Xana U Nga Hoxa Xandla—Eku Akiweni Ka Tiholo Ta Mfumo?
1-3. Xana Yehovha u wu katekisa njhani ntirho wo aka Tiholo ta Mfumo naswona ha yini ku ri ni xilaveko xa vatirhi lava engetelekeke va ku tirhandzela?
1 Hakunene swa tsakisa ku vona switiviso eka Vutirheli Bya Hina Bya Mfumo malunghana ni Tiholo ta Mfumo letintshwa leti nyikeriwaka n’hweti ni n’hweti! Ntirho wo tika lowu vatirhi va ku tirhandzela va wu endleke eku akiweni ka Tiholo ta Mfumo wu endle leswaku ku nyiketeriwa Tiholo ta Mfumo to tlula 1 000 leti nga ehansi ka rhavi ra Afrika Dzonga. Ku dzuneka hinkwako ku ya eka Yehovha, loyi moya wakwe wu pfunaka vanhu vakwe lava tiyimiseleke ku tirha.—Zak. 4:6.
2 Lembe ni lembe ku simekiwa mavandlha lamantshwa ya kwalomu ka 70 ensin’wini ya hina. Leswi swi vula leswaku lembe ni lembe ku laveka Tiholo ta Mfumo letintshwa ta kwalomu ka 45. Hi lembe ra ntirho ra 2012, ku akiwe Tiholo ta Mfumo letintshwa ta 44. Ku ni xilaveko xa xihatla xa vatirhi va ku tirhandzela lava engetelekeke leswaku va ta pfuna ku hatlisisa ntirho lowu wo aka Tiholo ta Mfumo!
3 Hambileswi ku nga ni nhluvuko lembe ni lembe, ensin’wini ya hina ka ha ri ni Tiholo ta Mfumo ta 293 leti faneleke ti akiwa. Mavandlha man’wana lamakulu ma ha hlengeletana leswaku ma gandzela endzhaku ka tindlu, emakaya, etigaraji kumbe etiholweni leti hirhiweke. Nakambe, Tiholo to tala ta Mfumo leti nga kona ti lava ku lunghisiwa ni ku pfuxetiwa. Xana ntirho lowu hinkwawo wu ta hetisisiwa njhani?
4. I yini leswi faneleke swi endliwa loko ku nga si sungula matsima yo aka Tiholo ta Mfumo naswona hi byihi vuyelo byo va ni pulani ya Holo ya Mfumo leyi fanelaka ndhawu yoleyo ni nxaxamelo wa swilo leswi faneleke swi tirhisiwa?
4 Nhlengeletano Ya Ku Akiwa Ka Tiholo Ta Mfumo: Ndzawulo yo Aka Tiholo ta Mfumo leyi nga erhavini ra laha Afrika Dzonga yi langutela mintirho hinkwayo leyi fambisanaka ni ku aka ni ku lunghisa Tiholo ta Mfumo. Mavandlha ma fanele ma kuma papila ra mpfumelelo leri humaka erhavini emahlweni ko va ku xaviwa ndhawu kumbe ku hleriwa ku aka. Vandlha ri fanele ri kota ku seketela tsima hi ku tirha ni hi swa timali. Rhavi hi rona leri endlaka pulani ya Tiholo ta Mfumo leyi fanelaka ndhawu yoleyo swin’we ni nxaxamelo wa swilo leswi faneleke swi tirhisiwa.—Hlaya bokisi leri nge “Pulani Ya Tiholo Ta Mfumo Leyi Fanelaka Ndhawu Yoleyo,” eka tluka 4 ni leri nge “Nxaxamelo Wa Swilo Leswi Faneleke Swi Tirhisiwa,” eka tluka 6.
5. Hi wahi malunghiselelo mambirhi lama endliweke leswaku ku pfuniwa mavandlha leswaku ma hakelela Holo ya Mfumo?
5 Ndlela Leyi Ku Akiwa Ka Tiholo Ta Mfumo Ku Hakeleriwaka Ha Yona: Mavandlha ma nga lomba mali eka nhlengeletano, leyi nga hakeriwaka handle ka ntswalo ku ringana malembe ya 20. Hambiswiritano, mavandlha man’wana ma tikeriwa loko swi ta eka timali lerova ma tsandzeka ku hakela mali leyi lombiweke. Lexi tsakisaka, Huvo leyi Fumaka yi endle lunghiselelo ra leswaku mavandlha yo tano ma akeriwa Holo ya Mfumo. Eka lunghiselelo leri, rhavi ri va n’wini wa Holo ya Mfumo kutani vandlha ri endla xihlambanyo xa leswaku ri ta nyikela hilaha ku nga heriki eka nkwama wa Ku Akiwa Ka Tiholo eMisaveni Hinkwayo. Muhuweleri un’wana ni un’wana evandlheni wa tiboha leswaku u ta nyikela mali muni hi n’hweti. (Mat. 5:37) Vandlha hi rona ri humesaka mali yo khathalela Holo ya Mfumo.
