Yehova U Humesa Banga Rakwe!

“Kutani nyama hikwayo yi ta ŝi tiv̌a leŝaku mina Yehova nḍi hlomule ripanga ra mina e nkotlotweni.”—EZEKIEL 21:10.

1. Yehova a a ri ndzulutela vamani banga ra yena eYuda ni le Israyele?

BANGA ra Yehova hi laha ku fanelaka ri tisa ku chava eka valala va yena. Kambe loko a ri tirhisile hi laha ku humelelaka ku hlasela vadyohi emfun’weni wa Yuda ni wa Israyele, xana va swi tivile leswaku i yini lexi a xi humelela hakunene? Ina, va endliwe va tiva leswaku Yehova u hlomule banga ra yena ro fanekisela enkotlotweni wa rona.—Ezra 9:6-9; Nehemia 1:8; 9:26-30.

2. Yehova u vule yini mayelana ni “ripanga” ra yena, swi tlakusa swivutiso swihi ke?

² Hi ku tirhisa muprofeta ni mulanguteri wa xona Ezekiyele, Xikwembu xi te: “Kutani nyama hikwayo yi ta ŝi tiv̌a leŝaku mina Yehova nḍi hlomule ripanga ra mina e nkotlotweni.” (Ezekiel 21:10) Xana marito wolawo a ma tirha ntsena eminkarhini ya khale? Kumbe ma vula swo karhi eka hina?

Ku Vhumba Ku Avanyisiwa Ka Yerusalema

3. I yini lexi Ezekiyele a xi byeleke mahlonga eBabilona, naswona leswi swi na ku yelana kwihi ka manguva lawa?

³ Golonyi ya Yehova yi fambile nakambe, naswona ndhawu ya Ezekiyele yi cincile. A swi vonaka onge hi loko nhlengeletano ya le tilweni ya Xikwembu leyi fanaka ni golonyi yi ye enhlohlorhini yo languta u ri eka yona ehenhla ka Ntshava ya Mitlhwari. Hi laha Yesu a vhumbeke ku lovisiwa loku teke ehenhla ka Yerusalema a ri kona hi 70 C.E., ndzoviso lowu profetaka makumu ya Vujagana. (Marka 13:1-20) Exivonweni, Ezekiyele u tekiwe enambyeni wa Kebar, kambe hi moya wa Xikwembu sweswi a a tlheriseriwe endlwini yakwe ya vuhlonga eBabilona. Kwalaho u byele mahlonga man’wana ‘hinkwaswo leswi Yehova a n’wi kombiseke swona.’ Hi ku fanana, “mulanguteri” la totiweke wa Xikwembu ni timbhoni leti hlanganyelaka na yena namuntlha hinkwavo va twarisa leswi swi paluxiweke eka vona hi Mukhandziyi wa golonyi ya le tilweni.—Ezekiel 11:22-25.

4. Xana mahlonga ya Vayuda ya swi tekise ku yini swiendlo swo fanekisela swa Ezekiyele?

⁴ Hi swiendlo swo fanekisela, Ezekiyele u kombise mahlonga ya Vayuda leswaku khombo ra tiko a ri tshinela. (Hlaya Ezekiel 12:1-7.) Muprofeta u rhwale “nhunḍu ya ku rura” ku kombisa swilo swi nga ri swingani leswi mahlonga a ma ta kota ku swi rhwala emakatleni ya wona. Ku chava hi xihatla a ku ta funengeta Yerusalema la rhendzeriweke. Hambi leswi vo tala va nga swi tekelangiki nhlokweni switsundzuxo swo tano, Ezekiyele a a fanele ku byela vanhu a ku: “Ŝi ta hatla ku humelela.” Namuntlha na kona ku ni ku honisiwa ka switsundzuxo ni vuprofeta bya Xikwembu, kambe hi nga endla swo tala ku pfuna valavi va ntiyiso ku veka ntshembo eku hetisekeni ka swona.—Ezekiel 12:8-28.

