Xana Lexi Hi Xona Xikongomelo Xa Xikwembu?

HLAYA phepha-hungu rin’wana ni rin’wana. Kutani u hlalela mahungu eka thelevhixini kumbe u ma yingisela eka xiya-ni-moya. U ta kuma leswaku ku vulavuriwa ngopfu hi vugevenga, nyimpi ni vutherorisi! Anakanya hi swiphiqo swa wena n’wini. Swi nga endleka leswaku u dya mbitsi u xeva hi nhlomulo hikwalaho ko vabyeriwa hi loyi u n’wi rhandzaka kumbexana munhu wa kona u lovile. Swi nga endleka u titwa ku fana ni munhu lonene Yobo, loyi a vuleke leswaku wa “tsakama hi ku xaniseka.”—Yobo 10:15.

Tivutise:

Xana lexi a xi ri xona xikongomelo xa Xikwembu ha mina ni vanhu lavan’wana hinkwavo?
I mani la nga ndzi pfunaka leswaku ndzi kota ku tiyisela swiphiqo swa mina?
Xana swa tshembisa leswaku hi ta kala hi hanya hi ku rhula emisaveni?

Bibele yi ni tinhlamulo leti enerisaka ta swivutiso leswi.

BIBELE YI DYONDZISA LESWAKU XIKWEMBU XI TA ENDLA SWILO LESWI LANDZELAKA LA MISAVENI.

“Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4
“La khutaka u ta tlula kukota mhunti.”—Esaya 35:6
“Mahlo ya lava nga voniki ma ta pfuriwa.”—Esaya 35:5
‘Hinkwavo lava nga eka masirha-bako ya xitsundzuxo va ta huma.’—Yohane 5:28, 29
“Ku hava munhu la tshamaka kona la nga ta ku: ‘Ndza vabya.’”—Esaya 33:24
“Ku ta va ni mavele yo tala emisaveni.”—Pisalema 72:16

Misava yi ta cinca yi va hilaha Xikwembu a xi lava hakona: Lava dyuhaleke va ta va lavantshwa, lava vabyaka ni lava nga voniki va ta horisiwa, lava feke va ta pfuxiwa, ku ta va ni ndzalo ya swakudya

VUYERIWA HI LESWI BIBELE YI SWI DYONDZISAKA

Leswi u swi dyondzeke eka matluka lama hundzeke, u nga swi bakanyeli etlhelo naswona u nga swi teki swi ri norho ntsena. Xikwembu xi tshembisa leswaku xi ta swi endla naswona Bibele yi hlamusela ndlela leyi xi nga ta swi endla ha yona.

Vavanuna vambirhi va ri karhi va dyondza Bibele hi ku tirhisa buku leyi nge Leswi Bibele Yi Swi Dyondzisaka

Nilokoswiritano, Bibele yi vuyerisa hi tindlela to tala. Yi ku pfulela ndlela ya leswaku u tiphina hi vutomi sweswi. Yimanyana, u anakanya hi swilo leswi ku karhataka. Ku nga ha va ku ri ku pfumala mali, swiphiqo swa ndyangu, ku vabya kumbe ku feriwa hi murhandziwa wa wena. Bibele yi nga ku pfuna leswaku u kota ku langutana ni swiphiqo sweswo namuntlha, naswona yi nga ku chavelela hi ku hlamula swivutiso swo fana ni leswi:

Ha yini hi xaniseka?
Hi nga swi kotisa ku yini ku langutana ni swilo leswi hi tikiselaka vutomi?
Hi nga endla njhani leswaku ndyangu wa hina wu va lowu tsakeke?
Ku endleka yini hi hina loko hi fa?
Xana hi ta kala hi va vona varhandziwa va hina lava feke?
Hi nga tiyiseka njhani leswaku Xikwembu xi ta swi endla leswi xi tshembiseke leswaku xi ta hi endlela swona enkarhini lowu taka?

Leswi u hlayaka buku leyi, swi vula leswaku u rhandza ku tiva leswi Bibele yi swi dyondzisaka. Buku leyi yi ta ku pfuna. Xiya leswaku tindzimana ta yona ti ni swivutiso leswi fambisanaka na tona ehansi ka tluka. Vanhu va timiliyoni va tiphinile hi ku dyondza Bibele ni Timbhoni ta Yehovha, va tirhisa swivutiso ni tinhlamulo. Hi tshemba leswaku na wena u ta tiphina. Onge Xikwembu xi nga ku katekisa loko u ri karhi u tiphina hi dyondzo leyi tsakisaka ni leyi enerisaka, leyi nga ta ku endla u tiva leswi Bibele yi swi dyondzisaka hakunene!!