Swivutiso Swa Vahlayi

I yini leswi fanekiseriwaka hi lunghiselelo ra lembe ra Yubili leri ku vulavuriwaka ha rona eka ndzima ya vu-25 ya Levhitika?

Nawu wa Muxe wu lerise leswaku “hi lembe ra vunkombo ku ta va ni savata ya ku wisa ka tiko hilaha ku heleleke.” Vaisrayele va lerisiwe leswi malunghana ni lembe rero: “U nga tshuki u byala mbewu ensin’wini ya wena, naswona u nga tshuki u tshena nsimu ya wena ya vhinya. Mbewu leyi halakeke entshovelweni wa wena yi mila u nga tshuki u yi tshovela, naswona madiriva ya murhi wa wena wa vhinya lowu nga tsheniwangiki u nga tshuki u ma hlengeleta. Ku fanele ku va ni lembe ra ku wisa ka tiko hilaha ku heleleke.” (Levhitika 25:4, 5) Hikwalaho, lembe rin’wana ni rin’wana ra vunkombo a ri fanele ri va lembe ra Savata ya nsimu. Naswona lembe rin’wana ni rin’wana ra vu-50, leri a ri landzela lembe ra Savata ra vunkombo, a ri fanele ri va Yubili. A ku fanele ku endleka yini hi lembe rero?

Yehovha u tirhise Muxe ku byela Vaisrayele a ku: “Mi fanele mi hlawulekisa lembe ra vu-50, mi huwelela ntshunxeko etikweni, eka vaaki hinkwavo va rona. Ri ta va Yubili eka n’wina, kutani un’wana ni un’wana wa n’wina u fanele a tlhelela endzhakeni yakwe naswona un’wana ni un’wana a tlhelela endyangwini wakwe. Lembe rero ra vu-50 ri ta va Yubili eka n’wina. Mi nga tshuki mi byala mbewu kumbe mi tshovela leswi kuleke etikweni swi huma eka mbewu leyi halakeke kumbe mi hlengeleta madiriva ya mirhi ya vhinya ya rona leyi nga tsheniwangiki.” (Levhitika 25:10, 11) Yubili a ku ri lembe leri tlhandlamaka lembe ra Savata ro tshika nsimu yi etlela. Kambe a yi tisela vaaki ntshunxeko. Muyuda wihi na wihi loyi a a xaviseriwe evuhlongeni a a fanele a ntshunxiwa. Nhundzu leyi nga ndzhaka leyi munhu a bohekeke ku yi xavisa a yi fanele yi tlheriseriwa endyangwini wa yena. Yubili a yi fanele yi va lembe ra ku vuyisela ni ra ku ntshunxiwa eka Vaisrayele va khale. Xana yi fanekisela yini eka Vakreste?

Ku xandzuka ka wanuna wo sungula Adamu, ku endle leswaku vanhu va va evuhlongeni bya xidyoho. Lunghiselelo ra Xikwembu ro ntshunxa vanhu evuhlongeni bya xidyoho i gandzelo ra nkutsulo ra Yesu Kreste.a (Matewu 20:28; Yohane 3:16; 1 Yohane 2:1, 2) Vakreste va ntshunxiwa rini enawini wa xidyoho? Loko a vulavula ni Vakreste lava totiweke, muapostola Pawulo u te: “Nawu wa moya lowu nyikaka vutomi evun’weni na Kreste Yesu wu mi ntshunxile enawini wa xidyoho ni wa rifu.” (Varhoma 8:2) Lava va nga ni ntshembo wo ya hanya etilweni va kuma ntshunxeko lowu loko va totiwa hi moya lowo kwetsima. Hambileswi mimiri ya vona yi nga ya nyama naswona yi nga hetisekangiki, Xikwembu xi va vula lava lulameke naswona xi va amukela tanihi vana va xona va moya. (Varhoma 3:24; 8:16, 17) Eka ntlawa wa vatotiwa, Yubili ya Vukreste yi sungule hi Pentekosta ya 33 C.E.

Ku vuriwa yini hi “tinyimpfu tin’wana,” leti nga ni ntshembo wo hanya hilaha ku nga heriki emisaveni? (Yohane 10:16) Eka tinyimpfu tin’wana, Mfumo wa Kreste wa Gidi ra Malembe wu ta va nkarhi wa ku vuyeteriwa ni wa ku ntshunxiwa. Hi nkarhi wa Yubili leyi ya Gidi ra Malembe, Yesu u ta tirhisa vuyelo bya gandzelo ra yena ra nkutsulo eka vanhu lava pfumelaka naswona u ta herisa vuyelo bya xidyoho. (Nhlavutelo 21:3, 4) Loko ku hela Mfumo wa Kreste wa Gidi ra Malembe, vanhu va ta va se va hetisekile naswona va ta va va ntshunxeke hi ku helela eka xidyoho ni rifu leswi va tswariweke na swona. (Varhoma 8:21) Loko sweswo se swi hetisisiwile, Yubili ya Vukreste yi ta va yi herile.

[Nhlamuselo ya le hansi]

[Xifaniso lexi nga eka tluka 26]

Yubili ya Gidi ra Malembe—ku ta va nkarhi wa ku vuyetela ni wa ku ntshunxiwa ka “tinyimpfu tin’wana”

“Un’wana Ni Un’wana Wo Tlhariha U Ta Endla Swilo Hi Ku Tiva”

NKONGOMISO lowu humaka eRitweni ra Xikwembu, ku nga Bibele ‘wu fanele wu naveriwa ngopfu ku tlula nsuku—ku tlula nsuku lowu tengisiweke swinene.’ (Pisalema 19:7-10) Ha yini? Hikuva “nawu wa lowo tlhariha [Yehovha] i xihlovo xa vutomi, leswaku wu kendlusa munhu entlhan’wini wa rifu.” (Swivuriso 13:14) Loko ndzayo leyi humaka eMatsalweni yi tirhisiwa, a yi antswisi nkoka wa vutomi bya hina ntsena kambe yi tlhela yi hi pfuna ku papalata mintlhamu leyi nga hoxaka vutomi bya hina ekhombyeni. I swa nkoka hakunene leswaku hi lava vutivi bya le Matsalweni kutani hi hanya hi ku pfumelelana ni leswi hi swi dyondzaka!

Hilaha swi tsariweke hakona eka Swivuriso 13:15-25, Hosi Solomoni wa le Israyele wa khale u nyikele xitsundzuxo lexi hi pfunaka ku endla swilo hi ku tiva leswaku hi ta hanya vutomi byo antswa ni byo leha.a Hi ku tirhisa swivuriso swo koma, u kombisa ndlela leyi Rito ra Xikwembu ri nga hi pfunaka ha yona leswaku hi tsakeriwa hi van’wana, hi tshama hi tshembekile evutirhelini bya hina, hi va ni langutelo lerinene malunghana ni ndzayo hi tlhela hi hlawula vanghana va hina hi vutlhari. U tlhela a kambisisa vutlhari bya ku siyela vana va hina ndzhaka swin’we ni ku va tshinya hi rirhandzu.

Ku Twisisa Lokunene Ku Tisa Tintswalo

Solomoni u ri: “Ku twisisa lokunene ku tisa tintswalo, kambe ndlela ya lava va xengaka yi ni magombogombo.” (Swivuriso 13:15) Buku yin’wana ya tinhlamuselo yi vula leswaku xiga