6, 7. (a) I yini Ntlawa wo Aka Tiholo ta Mfumo? (b) I yini leswi endliwaka loko ku hlawuriwa ndhawu ni ku yi tsarisa hi nawu? (Hlaya bokisi.)
6 Mintlawa Yo Aka Tiholo Ta Mfumo: Ku endliwe lunghiselelo lerintshwa hileswi ku nga ni xilaveko xa xihatla xa Tiholo ta Mfumo leti engetelekeke. Rhavi ri simeke Mintlawa ya tsevu yo Aka Tiholo ta Mfumo laha Afrika Dzonga. Nakambe rhavi ri langutela Tikomiti to Aka ta Xifundzha ta 22. Leswi swi hambanile hi ku ya hi tindhawu, tanihi leswi marhavi yo tala ya nga na lunghiselelo rin’we ntsena ra ku langutela ku akiwa ka Tiholo ta Mfumo.
7 Mintlawa yo Aka Tiholo ta Mfumo yi averiwa ku aka Tiholo ta Mfumo nkarhi hinkwawo. Mintlawa leyi yi vumbiwa hi vamakwerhu lava ngheneleke ntirho wa nkarhi hinkwawo wo aka Tiholo ta Mfumo ni vatirhi va ku tirhandzela lava ngheneleke ntirho wa nkarhinyana wo Aka Tiholo ta Mfumo. Mintirho leyi hayimbirhi i mintirho ya nkarhi hinkwawo. Vamakwerhu lava swin’we ni vatirhi va ku tirhandzela va khathaleriwa hi ndlela yo fana ni vamakwerhu lava nga eka mintirho yin’wana yo hlawuleka ya nkarhi hinkwawo. Hi nkarhi wa tsima ro aka Tiholo ta Mfumo, vamakwerhu lava, lava nga ni ntokoto va tirha swin’we ni vatirhi va ku tirhandzela va le vandlheni, va va letela mintirho leyi faneleke yi endliwa. Xana u nga swi tsakela ku pfuna?
8. I yini leswi u nga swi langutelaka loko u va mutirhi wo Aka Tiholo ta Mfumo?
8 Vatirhi va ku tirhandzela va nkarhinyana vo Aka Tiholo ta Mfumo va averiwa nkarhi wo fika eka tin’hweti tinharhu. Swi ya hi xilaveko xa kona, rhavi ri nga ha kombela vatirhi va ku tirhandzela lava tsakelaka leswaku va endla xikombelo xo tirha tanihi malandza yo Aka Tiholo ta Mfumo. Loko va ri karhi va endla ntirho wa vona, malandza yo Aka Tiholo ta Mfumo ma nyikiwa mali yitsongo n’hweti ni n’hweti yo hakela swilaveko swa munhu hi yexe. Vatirhi lava va ku tirhandzela a va rhangisi ntirho wa vona wo aka ntsena kambe va tlhela va khathalela xilaveko xa vona xa moya nkarhi na nkarhi. Ntlawa wo Aka Tiholo ta Mfumo wu hoxa xandla eka ntirho wa nsimu, wu tiphina hi dyondzo ya Xihondzo xo Rindza leyi vaka kona vhiki ni vhiki ni ku va kona eka minhlangano hinkwayo ya vandlha. Hakanyingi ntlawa lowu wu tshama ematendeni kumbe endhawini leyi hirhiweke leyi nga ekusuhi ni Holo ya Mfumo. Wu hanya vutomi byo olova naswona minkarhi yin’wana swiyimo swa wu tikela, kambe wa vuyeriwa swinene hi ku vona vamakwerhu va magidi va hlanganyela etindhawini ta vugandzeri leti xiximekaka leti dzunisaka vito ra Yehovha.
9, 10. (a) Hi wihi ntirho lowu endliwaka hi Komiti yo Aka ya Xifundzha naswona yi titshege hi vamani? (b) Hi rihi lunghelo leri mindyangu yi nga na rona?
