Ku Chumayela Ni Ku Dyondzisa eMisaveni Hinkwayo

AFRIKA

MATIKO 57

VAAKA-TIKO 878 000 158

VAHUWELERI 1 171 674

TIDYONDZO TA BIBELE 2 382 709

Benin

Claude swin’we ni nsati wa yena Marie-Claire va ni malembe ya 27 va ri varhumiwa lava hisekaka. Hi February, Marie-Claire u wile ivi a tshoveka nenge. Endzhaku ka mavhiki mambirhi, loko Claude a ri karhi a tirha ekaya ra varhumiwa, u wile ivi a tshoveka nenge. Havumbirhi bya vona a va hoxe semendhe, Marie-Claire a a yi hoxe enengeni wa xinene kasi Claude yena a a yi hoxe enengeni wa ximatsi. Claude u te, “Hi rhandza ku endla swilo hi ri vambirhi!”

Claude a a swi kota ku famba-fambanyana hambileswi a hoxe semendhe kambe Marie-Claire a a nga swi koti ku huma ekaya ku ringana mavhiki yo hlayanyana. Hambileswi a a hlele leswaku vanhu va mune eka va 12 lava a a dyondza na vona Bibele va ta ekaya ra varhumiwa leswaku a ta dyondza na vona, a a swi kumbuka ku hlanganyela eka swiyenge swin’wana swo chumayela. Kutani u hlele leswaku a tshama emahlweni ka yindlu ya varhumiwa ivi a veka tafula leri nga ni minkandziyiso yo tala leswaku a ta vulavula ni vanhu lava hundzaka kwalaho. Hi March u hete tiawara ta 83 a ri karhi a chumayela a tshame exitulwini. Xana Yehovha u n’wi katekisile hileswi a swi endleke? Hi n’hweti yoleyo u fambise tibuku ta 14, tibroxara ta 452, timagazini ta 290 swin’we ni swiphephana leswi tlulaka 500.

Ethiopia

Arega, la tshamaka eximutanini lexi ngo va xoxe, u endle xiboho xo khavisa khumbi ra yindlu ya yena. Hambileswi vanhu van’wana va le tikweni ra rikwavo va toloveleke ku tirhisa maphepha-hungu loko va khavisa makhumbi ya tindlu ta vona, a a lava ku tirhisa nchumu lowu nga ni mivala-vala. Loko Arega, a ri emakete u vone wanuna un’wana a fambisa broxara leyi nge, Tsakela Vutomi eMisaveni Hi Masiku! hiloko a yi teka ivi a yi handzula kutani a yi nameka emakhumbini ya yindlu ya yena a nga kalanga a yi hlaya. Endzhaku ka malembe mambirhi, u vone marito lama nge: “Yesu a a ri N’wana wa Xikwembu,” ekhumbini ra yena leri khavisiweke. Leswi a swi hambanile ni dyondzo leyi nga twisisekiki ya Vunharhu-un’we, leyi a a dyondzisiwe yona. Arega u sungule ku tsakisiwa hi sweswo, hiloko a famba tiawara ta kaye a ya edorobeni leri nga le kusuhi leswaku a ya lava vanhu lava vulaka leswaku Xikwembu xi ni N’wana. Eka riendzo ra yena ro sungula a nga va kumanga hiloko a tlhelela ekaya ka yena a hele matimba. Endzhaku ka nkarhi, u tlhele a ringeta naswona hi nkarhi wolowo vanhu va n’wi yise endlwini ya makwerhu loyi a kumeke broxara yoleyo eka yena. Ku tiyimisela ka Arega ku tlhele ku ringiwa hikuva a a fanele a rindza tiawara tin’wana loko makwerhu yoloye a nga si vuya ekaya. Bulo leri va veke na rona ri endle leswaku va sungula ku dyondza Bibele. Eka tin’hweti leti landzeleke, Arega u ye edorobeni minkarhi yo tala leswaku a ya kuma vutivi lebyi engetelekeke hi Xikwembu. Loko a sungula ku byela vanhu va le ximutanini xa ka vona leswi a swi dyondzeke, vanhu va sungule ku n’wi kaneta swinene naswona vo tala va n’wi papalatile. Kambe a nga lan’wanga naswona van’wana va swi tsakerile. Loko nhlayo ya vanhu lava tsakelaka yi fike eka 13, ku rhumeriwe maphayona mambirhi yo hlawuleka leswaku ma ya tirha endhawini yoleyo. Ku nga ri khale, se a ma fambisa tidyondzo ta Bibele leti tlulaka 40 naswona vanhu va kwalomu ka 40 a va va kona eminhlanganweni. Endhawini yoleyo se ku ni vahuweleri va nhungu lava hisekaka. Eka makwerhu wa hina lontshwa Arega, swifaniso leswi nga ekhumbini ra yindlu ya yena, a swo va mivalavala leyi khaviseke yindlu ya yena ntsena.

Ghana

Tanihi leswi tiselfoni se ti talaka laha Afrika, vanhu va vula leswaku ku ta va ni “ku cinca eka swa mbulavurisano.” Leswaku tikhampani ta tiselfoni ti khutaza vanhu lava ti tirhisaka, ti va pfumelela leswaku va fona mahala hi tiawara to karhi nivusiku. Grace, makwerhu un’wana wa xisati, u ri tirhisile lunghiselelo leri. A swi n’wi tikela ku dyondza ni xichudeni xa yena xa Bibele, Monica, hikuva Monica a a tshama a khomekile hi swilo swin’wana. Grace u endle hinkwaswo leswi a nga swi kotaka leswaku va hambeta va dyondza naswona u kale a hlela ku ya ekaya ka Monica hi awara ya ntlhanu nimixo. Kambe xiyimiso xa Monica xi cincile naswona hambi ku ri wona nkarhi wolowo a wu nga ha ri wunene. Kutani Grace u ehlekete ku tirhisa lunghiselelo ra ku fona mahala hi tiawara to karhi nivusiku. Monica u pfumerile naswona va hlele leswaku va dyondza hi ku tirhisa selfoni hi awara ya mune nimixo. Va hele matimba loko va kuma leswaku vanhu vo tala a va fonelana hi nkarhi wolowo, lerova a swi tika eka vona leswaku va kumana loko va fonelana. Xisweswo va hlele ku pfuka hi awara ya nharhu nimixo leswaku va ta dyondza hambileswi sweswo a swi tika eka vona hikuva havumbirhi bya vona i vamanana lava tirhaka. Grace u ri: “Ndzi khongele Yehovha ndzi n’wi kombela leswaku a ndzi nyika matimba ni ku navela ku ya emahlweni ndzi dyondzela xichudeni xa mina leswaku ndzi ta xi pfuna leswaku xi tshama xi ri karhi xi tsakela. Ndzi sete wachi eka foni ya mina naswona a ndzi tiyimisela swinene ku pfuka hi nkarhi wolowo. Hambileswi a ndzi karhele swinene, a ndzi swi pfumelelanga sweswo leswaku swi ndzi heta matimba.” A a tsake swinene leswi a endleke matshalatshala wolawo hikuva a a ri kona leswaku a ta vona Monica loko a khuvuriwa hi 2008 eNtsombanweni wa Muganga lowu nge, “Kongomisiwa Hi Moya Wa Xikwembu”! Sweswinyana, Grace u tirhise lunghiselelo rolero ra ku fona mahala hi tiawara to karhi nivusiku leswaku a dyondza ni wansati wo karhi loyi sweswi a sunguleke ku ta eminhlanganweni.

