Ni le ndzhaku ka loko huvo leyi fumaka ya lembe-xidzana ro sungula se yi yi lunghisile mhaka ya ku yimba, van’wana lava tivulaka Vakreste va hambete va sindzisa leswaku mhaka yoleyo ya ha tirha. Muapostola Pawulo u vule leswaku i “vamakwerhu va mavunwa” lava lavaka ku “soholota mahungu lamanene hi Kreste.”—Gal. 1:7; 2:4; Tito 1:10.
Vanhu volavo a va hisekela ndhavuko wa Vayuda naswona swi tikomba onge xikongomelo xa vona a ku ri ku tsakisa Vayuda leswaku va hambeta va xanisa Vakreste hi tihanyi. (Gal. 6:12, 13) A va vula leswaku munhu u va la lulameke hi ku namarhela Nawu wa Muxe emhakeni ya swakudya, ku yimba ni ku tlangela minkhuvo ya Xiyuda.—Kol. 2:16.
Swa twisiseka leswi lava a va kholwa vonelo rero a va nga ntshunxeki loko va ri ni Vamatiko lava hundzukeke. Khombo ra kona, hileswaku moya wolowo wo biha a wu vonaka ni le ka Vakreste lava nga Vayuda lava a va xiximeka evandlheni. Hi xikombiso loko vamakwerhu lava humaka evandlheni ra le Yerusalema va endzela eAntiyoka a va nga swi lavi ku tihlanganisa ni vamakwerhu Vamatiko. Hambi ku ri Petro loyi a a dzumba na vona, loko va fika u tihambanise na vona a tlhela a nga lavi ni ku dya na vona. Sweswo a ku ri ku tikaneta hikuva a a ha ku vula leswaku va fanele va amukeriwa. Hi yona mhaka leyi Pawulo a n’wi tshinyeke hi ndlela yo vava swinene.—Gal. 2:11-14.