Vugwinehi

Nhlamuselo: Vugwinehi i ku tshika kumbe ku fularhela vugandzeri ni ku tirhela Xikwembu, ngopfu-ngopfu ku xandzukela Yehovha Xikwembu. Vagwinehi van’wana va vula leswaku va xi tiva Xikwembu ni leswaku va xi tirhela kambe va ala tidyondzo kumbe swilaveko leswi andlariweke eRitweni ra xona. Van’wana va ri va yi tshemba Bibele kambe va ala nhlengeletano ya Yehovha.

Xana hi nga langutela leswaku ku humelela vagwinehi evandlheni ra Vukreste?

1 Tim. 4:1: “Moya wu vula wu tiyisile leswaku emasikwini lama taka, van’wana va ta hambana ni vupfumeri, hi mhaka ya ku landza mimoya leyi kanganyisaka ni tidyondzo ta mademona.”

2 Tes. 2:3: “Mi nga xisiwi hi munhu niswitsanana, hikuva siku ra [Yehovha] a ri nga ti, loko ku nga si ta [vugwinehi, NW], ni loko ku nga si humeseriwa erivaleni munhu lowo homboloka, la nga ta helela eku loveni.”

Swikombiso swin’wana swa vagwinehi—

Va lava ku endla van’wana va va valandzeri va vona, xisweswo va pfuxa ku avana

Mint. 20:30: “Ku ta huma van’wana exikarhi ka n’wina lava nga ta vula mavunwa ku tilavela vadyondzisiwa.”

2 Pet. 2:1, 3: “[Ku ta] va ni vadyondzisi va mavunwa exikarhi ka n’wina, lava nga ta nghenisa hi le xihundleni tidyondzo to hambuka leti onhaka; va ta landzula hambi a ri N’wini loyi a va kutsuleke . . . Kutani, hikwalaho ka makwanga ya vona, va ta mi dyelela hi marito ya vona ya vuxisi.”

Va nga ha vula leswaku va pfumela eka Kreste kambe va wu tekela ehansi ntirho wa ku chumayela ni wa ku dyondzisa lowu a wu nyikeke valandzeri vakwe

Lk. 6:46: “Xana mi ndzi vulela yini: ‘Hosi, Hosi’ xana, kasi a mi endli leswi ndzi mi byelaka swona?”

Mt. 28:19, 20: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula . . . mi va dyondzisa ku hlayisa hinkwaswo leswi ndzi mi leriseke swona.”

Mt. 24:14, NW: “Mahungu lawa lamanene ya mfumo ma ta twarisiwa emisaveni hinkwayo leyi akiweke leswaku byi va vumbhoni eka vanhu va matiko hinkwawo; kutani hi kona makumu ma nga ta fika.”

Va nga ha vula leswaku va tirhela Xikwembu kambe va ala vayimeri va xona, nhlengeletano ya xona leyi vonakaka

Yuda 8, 11: “Na vona vanhu lava, va hanyisa xisweswo: Va nyamisa miri wa vona hi milorho ya vona. A va na mhaka ni vuhosi bya Xikwembu, va sandza ni swivumbiwa leswo hlawuleka swa le tilweni. Khombo eka vona! Hikuva va . . . tilovisa hi makanetele yo fana ni ya Kora.”

Tinhl. 16:1-3, 11, 19-21: “[Kora] . . . a ri na . . . v̌av̌anuna v̌a 250 v̌a v̌ana v̌a Israel, ti ri tihosi ta nhlengeletano . . . Kutani v̌a hlengeletana v̌a renḍela Moše na Arone, v̌a ku ka v̌ona: Ŝi ringene, hikuv̌a nhlengeletano hikwayo yi kwetsimile, kutani Yehova o le šikari ka v̌ona! Šana mi tikurisela yini henhla ka nhlengeletano ya Yehova-ke? . . . [Muxe a ku:] Mi hlengeletene, wena ni v̌andla ra wena hikwaro e ku lwa na Yehova! Arone, i mani, leŝi mi ṅwi ḍumaḍumelaka šana? Kutani [Kora] a ramba nhlengeletano hikwayo e nyangweni ya tabernakela ya nhlengeletano, kutani ku kwetsima ka Yehova ku humelela e mahlweni ka nhlengeletano hikwayo. Kutani Yehova a byela Moše na Arone, a ku: Hambanani ni nhlengeletano leyi, nḍi ta v̌a hisa kaṅwe.”