9 Tikomiti To Aka Ta Xifundzha: Vatirhi va ku tirhandzela va le ndhawini yoleyo lava nyikiweke mpfumelelo wo aka va pfuna Tikomiti to Aka ta Xifundzha ku aka ni ku pfuxeta Tiholo ta Mfumo. Hakanyingi va tirha hi mahelo-vhiki. Tikomiti to Aka ta Xifundzha ti tlhela ti va ni vutihlamuleri byo letela van’wana leswaku va kambela ni ku khathalela Tiholo ta Mfumo leti nga kona.
10 Komiti yo Aka ya Xifundzha yi titshege ngopfu hi vatirhi va ku tirhandzela va le ndhawini yoleyo. Vatirhi va ku tirhandzela lava nyikiweke mpfumelelo wo tirha va aviwa hi mintlawa naswona va nga ha tlhela va leteriwa ku va ni vutshila byo karhi. Vatirhi lava va ku tirhandzela i vanhu lava tinyiketelaka ku tirha lava tlhelaka va tiyiseka leswaku a va byi honisi vutihlamuleri bya vona bya swilo swa moya naswona va hoxa xandla hilaha ku heleleke eka ntirho wo chumayela hi Mfumo. Vatswari va khutaziwa ku nghenela ntirho lowu wa ku tirhandzela ni vana va vona. Vatirhi va ku tirhandzela lava nga emalembeni ya le xikarhi ka 13 na 15 va nga ha pfuneta ehansi ka nkongomiso wa vatswari va vona. Nakambe ku ni malunghiselelo yo khathalela vana lavatsongo loko vatswari va vona va ri karhi va tirha endhawini leyi Holo ya Mfumo yi akiwaka eka yona. Hi ndlela yoleyo swa koteka leswaku ndyangu hinkwawo wu tirha swin’we eka ntirho lowu wo tsakisa.
11. Xana u nga pfuneta njhani eka ku akiwa ka Tiholo ta Mfumo ni ku ti khathalela hambi loko swiyimo swa wena swi nga ku pfumeleli ku nghenela ntirho lowu?
11 I ro sungula ku laveka vatirhi va ku tirhandzela hi xihatla leswaku va pfuna eku akiweni ni ku khathaleriwa ka Tiholo ta Mfumo. Kumbexana a wu swi koti ku nghenela ntirho wa nkarhi hinkwawo sweswi. Kambe xana u nga swi kota ku va mutirhi wa ku tirhandzela wa le ndhawini ya ka n’wina hi mahelo-vhiki? U nga ha swi kota ku pfuneta hi ku lunghiselela swakudya kumbe ku pfuneta hi byetlelo bya vatirhi va ku tirhandzela. Matshalatshala man’wana ni man’wana, ku nga khathariseki leswaku i matsongo hi ndlela yihi, ma pfuneta ku hetisisa xikongomelo xa Yehovha.
12. I vamani lava nga ni vutihlamuleri byo khathalela Holo ya Mfumo?
12 Ku Khathaleriwa Ka Holo Ya Mfumo: Loko Holo ya Mfumo leyintshwa yi akiwile, ku va ni ntsako lowukulu evandlheni. Loko se yi herile, muhuweleri un’wana ni un’wana u va ni vutihlamuleri byo khathalela Holo ya Mfumo leyintshwa.
13. Xana xiyimo xa Holo ya Mfumo xi ri yimela njhani vito ra Yehovha?
13 Ehleketa hi vaendzi lava fikaka ekaya ka wena u nga va langutelanga. Loko va ri karhi va nghena hi nyangwa wa le mahlweni, u xiya leswaku kamara ro dzumba eka rona ri thyakile. U ta titwa u khomiwe hi tingana, a swi tano ke? Ha yini? Hikuva kaya ra wena ri yimela ndyangu wa wena. Hilaha ku fanaka, Holo ya Mfumo yi yimela Yehovha Xikwembu ni vanhu vakwe. Loko vaendzi va fika eHolweni ya Mfumo, xana va kuma yi ri njhani? Xana swihambukelo swi basile? Xana switulu ni mimete swi languteka swi basile? Xana mafasitere ma basile? Xana xiyimo xa Holo ya hina ya Mfumo xi n’wi yimela kahle “Lowo Kwetsima Ngopfu” a tlhela a hleleka, ku nga Yehovha Xikwembu?—Swiv. 9:10; 1 Kor. 14:33.
14, 15. Xana hi nga swi kombisa njhani leswaku ha yi tlangela Holo ya hina ya Mfumo?
