Xana Xikwembu Xi Endla Swilo Hi Tindlela Leti “Gombonyokeke”?

XIVURISO XA LE BRAZIL XI RI: “DEUS ESCREVE CERTO POR LINHAS tortas” (“Xikwembu xi tsala hi ndlela leyi lulameke emintileni leyi gombonyokeke”). Xivuriso lexi xi vula leswaku minkarhi hinkwayo Xikwembu xi endla swilo leswi lulameke kambe hi ndlela leyi minkarhi yin’wana yi vonakaka yi nga lulamanga eka munhu. Hi xikombiso, loko munhu loyi a hanyeke kahle a fa, vanhu vo tala va ri, ‘Xikwembu xi n’wi vitanele etilweni.’ Loko munhu a lamala kumbe a weriwa hi khombo, vanhu van’wana va ri, ‘I ku rhandza ka Xikwembu.’ Leswi Xikwembu xi hehliwaka hi rifu, swiphiqo swa miri ni swilo swin’wana leswi vangaka nhlomulo, swihehlo swo tano swi ringanyeta leswaku Xikwembu xi ‘tsala hi ndlela leyi gombonyokeke,’ leswaku xi endla swilo hi ndlela leyi munhu a nga taka a nga yi twisisi.

Hikwalaho ka yini vanhu vo tala va vukhongeri va pfumela leswaku Xikwembu hi xona xi vangaka rifu ni maxangu? Hakanyingi tidyondzo leti ti sekeriwe eka matwisiselo lama hoxeke ya matsalwa yo karhi ya Bibele. Hi ku komisa a hi languteni ma nga ri mangani ya wona.

● “I mani l’a endlaka munhu e mbev̌ev̌e, kumbe lo’wo-fe-tindlev̌e, kumbe l’a v̌onaka, kumbe lowo fe-mahlo? Šana a hi mina Yehova?”—Eksoda 4:11.

Xana leswi swi vula leswaku vanhu hinkwavo lava xanisekaka hikwalaho ka ku lamala ko hambana-hambana va fanele va vona Xikwembu nandzu? E-e. Sweswo a swi fambelani nikatsongo ni vumunhu bya Xikwembu. Bibele yi hi byela leswi: “Ntumbuluko hinkwawo wa Xikwembu [i] wunene.” (1 Timotiya 4:4) A xi nge voniwi nandzu loko munhu a velekiwe a fe mahlo, a ri mbheveve kumbe a fe tindleve. Ntumbuluko wa xona xi wu navelela leswinene ntsena, hikuva xona i Xihlovo xa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.”—Yakobo 1:17.

Vatswari va hina vo sungula Adamu na Evha, hi vona lava hlawuleke ku xandzukela Xikwembu kutani va lahlekeriwa hi ku hetiseka ka vona, hikokwalaho va lahlekeriwe hi lunghelo ra ku va ni vana lava hetisekeke. (Genesa 3:1-6, 16, 19; Yobo 14:4) Leswi vana va vona va ngheneleke vukati kutani va va ni vana, ku sungule ku vonaka ku nga hetiseki loku engetelekeke eka vanhu, ku katsa ni ku tsana ka miri. Hambileswi Yehovha Xikwembu a nga swi vangangiki swilo leswi, u swi pfumelerile leswaku swi endleka. Hikwalaho a nga vula leswaku hi yena la ‘endlaka’ leswaku munhu a va mbheveve, a fa tindleve ni ku va bofu.

● “Le’ši hombolokeke ši nga ka ši nga ololoki.”—Eklesiasta 1:15.

Xana i Xikwembu lexi endleke swilo leswaku swi va leswi gombonyokeke? Handle ko kanakana a hi xona. Eklesiasta 7:29 yi ri: “Šikwembu ši endlile v̌anhu la’v̌a lulameke, kambe v̌ona v̌a lav̌ile mikhuv̌a yo tala.” Contemporary English Version yi veka ndzimana leyi hi ndlela leyi: “A hi tshembekile hilaha ku heleleke loko Xikwembu xi hi vumba, kambe sweswi hi ni mianakanyo leyi hombolokeke.” Ematshan’weni ya leswaku vavanuna ni vavasati va khomelela eka mimpimanyeto ya Xikwembu leyo lulama, hakanyingi va hlawule ku landzela makungu kumbe tindlela ta vona hi vomu—vuyelo byi va ku vaviseka ka vona.—1 Timotiya 2:14.

Nakambe, hilaha muapostola Pawulo a vuleke hakona, hikwalaho ka xidyoho xa vanhu, “ntumbuluko wu vekiwe ehansi ka vuhava.” (Varhoma 8:20) Kutani xiyimo lexi, a xi nge ‘ololoxiwi’ hi matshalatshala ya vanhu. Ku gombonyoka ni vuhava hinkwabyo bya timhaka ta misava leyi swi ta susiwa ntsena hi ku nghenelela ka Xikwembu.