A va tshiki ripfumelo ra ntiyiso ntsena kambe va tlhela va “ba” lava a va hlanganyela na vona khale, va va sola erivaleni ni hi tindlela tin’wana leswaku va sivela ntirho wa vona; matshalatshala ya vagwinehi volavo i ya ku onha, hayi ku aka

Mt. 24:45-51: “Xana nandza la tshembekaka, wo tlhariha, hi wihi xana? Hi loyi n’wini wa yena a n’wi vekeke ku hlayisa malandza laman’wana la mutini, a ma phamela swakudya hi nkarhi wa kona. . . . Kambe loko nandza yoloyi a ri lowo biha, ú ta ehleketa embilwini ya yena a ku: ‘N’wini wa mina wa hlwela ku vuya’, kutani a sungula ku ba malandza-kulobye, a dya, a nwa ni swidakwa. Kasi n’wini wa yena a nga tshuka a fika, hi siku leri nandza loyi a nga n’wi langutelangiki ku vuya ha rona, ni le nkarhini lowu a nga wu tiviki; kutani n’wini wa nandza loyi ú ta n’wi ba swinene, a n’wi cukumeta kun’we ni vakanganyisi.”

2 Tim. 2:16-18: “Chava ku vulavula swa hava leswi nga riki na vukhongeri, hikuva lava endlaka sweswo va tshamela ku sandza Xikwembu, kutani ku vulavula ka vona, ku ta fana ni xilondza lexi pfundzelaka xi borisa miri. Exikarhi ka vona ku na va Himenayo na Fileto, lava tshikeke ntiyiso hi ku vula leswaku swa ku pfuka eku feni swi hundzile khale, kutani va khunguvanyisa van’wana eku pfumeleni.”

Xana Vakreste vo tshembeka va nga amukela vagwinehi exikarhi ka vona, hi xiviri kumbe hi ku hlaya tibuku ta vona?

2 Yoh. 9, 10: “Un’wana ni un’wana loyi a yaka emahlweni ni swa yena a nga tiyiseli edyondzweni ya Kriste, a nga na Xikwembu; . . . Loko ku ta munhu un’wana eka n’wina la kanetaka dyondzo leyi, mi nga n’wi amukeli emutini wa n’wina, hambi ku n’wi xeweta mi nga n’wi xeweti.”

Rhom. 16:17, 18: “Ndza mi khongotela vamakwerhu, ndzi ri: Mi tivonela eka lava pfuxaka ku avana, ni swikhunguvanyiso, lava va mi humesaka etidyondzweni leti mi ti kumeke; hambanani na vona; . . . hi ku nandzihisa marito ni ku sasekisa mavulavulele, va hambukisa mianakanyo ya lava nga tiviki nchumu.”

Xana ku nga va ni khombo lerikulu leri nga vangiwaka hi ku enerisa torha ra wena ra ku tiva mianakanyo ya vagwinehi?

Swiv. 11:9: “[Mugwinehi, NW] o dlaya v̌arikwav̌o hi nomu wa yena.”

Esa. 32:6: “Mbabva yi v̌ulav̌ula ta v̌umbabva ntsena, kutani mbilu ya yena yi tele ku biha a ta endla v̌umbabva, a hlev̌a Yehova hi marito yo hemba, a ṭhika moya wa loyi a kareleke e ndlaleni, a ṭona wa tora e ku nwa.” (Ringanisa Esaya 65:13, 14.)

Xana vugwinehi byi ni khombo ku fikela kwihi?

2 Pet. 2:1: “Lava nga ta nghenisa hi le xihundleni tidyondzo to hambuka leti onhaka; va ta landzula hambi a ri N’wini loyi a va kutsuleke, va tivangela ku lova loku nga ta hatla ku va wela.”

Yobo 13:16: “[Mugwinehi, NW] a nga ka a nga yimi mahlweni ka šona [Xikwembu].”

Hev. 6:4-6: “Lava va tshamaka va voningiwa hi Xikwembu, lava nantsweke nyiko ya le tilweni, lava averiweke Moya lowo Kwetsima, lava nga nantswa ku nandziha ka Rito ra Xikwembu ni matimba ya swa minkarhi leyi taka, loko kutani va tlhelela endzhaku [“loko va gwineha,” RS], a swi endleki ku va vuyisela kambe eku hundzukeni; va tlhela va [belela, NW] N’wana wa Xikwembu, va n’wi hundzula xihlekiso.”