Xana Wa Twisisa?

LOKO a hlawula vaavanyisi eIsrayele, Muxe u lwele ku kuma “vavanuna vo tlhariha ni lava va nga ni ku twisisa, lava va nga ni ntokoto.” (Deteronoma 1:13) Ntokoto lowu kumekaka hi ku famba ka malembe, a ku nga langutiwi wona ntsena. Vutlhari ni ku twisisa na swona a swi ri swa nkoka.

Munhu la twisisaka u kombisa langutelo lerinene eku vulavuleni ni le mahanyelweni. Hi ku ya hi Webster’s Ninth New Collegiate Dictionary, munhu la twisisaka nakambe u “ni vuswikoti byo hlayisa vutlhari handle ko pfula nomu.” Ina, ku ni “nkarhi wa ku vulavula” ni “nkarhi wa ku miyela,” kutani munhu la twisisaka wa ku xiya ku hambana ka swona. (Eklesiasta 3:7) Hakanyingi ku suka ku ri ni xivangelo lexi twalaka xo miyela hikuva Bibele yi ri: “Ku tlula nawu a ku pfumaleki emaritweni yo tala, kambe loyi a tshamaka a kambela milomu yakwe u endla hi vutlhari.”—Swivuriso 10:19.

Vakreste va tikarhatela ku twisisa loko va tirhisana ni vanhu van’wana. Loyi a tshamelaka ku vulavulaka kumbe a nga ni nkucetelo swinene hakanyingi a hi yena a nga wa nkoka swinene kumbe la hlawulekeke swinene. Tsundzuka, Muxe a ri “ni matimba emaritweni yakwe,” kambe a a nga ta rhangela tiko ra Israyele hi ndlela leyi humelelaka ku fikela loko a hlakulele ku lehisa mbilu, vunene ni ku tikhoma. (Mintirho 7:22) Hikokwalaho, lava byarhisiweke vutihlamuleri byo rhangela van’wana va fanele ngopfu-ngopfu va lwela ku va lava titsongahataka ni ku va ni moya wo teka van’wana va ri va nkoka.—Swivuriso 11:2.

Lava Yesu Kreste a va khomiseke “hinkwaswo leswi nga swa yena” va hlamuseriwa eRitweni ra Xikwembu va ri “hlonga ro tshembeka ni ro tlhariha.” (Matewu 24:45-47) A va rhangeleli Yehovha hikwalaho ko susumetiwa hi matlotlo; kumbe ku salela endzhaku loko nkongomiso wa Xikwembu emhakeni yo karhi wu ri erivaleni. Va swi tiva loko ku ri nkarhi wo vulavula ni loko ku ri nkarhi wo rindza va miyerile leswaku va kuma nhlamuselo leyi engetelekeke. Vakreste va endla kahle loko va tekelela ripfumelo ra vona va tlhela va tikombisa va tlharihile hilaha hlonga ri endlaka hakona.—Vaheveru 13:7.

Xana U Nga Swi Tsakela Ku Endzeriwa?

Hambi ku ri emisaveni leyi yi nga ni maxangu, u nga wu kuma ntsako hi ku va ni vutivi lebyi kongomeke bya Bibele mayelana ni Xikwembu, Mfumo wa xona ni xikongomelo xa xona lexi hlamarisaka hi vanhu. Loko u ta lava ku kuma rungula leri engetelekeke, kumbe u swi tsakela leswaku un’wana a ku endzela ekaya a ta dyondza Bibele na wena mahala, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti xaxametiweke eka tluka 2.