5. Tanihi leswi “siku ra Yehova” a ri ri ekusuhi, i switiviso swihi leswi a swi fanela?

⁵ Lava va nga n’wi yingisiki mulanguteri wa Yehova a va fanele ku tiva leswaku a va ta kongomana ni “ripanga” ra Xikwembu. Kutani, lava va nga ni vutihlamuleri bya swidoledole mayelana ni ku hlayiseka ka Yerusalema na Yuda va soriwile. Vaprofeta va mavunwa a va fanisiwa ni vahlati lava onhaka, naswona swi kombisiwile leswaku vaxisi a va penda makhumbi lama mbundzumukaka ya va yo basa, kumbe miako ya hava, ya vanhu. Vaprofeta va xisati va mavunwa na vona va soriwile. “Siku ra Yehova” a ri ri kusuhi, naswona xikandza xa yena a xi fularhela lava ‘va n’wi sukelaka,’ hi leswaku, ‘va tinyikela ekule ni ku landzela Xikwembu.’ Loko hi tinyikele eka Yehova, entiyisweni a hi nge swi lavi ku sukela ntirho wa yena wo hlawuleka.—Ezekiel 13:1–14:11.

6. Xana a a ri kona munhu loyi a a ta swi kota ku ponisa vanhu va Yuda lava hambukaka, naswona leswi swi hi dyondzisa yini ke?

⁶ I mani loyi a a ta ponisa vanhu va Yuda lava hambukaka? Hambi ku ri Nowa, Daniyele na Yobo vo lulama a va nga ta swi kota ku va kutsula loko Xikwembu xi tisa ku avanyisa ka xona ehenhla ka tiko. Kutani ke, loko hi ta tokota ku pona, hi fanele ku rhwala vutihlamuleri bya hina vini emahlweni ka Xikwembu naswona hi endla ku rhandza ka xona.—Ezekiel 14:12-23; Varhoma 14:12.

7. Yuda u fanisiwe na yini, hambi swi ri tano, i yini lexi Xikwembu a xi ta xi simeka eka lava tshembekaka?

⁷ Hikwalaho ka vaaki va wona lava nga tshembekiki, Yuda u fanisiwe ni vhinyo ya le nhoveni leyi nga hava mihandzu leyinene naswona leyi faneriweke hi ndzilo. (Ezekiel 15:1-8) Nakambe wu fanisiwe ni n’wana la lahliweke hi vatswari la ponisiweke hi Xikwembu aEgipta naswona a n’wi wundla a kondza a va wansati. Yehova u n’wi teke tanihi nsati wa yena, kambe u hundzukele eka swikwembu swa mavunwa kutani a a ta tokota ndzoviso wa vuoswi bya yena bya moya. Hambi swi ri tano, Xikwembu a xi ta ‘endla ntwanano lowu nga heriki’—ntwanano lowuntshwa na Israyele wa moya ni lava tshembekaka.—Ezekiel 16:1-63; Yeremia 31:31-34; Vagalatiya 6:16.

8. (a) Babilona na Egipta va fanisiwe na yini xana? (b) Xana ku tlula ka Sedekiyasi ku hlambanya ka yena ku fanele ku hi khumbisa ku yini xana?

⁸ Endzhakunyana, vafumi va Babilona na Egipta va fanisiwe ni magama lamakulu. Rin’wana ri tshove makumu ya murhi wa kedar hi ku susa Hosi Yoyakin kutani ri n’wi pfala hi Sedekiyasi. Hambi leswi Sedekiyasi a endleke ku hlambanya ko tshembeka eka Nebukadnetsar, u ku tlurile, hi ku lava mpfuno wa masocha ya mufumi wa Egipta, gama leri rin’wana lerikulu. Loko Sedekiyasi a vitane vito ra Xikwembu eku hlambanyeni ka yena, ku ku tshova ka yena ku tise ndzhukano eka Yehova. Mianakanyo leyi ya ku tisa ndzhukano eka Xikwembu yi fanele ku hi sivela ku endla rito ra hina ri va vunwa. Hakunene i lunghelo eka hina ku byarha vito ra Xikwembu tanihi Timbhoni ta Yehova!—Ezekiel 17:1-21.

9, 10. (a) Hi byihi vuprofeta lebyi rhekhodiweke eka Ezekiel 17:22-24, kambe i yini leswi faneleke ku endliwa loko hi ta vuyeriwa eku hetisekeni ka byona? (b) I mani la nga ni vutihlamuleri hi mimbuyelo ya mahanyelo ya hina?

