Xiviko Xa Vahuweleri Va Mfumo
Hangalasiwa Ka Mahungu Ya Mfumo eNamibia
MAHUNGU lamanene ya Mfumo wa Xikwembu ma fike eNamibia ro sungula eku heleni ka va-1920. Ku sukela hi nkarhi wolowo, madzana ya vanhu va timbilu letinene ma amukele rungula ra Xikwembu ra ku pona. Mintokoto leyi landzelaka yi kombisa ndlela leyi Yehovha a hlengeletaka vanhu lava navelekaka etshangeni ra yena.—Hagayi 2:7.
◻ Paulus murimi la tshamaka en’walungu-vuxa bya Namibia u hlangane ni Timbhoni ta Yehovha ro sungula loko a endzele edoroba-nkulu ra Windhoek. Paulus hi xihatla u swi khorwile leswaku a kume ntiyiso. U tlhelele ekaya ni buku leyi nge U Nga Hanya Hi Masiku aParadeyisini eMisaveni. Kutani loko Paulus a ya edorobeni ra le kusuhi ra Rundu, laha ku nga ni Holo ya Mfumo, u kume Timbhoni ivi a ti kombela leswaku ti n’wi endzela.
Hambiswiritano, mpfuka a wu ri wukulu eka Timbhoni lerova ti ta dyondza Bibele na Paulus vhiki na vhiki. Handle ko hela matimba, Paulus u sungule ku dyondza Bibele a ri swakwe. Ku tlula kwalaho, hi nkhinkhi u chumayele van’wana hi swilo leswi a a swi dyondza. Hi ku famba ka nkarhi ntlawa wa dyondzo ya Bibele wu sunguriwile. Loko ntlawa lowu wu twe eka xiya-ni-moya leswaku nhlengeletano ya Timbhoni ta Yehovha yi ta khomeriwa eRundu, wu tikhwajile leswaku wu hlanganisa swimalana swo kuma xofamba ha xona enhlengeletanweni.
Mayana ntsako lowu va veke na wona loko va hlangane ni Timbhoni ta Yehovha ro sungula! Hi ku hatlisa malunghiselelo ma endliwile leswaku vamakwerhu lava fanelekaka va endzela ntlawa lowu nkarhi na nkarhi. Namuntlha ku ni vahuweleri va tsevu eximutanini lexi Paulus a tshamaka eka xona.
◻ Johanna u sungule ku tsakela vito ra Xikwembu loko a twe un’wana a vulavula ku biha hi Timbhoni ta Yehovha. U ri: “Loko ndzi twa vito ra Yehovha ro sungula, ri sungule ku dzika emianakanyweni ya mina ivi ndzi sungula ku tivutisa leswaku Yehovha i mani. A ndzi tshama ni nuna wa mina ekusuhi ni le Walvis Bay eribuweni ra Namibia. Siku rin’wana loko hi ye edorobeni ndzi vone Timbhoni ti ri karhi ti fambisa timagazini ta Xihondzo xo Rindza exitarateni. Ndzi teke magazini wun’we kutani ndzi kombela leswaku va dyondza na mina Bibele tanihi leswi a ndzi ri ni swivutiso swo tala. Ndzi ririle loko va ndzi byela leswaku a va nge swi koti ku ta hikuva movha wa vona wu onhakile. Endzhaku ka sweswo, nuna wa mina u file, hiloko ndzi rhurhela eKeetmanshoop. Phayona ro hlawuleka (muvuri wa evhangeli wa nkarhi hinkwawo) a ri averiwe ku tirha kwalaho, kutani ndzi kume buku leyi nge Ntiyiso Lowu Yisaka eVuton’wini Lebyi Nga Heriki eka rona. Ku sukela kwalaho ndzi sungule ku swi xiya leswaku ndzi kume ntiyiso.
“Hi ku famba ka nkarhi, ndzi rhambiwe ku hlanganyela entirhweni wo chumayela, kambe a ndzi karhatiwa hi ku chava vanhu. Loko hi ri karhi hi famba hi yindlu ni yindlu, ndzi khongele eka Yehovha leswaku a ndzi tshika ndzi fa ku ri ni ku va ndzi endla ntirho wo chumayela. Loko ndzi sungula ku nyikela vumbhoni exitarateni ro sungula ndzi tikhonete exiphacisanini, ndzi anakanya leswaku a nga kona la nga ta ndzi vona. Eku heteleleni ndzi kume matimba yo komba vahundzi va ndlela magazini kutani ku sukela kwalaho ndzi ve ni xivindzi xo kota ku vulavurisana ni vanhu. Hi mpfuno wa Yehovha, siku rero ndzi kote ku vulavula ni vanhu vo tala hi ntshembo wa mina lowu sekeriweke eBibeleni.
“Sweswi, endzhaku ka malembe ya 12, hambileswi ndzi nga xisiwana hi tlhelo ra swilo leswi vonakaka, ndza ha tlangela lunghelo ra ntirho wa vuphayona naswona ndzi hambeta ndzi kuma ntsako lowu nga ringanisiwiki hi ku vulavula ni van’wana hi ntiyiso wa Mfumo.”