I khale Timbhoni ta Yehovha ti tiviwa hi dyondzo ya Bibele. Dyondzo yo hlawuleka yi lunghiseleriwa lava tirhisaka nkarhi wa vona wo tala entirhweni wo chumayela hi Mfumo leswaku va ‘hetisisa vutirheli bya vona hi xitalo.’—2 Timotiya 4:5.

Xikolo xa Ntirho wa Vuphayona. Loko phayona ri heta lembe ra rona ro sungula entirhweni wa nkarhi hinkwawo, ri tsarisiwa exikolweni lexi tekaka masiku ya tsevu lexi nga ha khomiwaka eHolweni ya Mfumo ya le kusuhi. Xikongomelo xa xikolo lexi i ku pfuna phayona leswaku ri tshinela eka Yehovha, ri va ni vutshila eka swiyenge hinkwaswo swo chumayela naswona ri hambeta ri phayona hi ku tshembeka.

Xikolo xa Vachumayeri va Mfumo. Xikolo lexi, lexi tekaka tin’hweti timbirhi, xi endleriwe ku letela maphayona lama nga ni ntokoto lama tsakelaka ku suka laha ma tshamaka kona ma ya chumayela kun’wana ni kun’wana laha ma lavekaka kona. Entiyisweni ma ri, “Hi mina loyi! Ndzi rhume,” ma tekelela Muevhangeli lonkulu, loyi a tshameke a va kona laha misaveni, ku nga Yesu Kreste. (Esaya 6:8; Yohane 7:29) Ku rhurhela ekule ni le kaya swi nga ha lava leswaku ma titoloveta ku hanya vutomi byo olova. Ndhavuko, maxelo ni swakudya swi nga ha va swi hambane hi ku helela ni leswi ma swi toloveleke. Nakambe swi nga ha lava leswaku ma dyondza ririmi lerintshwa. Xikolo lexi xi pfuna vamakwerhu va xinuna ni va xisati lava nga nghenelangiki vukati ni mimpatswa, lava nga exikarhi ka malembe ya 23 ku ya eka 65, leswaku va hlakulela timfanelo ta moya leti va nga ta ti lava eka xiavelo xa vona ni vuswikoti lebyi nga ta va pfuna leswaku va tirhisiwa hi ku helela hi Yehovha ni nhlengeletano yakwe.

Xikolo xa Bibele xa Giliyadi xa Watchtower. Hi Xiheveru, rito “Giliyadi” ri vula “Vumbhoni byo Tala.” Ku sukela loko xikolo xa Giliyadi xi simekiwile hi 1943, mathwasana yo tlula 8 000 lama leteriweke eka xona ma rhumeriwe tanihi varhumiwa leswaku ma ya nyikela vumbhoni ku ya fikela “emakun’wini ya misava,” naswona ku ve ni vuyelo lebyikulu. (Mintirho 13:47) Loko varhumiwa va fika ro sungula ePeru, a ku nga ri na mavandlha etikweni. Sweswi ku ni mavandlha yo tlula 1 000. Loko varhumiwa va fika eJapani, a ku ri ni Timbhoni leti nga fikiki eka khume etikweni. Sweswi ku ni Timbhoni to tlula 200 000. Khoso ya xikolo xa Giliyadi leyi tekaka tin’hweti ta ntlhanu yi katsa dyondzo leyi dzikeke ya Rito ra Xikwembu. Lava nga maphayona yo hlawuleka kumbe varhumiwa lava nga emarhavini kumbe entirhweni wo endzela mavandlha va rhambiwa exikolweni lexi ku ta kuma ndzetelo lowu dzikeke leswaku va pfuneta ku tiyisa ntirho lowu endliwaka emisaveni hinkwayo.

• Hi xihi xikongomelo xa Xikolo xa Ntirho wa Vuphayona?

• Xi endleriwe vamani Xikolo xa Vachumayeri va Mfumo?

Enhlengeletanweni ya hina a ku na vafundhisi lava hakeriwaka. Ematshan’weni ya sweswo, hilaha swi veke hakona loko vandlha ra Vukreste ri sungula, valanguteri lava fanelekaka va hlawuriwa leswaku va ta “risa vandlha ra Xikwembu.” (Mintirho 20:28) Vakulu lava i vavanuna lava kuleke hi tlhelo ra moya lava rhangelaka evandlheni naswona va ri risaka “ku nga ri hi ku sindzisiwa, kambe hi ku swi rhandza; ku nga ri hi ku rhandza mpindzulo wa vukanganyisi, kambe hi mapfundza.” (1 Petro 5:1-3) Va hi pfuna njhani?

