Xikwembu xi lava leswaku hi hanya hi ku rhula hi tsakile hilaha ku nga heriki emisaveni leyi nga paradeyisi!

Kambe, u nga ha tivutisa u ku, ‘Xana sweswo swi nga endlekisa ku yini?’ Bibele yi vula leswaku Mfumo wa Xikwembu wu ta endla sweswo naswona i ku rhandza ka Xikwembu leswaku vanhu hinkwavo va dyondza hi ta Mfumo wolowo ni xikongomelo xa xona.—Pisalema 37:11, 29; Esaya 9:7.

Xikwembu xi lava leswaku hi vuyeriwa.

Ku fana ni tatana lonene loyi a navelelaka vana vakwe leswinene, Tata wa hina wa le tilweni u lava leswaku hi tsaka hilaha ku nga heriki. (Esaya 48:17, 18) U tshembise leswaku loyi a “endlaka ku rhandza ka Xikwembu u [ta] tshama hi masiku.”—1 Yohane 2:17.

Xikwembu xi lava leswaku hi famba etindleleni ta xona.

Bibele yi vula leswaku Muvumbi wa hina u lava ku “hi letela tindlela ta yena” leswaku hi ta “famba emintileni ya yena.” (Esaya 2:2, 3) U hlengelete ‘vanhu va vito ra yena’ leswaku va byela vanhu van’wana hi ta ku rhandza ka yena emisaveni hinkwayo.—Mintirho 15:14.

Xikwembu xi lava leswaku hi xi gandzela hi vun’we.

Vugandzeri lebyi tengeke bya Yehovha byi hlanganisa vanhu hi rirhandzu ra xiviri ematshan’weni yo va hambanisa. (Yohane 13:35) I vamani lava namuntlha va dyondzisaka vavanuna ni vavasati ndlela yo tirhela Xikwembu hi vun’we kun’wana ni kun’wana? Ha ku rhamba leswaku u tikumela nhlamulo hi ku dyondza broxara leyi.

I tingani Timbhoni ta Yehovha leti u ti tivaka? Van’wana va hina hi nga ha va hi ri vaakelani va wena, vatirhi-kuloni kumbe vadyondzi-kuloni. Kumbe hi nga ha va hi tshame hi bula na wena hi Bibele. Kahle-kahle hi vamani naswona ha yini hi byela van’wana malunghana ni leswi hi swi pfumelaka?

Hi vanhu lava tolovelekeke. Hi huma eka mindhavuko ni swiyimo swo hambana-hambana. Van’wana va hina a va nghena tikereke to hambana-hambana, kasi van’wana a va nga pfumeli eka Xikwembu. Hambiswiritano, loko hi nga si va Timbhoni, hinkwerhu ka hina hi tinyike nkarhi wa ku kambisisa hi vukheta leswi Bibele yi swi dyondzisaka. (Mintirho 17:11) Hi pfumelelane ni leswi hi swi dyondzeke kutani hi tiendlela xiboho xo gandzela Yehovha Xikwembu.

Ha vuyeriwa loko hi dyondza Bibele. Ku fana ni munhu un’wana ni un’wana, hi boheka ku langutana ni swiphiqo ni ku tsana ka hina. Kambe endzhaku ko ringeta ku tirhisa milawu ya Bibele siku ni siku, vutomi bya hina byi antswile swinene. (Pisalema 128:1, 2) Xexo i xin’wana xa swivangelo leswi endlaka hi byela van’wana swilo leswinene leswi hi swi dyondzeke eBibeleni.

Hi hanya hi milawu ya Xikwembu. Milawu yoleyo leyi kumekaka eBibeleni, yi hi pfuna leswaku hi titwa hi hlayisekile naswona hi xixima van’wana ni ku endla leswaku hi va ni timfanelo to tanihi ku tshembeka ni musa. Yi endla leswaku vanhu lava yi tirhisaka va va lava hanyeke kahle va tlhela va gingiriteka, naswona yi kondletela vun’we endyangwini ni mahanyelo lamanene. Leswi hi tiyisekaka leswaku “Xikwembu a xi yi hi nghohe,” hi titeka hi ri ndyangu wa le misaveni hinkwayo lowu hlanganisiwaka hi tidyondzo leti hi pfumelaka eka tona, lowu nga riki na rivengo leri vangiwaka hi rixaka ni tipolitiki. Hambileswi hi tolovelekeke, swi hi endla hi va vanhu lava hlawulekeke.—Mintirho 4:13; 10:34, 35.

• I yini leswi Timbhoni ta Yehovha ti fanaka ni vanhu van’wana ha swona?

• Hi yihi milawu leyi Timbhoni ti yi dyondzeke loko ti dyondza Bibele?

Vanhu vo tala va anakanya leswaku vito leri nge, Timbhoni ta Yehovha i vito ra vukhongeri lebyintshwa. Hambiswiritano, emalembeni lama tlulaka 2 700 lama hundzeke, malandza ya Xikwembu xi ri xin’we xa ntiyiso a ma vitaniwa “timbhoni” ta xona. (Esaya 43:10-12) A hi tiviwa tanihi Swichudeni swa Bibele ku fikela hi 1931. Ha yini hi amukele vito leri nge, Timbhoni ta Yehovha?

Ri hlamusela Xikwembu xa hina. Hi ku ya hi matsalwa ya voko ya khale, vito ra Xikwembu leri nge, Yehovha ri humelela minkarhi ya magidi eBibeleni. Eka vuhundzuluxeri byo tala vito leri ri siviwe hi swithopo swo tanihi leswi nge, Hosi kumbe Xikwembu. Kambe, Xikwembu xa ntiyiso xi byele Muxe vito ra xona leri nge, Yehovha, xi ku: “Leri i vito ra mina ra hilaha ku nga riki na makumu.” (Eksoda 3:15) Hi ndlela yoleyo, xi tihambanise ni swikwembu leswin’wana hinkwaswo swa mavunwa. Ha tinyungubyisa hi ku byarha vito ro kwetsima ra Xikwembu.

Ri hlamusela ntirho wa hina. Eminkarhini ya khale vanhu vo tala va nyikele vumbhoni hi ripfumelo ra vona eka Yehovha, ku sukela eka Avele, wanuna wo lulama. Eka malembe-xidzana lama landzeleke, Nowa, Abrahama, Sara, Muxe, Davhida ni van’wana va joyine ‘papa leri lerikulu ra timbhoni.’ (Vaheveru 11:4–12:1) Tanihi leswi munhu a nga ha nyikelaka vumbhoni ehubyeni a yimelela munhu la nga riki na nandzu, na hina hi tiyimisele ku twarisa ntiyiso malunghana ni Xikwembu.

Hi tekelela Yesu. Bibele yi n’wi vitana “mbhoni yo tshembeka ni ya ntiyiso.” (Nhlavutelo 3:14) Yesu u vule leswaku u ‘twarise vito ra Xikwembu’ naswona u hambete a “nyikela vumbhoni malunghana ni ntiyiso” hi Xikwembu. (Yohane 17:26; 18:37) Hikwalaho, valandzeri va Kreste va xiviri va fanele va byarha vito ra Yehovha va tlhela va ri twarisa. Leswi hileswi Timbhoni ta Yehovha ti tikarhatelaka ku swi endla.

• Ha yini Swichudeni swa Bibele swi amukele vito leri nge, Timbhoni ta Yehovha?

• Yehovha u ni nkarhi wo tanihi kwihi a ri ni timbhoni emisaveni?

• I mani Mbhoni leyikulu ya Yehovha?