14 Hi fanele hi tsundzuka leswaku Holo ya hina ya Mfumo i nyiko leyi humaka eka Xikwembu naswona ndlela leyi hi yi khathalelaka ha yona yi kombisa ndlela leyi hi yi tlangelaka ha yona. Kutani i swinene ku tivutisa swivutiso leswi nge: Xana ndza pfuneta eku endleni ka leswaku Holo ya Mfumo yi va leyi baseke? Xana ndzi nyikela hi nkarhi wa mina ni matimba leswaku ndzi pfuneta ku khathalela Holo ya Mfumo?
15 Hinkwerhu ka hina swin’we ni mindyangu, a hi yi kambisiseni hi xikhongelo ndlela leyi hi nga ma engetelaka ha yona matshalatshala ya hina yo hoxa xandla ni ku khathalela tindhawu ta hina to gandzela. Loko a vulavula hi ndlela leyi tempele yakwe yi nga seketeriwaka ha yona, Yehovha u te: “Vito ra mina . . . kunene mahlo ya mina ni mbilu ya mina swi ta va kwalaho nkarhi hinkwawo.”—1 Tih. 9:3.
[Nhlamuselo ya xifaniso lexi nga eka tluka 3]
Leswaku u kuma rungula leri engetelekeke tihlanganise ni: Ndzawulo Yo Aka Tiholo ta Mfumo
Riqingho: +27 11 761 1431
Fax: +27 11 761 1890
E-mail: khcd.za@jw.org
[Bokisi leri nga eka matluka 3]
• Lava Langutelaka Tiholo Ta Mfumo
• Ku Hakela Tiholo Ta Mfumo
• Pulani Ya Holo Ya Mfumo Leyi Fanelaka Ndhawu
• Mintlawa Yo Aka Tiholo Ta Mfumo
• Ku Hlawula Ndhawu Ni Ku Yi Tsarisa
• Komiti Yo Aka Ya Xifundzha
• Ndlela Yo Yi Khathalela
• Swilo Leswi Faneleke Swi Tirhisiwa
[Bokisi leri nga eka matluka 4]
• Lava Langutelaka Tiholo Ta Mfumo
• Ku Hakela Tiholo Ta Mfumo
• Holo Ya Mfumo Leyi Fanelaka Ndhawu
• Mintlawa Yo Aka Tiholo Ta Mfumo
• Ku Hlawula Ndhawu Ni Ku Yi Tsarisa
• Komiti Yo Aka Ya Xifundzha
• Ndlela Yo Yi Khathalela
• Swilo Leswi Faneleke Swi Tirhisiwa
Pulani Ya Holo Ya Mfumo Leyi Fanelaka Ndhawu Yoleyo
Yi fambisana ni milawu yo aka
Yi chipile: Rhavi ra Afrika Dzonga ri xava swilo swi tele naswona ri xava swilo leswi tiyeke hi nxavo wa le hansi.
Ya olova ku yi khathalela: Pulani ya Tiholo ta Mfumo leyi fanelaka ndhawu yoleyo yi katsa ni swilo leswi olovaka ku swi khathalela leswi endlaka leswaku swi olova ku endla leswaku Holo ya Mfumo yi tshama yi ri exiyin’weni lexinene.
Yi hlayisa nkarhi: A swa ha bohi leswaku mavandlha ma heta nkarhi wo leha ma ri karhi ma hlawula pulani ni ndlela leyi yi faneleke yi languteka ha yona.
Yi antswisa vutivi lebyi nga kona: Ndzawulo yo Aka Tiholo ta Mfumo yi tirhisa maendlelo lawa yi ma tirhiseke eka matsima lama hundzeke.
Endlelo leri oloveke: Ku ni endlelo ra Holo leyi kotaka ku rhurhisiwa leri nga tirhisiwaka eka mavandlha lamatsongo kumbe lama tsandzekaka ku kuma xitandi xa wona n’wini.
Ku Hlawuriwa Ka Ndhawu Ni Ku Yi Tsarisa Hi Nawu
Ntlawa wa vamakwerhu wu heta nkarhi wa wona hinkwawo wu ri karhi wu lavana ni ndhawu, wu vulavurisana ni vaxavisi ni ku tsarisa ndhawu enawini. Sweswi va le ku vulavurisaneni ni mavandlha ya kwalomu ka 350 naswona va le ku laveni switandi swa Tiholo ta Mfumo ta 300. Va pfuna mavandlha ya laha Afrika Dzonga ni le matikweni lama akelaneke na yona.