● “Šiyisisa ntiro wa Šikwembu, hikuv̌a i mani l’a nga olološaka le’ši peṭiweke hi šona?”—Eklesiasta 7:13.

Hi marito man’wana, xivutiso xa Hosi Solomoni xi ri: ‘I mani exikarhi ka vanhu la nga ololoxaka ku tsana ni ku nga hetiseki loku Xikwembu xi ku pfumeleleke?’ A nga kona, hikuva Yehovha Xikwembu u ni xivangelo xa ku pfumelela swilo leswi leswaku swi humelela.

Hikokwalaho, Solomoni u ringanyeta leswi: “Hi siku ra ku kateka, ṭaka, kambe hi siku ra khombo anakanya. I Šikwembu le’ši endleke uṅwana ni uṅwana leŝaku munhu a nga ṭhuki a tiv̌a ntšhumu wa le’ŝi nga ta ṅwi humelela e nḍaku.” (Eklesiasta 7:14) Munhu u fanele a tlangela siku leri swilo swi fambaka kahle kutani a kombisa ku tlangela ka yena hi vunene. U fanele a teka siku lerinene tanihi nyiko leyi humaka eka Xikwembu. Kambe ku vuriwa yini loko siku ri tisa khombo? Munhu u endla kahle loko a “šiyisisa,” hileswaku a vona leswaku Xikwembu xi pfumelele khombo rero leswaku ri humelela. Ha yini xi endle tano? Solomoni u ri: “Leŝaku munhu a nga ṭhuki a tiv̌a ntšhumu wa le’ŝi nga ta ṅwi humelela e nḍaku.” Xana sweswo swi vula yini?

Ntiyiso wa leswaku Xikwembu xi hi pfumelela ku tsaka ni ku karhateka wu hi tsundzuxa leswaku a hi nge swi koti ku tiva leswi vumundzuku bya hina byi hi khomeleke swona. Khombo ri nga ha wela vo lulama ni vo homboloka. A ku na ku hambana. Leswi swi fanele swi hi endla hi xiya nkoka wa ku tshemba Xikwembu, hi nga titshembi hina vini, hi tsundzuka leswaku “Xikwembu i rirhandzu.” (1 Yohane 4:8) Hambiloko hi nga swi twisisi swilo swin’wana sweswi, hi nga tiyiseka leswaku loko swilo swi hetisekile hinkwaswo, leswi Xikwembu xi swi pfumeleleke swi ta va swi tirhe ntirho wa swona lowu nga ta vuyerisa hinkwavo lava khumbekaka.

Hinkwaswo leswi xi swi pfumeleleke a swi nge pfuki swi va vavise hilaha ku nga heriki vanhu va timbilu letinene. Muapostola Petro u veke mhaka leyi erivaleni loko a vulavula hi ku xaniseka loku weleke vapfumeri-kulobye hi nkarhi wakwe, a ku: “Loko se mi xaniseke nkarhinyana, Xikwembu xa musa hinkwawo lowu nga faneriwiki, lexi mi vitaneleke eku vangameni ka xona loku nga heriki leswaku mi va ni vun’we na Kreste, xona hi xoxe xi ta hetisa ku leteriwa ka n’wina, xi ta mi tiyisa, xi mi nyika ntamu.”—1 Petro 5:10.

Nkarhi Wa Ku Lulamisa Swilo

Yehovha u hi nyika matimba ya ku tiyiselela miringo leyi hi langutanaka na yona sweswi. Nakambe u tshembisa leswaku u ta endla “swilo hinkwaswo swi va leswintshwa.” (Nhlavutelo 21:5) Ina, i xikongomelo xakwe leswaku Mfumo wa le tilweni wu tlherisela rihanyo hi ku hatlisa eka lava va xanisekaka hikwalaho ka ku lamala, naswona wu ta kongomisa ku pfuxiwa ka vafi. Mfumo wolowo wu ta tlhela wu herisa loyi tindlela takwe ti gombonyokeke hakunene—ku nga Sathana Diyavulosi. (Yohane 5:28, 29; Varhoma 16:20; 1 Vakorinto 15:26; 2 Petro 3:13) Wu ta va nkateko wonghasi eka vanhu lava chavaka Xikwembu emisaveni hinkwayo loko ku fika nkarhi wa leswaku Xikwembu xi lulamisa swilo!

[Laha Xifaniso Xi Humaka Kona eka tluka 28]

Job Hearing of His Ruin/The Doré Bible Illustrations/Dover Publications