Hambileswi Vulawuri bya Vukhomunisi a byi tshikilela swinene, a byi swi kotanga ku sivela ku vonakala ka ntiyiso wa Bibele hi ku helela leswaku ku nga voningi. Vamakwerhu va boheke ku tirhisa minkandziyiso ya le malembeni lama hundzeke ku ringana malembe yo tala. Hambiswiritano, loko Timbhoni ta le Estonia ta ha ri le Siberia, ti kote ku hlangana ni vamakwerhu lava humaka eswiphen’wini swin’wana swa le Soviet Union. Loko va tlhelele aEstonia va ye emahlweni va vulavurisana ni vamakwerhu va le Soviet Union hi xivindzi naswona va swi kotile ku kuma swakudya swa moya leswi nga le nkarhini nkarhi na nkarhi. Hi xikombiso, ku sukela hi 1956, va kote ku vulavurisana na Ivan Dziabko ni van’wana va le Ukraine naswona va kote ku kuma minkandziyiso eka vona. Kambe a va nga vulavurisani ni vanhu volavo nkarhi na nkarhi naswona a va nga kumi minkandziyiso yo tala. A ku laveka nchumu lowu engetelekeke naswona swi nga si ya kwihi Yehovha u katekise matshalatshala lamakulu ya vamakwerhu.

Rhavi ra le Finland ri endle makungu yo pfuna vamakwerhu va le Estonia hi ndlela leyi hlelekeke ri kongomisiwa hi Huvo leyi Fumaka. Vilho Eloranta, loyi a a ri phayona le Estonia hi va-1930 u averiwe ku ya vulavurisana na vona. Eku sunguleni ka va-1960 loko a sungula ku ya aEstonia u swi kotile ku vulavurisana na Fanny Hietala. Endzhaku ka sweswo, vamakwerhu vo tala va le Finland lava a va endla onge i vavalangi va fambise minkandziyiso naswona va pfunetile leswaku ku tshama ku ri karhi ku vulavurisaniwa ni vamakwerhu va kwalaho. Eku heteleleni, vamakwerhu va le Estonia a va kota ku vulavurisana na “Manana,” hilaha vamakwerhu a va yi vitana hakona nhlengeletano ya Yehovha. A va kota ku rhumela swiviko swa ntirho wa nsimu ni mapapila naswona a va kuma minkandziyiso leyi a yi ri eka tifilimi letitsongo ta khamera. Hambiswiritano, leswi ndlela leyi va vulavurisanaka ha yona a yi fanele yi va xihundla lexikulu naswona yi endliwa hi vutlhari lebyikulu, a va vulavurisana kambirhi kumbe kanharhu hi lembe.

Huvo leyi Fumaka yi hlele leswaku Lloyd Barry, un’wana wa swirho swa yona swin’we na Viv Mouritz loyi a a huma erhavini ra le Finland, va ya hlangana na Adolf Kose, loyi a a hlela ntirho wa hina le Estonia. Va hlangane ephakini le Leningrad (sweswi ku nga St. Petersburg).

Loko Makwerhu Mouritz a hlamusela hi ku hlangana ka vona ka le xihundleni u ri: “Eku sunguleni, Makwerhu Kose a a kanakana ku vulavula naswona u endle onge u le ku hlayeni ka phepha-hungu ra yena. Kambe loko bulo ri ri karhi ri ya emahlweni, Adolf u tshike phepha-hungu ra yena kutani a sungula ku vulavula.”

Makwerhu Barry u ri: “U arile ku famba a ya dya na hina swakudya. U vule leswaku swa antswa leswaku va bula hi timhaka toleto ta nkoka swi helela kwalaho.”

Loko Makwerhu Kose a kombise ku karhateka malunghana ni nxaniso lowukulu ni swipimelo leswi Timbhoni a ti ri ehansi ka swona le Soviet Union, Makwerhu Mouritz na Makwerhu Barry va n’wi khutazile swinene. Va te: “Ematikweni man’wana na kona ha ringiwa. Miringo yoleyo yi tikomba yi olova, kambe yi ni khombo swinene! Hi ni miringo yo tala leyi n’wina mi nga riki na yona, naswona vanhu vo tala ematikweni lawa ntirho wa hina wu nga yirisiwangiki va tshika ntiyiso ku tlula laha tikweni ra n’wina.”

Riendzo leri a a ri fike hi nkarhi naswona ri tiyise Makwerhu Kose hi tlhelo ra moya. U swi tive endzhaku ka nkarhi leswaku a a vulavula ni xirho xa Huvo leyi Fumaka, naswona u hundzisele xikhutazo xolexo lexi humaka enhlengeletanweni ya Yehovha eka hinkwavo lava a va tshembekile hambiloko va tshikileriwa hi ndlela ya tihanyi.

Endzhakunyana Makwerhu Barry u tsarile a ku: “Hi va twela vusiwana vamakwerhu va le Soviet Union. A swi tsakisa ku hlangana na Makwerhu Kose, naswona a swi fanerile loko a hi qhavula a tlhela a hi angarha hi ndlela ya rirhandzu loko hi hambana endzhaku ka ku hlangana ka hina loku tsakisaka swinene.”