Va hi khathalela ni ku hi sirhelela. Vakulu va nyikela nkongomiso lowu humaka eMatsalweni ni ku pfuna vandlha leswaku ri tshama ri ri ekusuhi na Yehovha. Leswi vakulu va tivaka leswaku Xikwembu xi va byarhise ntirho lowu wa nkoka, a va va tshikileli vanhu va xona kambe va hi sirhelela ni ku endla leswaku hi tsaka. (2 Vakorinto 1:24) Tanihi leswi murisi a khathalelaka nyimpfu yin’wana ni yin’wana ya yena, vakulu va ringeta ku tiva xirho xin’wana ni xin’wana xa vandlha.—Swivuriso 27:23.

Va hi dyondzisa ndlela yo endla ku rhandza ka Xikwembu. Vhiki rin’wana ni rin’wana va dyondzisa eminhlanganweni ya vandlha leswaku va tiyisa ripfumelo ra hina. (Mintirho 15:32) Nakambe vavanuna lava, lava tinyiketeleke va rhangela entirhweni wo chumayela, va tirha na hina ni ku hi letela eka swiyenge hinkwaswo swa ntirho wa nsimu.

Va khutaza un’wana ni un’wana wa hina. Leswaku va hi pfuna hi tiyisa vuxaka bya hina na Yehovha, vakulu va le vandlheni va hi endzela emakaya ya hina kumbe va vulavula na hina eHolweni ya Mfumo leswaku va hi pfuna ni ku hi chavelela hi ku tirhisa Matsalwa.—Yakobo 5:14, 15.

Ku engetela eka ntirho lowu va nga na wona evandlheni, nakambe vakulu vo tala va tirha mintirho ya ku tihanyisa ni ku va ni vutihlamuleri emindyangwini leswi endlaka leswaku va tshama va khomekile. Vamakwerhu lava, lava tirhaka hi matimba va faneriwa hi ku xiximiwa.—1 Vatesalonika 5:12, 13.

• Hi wihi ntirho wa vakulu evandlheni?

• Vakulu va swi kombisa njhani leswaku va hi rhandza ha un’we wa hina?

Bibele yi hlamusela hi mintlawa yimbirhi ya vavanuna va Vakreste lava nga ni vutihlamuleri evandlheni—“valanguteri ni malandza ya vutirheli.” (Vafilipiya 1:1) Hi ntolovelo, evandlheni rin’wana ni rin’wana ku ni vakulu ni malandza ya vutirheli. Hi yihi mintirho leyi malandza ya vutirheli ma yi endlaka leswaku hi ta vuyeriwa?

Ma pfuna huvo ya vakulu. Malandza ya vutirheli i vavanuna lava hlutekeke emianakanyweni, lava tshembekaka ni lava nga ni vukheta, van’wana i vatsongo kasi van’wana i vakulu. Ma endla mintirho ya nkoka evandlheni. Leswi swi endla leswaku vakulu va kota ku dzikisa mianakanyo ya vona eka ntirho wo dyondzisa ni wo risa.

Ma endla mintirho yo hambana-hambana. Malandza ya vutirheli man’wana ma averiwa ku va varindzi leswaku ma amukela hinkwavo lava taka eminhlanganweni. Man’wana ma tirha eka swa mpfumawulo, ma khathalela minkandziyiso, ma tirha eka tiakhawunti ta vandlha ma tlhela ma avela swirho swa vandlha nsimu leyi swi faneleke swi yi tirha. Ma tlhela ma pfuneta eku khathaleleni ka Holo ya Mfumo. Vakulu va nga ha ma kombela leswaku ma khathalela lava dyuhaleke. Ku nga khathariseki mintirho leyi malandza ya vutirheli ma averiwaka yona, ku tirha ka wona hi ku tiyimisela swi endla leswaku vandlha ri ma xixima.—1 Timotiya 3:13.

Ma hi vekela xikombiso lexinene tanihi vavanuna va Vakreste. Malandza ya vutirheli ma hlawuriwe hikwalaho ka timfanelo ta wona ta moya letinene. Loko ma nyikela tinkulumo eminhlanganweni, ma tiyisa ripfumelo ra hina. Leswi ma hi vekelaka xikombiso lexinene entirhweni wa nsimu, ma hi pfuna leswaku hi hiseka swinene. Hikwalaho ka leswi ma tirhisanaka kahle ni vakulu, ma endla leswaku evandlheni ku va ni ntsako ni vun’we. (Vaefesa 4:16) Hi ku famba ka nkarhi, na wona ma nga ha fanelekela ku tirha tanihi vakulu.

• Xana malandza ya vutirheli i vanhu va njhani?

• Malandza ya vutirheli ma ri pfuna njhani vandlha leswaku ri va ni vun’we?