⁹ Vuprofeta lebyi tsakisaka bya Vumesiya bya landzela. (Hlaya Ezekiel 17:22-24.) Laha, “šihluke” i Hosi ya Vumesiya, Yesu Kriste. Hi ku tlhomiwa hi Yehova eNtshaveni ya Siyoni ya le tilweni, a a ta va “Kedar lo’wukulu,” xihlovo xa nsirhelelo ni nkateko loko a ri karhi a fuma ehenhla ka misava. (Nhlavutelo 14:1) Eka leswi hi nga kuma xikhutazo hakunene.

¹⁰ Hambi swi ri tano, loko hi ta vuyeriwa eku hetisekeni ka vuprofeta bya Vumesiya, hi fanele ku hlayisa vuxaka lebyinene na Yehova. Mahlonga-kulobye ya Ezekiyele kahle-kahle a ma ehleketa leswaku ma ni xiyimo lexinene ni Xikwembu ivi va sola vakokwa wa vona hi ku xaniseka ka vona. Kambe muprofeta u kombisile leswaku munhu un’wana ni un’wana a a ri ni vutihlamuleri hi mimbuyelo ya mahanyelo ya yena n’wini. (Ezekiel 18:1-29; ringanisa Yeremia 31:28-30.) Ku landzele xikombelo. (Hlaya Ezekiel 18:30-32.) Ina, Yehova u ni ntwelo-vusiwana eka lava va tisolaka naswona a nga tsakeli rifu ra munhu wihi na wihi. Hikwalaho, Xikwembu xi ri: ‘N’wina vanhu, hundzukani ha kona, mi ta hanya.’—Ringanisa 2 Petro 3:9.

11. Xana vafumi va Yuda va fanisiwa na yini, naswona a ku ta humelela yini eka yena loko a biwa hi “ripanga” ra Yehova?

¹¹ Enhlomulweni wa ku wa ka Yuda, vafumi va yena va fanisiwe ni swinghalana. Hosi Yoakaz u fe evuhlongeni bya Egipta, Yoyakim u hluriwe hi Nebukadnetsar, kutani Yoyakin a khotsiwa eBabilona. Endzhakunyana Nebukadnetsar u veke Sedekiyasi exiluvelweni xa Yuda, kambe u xandzukile. Eku heteleleni, ku fana ni nghala leyi pfaleriweke, Sedekiyasi u rhwariwe tanihi hlonga a yisiwa eBabilona. Ku fambisana ni nhlomulo wa vuprofeta, hi 607 B.C.E., Yuda ri ve vhinya leyi onhiweke, “yi nga ha ri na marav̌i lamanene lama ringanaka nhonga ya v̌uhosi.” U biwe hi “ripanga” ra Yehova!—Ezekiel 19:1-14; Yeremia 39:1-7.

12. (a) Ku fana ni vakokwa wa vona, tintangha ta Ezekiyele ti hlanganyele eka xidyoho xihi? (b) Ha yini vanhu va vutisile loko Ezekiyele a a nga vulavuli hi swifaniso, naswona leswi swi hi nyika xitsundzuxo xihi?

¹² Loko a tshineleriwa hi “v̌akulukumba v̌aṅwana v̌a Israel,” Ezekiyele u vule rungula ra Xikwembu. U kombise leswaku hambi loko Yehova a ntshunxe Vaisrayele aEgipta ivi a va nyika Nawu wa Yena, va wu arile ivi va gandzela swifaniso. Tanihi leswi tintangha ta Ezekiyele a ti ri ni nandzu wa xidyoho lexi fanaka, Xikwembu hi xoxe a xi ta va avanyisa. Kahle-kahle hi ku kanakana naswona ku nga ri hi leswi a va nga swi twisisi leswi Ezekiyele a a swi vula, vanhu va vutisile va ku: “A nga v̌ulav̌uli ha ŝifaniso šana”? Ku nga ri khale a va ta swi vona leswaku kahle-kahle a ku ri hava lexi xi nga xifaniso mayelana ni rungula ra vuprofeta. Leswi swi fanele ku hi tsundzuxa leswaku hi nga tshuki hi va ni xiyimo xo kanakana ehenhleni ka ku hetiseka ka switsundzuxo swa Matsalwa.—Ezekiel 20:1–21:5.