Mozambhiki

Hi August 2008, ku we baji emovheni wun’wana lowu hundzeke ekusuhi ni xiyindlwana lexi akiweke hi misava xa makwerhu un’wana wa xisati la nga xisiwana naswona a nga noni. Makwerhu yoloye wa xisati u teke baji rolero hiloko a kuma leswaku a ri ri ni maphepha yo karhi ya nkoka, swinkwamana swinharhu leswitsongo leswi a swi ri ni swin’wetsin’wetsi swo durha swin’we ni mali leyi ringanaka R8 000. U sindzise leswaku munhu un’wana eximutanini xolexo a tirhisa tinomboro ta riqingho leti a ti ri eka maphepha wolawo ivi a vula leswaku u kume baji leri lahlekeke. Hi madyambu wolawo ku fike vavanuna va mune hi movha eximutanini xolexo. Makwerhu loyi wa xisati u nyike n’wini wa baji rero baji ra yena ri ri ni swilo hinkwaswo leswi a swi ri eka rona naswona u endle sweswo a voniwa hi tindhuna ta ximutana xolexo. Wanuna yoloye u sungule ku rila ivi a vula leswaku loko baji rero a ri kumiwe hi munhu un’wana la nga riki Mbhoni ya Yehovha, a swi ta n’wi tikela ku kuma swilo swa yena. Hambileswi a nga xisiwana, makwerhu loyi wa xisati u nyikele vumbhoni lebyi dzunisaka vito ra Xikwembu xa yena Yehovha emugangeni wa laha a tshamaka kona.

MATIKO YA AMERIKA

MATIKO 55

VAAKA-TIKO 910 761 124

VAHUWELERI 3 575 123

TIDYONDZO TA BIBELE 3 778 321

Barbados

Vatswari vo tala va swi kuma swi vuyerisa ku dyondzisa vana va vona ku nhlokohata tindzimana ta Bibele. Ndyangu wun’wana wa le Grenada wu tsakisiwe hi ku twa ndlela leyi xifanyatana xa wona lexi nga ni malembe ya tsevu xi yi tirhiseke ha yona ndzimana ya Bibele leswaku xi yimela ntiyiso wa leswaku Yehovha u tlakuke ku tlula vanhu hinkwavo. Tata wa xifanyatana lexi u ri: “Siku rin’wana nindzhenga loko nsati wa mina Laura a landze n’wana wa hina Stefan exikolweni, mudyondzisi wa yena u vitanele nsati wa mina etlhelo ivi a ku: ‘Ndzi lava ku ku byela leswaku n’wana wa wena wa ndzi tsakisa. Hambileswi ndzi nga swi seketeliki swilo leswi mi swi kholwaka, ndza yi rhandza ndlela leyi n’wana wa wena a swi hlamuselaka ha yona swilo leswi a swi pfumelaka.’

“Loko va fika ekaya, nsati wa mina u vutise Stefan leswaku ku endleke yini exikolweni lexi endleke leswaku mudyondzisi wa yena a n’wi bumabumela hi ndlela yoleyo. N’wana wa hina u vule leswaku loko va ha ku sungula ku dyondza siku rero, mudyondzisi u vule leswaku ‘Yesu i Xikwembu.’

“Stefan u tlakuse voko naswona loko mudyondzisi wa yena a n’wi komba, u te: ‘A swi tano Mudyondzisi. Yesu a hi Xikwembu. Bibele yi vula leswaku Yesu i N’wana wa Yehovha, kutani a swi nge koteki leswaku a va Yehovha.’

“Mudyondzisi yoloye u hlamule a ku: ‘Mina ndzi pfumela leswaku Yesu i munhu un’we na Yehovha.’

“Hiloko Stefan a ku: ‘Kambe Bibele yi vula leswaku Yehovha a ri yexe hi yena La nge Henhla-henhla, ku nga ri Yesu. I Yehovha ntsena La nge Henhla-henhla.’ A a tshaha eka Pisalema 83:18, ku nga tsalwa leri a hi n’wi pfune leswaku a ri nhlokohata ni ku ri twisisa. Hambileswi mudyondzisi loyi a nga munhu la nga hleka-hlekiki, a nga wu vonanga ntlangu eka n’wana wa malembe ya tsevu loyi a a ri ni vutivi lebyi kongomeke bya Matsalwa.”

Ecuador

Vamakwerhu va nga ri vangani va khandziye bazi loko va tlhelela ekaya endzhaku ka loko va chumayele ensin’wini leyi tirhisaka ririmi ra Xiquichua, leyi nga le matiko-xikaya. Tanihi leswi bazi rero a ri ri ni muchini wo tlanga vhidiyo, va kume mpfumelelo wo tlanga vhidiyo ya Xiquichua leyi vulavulaka hi Nowa na Davhida leswaku yi ta hlaleriwa hi vakhandziyi, lava hinkwavo ka vona a va vulavula Xiquichua. A va hlamale swinene ku vona ni ku twa nchumu wo karhi hi ririmi ra vona! A va yingiserisisile lerova loko bazi ri yima leswaku ku khandziya munhu wo karhi, a va n’wi kombela leswaku a hatla a tshama ehansi leswaku va nga kayeriwi hi nchumu. Loko vhidiyo yoleyo yi hela, vanhu vo tala va yi komberile. Vakhandziyi van’wana a va ri ni swivutiso leswi khumbaka Bibele naswona a va lava minkandziyiso; van’wana va tsale mavito ni tiadirese ta vona leswaku munhu un’wana a ta va endzela edorobeni naswona hinkwavo va nyikiwe swirhambo swa Xitsundzuxo lexi nongonoko wa kona a wu ta fambisiwa hi Xiquichua. A swi kanakanisi leswaku leswi swi hoxe xandla eka nhlayo ya vanhu vo tala lava veke kona eXitsundzuxweni endhawini yoleyo.

