Loko Munhu A Ku—

‘Xidyoho xa Adamu a ku ri ku rhandza ka Xikwembu, a ku ri kungu ra Xikwembu.’

U nga ha hlamula u ku: ‘Va tele vanhu lava nga vula sweswo. Kambe loko mina a ndzo endla nchumu lowu u lavaka leswaku ndzi wu endla, xana a wu ta ndzi sola? . . . Kutani, loko xidyoho xa Adamu a ku ri ku rhandza ka Xikwembu, hikwalaho ka yini Adamu a hlongoriwile aEdeni tanihi mudyohi? (Gen. 3:17-19, 23, 24)’

Kumbe u nga ha ku: ‘Yoleyo i mhaka leyi tsakisaka, naswona nhlamulo ya kona yi katsa leswaku Xikwembu i munhu wa muxaka muni. Xana swi nga va swinene kumbe swi kombisa rirhandzu ku sola munhu hikwalaho ko endla xilo lexi wena u kunguhateke leswaku a xi endla?’ Kumbexana u engetela u ku: (1) ‘Yehovha i Xikwembu xa rirhandzu. (1 Yoh. 4:8) Tindlela takwe hinkwato ti lulamile. (Ps. 37:28; Det. 32:4) A ku nga ri ku rhandza ka Xikwembu leswaku Adamu a dyoha; xi tsundzuxe Adamu leswaku a tivonela. (Gen. 2:17)’ (2) ‘Xikwembu xi nyike Adamu, ku fana na hina, ntshunxeko wo hlawula leswi a nga swi endlaka. Ku hetiseka ka yena a ku nga vuli leswaku u ni ntshunxeko wo ka a nga yingisi. Adamu u hlawule ku xandzukela Xikwembu, ku nga khathariseki ku tsundzuxiwa ka yena leswaku u ta fa.’ (Nakambe vona tluka 76.)

Antikreste

Nhlamuselo: Rito leri nge Antikreste ri vula ku lwisana kumbe ku va ematshan’wini ya Kreste. Rito leri ri tirha eka hinkwavo lava alaka leswi Bibele yi swi vulaka hi Yesu Kreste, hinkwavo lava kanetaka Mfumo wa yena, ni hinkwavo lava karhataka valandzeri vakwe. Ri tlhela ri hlanganisa vanhu, tinhlengeletano ni matiko lama hembaka ma vula leswaku ma yimela Kreste kumbe ma vula leswaku ma endla xiphemu xa Mesiya.

Xana Bibele yi vulavula hi antikreste un’we ntsena?

1 Yoh. 2:18: “N’wina vana, nkarhi wa makumu wu fikile, kutani kukotisa leswi mi tweke leswaku Nala wa Kriste wa ta, sweswi Valala va Kriste lavo tala va humelerile; hikokwalaho, ha tiva leswaku i nkarhi wa makumu.”—Xiitaliki i xerhu.

2 Yoh. 7: “Vaxisi lavo tala va hangalakile ni misava, i vanhu lava kanetaka leswaku Yesu Kriste ú tile emisaveni a va munhu. Mukaneti wo tano i muxisi ni Nala wa Kriste.” (Xiya leswaku “Valala va Kriste lavo tala” eka 1 Yoh. 2:18, ku vuriwa vona hinkwavo tanihi “Nala wa Kreste.”)

Xana ku ta ka antikreste ku vekeriwe nkarhi wun’wana lowu taka?

1 Yoh. 4:3: “Moya wihi na wihi lowu nga vuriki sweswo hi tlhelo ra Yesu, a hi wa Xikwembu. Lowu hi wo moya wa Nala wa Kriste, lowu mi tweke ta wona leswaku wa ta; kutani nisweswi wu kona la misaveni.” (Xiitaliki i xerhu.) (Sweswo swi tsariwe ekusuhi ni ku hela ka lembe-xidzana ro sungula C.E.)