[Bokisi leri nga eka matluka 5]
Ku Vuriwa Yini Hi Wena?
Mutirhi Wa Ku Tirhandzela Wo Aka Tiholo Ta Mfumo
Xana Ndza Faneleka?
◻ U fanele u va u ri ni lembe u khuvuriwile
◻ U ri exikarhi ka malembe ya 19 na 55
◻ U kota ku tirha hi ku tirhandzela nkarhi hinkwawo ku ringana tin’hweti tinharhu
◻ U ri phayona ra nkarhi hinkwawo leri hisekaka
◻ U kota ku endla ntirho lowu lavaka matimba
◻ U hanye kahle emirini ni le mintlhavekweni
◻ U tiyimisele ku endla ntirho wun’wana ni wun’wana lowu u nyikiwaka wona
Xana ndzi nga tsarisa njhani?
✔ Tata fomo ya Application for Kingdom Hall Construction Volunteer Program (A-25)
✔ Yisa fomo leyi tatiweke eka Komiti ya Ntirho ya Vandlha ra n’wina
Mutirhi Wa Ku Tirhandzela Wa Le Ndhawini Yoleyo
Xana Ndza Faneleka?
◻ U fanele u va u khuvuriwile
◻ U ri ni malembe ya 16 kumbe ku tlula
◻ U kota ku tirha hi ku tirhandzela ngopfu-ngopfu hi mahelo-vhiki
◻ U ri phayona ra nkarhi hinkwawo leri hisekaka
◻ U kota ku endla ntirho lowu lavaka matimba
◻ U hanye kahle emirini
◻ U tiyimisele ku endla ntirho wun’wana ni wun’wana lowu u nyikiwaka wona
Xana ndzi nga tsarisa njhani?
✔ Tata fomo ya Regional Building Committee Volunteer Application (S-82)
✔ Yisa fomo leyi tatiweke eka Komiti ya Ntirho ya Vandlha ra n’wina
[Bokisi leri nga eka matluka 6]
Nxaxamelo Wa Swilo Leswi Faneleke Swi Tirhisiwa
Rhavi ri langutela nxaxamelo wa swilo leswi faneleke swi tirhisiwa eka Tiholo ta Mfumo letintshwa ni leti akiweke. Leswi swi katsa ku lava swilo ni ku swi xava swi tele, leswi endlaka leswaku swi chipa. Mavandlha ma khutaziwa ku endla xikombelo xa swilo leswi eka Ndzawulo yo Aka Tiholo ta Mfumo.
Rungula malunghana ni swilo leswi ni minxavo ya kona swi kumeka eka xiyenge lexi nge Documents lexi kumekaka eka Web site ya jw.org. Vakulu van’wana ni malandza ya vutirheli va nga swi kota ku vona swilo leswi eka Internet kutani va kopa tifomo ta ku endla xikombelo. Web site i ndlela ya nkoka leyi rhavi ri kotaka ku vulavurisana ni mavandlha ha yona; ku yi tirhisa swi hlayisa nkarhi ni mali.
• Lava Langutelaka Ku Akiwa Ka Tiholo Ta Mfumo
• Ku Hakela Tiholo Ta Mfumo
• Holo Ya Mfumo Leyi Fanelaka Ndhawu
• Mintlawa Yo Aka Tiholo Ta Mfumo
• Ku Hlawula Ndhawu Ni Ku Yi Tsarisa
• Komiti Yo Aka Ya Xifundzha
• Ndlela Yo Yi Khathalela
• Swilo Leswi Faneleke Swi Tirhisiwa
Ndyangu Wa Wena Wu Nga Pfuna Njhani?
Nkarhi na nkarhi vana kona loko ku basisiwa Holo ya Mfumo
Vana kona hi siku leri vandlha ra n’wina ri khathalelaka Holo Ya Mfumo ha rona
Dyondzisa vana va wena ku endla leswaku Holo ya Mfumo ni swihambukelo swi tshama swi basile
Vika swilo leswi faneleke swi lunghisiwa hi vamakwerhu lava khathalelaka Holo ya Mfumo
[Xifaniso lexi nga eka matluka 3]
Holo ya khale
[Xifaniso lexi nga eka matluka 3]
Loko ku akiwa Holo ya Mfumo leyintshwa
[Xifaniso lexi nga eka matluka 3]
Loko se Holo ya Mfumo leyintshwa yi herile
[Xifaniso lexi nga eka matluka 3]
Swirho swa Vandlha swi ri ni Ntlawa wo Aka