Mexico

Loko Gabino, makwerhu un’wana wa xinuna la nga phayona, a ri karhi a chumayela hi yindlu ni yindlu, u fike endlwini yin’wana ivi a gongondza. A ku hlamulanga munhu. U gongondze ra vumbirhi a tlhela a gongondza ra vunharhu. Endzhaku ko yimanyana, u tlhele a gongondza ra vumune. Wanuna un’wana loyi a a ri ni gome u pfule nyangwa a ri karhi a rila. U nambe a kombela Gabino leswaku a nghena endlwini kambe a a nga swi koti ku vulavula hikuva a a hlundzukile. Gabino u sungule ku vulavula hi ndlela leyi chavelelaka hi mahungu lamanene naswona wanuna yoloye u sungule ku verhama. Wanuna yoloye u n’wi vutisile a ku: “Xana wa xi vona xitulu lexiya? Loko u gongondza ra vunharhu, a ndzi yime ehenhla ka xona. Xana wa yi vona ntambhu leyi lenga-lengaka lahaya? Loko u gongondza ra vumune, a ndzi hoxe nhamu ya mina eka yona. Kambe ndzi yi susile leswaku ndzi ta pfula nyangwa. Ndza nkhensa leswi u phikeleleke hikuva loko a wu nga phikelelanga ingi ndzi tisungile.” U vule leswaku a a ri ni gome hikwalaho ka swiphiqo leswi a a ri na swona ni nsati wa yena. Gabino u hlele leswaku a dyondza Bibele na yena. Minkarhi yo tala, phayona leri ri gongondza kan’we kumbe kambirhi enyangweni. Kambe hi nkarhi lowu, ku phikelela ka rona ku ve ni vuyelo lebyinene, kumbexana hikwalaho ko kongomisiwa hi ntsumi.

Chile

Hi nkarhi wa tsima ra ku rhambela vanhu lava tsakelaka leswaku va va kona eXitsundzuxweni xa rifu ra Kreste, n’wana un’wana u ye eka Mbhoni kutani a yi vutisa a ku, “Xana u ni malembe mangani?” Tanihi leswi makwerhu yoloye a a hlamarisiwe hi xivutiso xexo, u hlamule a ku, “Xana wena u ni malembe mangani?” Xinhwanyatana xexo xi vule leswaku xi ni malembe ya tsevu xi tlhela xi vula leswaku mana wa xona a a xi nyike papila leswaku xi ya ri nyika Mbhoni ya Yehovha. Mana wa xona a a xi byele leswaku xi fanele xi kuma Mbhoni leyi nga riki yitsongo naswona yi nga dyuhalangiki. Kutani makwerhu yoloye wa xisati u byele xinhwanyatana xexo leswaku u ni malembe ya 25. Xinhwanyatana xexo xi n’wi nyike papila rero. A ri ku: “Loko mi ndzi endzerile ekaya ka mina, a ndzi vanga na xona xivindzi xo pfula nyangwa. Ndzi tshikilelekile swinene naswona ndzi kombele Xikwembu leswaku xi ndzi pfuna. Ndzi tlhele ndzi ringeta ku yingisela rungula ra n’wina ndzi tlhela ndzi hlaya ni Bibele kambe swilo swa ndzi tikela swinene. Ndzi nga swi tsakela ku dyondzeriwa Bibele hi munhu loyi a nga ta ndzi pfuna leswaku ndzi hlakarhela leswi vukati bya mina byi nga fambangiki kahle. Loko u nga swi kota ku ndzi pfuna, ndzi kombela u fika ekaya ka mina ndzhenga lowu hikuva sweswi mixo lowu ndza ha etlele. Inkomu.”

Ndzhenga wolowo, makwerhu yoloye wa xisati u n’wi endzerile wansati yoloye a tlhela a n’wi rhambela eXitsundzuxweni ni le ka nkulumo yo hlawuleka, leswi n’wi khutazeke swinene. Ku sukela hi nkarhi wolowo, u hambeta a vuyeriwa hi ku va kona minkarhi hinkwayo eminhlanganweni naswona u endla nhluvuko eka dyondzo ya yena ya Bibele laha a tirhisaka buku leyi nge, Xana Bibele Yi Dyondzisa Yini Hakunene? Xana ku vuriwa yini hi xinhwanyatana xa yena lexi nga ni malembe ya tsevu? Xona ni sesi wa xona la nga ni malembe ya 12, va tiphina hi dyondzo ya Bibele leyi va vaka na yona.

Puerto Rico

Makwerhu un’wana wa xisati u tsarile a ku: “A ndzi ri karhi ndzi fambisa timagazini exitarateni loko ndzi vona wansati un’wana a ri karhi a pompa moya emathayereni ya movha ya yena. Ndzi ye eka yena kambe loko ndzi nga si vulavula, u kombele leswaku ndzi n’wi nyika magazini wa Xihondzo xo Rindza ni wa Xalamuka! a vula leswaku wa swi tsakela ku ti hlaya. Hambileswi ndzi kombeleke ku va ni dyondzo ya le kaya ya Bibele na yena, u vule leswaku a nge swi koti hikuva u tshama exithezini xa vumbirhi xa yindlu ya mana wa yena nileswaku mana wa yena a nga wu rhandzi ntirho wa hina. Loko ndzi n’wi kombele leswaku a ndzi nyika adirese ya yena, u ndzi nyike vito ra xitarata ntsena. Siku rin’wana ndzi yile ndzi ya n’wi lava eka xitarata lexi a xi vuleke kambe a ndzi n’wi kumanga. Kutani siku rin’wana ndzi ye exitarateni xolexo ivi ndzi fika ndzi vutisa vaakelani loko va n’wi tiva wansati la vuriwaka Nancy, ku nga manana la nga ni vana vambirhi lavatsongo. Lexi ndzi tsakiseke, ndzi hetelele ndzi yi kumile adirese ya yena. Hambiswiritano, a ndzi nga n’wi kumi ekaya kutani ndzi n’wi siyele timagazini ndzi tlhela ndzi n’wi tsalela xipapilana. Loko ndzi hetelele ndzi n’wi kumile, u sungule ku rila a vula leswaku a a lava ku ya eHolweni ya Mfumo. U tile ivi a fika a tsakela rirhandzu leri a ri voneke exikarhi ka vamakwerhu. U ndzi byele leswaku a a nga swi koti ku ndzi hlamula leswi a ndzi n’wi endzela hikuva mana wa yena a a handzula swipapilana leswi a ndzi n’wi tsalela swona swin’we ni timagazini loko yena a nga si vuya ekaya. Hi sungule ku dyondza Bibele ekaya ra sesi wa yena naswona swi nga si ya kwihi Nancy u sungule ku va kona minkarhi hinkwayo eminhlanganweni. Sweswi u tshama a ri kona eminhlanganweni. Sweswi u tsarisile eXikolweni xa Vutirheli bya le Tilweni naswona swa tsakisa ku twa yena ni vana va yena vambirhi lavatsongo va ri karhi va hlamula eminhlanganweni.”