1 Yoh. 2:18: “Sweswi Valala va Kriste lavo tala va humelerile; hikokwalaho, ha tiva leswaku i nkarhi wa makumu.” (Xiitaliki i xerhu.) (Loko Yohane a ku “nkarhi wa makumu” swi le rivaleni leswaku a a vula ku hela ka nkarhi wa vaapostola. Vaapostola lavan’wana va file, naswona Yohane hi byakwe a a dyuhale ngopfu.)

Van’wana va lava va vitaniwaka tanihi vaantikreste—

Vanhu lava kanetaka leswaku Yesu hakunene i Mesiya

1 Yoh. 2:22: “Munhu wa vunwa i mani xana, loko a nga ri loyi a kanetaka leswaku Yesu i Mesiya [kumbe, Kreste, mutotiwa]? Munhu wo tano, hi ye Nala wa Kriste.”

Hinkwavo lava alaka leswaku Yesu i N’wana wa Xikwembu la hlawulekeke

1 Yoh. 2:22: “Nala wa Kriste, [hi] loyi a landzulaka Tatana ni N’wana.”

Ringanisa Yohane 10:36; Luka 9:35.

Vagwinehi

1 Yoh. 2:18, 19: “Valala va Kriste lavo tala va humelerile . . . Va sukile va hi siya, kambe a va nga ri va hina.”—Xiitaliki i xerhu.

Lava va kanetaka valandzeri va ntiyiso va Kreste

Yoh. 15:20, 21: “Loko va ndzi xanisile, na n’wina va ta mi xanisa . . . Kambe va ta endla hinkwaswo leswi eka n’wina hikwalaho ka mina.”

Vanhu ni matiko, lama kanetaka Kreste tanihi Hosi kumbe lava va hembaka va vula leswaku va endla xiphemu xa Mesiya

Ps. 2:2, NW: “Tihosi ta misava ta yima naswona valawuri lavakulu va hlengeletane kun’we va lwa na Yehovha ni mutotiwa wa yena [Kreste kumbe Mesiya].”

Nakambe vona Nhlavutelo 17:3, 12-14; 19:11-21.

Mt. 24:24: “Ku ta humelela Vamesiya va mavunwa, ni vaprofeta va mavunwa, va ta endla mahlori lamakulu ni swihlamariso, ku xisa hambi va ri vona vahlawuriwa.”

Armagedoni

Nhlamuselo: Rito ra Xigriki leri nge Har Ma·ge·donʹ, leri humaka eka Xiheveru, leri vahundzuluxeri vo tala va nge i “Armagedoni,” ri vula leswaku “Ntshava Ya Megido,” kumbe “Ntshava Ya Nhlengeletano Ya Mavuthu.” Vito leri, Bibele a yi ri hlanganisi ni ndzoviso wa nyutliya, kambe yi ri hlanganisa ni ku ta ka ‘nyimpi ya siku lerikulu ra Xikwembu xa Matimba Hinkwawo.’ (Nhlav. 16:14, 16) Vito leri ri tirhisiwa hi ku kongoma eka “ndhawu [hi Xigriki, toʹpon; hi leswaku, xiyimo kumbe matshamelo]” leyi valawuri va misava va tipolitiki va hlengeletiwaka kona ku lwa na Yehovha ni Mfumo wa yena hi Yesu Kreste. Nkaneto wo tano wu ta kombisiwa hi ku kanetiwa ka malandza ya Yehovha emisaveni hinkwayo, vayimeri lava vonakaka va Mfumo wa Xikwembu.

Xana Xikwembu xi ta va pfumelela vanhu leswaku va lovisa misava hi leswi van’wana va swi vitanaka “Armagedoni ya nyutliya”?

Ps. 96:10: “Yehova wa fuma. Na yona misav̌a [hi Xiheveru, te·velʹ; misava, i xirhendzevutana lexi noneke ni lexi akiweke, lexi ku tshamiwaka eka xona] yi tiyile, a yi ṭekaṭeki.”

Ps. 37:29: “La’v̌o lulama v̌a ta fuma misav̌a, v̌a ta ṭhama ka yona hi masiku.”

Nhlav. 11:18: “Vanhu va matiko a va tele ku hlundzuka, kambe siku ra vukari bya wena [Yehovha] ri fikile . . . [ra] ku herisa lava herisaka misava.”