Yehova Loyi A Nga Nhenha

13. “Ripanga” ra Xikwembu ri vula yini, naswona “nyama hikwayo” a yi ta endliwa leswaku yi tiva yini loko banga rero ri ndzulutiwa?

¹³ Elembeni ra vunkombo ra vunhlonga (hi Ab 10, 611 B.C.E.), a ku sale nkarhi lowu nga ehansi ka malembe mambirhi ni hafu leswaku ‘nyimpi ya siku ra Yehova’ yi sungula ku hlasela Yuda na Yerusalema. (Ezekiel 13:5; 20:1) Manuku xiya leswi Yehova loyi a nga Nhenha a swi vuleke hi ku tirhisa Ezekiyele. (Hlaya Ezekiel 21:6-10.) “Ripanga” ra Xikwembu ri kombisa xitirho xa la misaveni lexi xi nga ta xi tirhisa, kambe xi nga katsa ni nhlengeletano ya yena ya le matilweni, leyi fanaka ni golonyi. Vaaki “la’v̌o lulama” ni “la’v̌o biha” va Yuda na Israyele, kun’we ni matiko lama vengaka vanhu va Xikwembu, a va ta wa hi makumu ya “ripanga” ra Xikwembu. Hakunene, “nyama hikwayo” a yi ta tivisiwa leswaku Yehova a a lwa na yona.

14. (a) Ku fana na Ezekiyele, timbhoni ta Yehova leti totiweke ti kokela nyingiso eka yini? (b) I yini lexi kombisaka leswaku vafumi va Vujagana va nga ka va nga ri balekeli “ripanga” ra Xikwembu?

¹⁴ Ku fana na Ezekiyele, timbhoni leti totiweke ta Yehova namuntlha ti kokela nyingiso eka “ripanga” leri Xikwembu xi nga ta ri ndzuluta ehenhleni ka valandzeri va Vujagana, lava xivandla xa vona ku nga ‘tiko ro fanekisela ra Israyele.’ Ku nga ri khale “ripanga” rero ri ta tokotiwa hi “nyama hikwayo, e ku suka eḍongeni e ku fika e ṅwalungwini,” hi hinkwavo lava tirhisaka vukhongeri byo hemba. Lava titshembaka va siku ra Ezekiyele a va nga ri na xivangelo xo tsaka, va endla makumu ya leswaku “ripanga” ra Yehova a ri nge ‘va dlayi.’ “Ripanga” rero ri herise nhonga ya vuhosi ya mfumo wa Yuda, hi laha ri heriseke ha kona “muri” wun’wana ni wun’wana, kumbe nhonga ya vuhosi. Kutani ke, handle ko kanakana, vafumi va Vujagana a va nge siyiwi hi xitirho xa Xikwembu xa ku herisa.—Ezekiel 21:11-22.

15. I xiendlakalo xihi lexi katsaka Nebukadnetsar lexi kombisaka leswaku a nga kona la nga ta hambukisa “ripanga” ra Yehova?

¹⁵ Vuprofeta bya Ezekiyele byi ya emahlweni byi kombisa leswaku a nga kona la nga hambukisaka “ripanga” ra Yehova, ku katsa ni mademona. (Hlaya Ezekiel 21:23-27.) Hambi leswi Hosi Nebukadnetsar a a ta tirhisa ku vhumba ka vudemona, Yehova a a ta endla swi koteka leswaku mufumi wa Babilona a macha hi le Yerusalema, hayi hi le ntsindza wa Vaamoni lava tsaneke wa Raba. Exibyeni Nebukadnetsar a a ta hlawula nseve lowu fungheriweke Yerusalema. A a ta tirhisa teraphim (kumbexana, swifaniso leswintsongo swa xivumbeko xa munhu) naswona a a ta lava swikombiso exivindzini xa xiharhi lexi dlayiweke. Hambi swi ri tano, ku nga khathariseki ku vhumba, a a ta khoma ndlela leyi yaka entsindza wa Yuda kutani a wu rhendzela. I ntiyiso, Nebukadnetsar u endle ntwanano na Hosi Sedekiyasi. Kambe hikwalaho ka ku tlula ka vona ku hlambanya, Sedekiyasi ni Vayuda van’wana a va ta “khomiwa hi v̌oko ra yena” ivi va yisiwa va ri mahlonga eBabilona.—Ezekiel 21:28, 29.