ASIA NI LE MIDDLE EAST

MATIKO 47

VAAKA-TIKO 4 073 556 172

VAHUWELERI 635 896

TIDYONDZO TA BIBELE 579 554

Korea Dzonga

Wanuna un’wana la tshamaka ekusuhi ni Holo ya Mfumo u kume xipapilana xi namekiwe emovheni wa yena, lowu a wu pake emahlweni ka yindlu ya yena. Xipapilana xexo a xi ku: “Ndzi hale movha wa wena hi xihoxo loko ndzi ri karhi ndzi paka movha wa mina. Ndzi kombela leswaku u ndzi fonela kutani ndzi ta wu lunghisisa.” Tanihi leswi wanuna yoloye a xiyeke ndlela leyi Timbhoni leti hlanganyelaka eholweni leyi nga kusuhi ni le kaya ka yena ti ti khomaka ha yona, u te, ‘Munhu wo tshembeka hi ndlela leyi u fanele a ri Mbhoni ya Yehovha.’

Makwerhu wa xisati la vuriwaka Su-yeon hi yena loyi a siyeke xipapilana xexo naswona loko wanuna yoloye a n’wi fonela, makwerhu loyi u kombele ku rivaleriwa a tlhela a vula leswaku u ta wu lunghisisa movha wolowo. Anakanya ndlela leyi swi n’wi hlamariseke ha yona loko wanuna yoloye a vutise a ku, “Ndzi kombela ku tiva, xana u Mbhoni ya Yehovha?” Wanuna yoloye u vule leswaku u ta tilunghisela movha wa yena a tlhela a vula leswaku makwerhu loyi a nga fanelanga a karhateka ha nchumu! U tlhele a vula leswaku a nga tsakela ku hlangana na yena tanihi leswi a ku ri ni swilo leswi a a lava ku swi tiva hi Timbhoni. Su-yeon u yile a ya hlangana na yena kambe u fambe ni tata wa yena swin’we ni makwerhu un’wana wa xinuna wa le vandlheni. Wanuna yoloye u te: “Ndzi xiye ndlela leyi Timbhoni ti ti khomaka ha yona hikuva ndzi tshama ekusuhi ni Holo ya Mfumo. Mi vanhu lavanene. A ndzi twisisi leswaku ha yini mi vengiwa hi ndlela leyi.” Tata wa Su-yeon u tirhise Bibele ni buku leyi nge, Xana Bibele Yi Dyondzisa Yini Hakunene? leswaku a hlamula swivutiso swo tala swa wanuna yoloye. Sweswi wanuna yoloye u tsakela ku dyondzeriwa Bibele hi tata wa Su-yeon naswona u endla nhluvuko lowunene hi tlhelo ra moya.

Matiko lawa ntirho wu siveriweke kumbe wu yirisiweke eka wona

Ndhuna ya masocha yi khumbekile loko yi vona vuyelo lebyinene lebyi ntiyiso wu nga va na byona eka nsati wa yona loyi a nga Mbhoni ya Yehovha. Hikwalaho ka sweswo, yi pfumerile ku dyondzeriwa Bibele. Ndhuna ya yona, leyi a yi ri jenerala, yi swi twile sweswo hiloko yi yi vita leswaku yi ta vulavula na yona. Jenerala loyi u yi byele leswaku loko yi nga tshiki ku hlangana ni Timbhoni ta Yehovha, yi ta rhumeriwa endhawini ya le kule swinene ya le tikweni rero. Ndhuna yoleyo ya masocha yi vule leswaku nsati wa yona u ni nkarhi wo leha a ri karhi a dyondza Bibele naswona a yi nga voni nchumu lowu nga khombo hi sweswo. Hikwalaho, a yi nga ta tshika ku dyondza Bibele. Endzhaku ka nkarhi, ndhuna yoleyo ya masocha yi hlawule ku tshika ntirho wa yona wa vusocha. Sweswi se i Mbhoni leyi khuvuriweke leyi nga phayona ra nkarhi hinkwawo naswona i nandza wa vutirheli. Lexi tsakisaka hileswaku nsati wa jenerala loyi a vulavuleke na yena u sungule ku dyondzeriwa Bibele. Jenerala yoloye u tsandzekile ku n’wi tshikisa nsati wa yena kutani sweswi se i phayona ra nkarhi hinkwawo.

Etikweni rin’wana, makwerhu un’wana wa xisati u sungule ku dyondza Bibele ni wansati un’wana loyi nuna wa yena a a n’wi kaneta hi tihanyi. Tanihi leswi a swi nga ta koteka ku dyondzela ekaya ka wansati loyi, vavasati lavambirhi va hlele ku ya dyondzela ephakeni leyitsongo. Hi nkarhi lowu a va dyondza ha wona, mukhalabye un’wana loyi a a ri karhi a tijika-jikela ephakeni, a a tshamela ku famba-famba ekusuhi na vona a ri karhi a languta leswi va swi endlaka ni ku yingisela bulo ra vona. Siku rin’wana u tile eka vona a fika a va vutisa swivutiso swo karhi leswi khumbaka Bibele. Eka dyondzo ya vona leyi landzelaka, u endle hi ndlela leyi fanaka. Wansati loyi a a dyondzeriwa u sungule ku hlundzuka ivi a ku, “Ndzi ni awara ntsena yo dyondza Bibele kambe u ndzi dyela nkarhi hi ku vutisa swivutiso swo tala.” Endzhaku ka sweswo, makwerhu loyi wa xisati u hlele leswaku makwerhu un’wana a dyondza ni mukhalabye loyi, loyi a endleke nhluvuko hi xihatla hi tlhelo ra moya ivi a sungula ku ya eminhlanganweni. Sonto yin’wana ni yin’wana, vavasati van’wana vambirhi lava nga vaakelani va yena a va n’wi vona loko a huma endlwini ya yena a ambale kahle naswona a khome bege ya yena. A va lava ku tiva leswaku u ya kwihi hiloko va twa leswaku u sungule ku pfumela eka “vukhongeri byin’wana lebyintshwa.” Tanihi leswi vavasati volavo vambirhi a va lava ku tiva, va landzelele mukhalabye yoloye ku kondza va ya fika eHolweni ya Mfumo. Vamakwerhu va nga ri vangani va xisati va vulavule ni vavasati volavo hiloko va va vutisa loko va nga swi tsakela ku dyondzeriwa Bibele. Wansati un’we u pfumerile. Vanhu lavanharhu—wansati loyi a a dyondzeriwa ephakeni, mukhalabye loyi ku buriweke na yena ephakeni swin’we ni wansati un’we loyi a a landzelela mukhalabye loyi—va endle nhluvuko lowunene hi tlhelo ra moya naswona va ha ku khuvuriwa.

