Ha Yini U Fanele U Kambisisa Bibele?

Xana u yi toloverile Bibele? Bibele hi yona ntsena buku leyi nga hangalasiwa ku tlula tibuku hinkwato ematin’wini ya vanhu. Vanhu va mindhavuko hinkwayo va kume leswaku ya va chavelela ni ku va nyika ntshembo nileswaku ndzayo ya yona ya ha tirha enkarhini wa hina. Hambiswiritano, vanhu vo tala namuntlha a va tivi swo tala hi Bibele. Ku nga khathariseki leswaku u ni vukhongeri bya wena kumbe a wu na byona, swi nga endleka leswaku u nga rhandza ku tiva swo karhi hi Bibele. Broxara leyi yi endleriwe ku ku pfuna leswaku u dyondza tidyondzo ta xisekelo ta Bibele.

LOKO u nga si sungula ku hlaya Bibele, i swa nkoka leswaku u tiva tinhla ti nga ri tingani hi yona. Tanihi leswi yi vitaniwaka leswaku i Matsalwa yo Kwetsima, Bibele yi vumbiwa hi tibuku kumbe swiyenge swa 66 naswona yi sungula eka Genesa ivi yi helela eka Nhlavutelo.

I mani mutsari wa Bibele? Lexi i xivutiso lexi tsakisaka hakunene. Entiyisweni, Xikwembu xi tirhise vavanuna va 40 leswaku va tsala Bibele emalembeni ya kwalomu ka 1 600. Mhaka leyi tsakisaka hileswaku vavanuna volavo a va vulanga leswaku hi vona va nga tsala Bibele. Un’wana wa lava nga yi tsala u te: “Matsalwa hinkwawo ma huhuteriwe hi Xikwembu.” (2 Timotiya 3:16) Kasi un’wana u te: “Moya wa Yehovha wu vulavule ha mina, rito rakwe a ri ri eririmini ra mina.” (2 Samuwele 23:2) Kutani vavanuna volavo va vula leswaku Yehovha Xikwembu, Mufumi la Tlakukeke wa matilo ni misava, hi yena Mutsari wa Bibele. Vavanuna volavo va vula leswaku Xikwembu xi lava leswaku vanhu va xi tiva.

Ku ni nchumu wun’wana lowu nga wa nkoka loko hi lava ku twisisa Bibele. Matsalwa hinkwawo ma ni nhloko-mhaka yin’we: ku nga ku lweriwa ka mfanelo ya Xikwembu yo fuma vanhu hi ku tirhisa Mfumo wa xona wa le tilweni. Eka matluka lama landzelaka ya broxara leyi, u ta vona ndlela leyi nhloko-mhaka leyi yi kumekaka ha yona eBibeleni hinkwayo, ku suka eka Genesa ku ya fika eka Nhlavutelo.

Loko u ri karhi u anakanyisisa hi leswi, kambisisa rungula leri kumekaka ebukwini leyi tiviwaka emisaveni hinkwayo, ku nga Bibele.

a Ku ni tindlela to hambana-hambana to vulavula hi minkarhi. Eka broxara leyi, C.E., swi vula “Nguva leyi Tolovelekeke” kasi B.C.E., swi vula “Emahlweni ka Nguva leyi Tolovelekeke.” Leswi u ta swi vona eka nxaxamelo wa minkarhi lowu kombisiweke laha hansi eka matluka lawa.