16. (a) I yini lexi humeleleke eku hetisekeni ka Ezekiel 21:30-32? (b) Minkarhi ya Vamatiko yi sungule rini, naswona yi hele hi xiendlakalo xihi?

¹⁶ Hi ku xandzuka, Sedekiyasi u tivavisile hi ndlela leyi nga ni khombo. (Hlaya Ezekiel 21:30-32.) Loko hosi ya Yuda yi susiwa exiluvelweni, nguvu ya vuhosi ya le nhlokweni ni harhi ya vuhosi swi susiwile. (2 Tihosi 25:1-7) Mfumo wa le “henhla” wa Yuda wu ‘yisiwe ehansi’ hi ku herisiwa ka wona hi 607 B.C.E. Xisweswo mimfumo ya le “hansi” ya Vamatiko yi ‘vekiwe ehenhla,’ yi tshikiwa yi lawula misava yi nga kavanyetiwi hi mfumo wa xiviri wa Xikwembu. (Deuteronoma 28:13, 15, 36, 43, 44) Kutani ku sungule ‘minkarhi leyi vekiweke ya vamatiko’—Minkarhi ya Vamatiko—leyi heleke hi 1914 loko Xikwembu xi veka vuhosi ehenhla ka Yesu Kriste, ‘loyi a nga ni mfanelo ya le nawini’ ya byona. (Luka 21:20-24; Psalma 110:1, 2; Daniel 4:15-28; 7:13, 14) Loko Yesu a ri exiluvelweni xa le tilweni, Vamatiko a va nge swi kandziyeli leswi fanekiseriweke hi Yerusalema wa khale, Mfumo wa mudyandzhaka wa le nawini wa Davhida.—Vaheveru 12:22.

17. Hi byihi “vunwa” lebyi a byi ri karhi byi twarisiwa hi vaprofeta va Vaamoni?

¹⁷ Vaprofeta va Vaamoni a va vula leswaku ntsindza wa Amoni, Raba, a wu ta pona ku lovisiwa hi banga ra Nebukadnetsar. Kambe leswi a ku ri “vunwa,” hikuva tiko hinkwaro ra Amon a ri ta herisiwa. Esikwini ra hina, Xikwembu xi vurile leswaku ku lovisiwa ka matiko ku ta landzela lokuya ka Vujagana, tanihi leswi Raba ri lovisiweke endzhaku ka Yerusalema.—Ezekiel 21:33-37; Nhlavutelo 16:14-16.

Yerusalema Wu Tengisiwa

18. Ezekiyele u avanyise Yerusalema hikwalaho ka swidyoho swihi, naswona hi fanele ku endlisa ku yini eka leswi?

¹⁸ Nakambe loko a vula rito ra Yehova, Ezekiyele u avanyise Yerusalema hi swidyoho swo tanihi ku halata ngati, ku gandzela swifaniso, ku tikhoma loko biha, vunwa ni ku rivala Xikwembu. Varhangeri va vona lava nga ni nandzu wa ngati va tirhise matimba hi ndlela yo biha ku fikela laha va lerisaka ku dlaya, kutani vahehli va tiponise eka valala hi ku va hehla hi vunwa. Hikwalaho ka swidyoho swo tano, vaaki va Yerusalema a va ta hangalasiwa. Ku tiva leswi swi fanele ku tiyisa xiyimo xa hina xo papalata ku tirhisa matimba hi ndlela yo biha, ku tikhoma loko biha, ku hehla ni swidyoho swin’wana leswikulu.—Ezekiel 22:1-16.