Cambodia

Louy, la nga phayona eCambodia, nkarhi na nkarhi u gada xikanyakanya xakwe leswaku a ya eximutanini lexi tindlu ta kona ti akiweke hi musengele ehenhla ka timhandzi leti dzimiweke. Ku ni vanhu lava a dyondzaka na vona Bibele endhawini yoleyo. Loko ka ha sale masiku manharhu leswaku ku fika siku ra Xitsundzuxo, u ye eximutanini xolexo leswaku a ya hlamusela un’wana wa lava a dyondzaka na vona Bibele xikongomelo xa Xitsundzuxo, hiloko ku fika vana ivi va sungula ku vutisa swivutiso. Nhlayo ya vana volavo yi sungule ku andza. Louy u fambise swirhambo swa Xitsundzuxo swa 57. Hi siku leri landzelaka, Louy u gade xikanyakanya xakwe a ya eximutanini xolexo leswaku a ya fambisa dyondzo yin’wana ya Bibele, naswona xichudeni xa yena xi n’wi byele leswaku maxaka ni vanghana va xona na vona va lava ku ta. Kutani Louy u siye swirhambo swin’wana swa 20 leswaku xichudeni xa yena xa Bibele xi ta swi fambisa. Louy u sungule ku karhateka hileswaku u ta va pfunisa ku yini vanhu volavo leswaku va va kona eXitsundzuxweni. Endzhaku ko khongela, u vulavule ni tata wa un’wana wa swichudeni swa yena swa Bibele, loyi a nga ndhuna ya ximutana. Tatana yoloye u tiyisekise Louy leswaku loko o hlela leswaku ku va ni tuk-tuk yin’we (ku nga xigolonyana lexi hi ntolovelo xi khandziyisaka vanhu va mune, lexi kokiwaka hi xithuthuthu) leyi nga ta va fambisa, hinkwavo va nga swi kota ku famba hikuva van’wana a va ta yima kumbe va tshama ematsolweni ya van’wana. Louy a a tsake swinene loko ku fika vanhu va 18 va le ximutanini xexo.

Indiya

Makwerhu un’wana loyi a tirhaka ku chayela xigolonyana lexi fanaka ni xikanyakanya u chumayele mukhandziyi loyi a nga mutsari wa phepha-hungu. Mutsari loyi u tsakisiwe hi xivindzi xa makwerhu loyi hikuva Timbhoni tin’wana endhawini yoleyo a ti khomiwa ku biha hi vakaneti loko ti ri karhi ti chumayela mahungu lamanene. Mutsari yoloye u endle xiboho xo tsala bulo leri a veke na rona ni makwerhu yoloye eka phepha-hungu ra le tikweni. U tsarile a ku: “A ndzi lava ku vona leswaku muchayeri u ta ku yini loko ndzi ku: ‘Xana u ma twile mahungu namuntlha? Xana u swi twile leswaku vanhu va n’wina va biwile ni leswaku tikereke ta n’wina ti hlaseriwile etindhawini to hambana-hambana laha tikweni?’ U te, ‘Ina, ndzi swi hlayile sweswo ephepheni ra namuntlha.’ ‘Kutani, xana mi ta endla yini loko [vakaneti] va hambeta va mi karhata?’ U lo hlakahla nhloko a ku: ‘A swi na mhaka. Hi ta hambeta hi kholwa [ntiyiso].’”

Loko a hlamusela xiphephana lexi Mbhoni yoleyo yi n’wi nyikeke xona, u tsarile a ku: “Loko ndzi fika ekaya ndzi humese xiphephana xexo ebegeni ya mina. A xi ri ni swifaniso swa ndhawu leyi nga ya rihlaza, tiva, mirhi leyi nga ni swiluva, vanhu va ri karhi va tshovela mavele ni mihandzu swin’we ni tintshava leti funengetiweke hi gamboko. A xi ri ni nhloko-mhaka leyi nge, ‘Vutomi emisaveni leyintshwa ya ku rhula.’ Rungula ra xona a ri ri ra vukhongeri. Hi ntolovelo, a nga kona munhu la nga alaka ku nyikiwa xiphephana lexi navetisaka xitolo lexi xavisaka swiambalo kumbe mahanyelo yo karhi. Kambe loko u sungula ku vulavula hi misava leyintshwa leyi nga ni ku rhula, sweswo swi nga ha endla leswaku vanhu va ku venga.”

Philippines

Endhawini yin’wana leyi nga le xifundzheni xa Zamboanga ku ni ntshava leyi leheke swinene lerova xihlungwana xa yona u nga xi vona u ri ekule hi tikhilomitara ta 200. Vamakwerhu lava tshamaka ekusuhi ni ntshava yoleyo a va rhandza ku endla fenya loko va ri ensin’wini ivi va ku, “Xana hi ta endla yini loko ku ri ni munhu la tsakelaka la tshamaka exihlungwanini xa ntshava leyi?” Siku rin’wana loko va ri karhi va chumayela etshakwini ra ntshava yoleyo, ku fike wanuna un’wana a vula leswaku a a ri karhi a lavana ni Timbhoni ta Yehovha. U vule leswaku u lava ti n’wi pfuna ku dyondza Bibele. Vamakwerhu va n’wi vutise leswaku u tshama kwihi. Loko a kombetela exihlungwanini xa ntshava, vamakwerhu volavo va heleriwe hi marito. Wanuna yoloye u vule leswaku yindlu ya yena a yi nga ri exihlungwanini xa ntshava yoleyo kambe a yi ri endzhaku ka yona naswona leswaku u ya fika kona a wu fanele u ya fika exihlungwanini xa ntshava. Endzhaku ka loko vamakwerhu va ti ehleketile, va pfumerile leswaku va ta ya. Ku sunguriwe dyondzo ya Bibele naswona wanuna yoloye u va kona eminhlanganweni ya vhiki ni vhiki eHolweni ya Mfumo hambileswi yi nga le kule swinene ni muti wa yena. Wanuna loyi, sweswi i un’wana wa vanhu va matiko hinkwawo lava khitikanelaka ‘entshaveni ya yindlu ya Yehovha.’—Esa. 2:2.

