Leswi Hi Nga Swi Dyondzaka Eka Mutluti

KU TLUTA u ri wexe elwandle ro anama swi nga karharisa. Matshimbi ma nga peta mutluti ekhombyeni, lerova a endla swihoxo ni swiboho leswi nga riki swa vutlhari. Hikwalaho, u twisisa ntirho wa nsoma ya xikepe. Yi nyika mutluti la karhaleke nkarhi wo wisa a kuma matimba, ematshan’weni ya ku ya emahlweni a tluta a langutane ni khombo. Hi nkarhi lowu fanaka, nsoma yi endla leswaku xikepe xi langutana ni mheho ni magandlati xi tlhela xi tshamiseka kahle.

Leswi vatluti va langutanaka ni makhombo yo tala elwandle, ni Vakreste va tshama va langutane ni mintshikilelo ya misava leyi naswona va vona xilaveko xa ku humula. Kahle-kahle, Yesu u tshama a kombela vadyondzisiwa vakwe a ku: “Tanani, mi ri swenu hi ya enhoveni, mi wisanyana.” (Marka 6:31) Namuntlha, van’wana va nga teka mavhiki ma nga ri mangani kumbe mahelo-vhiki va ya tiwisela ni mindyangu ya vona ekule. Sweswo swi nga va phyuphyisa ni ku va nyika matimba. Kambe, xana hi nga tiyiseka njhani leswaku hi tshama hi hlayisekile hi tlhelo ra moya eminkarhini yoleyo? I yini lexi nga vaka nsoma ya hina ya moya, lexi nga hi pfunaka leswaku hi nga hambuki endleleni kambe hi yima hi tiyile?

Hi musa Yehovha u hi lunghiselele nchumu wo karhi. Nchumu wa kona i Rito rakwe ro Kwetsima, ku nga Bibele. Loko hi ri hlaya siku ni siku, hi ta tshama hi ri ni vuxaka lebyinene na Yehovha, naswona a hi nge hambuki. Ndzayo ya rona yi nga hi tiyisa, yi hi pfuna ku lwisana ni miringo ya Sathana ni misava yakwe. Ku namarhela xiyimiso xa ku hlaya Bibele nkarhi ni nkarhi, hambiloko swi nga hi oloveli, swi nga hi tiyisa emoyeni.—Yoxuwa 1:7, 8; Vakolosa 2:7.

Mupisalema u hi tsundzuxa leswaku “wa tsaka munhu” loyi a “[tsakelaka] nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi.” (Pisalema 1:1, 2) Ku hlaya Rito ra Xikwembu siku ni siku swi ta hi nyika vuyelo lebyi ‘tsakisaka’ lebyi nga ta hi phyuphyisa hakunene ni ku hi nyika matimba, hi lunghekela ku hambeta hi famba endleni ya hina ya Vukreste.

Xana U Nga Ri Amukela Riendzo?

Hambi ku ri emisaveni leyi yi nga ni maxangu, u nga wu kuma ntsako hi ku va ni vutivi lebyi kongomeke bya Bibele mayelana ni Xikwembu, Mfumo wa xona ni xikongomelo xa xona lexi hlamarisaka hi vanhu. Loko u lava ku kuma rungula leri engetelekeke, kumbe u swi tsakela leswaku un’wana a ku endzela ekaya a ta dyondza Bibele na wena mahala, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti xaxametiweke eka tluka 2.