19. Vanhu va Yuda a va ta n’okisiwa hi ndlela yihi, naswona ha yini ku herisiwa ka vona ku tiyisiwile?

¹⁹ Nakambe Yehova a a ta n’okisa vanhu va Yuda endzilweni. Leswi a ku nga ri ku va basisa e endlelweni ro basisa kambe ku va n’okisa hi vukarhi bya yena lebyi pfurhaka. (Ezekiel 22:17-22) Ku avanyisa loku a ku va fanerile vaprofeta lava va xandzukaka, vaprista vo homboloka, tihosana ta makwanga ni vanhu vo pfumala vululami. Hinkwavo va avanyisiwile. Tanihi leswi ku nga hava ni un’we exikarhi ka vona la yimeleke ku lulama, Xikwembu xi ta va herisa hi ndzilo wa vukarhi bya xona.—Ezekiel 22:23-31.

Nxupulo Lowu Faneleke

20. Vukarhi bya Xikwembu a byi ta chuluriwa ehenhla ka vavasati vahi vo fanekisela, naswona i vuxokoxoko byihi lebyi u nga byi nyikelaka malunghana ni nhlamuselo ya vona?

²⁰ Ku chuluriwa ka vukarhi bya Xikwembu endzhakunyana ku fanisiwe tanihi ku avanyisa loku vekiweke ehenhla ka vavasati vambirhi vo fanekisela lava nga ni nandzu wa vuoswi bya moya. Un’wana a a ri Ohola, tinxaka ta khume ta mfumo wa Israyele na Samariya tanihi ntsindza wa yena. A a ri “lonkulu” hikwalaho ka ku vumbiwa hi tinxaka to hlayanyana ta Israyele, ku katsa ni leti ti humaka eka majaha lamakulu ya Yakobo, Rubeni na Simiyoni. Makwavo wa yena wa xisati a a ri Oholiba, tinxaka timbirhi ta Yuda na Yerusalema tanihi ntsindza wa yena. Ohola swi vula “Tende Ra Yena.” Oholiba swi vula ku “Tende Ra Mina Ri Le Ka Yena,” leswi fanelaka tanihi leswi tende ra Xikwembu, kumbe tempele, a ri ri eYuda.—Ezekiel 23:1-4.

21. Ohola u wu lave kwihi nsirhelelo, leswi swi hi nyika xitsundzuxo xihi?

²¹ Ohola (Israyele) u tshikile ku va kona loko a hluriwile hi Vaasiriya hi 740 B.C.E. A a endle yini xana? (Hlaya Ezekiel 23:5-7.) Hi ku pfumala ripfumelo Ohola u lave nsirhelelo eka swirho swa politiki, kambe leswi swi n’wi vangele ku amukela vugandzeri bya mavunwa bya vanghana va yena, lerova ‘a tinyamisa hi swifaniso swa vona leswi thyakeke.’ Hi ku amukela xitsundzuxo eka vuoswi bya Ohola bya moya, hi fanele ku tivonela eka vuxaka bya misava lebyi nga dlayaka ripfumelo ra hina.—Yakobo 4:4; 1 Yohane 2:15-17.

22. Ku fana na Ohola na Oholiba, i yini lexi Vujagana byi xi endlaka, kambe ku ta humelela yini eka byona xana?

²² Hi ku phikelela ndlela ya vudyoho swinene ku tlula makwavo, Oholiba (Yuda) u tokote khombo ra tiko emavokweni ya Vababilona hi 607 B.C.E. Vana va yena va we hi banga kumbe va byisiwa va ya va mahlonga, naswona u khomisiwe tingana exikarhi ka matiko. Ku fana na Ohola na Oholiba, Vujagana byi endla vuoswi bya moya, xidyoho etlhelweni ra Xikwembu lexi byi vulaka leswaku bya xi gandzela. Vuprotestente, ni mintlawa ya byona yo tala, byi tithyakisile swinene hi mimfumo ya bindzu ni ya politiki ya misava ku tlula makwavo lonkulu, Vukhatoliki bya Rhoma. Xisweswo, Yehova u ta vona leswaku Vujagana bya herisiwa. Kutani vanhu va ta swi tiva leswaku i Yehova Hosi Leyikulu. Swi ta tiyisa ku tiyimisela ka hina ku papalata vuxaka lebyi nga tengangiki bya misava loko hi tsundzuka leswaku vanghana va Vujagana ku nga ri khale va ta byi hundzukela kutani va tisa ku avanyisa ka Xikwembu ehenhla ka byona tanihi xiphemu lexikulu xa Babilona Lonkulu, mfumo wa misava wa vukhongeri bya mavunwa.—Ezekiel 23:8-49; Nhlavutelo 17:1-6, 15-18.