YUROPA

MATIKO 47

VAAKA-TIKO 736 988 468

VAHUWELERI 1 563 910

TIDYONDZO TA BIBELE 819 067

Finland

Vamakwerhu vambirhi a va ri karhi va chumayela hi yindlu ni yindlu va kombela ku dyondza ni vanhu Bibele hi ku tirhisa xiphephana lexi nge, Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? Wanuna un’wana u pfule nyangwa, a va kavanyeta loko va ha vula xingheniso xa vona ivi a kombela leswaku va nghena endlwini. U te: “Ndzi ni swivutiso swo tala leswi ndzi lavaka ku swi vutisa. Ha yini mi fika hi nkarhi lowu?”

Vamakwerhu volavo va te: “Hi chumayela endhawini leyi ni vandlha ra hina.”

Wanuna yoloye u te: “A ndzi ri karhi ndzi khongela leswaku Timbhoni ta Yehovha ti fika laha kaya ka mina. Minkarhi yo tala ndzi va ndzi ri eku tsutsumeni hi nkarhi lowu kambe namuntlha a ndzi yanga. Kutani sweswi mi fikile!” Wanuna yoloye a a swi vona leswaku swikhongelo swa yena swi hlamuriwile. Laha a tirhaka kona, minkarhi yo tala vanhu a va vulavula ku biha hi Timbhoni ta Yehovha. Tanihi leswi a a lava ku tiva leswaku leswi va swi vulaka i ntiyiso, u ye elayiburari leswaku a ya endla ndzavisiso. U kume buku leyi nge, Timbhoni Ta Yehovha I Vahuweleri Va Mfumo Wa Xikwembu, hiloko a yi hlaya ivi a kuma leswaku leswi va swi vuleke i mavunwa. Hikwalaho ka sweswo, a a swi lava hi mahlo-ngati ku hlangana ni Timbhoni ta Yehovha. Ku sunguriwe dyondzo ya Bibele na yena naswona u nambe a sungula ku ta eminhlanganweni ya vandlha. U chumayele khale ka nsati wa yena swin’we ni n’wana wa vona wa nhwanyana hiloko na vona va sungula ku dyondza.

Britain

Kirsty la nga phayona ra nkarhi hinkwawo u dyondze Xifurwa ni Xilingala leswaku a ta chumayela vanhu va le nsin’wini ya yena lava humaka etikweni ra le Congo. Siku rin’wana u vone wansati wa le Congo loyi a a khome mindzhwalo yo tala a ri karhi a tsandzeka ku nghena ebazini. Kirsty u vulavule hi Xilingala ivi a n’wi byela leswaku u ta n’wi pfuna hiloko a n’wi tlakulela mindzhwalo leyi a a yi khomile ivi a nghena na yona ebazini. Wansati yoloye u n’wi vutise a ku: “Ha yini u vulavula Xilingala hambileswi u nga mulungu?” Kirsty u n’wi byele leswaku u hlanganyela evandlheni ra Xilingala nileswaku Timbhoni ta kwalaho ti n’wi dyondzise ririmi rero leswaku a ta kota ku vulavula ni vanhu hi Bibele. Kirsty a a lava ku n’wi kombela ku dyondza na yena Bibele hiloko a tshama ebazini kukondza wansati loyi a fika laha a a ya kona. Kutani Kirsty u khomise wansati loyi mindzhwalo ya yena a n’wi yisela yona exithezini xa vunharhu xa laha a tshamaka kona. Kirsty u amukeriwe hi nuna wa wansati yoloye ni vana va vona va mune naswona u kombe ndyangu wolowo ndlela leyi dyondzo ya Bibele yi fambisiwaka ha yona hi ku tirhisa buku leyi nge, Xana Bibele Yi Dyondzisa Yini Hakunene? Sweswi wansati loyi ni vana va yena vambirhi lavakulu va dyondzeriwa Bibele. Hinkwavo va ri vanharhu va endla matshalatshala yo tsakisa Yehovha.

Georgia

Vamakwerhu vambirhi lavantshwa lava nga maphayona va hlawule ku rhurhela endhawini leyi nga ni tintshava ya le tikweni leri, laha a ku ri ni Timbhoni ti nga ri tingani. Va sungule ku chumayela swimitana swa kwalaho naswona vuyelo bya kona a byi tsakisa. Va fambise minkandziyiso yo tala swinene naswona va sungule tidyondzo to tala ta Bibele. Loko vamakwerhu lava va sungula ku chumayela endhawini leyi leyi nga ni tintshava, a va nga ri ni swilo swo tala naswona a va nga swi tivi leswaku va ta etlela kwihi. Kambe minkarhi hinkwayo swilaveko swa vona a swi khathaleriwa. Vanhu va le swimitanini sweswo a va va rhambela emakaya ya vona leswaku va ta lata rimbambu va tlhela va va nyika ni swakudya. Minkarhi yin’wana, hambi ku ri vanhu lava a va nga swi lavi ku yingisela rungula ra vona, a va va rhamba leswaku va ta etlela emakaya ya vona va tlhela va va nyika ni swakudya. Hi ku famba ka nkarhi, vamakwerhu volavo va hlawuriwile leswaku va va maphayona yo hlawuleka ensin’wini yoleyo. Tanihi leswi a va fambisa tidyondzo to tala ta Bibele, a va hlawula nhlayo leyi a va ta kota ku yi khathalela. Swi tolovelekile leswaku vanhu va ya eka vona loko va ri exitarateni ivi va fika va kombela ku dyondzeriwa Bibele naswona hambileswi a va hungute nhlayo ya vanhu lava va dyondzelaka, hi xiringaniso, un’wana ni un’wana wa vona a a fambisa tidyondzo ta Bibele ta 20 n’hweti yin’wana ni yin’wana.

