vumbhoni bya leswaku vanhu lava hanyaka sweswi va ta faneriwa hi ku va tinyimpfu kumbe timbuti i khale byi ri karhi byi hlengeletiwa. Naswona bya ha hlengeletiwa. Kambe loko Yesu a tshama exiluvelweni xa yena xa vuhosi, nandzu wu ta va se wu herile. U ta va a lunghekele ku avanyisa. Vanhu va ta hlawuleriwa ku loviseriwa makumu kumbe ku avanyiseriwa vutomi lebyi nga heriki.

Kambe hambileswi ku avanyisiwa ka vanhu leswaku va ya evuton’wini kumbe eku feni loku boxiweke eka Matewu 25:32 ku nga ka nkarhi lowu taka, sweswo a swi vuli swona leswaku a ku na ku avanyisa kumbe ku hambanisa loku endlekaka emahlweni ka sweswo. Bibele, eka Matewu ndzima 13, yi boxa ntirho wun’wana wo hambanisa lowu humeleleke kan’we enkarhini lowu hundzeke. Lexi tsakisaka, buku leyi nge Vun’we Eku Gandzeleni Ka Xikwembu Xi Ri Xin’we Xa Ntiyiso, matluka 179-80, yi vulavula hi mhaka leyi ehansi ka xihlokwana lexi nge “Ku Hlawuriwa Ka Vanhu.”a Buku leyi yi ri: “Ku ni swiendlakalo swin’wana swa nkoka leswi Yesu a swi hlanganiseke swinene ni ku hela ka mafambiselo ya swilo. Xin’wana xa swona i ku hlawuriwa ka ‘vana va Mfumo’ exikarhi ka ‘vana va Lowo biha.’ Yesu u vulavule ha vona eka xifaniso xakwe xa nsimu ya mavele laha nala a nga fika a haxa mfava eka yona.”

Buku leyi a yi vulavula hi xifaniso xa Yesu lexi nga eka Matewu 13:24-30 lexi hlamuseriweke eka tindzimana 36-43. Xiya eka ndzimana 38 leswaku timbewu letinene ta mavele ti yimela vana va Mfumo, kambe mfava wu yimela vana va lowo biha. Tindzimana 39 na 40 ti kombisa leswaku eku ‘heleni ka mafambiselo ya swilo’—ku nga enkarhini lowu hi hanyaka eka wona—mfava wu hlengeletiwile. Wu hlawuriwile naswona eku heteleleni wu ta hisiwa, wu tlhela wu herisiwa.

Xifaniso lexi xi vulavula hi Vakreste lava totiweke (lava exifanisweni xa tinyimpfu ni timbuti va vitaniwaka vamakwavo va Yesu). Kutani, ntiyiso wa leswaku ku hlawuriwa loku ka nkoka ku endleka enkarhini wa hina wu le rivaleni, ni leswaku vatotiwa va vonaka eka lava tivulaka Vakreste kambe va tikombisaka va ri “vana va Lowo biha.”

Yesu u nyikele swikombiso swin’wana swa ku avanyisiwa kumbe ku hambanisiwa ka vanhu. Tsundzuka leswi a swi vuleke malunghana ni ndlela leyo anama leyi yisaka eku loveni: “Lava nghenaka hi yona va tele.” (Matewu 7:13, xiitaliki i xerhu.) Yoleyo a yi nga ri nhlamuselo ya vuyelo byo hetelela ntsena. A ku ri nhlamuselo ya vulavisisi lebyi yaka emahlweni, hilaha swi nga hakona sweswi eka vanhu va nga ri vangani lava kumaka ndlela leyo lala leyi yisaka evuton’wini. Nakambe, tsundzuka leswaku loko a rhuma vaapostola va yena, Yesu u vule leswaku a va ta kuma van’wana lava fanelekaka. Van’wana a va ta va lava nga fanelekiki, kutani vaapostola a va fanele va phumunha ntshuri emilengeni ya vona “[leswaku] swi ta va vumbhoni eka vona.” (Luka 9:5) Xana a hi ntiyiso leswaku nchumu lowu fanaka wu karhi wa endleka loko Vakreste va endla vutirheli bya vona bya le rivaleni namuntlha? Van’wana va angula kahle, kasi van’wana va ala ku amukela rungula ra Xikwembu leri hi va yiselaka rona.

Swihloko leswi nga eka Xihondzo xo Rindza leswi vulavulaka hi tinyimpfu ni timbuti swi te: “Hambileswi ku avanyisa loku hlamuseriweke exifanisweni ku nga ta humelela enkarhini lowu taka lowu tshineleke, hambi ku ri sweswi ku ni swin’wana swa nkoka leswi endlekaka. Hina Vakreste hi nghenele ntirho wa ku ponisa vutomi wa ku huwelela rungula leri avanisaka vanhu. (Matewu 10:32-39).” Eka rungula rero leri nga eka Matewu ndzima 10, hi hlaya leswaku Yesu u vule leswaku ku n’wi landzela a swi ta vanga ku avana exikarhi ka vanhu—tatana a a ta lwisana ni n’wana wa jaha, n’wana wa nhwanyana a a ta lwisana ni mana wakwe.

Eku heteleleni, vamakwavo va Kreste lava totiweke hi moya va rhangele eku chumayeriweni ka rungula ra Mfumo emisaveni hinkwayo. Loko vanhu va ri twa kutani va angula hi ndlela leyinene kumbe hi ndlela leyi nga riki yinene, va tikombisa leswi va nga xiswona. Hina vanhu va nyama a hi nge swi koti, naswona a hi fanelanga hi vula hi ku, ‘Munhu loyi i nyimpfu; ni leswaku lowun’wana i mbuti,’ hi ku ya hi nhlamuselo leyi nga eka Matewu ndzima 25. Phela, ku yisa ka hina mahungu lamanene evanhwini swi va pfumelela ku kombisa lomu va yimeke kona—leswi va nga xiswona ni ndlela leyi va khomaka vamakwavo va Yesu ha yona. Hikokwalaho, kukotisa vumbhoni lebyi engetelekeke bya le hubyeni, ku hambana loku nga kona exikarhi ka lava seketelaka vamakwavo va Yesu ni lava alaka ku va seketela byi ya byi vonaka. (Malakiya 3:18) Hilaha Xihondzo xo Rindza xi kombiseke hakona, ku nga ri khale Yesu u ta tshama exiluvelweni xa yena xa vuhosi kutani a nyika xigwevo, hikwalaho vanhu va ta va va avanyisiwile ni ku avanisiwa hilaha ku heleleke leswaku va kuma vutomi kumbe ku loviseriwa makumu.

[Nhlamuselo ya le hansi]