Vakanganyisi Va Hlamarisiwa

23. Yerusalema a a yimeriwe njhani eka rungula ra Xikwembu leri yaka eka Ezekiyele eku heleni ka December ya 609 B.C.E., naswona a ku ta humelela yini eka yena?

²³ Hi siku rero eku heleni ka December loko Nebukadnetsar a sungula n’hweti ya yena ya vu-18 yo rhendzela Yerusalema (Tebeth 10, 609 B.C.E.), Xikwembu xi nyike Ezekiyele rungula rin’wana leri twisisekaka. Eka rona, Yerusalema la rhendzeriweke u yimeriwe hi mbita yo sweka hi yona leyi vaaki va muti a va ta ‘virisiwa’ eka yona. Ku thyaka ka mahanyelo ku vange “ku kurha” eka mbita yoleyo yo fanekisela yo sweka. ‘Hakantsongo-ntsongo,’ vadyohi a va ta humesiwa eYerusalema, naswona xirilo xa yena a xi nge heli ku kondza a karhatiwa hi ndzoviso. Yehova u avanyise Yerusalema hi ku ya hi mintirho ya yena yo biha, naswona u fanele ku lovisiwa, tanihi leswi Vujagana byi faneleke ku lovisiwa.—Ezekiel 24:1-14.

24. (a) Ha yini Ezekiyele a nga kombisanga ku twa ku vava loko nsati wa yena a file? (b) Loko “ripanga” ra Yehova ri ehlela ehenhla ka byona, Vujagana byi ta endlisa ku yini, naswona i yini lexi a nga ta xi tiva?

²⁴ Ku ya emahlweni, Ezekiyele a a fanele ku endla hi ndlela leyi nga tolovelekangiki. (Hlaya Ezekiel 24:15-18.) Ha yini muprofeta a a fanele a nga kombisi ku twa ku vava loko nsati wa yena a file? Ku kombisa ndlela leyi Vayuda a va ta va va hlamale ha yona eku lovisiweni ka Yerusalema, vaaki va wona ni tempele. Ezekiyele ana se a a vule leswi aneleke mayelana ni timhaka to tano naswona a a nga ha ta vula rungula ra Xikwembu nakambe ku kondza ku wa ka Yerusalema ku vikiwa eka yena. Hi ku fanana, Vujagana ni vakhongeri va byona lava kanganyisaka va ta hlamala enkarhini wa ku lovisiwa ka vona. Naswona endzhaku ka ku sungula ka ‘nhlomulo lowukulu,’ leswi ntlawa wa mulanguteri la totiweke wu nga ta va wu swi vurile malunghana ni makumu ya byona swi ta va swi anerile. (Matewu 24:21) Kambe loko “ripanga” ra Xikwembu ri ehlela ehenhla ka Vujagana, vakhongeri ni van’wana vo tano lava hlamaleke ‘va ta boheka ku tiva leswaku i Yehova.’—Ezekiel 24:19-27.

U Nga Hlamurisa Ku Yini?

◻ Ku humelele yini loko Yehova a ndzuluta “ripanga” ra yena ehenhla ka Yuda na Israyele?

◻ Ku tlula ka Sedekiyasi ku hlambanya ka yena eka Nebukadnetsar ku fanele ku hi khumba hi ndlela yihi?

◻ “Ripanga” ra Xikwembu ri kombisa yini?

◻ I xiendlakalo xihi lexi katsaka Nebukadnetsar lexi kombisaka leswaku a nga kona loyi a nga hambukisaka “ripanga” ra Yehova?

◻ Ku humelele yini eku hetisekeni ka Ezekiel 21:30-32?

◻ I yini lexi a xi faniseriwa hi ku ka Ezekiyele a nga kombisi ku twa ku vaviseka loko nsati wa yena a file?

[Xifaniso lexi nga eka tluka 18]

Loko Hosi Sedekiyasi a tlula ku hlambanya ka yena eka Nebukadnetsar ivi a tekiwa a yisiwa evuhlongeni, i vuprofeta byihi lebyi sunguleke ku hetiseka?