Hungary

Minkarhi hinkwayo makwerhu un’wana wa xisati u kuma mabodlhela ya ntswamba ma ri enkwameni ma hayekiwe edarateni ra yena. Siku rin’wana loko a tlherisela mabodlhela wolawo lama nga riki na nchumu, u hoxe xiphephana lexi nge, Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? endzeni ka nkwama wolowo. Lexi n’wi hlamariseke hileswaku enkarhini lowu taka loko a tiseriwa ntswamba wun’wana, wansati loyi a n’wi tiselaka wona u hoxe xipapilana lexi a xi ri ni swivutiso leswi khumbaka xiphephana xexo a tlhela a kombela Bibele. Makwerhu yoloye wa xisati u nambe a endzela wansati yoloye laha a tshamaka kona epurasini ra yena ivi a sungula ku dyondza na yena Bibele hi ku tirhisa buku leyi nge, Xana Bibele Yi Dyondzisa Yini Hakunene? Emahlweni ka sweswo, wansati yoloye a a lava tinhlamulo ta swivutiso swa yena etikerekeni to hambana-hambana, kambe a ha ri ni ndlala hi tlhelo ra moya. Entiyisweni, ku lavisisa ka yena ku endle leswaku a va ni swivutiso leswi engetelekeke emianakanyweni ya yena. Loko un’wana wa vana va yena wa nhwanyana a kombise ku tsakele rungula rero, makwerhu yoloye u n’wi nyike buku leyi nge, Dyondza Eka Mudyondzisi Lonkulu. Wansati loyi u vule leswaku minkarhi yo tala n’wana wa yena a a hamba a pfuka nivusiku hileswi a a lorha swilo swo chavisa. Hambiswiritano, endzhaku ka loko n’wana yoloye a hlaye tindzima ti nga ri tingani ebukwini leyi, u sungule ku nga ha chavi ngopfu naswona sweswi u etlela bya n’wantenyana nivusiku. Wansati loyi wa ha dyondzeriwa Bibele naswona minkarhi hinkwayo u va kona eminhlanganweni hi Sonto naswona u ta ni vana va yena vambirhi va vanhwanyana.

Italy

Cristina na Manel, ku nga vatirhi vambirhi va nkarhi hinkwawo, a va ri karhi va fambisa xiphephana lexi nge, Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? endhawini leyi nga le matiko-xikaya exikarhi ka tiko ra Italy. Epurasini rin’wana va twe huwa endzhaku ka yindlu. Loko n’wini wa muti a swi vona leswaku i Timbhoni, u va huwelerile a ku: “Ndzi kombela mi tsutsumela haleno! Ndzi kombela mi ta ndzi pfuna!” Loko Timbhoni teto ti hatlisela ku ya n’wi pfuna, ti vone leswaku a a ri karhi a ringeta ku sivela nguluve leyikulu, leyi a yi hlundzukile leswaku yi nga humi ehokweni. Gede ra kona a ri tshovekile naswona wansati yoloye a a karhatekile leswaku nguluve yoleyo a yi ta balekela enhoveni leyi nga kusuhi. A a ri yexe naswona a a ri karhi a ringeta ku pfala gede rolero. Wansati yoloye u byele Cristina a ku: “Khomelela gede leri loko ndza ha ya lava nchumu wo pfala ha wona!” Cristina u nambe a vula leswaku wa yi chava nguluve leyi. Wansati yoloye u nyike Manel kwembe ni mukwana ivi a ku eka yena: “U nga karhateki. Tsemelela kwembe leri ivi u yi hoxela rona hakatsongo-tsongo leswaku u yi rivatisa loko ndza ha ya lavana ni nchumu lowuntshwa wo pfala ha wona.”

Wansati yoloye u nyamalarile naswona ku hele timinete to hlayanyana a nga si vuya. Cristina a a ri karhi a khongotela Manel leswaku a hatlisa a nyika nguluve yoleyo swakudya, kambe Manel a swi n’wi tikela ku tsemelela kwembe rero hikuva a ri nonon’hwa. Eku heteleleni, wansati yoloye u vuyile hiloko a lunghisa gede rero. Endzhaku ka sweswo u koke moya, ivi a ku: “Hakunene n’wina vambirhi a mi rhumiwe hi Lowa Matimba Hinkwawo!”

Va te: “U tiyisile Manana!” va ri karhi va humesa xiphephana ivi va n’wi komba xona.

Hiloko wansati yoloye a ku: “Mhaka leyi i ya nkoka swinene hikwalaho a hi nge yimi laha hi vulavula hi yona. Hi fanele hi tshama ehansi hi vulavula ha yona hi nga jahanga.” Kutani wansati yoloye u landze switulu naswona loko va tshamile ehandle ejaratini eka maxelo lamanene, u vutise swivutiso swo tala naswona u kombise ku tsakela lokukulu hi ku rhiya ndleve a tlhela a tlangela. Hi ku famba ka nkarhi, va hlele leswaku ku sunguriwa dyondzo ya Bibele. Cristina na Manel va vula leswaku va ve ni ntokoto lowu hi nkarhi lowu faneleke hikwalaho ka nguluve leyi a yi lava ku baleka.

OCEANIA

MATIKO 30

VAAKA-TIKO 38 338 482

VAHUWELERI 99 816

TIDYONDZO TA BIBELE 59 619

Australia

Fred, la nga Mbhoni leyi tshamaka edorobeni leri rhuleke leri nga le ribuweni, u siyele wanuna un’wana ti-DVD ta hina tinharhu. Endzhakunyana, Fred u kume papila leri humaka eka wanuna yoloye, leri xiphemu xin’wana xa rona a xi ku: “Ku hlalela ni ku yingiserisisa ti-DVD swi ndzi rhulise mbilu. A ndzi ku vona ku rhula, ntsako ni ku n’wayitela ka vanhu lava a ndzi va hlalerile. Se a ndzi ri ni malembe yo tala ndzi nga si titwa hi ndlela yoleyo. Sweswi se ndza swi kholwa leswaku ku nga va ni vutomi lebyi antswaka lebyi ndzi nga byi rindzelaka. Enkarhini lowu hundzeke, a ndzi tikhoma hi ndlela yo biha Timbhoni leti a ti ndzi endzela. Ndzi kombela mi ndzi rivalela swinene hikwalaho ka sweswo. Vanhu van’wana va n’wina va te eka mina va ri ni xinghana naswona va navela ku ndzi byela mahungu lamanene. A hi swi tivi, kumbexana siku rin’wana u ta languta endzhaku eHolweni ya n’wina ya Mfumo ivi u ndzi vona ndzi tshame hala ndzhaku ka wena.”

