Swivutiso Swa Vahlayi

Hi ku ya hi Yobo 1:8, xana hi fanele hi vula leswaku enkarhini lowu Yobo a nga hanya hi wona, a a ri yena ntsena munhu loyi a a tshembekile eka Yehova?

Doo. Marito wolawo a ma tiyisiwi hi Yobo 1:8, leyi nge:

“Yehova a ku ka Sathana: A [w]u ṭunḍukanga Yobo, nanḍa wa mina šana? Hikuv̌a a ku na munhu l’a fanaka na yena misav̌eni, l’a fambaka hi ku lulama ni ku tenga, l’a tšhav̌aka Šikwembu ni ku fularela ŝo biha.” Xikwembu xi nyikele xiringanyeto lexi fanaka eka Yobo 2:3, loko xi vutisa Sathana xi ku: “Xana u ṭunḍukile Yobo nanḍa wa mina-ke? Hikuv̌a a ku na l’a fanaka na yena misav̌eni, l’a fambaka hi ku lulama ni ku tenga, la tšhav̌aka Šikwembu, l’a fularelaka ŝo biha?”

Buku ya Yobo hi yoxe yi komba leswaku Yobo a a nga ri yena ntsena munhu la hanyaka loyi Xikwembu xi n’wi amukeleke tanihi la tshembekaka. Ku sukela eka ndzima 32, hi hlaya hi ta Elihu. Hambi leswi a a ri muntshwa, Elihu u lulamise xihoxo xa langutelo ra Yobo naswona u tlakuse Xikwembu xa ntiyiso.—Yobo 32:6–33:6, 31-33; 35:1–36:2.

Xisweswo, nhlamuselo ya Xikwembu ya leswaku ‘a ku nga ri na munhu la fanaka na Yobo emisaveni’ yi fanele yi vula leswaku Yobo a a xiyeka ngopfu tanihi munhu la lulameke. Kumbexana Yobo u hanye enkarhini wa le xikarhi ka rifu ra Yosefa le Egipta ni le ku sunguleni ka ntirho wa Muxe tanihi muprofeta wa Xikwembu. Enkarhini wolowo vunyingi bya Vaisrayele byi tshame aEgipta. Ku hava xivangelo xo anakanya leswaku hinkwavo ka vona a va nga tshembekanga naswona a va nga amukeleki eka Xikwembu; swi vonaka onge a va tele lava a va tshemba Yehova. (Eksoda 2:1-10; Vaheveru 11:23) Kambe, ku hava na un’we wa vona la nga va ni ndhuma, ku fana na Yosefa, naswona vagandzeri volavo a va nga hlawulekanga mayelana ni vugandzeri bya ntiyiso, ku fana na Muxe loko a rhangela tiko ra Israyele ri huma aEgipta.

Kambe, a ku ri ni munhu loyi a a ri ni vutshembeki lebyi xiyekaka, la tshamaka kun’wana. “Munhu a a ri kona e tikweni ra Uts, v̌ito ra yena a ri Yobo. A a ri munhu l’a fambaka hi ku tenga ni ku lulama; a tšhav̌a Šikwembu, a tinga ŝo biha.”—Yobo 1:1.

Xisweswo Yehova u vulavule hi Yobo tanihi xikombiso lexinene kumbe lexi xiyekaka xa ripfumelo ni ku tinyiketela. Hi laha ku fanaka, vatsari va Bibele, Ezekiyele na Yakobo va hlawule Yobo tanihi la boxaka ntila wa ku lulama ni ku tiyisela.—Ezekiel 14:14; Yakobo 5:11.

Nhlangano Wa Lembe Na Lembe—October 3, 1992

NHLANGANO WA LEMBE NA LEMBE wa swirho swa Watch Tower Bible and Tract Society of Pennsylvania wu ta tameriwa hi October 3, 1992, eHolweni ya Nhlengeletano ya Timbhoni ta Yehova, 2932 Kennedy Boulevard, Jersey City, New Jersey. Nhlangano wo sungula wa swirho ntsena wu ta khomiwa hi 9:30 a.m., wu landziwa hi nhlangano wa mani na mani wa lembe na lembe hi 10:00 a.m.

Swirho swa Vandla leri swi fanele ku tivisa Hofisi ya Matsalana sweswi hi ku cinca kwihi na kwihi ka tiadirese ta swona ta poso loku endlekeke n’wexemu leswaku mapapila ya ntolovelo ya xitiviso ni maphepha ya nhlangano swi ta fika eka vona endzhakunyana ka August 1.

Maphepha ya nhlangano, lama nga ta rhumeriwa eka swirho swa wona kun’we ni xitiviso xa nhlangano wa lembe na lembe, swi fanele ku tlhela swi rhumeriwa leswaku swi fika eHofisini ya Matsalana wa Sosayiti ku nga si hundza August 15. Xirho xin’wana ni xin’wana xi fanele ku tata ni ku tlhela xi rhumela phepha ra xona ra nhlangano hi xihatla, xi vula loko xi ta va kona hi xoxe enhlanganweni kumbe loko xi nga ta va kona. Rungula leri nyikeriweke eka phepha rin’wana ni rin’wana ra nhlangano ri fanele ku va leri tiyeke emhakeni leyi, tanihi leswi hi nga ta tiseketela ha rona ku kumisisa lava kahle-kahle va nga ta va kona hi xiviri.

Ku rindzeriwa leswaku nongonoko hinkwawo, ku katsa ni nhlangano lowu endliwaka ximfumo wa bindzu ni swiviko, swi hetiwa hi 1:00 p.m. kumbe endzhakunyana ka kwalaho. A ku nge vi na nongonoko wa ni ndzhenga. Hikwalaho ka leswi ndhawu yi nga yitsongo, ku ta ngheniwa hi thikithi ntsena. Ku hava malunghiselelo lama nga ta endliwa yo yisa nhlangano wa lembe na lembe eswivandleni swin’wana hi tiqingho.