New Zealand

Vamakwerhu vambirhi va xisati va endzele nhlangano lowu lawuriwaka hi mfumo lowu pfunaka mindyangu ivi va hlela ku vonana ni mukongomisi wa wona. Loko va ri karhi va tilunghiselela, va hlawule “minkandziyiso leyi vulavulaka hi ndyangu,” leyi a yi vulavula ngopfu hi tinhloko-mhaka leti a ti ta tsakisa mukongomisi loko a ri karhi a endla ntirho lowu khumbaka mindyangu. Minkandziyiso yoleyo a yi katsa buku leyi nge, Xihundla Xa Ntsako eNdyangwini ni leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka, swin’we ni Xalamuka! ya August 2007 leyi a yi ri ni swihloko leswi tlhandlamanaka swa nhloko-mhaka leyi nga exifunengetweni leyi nge, “Magoza Ya Nkombo Ya Ku Va Mutswari Lonene” swin’we ni ya October 2007 leyi a yi ri ni swihloko leswi tlhandlamanaka swa nhloko-mhaka leyi nga exifunengetweni leyi nge, “Sirhelela Vana Va Wena!”

Loko vamakwerhu volavo va xisati va endzela mukongomisi loyi, va hlamusele ntirho wa hina lowu hi wu endlaka hi ku tirhandzela va tlhela va vula leswaku hi swi tsakela swinene ku pfuna mindyangu, ngopfu-ngopfu hi tlhelo ra moya. Va hete nkarhi wo leha va ri karhi va n’wi komba leswi tameriweke hi tibuku teto. Mukongomisi yoloye u rhiye ndleve ivi a amukela minkandziyiso a tlhela a vula leswaku u ta byela vatirhi va yena va 35 rungula leri a ri kumeke. U tlhele a vula leswaku tinhloko-mhaka ta Xalamuka! a ti ta pfuna mindyangu ya 503 leyi a a yi pfuna. Vamakwerhu volavo va xisati va swi kotile ku kuma timagazini ta 557 ta Xalamuka! Endzhaku ka mavhiki mambirhi, va beriwe riqingho ivi va tivisiwa leswaku timagazini hinkwato ti nyikiwe mindyangu liya.

Fiji

Jaha rin’wana leri vuriwaka Viliame a ri wu tlanga hi ndlela ya xiyimo xa le henhla ntlangu wa rugby naswona a ri swi navela hi mbilu hinkwayo ku ya tlangela xipano xa tiko ra rikwavo. Ndzisana ya rona, Leone, na yena a a swi rhandza ku tlanga rugby kambe endzhaku ka loko a pfumerile ku dyondzeriwa Bibele hi phayona ro hlawuleka, u swi xiyile leswaku a nge swi koti ku tirhela tihosi timbirhi. U sungule ku va kona eminhlanganweni ivi a tshika ku tlanga rugby. Mana wa yena, la nga Mbhoni, u n’wi xavele swiambalo leswi a a ta swi ambala loko a ya eminhlanganweni kambe loko va phikizana Viliame u teke swiambalo leswi Leone a a ya ha swona eminhlanganweni ivi a swi handzula. Leone a a karhatekile kambe a nga tirihiselanga. Endzhaku ka nkarhi, Leone u ye emakete ivi a fika a tixavisela makhalavatla lawa a a ma byarile ivi hi mali leyi a yi kumeke a tixavela swiambalo swo ya ha swona eminhlanganweni swin’we ni Bibele, switsalo ni switsalo leswi pendaka leswi a a ta swi tirhisa eminhlanganweni. U xavele Viliame swilo leswi fanaka. Viliame u tsundzuke ndlela yo biha leyi a khomeke ndzisana ya yena ha yona hiloko a khumbiwa hi musa wa yena. U ambale swiambalo swa yena leswintshwa ivi a hlamarisa ndzisana ya yena hi ku ya eminhlanganweni. Viliame na yena u amukele dyondzo ya Bibele naswona vamakwavo volavo vambirhi va endle nhluvuko hi tlhelo ra moya. Loko va ri karhi va tilunghiselela ku ya khuvuriwa, Viliame u komberiwe leswaku a ya tlanga rugby eYuropa, ku nga nchumu lowu majaha yo tala ma wu lavaka hi mahlo-ngati, tanihi leswi ma kumaka mali yo tala ma tlhela ma va ni ndhuma. Hambiswiritano, tipakani ta yena se a ti cincile hiloko a hlawula ku tinyiketela eka Yehovha. Viliame na Leone va ve maphayona ya nkarhinyana ku ringana tin’hweti ta tsevu endzhaku ka loko va khuvuriwile. Waisea, tata wa vona u sungule ku dyondzeriwa Bibele loko a vona leswaku vana va yena i swikombiso leswinene. Waisea u cince mahanyelo ya yena naswona u khuvuriwe ni vana va yena vambirhi va vanhwanyana hi siku ra nhlengeletano yo hlawuleka.

[Xifaniso lexi nga eka tluka 45]

Ku tiyimisela ni ku tirhisa thekinoloji ya masiku lawa swi pfune makwerhu wa xisati leswaku a fambisa dyondzo ya Bibele

[Xifaniso lexi nga eka tluka 46]

Ku tshembeka ka yena ku nyikele vumbhoni

[Xifaniso lexi nga eka tluka 48]

Dyondzo ya ndyangu yi pfune Stefan leswaku a chumayela exikolweni

[Xifaniso lexi nga eka tluka 49]

Ku phikelela ka yena ku ponise vutomi

[Xifaniso lexi nga eka tluka 50]

Xi kume Mbhoni leyi nga riki yitsongo kumbe leyi dyuhaleke

[Xifaniso lexi nga eka tluka 55]

U hlele leswaku ku va ni “tuk-tuk” yin’we ntsena

[Xifaniso lexi nga eka tluka 58]

Ku dyondza ririmi rimbe swi endle leswaku ku va ni dyondzo ya Bibele

[Xifaniso lexi nga eka tluka 60]

Ti tele tindlela to chumayela hi xitshuketa

[Xifaniso lexi nga eka tluka 63]

Va ri karhi va hlela “minkandziyiso leyi vulavulaka hi ndyangu”

[Xifaniso lexi nga eka tluka 64]

Va tshike ku tlanga rugby leswaku va ta tirhela Yehovha