Hakanyingi Matsalwa ya Vukreste ya Xigriki ma vulavula hi Barnaba na muapostola Pawulo. Vavanuna lava a va tirha tanihi valanguteri va miganga, va endzela mavandlha ya lembe-xidzana ro sungula. Ha yini? A va khathala swinene hi vuhlayiseki bya vamakwavo va vona va moya. Pawulo u vule leswaku a a lava ku ‘tlhela a endzela vamakwavo’ leswaku a ta vona leswaku va njhani. A a tiyimisele ku famba tikhilomitara ta madzana leswaku a ta va tiyisa. (Mintirho 15:36) Loku i ku navela loku valanguteri va miganga va nga na kona namuntlha.

Va endzele ku hi khutaza. Mulanguteri ha un’we wa muganga u endzela mavandlha ya kwalomu ka 20 kumbe ku tlula, a heta vhiki a ri eka vandlha ro karhi kambirhi hi lembe. Hi nga vuyeriwa swinene eka mintokoto ya vamakwerhu lava ni le ka mintokoto ya vasati va vona loko va tekile. Va endla matshalatshala ya ku tiva lavatsongo ni lavakulu naswona va tiyimisele ku famba na hina entirhweni wa nsimu ni le ka tidyondzo ta hina ta Bibele. Valanguteri lava va khutaza vakulu naswona leswaku va hi tiyisa, va nyikela tinkulumo leti khutazaka eminhlanganweni ni le tinhlengeletanweni.—Mintirho 15:35.

Va kombisa leswaku va hi rhandza hinkwerhu. Valanguteri va miganga va khathala swinene hi xiyimo xa moya xa mavandlha. Va hlangana ni vakulu ni malandza ya vutirheli leswaku va langutisa nhluvuko lowu endliweke ni ku va nyika swiringanyeto leswi pfunaka swa ndlela leyi va nga hetisisaka vutihlamuleri bya vona ha yona. Va pfuna maphayona leswaku ma kota ku humelela ensin’wini naswona va tsakela ku tiva vanhu lavantshwa lava hlanganyelaka ni vandlha ni ku twa nhluvuko lowu va wu endlaka hi tlhelo ra moya. Un’wana ni un’wana wa vamakwerhu lava, wa tinyikela hi ku tirhandzela leswaku a va “mutirhi-kulorhi leswaku [hi] vuyeriwa.” (2 Vakorinto 8:23) Hi fanele hi tekelela ripfumelo ni ku tinyiketela ka vona eka Xikwembu.—Vaheveru 13:7.

• Hi xihi xikongomelo xa ku endza ka valanguteri va miganga emavandlheni?

• Hi nga vuyeriwa njhani hi ku endza ka vona?

Loko mhangu yi hlasela, hi xihatla Timbhoni ta Yehovha ti sungula ku pfuna vamakwerhu lava hlaseriweke. Matshalatshala wolawo ma kombisa rirhandzu ra hina leri tiyeke eka van’wana. (Yohane 13:34, 35; 1 Yohane 3:17, 18) Hi pfuna hi tindlela tihi?

Hi nyikela hi mali. Loko ku va ni ndlala leyikulu eYudiya, Vakreste va lembe-xidzana ro sungula va le Antiyoka va rhumele mali leswaku va pfuna vamakwavo va vona va moya. (Mintirho 11:27-30) Hilaha ku fanaka, loko hi twa leswaku vamakwerhu eswiphen’wini swin’wana swa misava va langutane ni swiyimo swo tika, hi va rhumelela minyikelo ku suka emavandlheni ya hina leswaku yi va pfuna hi leswi va swi pfumalaka eminkarhini yo tika.—2 Vakorinto 8:13-15.

Hi va pfuna hi tindlela to hambana-hambana. Vakulu lava nga le ndhawini leyi mhangu yi humeleleke eka yona va lava xirho xin’wana ni xin’wana xa vandlha ku tiyisekisa leswaku xi hlayisekile. Komiti ya mphalalo yi kongomisa leswaku lava hlaseriweke va kuma swakudya, mati yo tenga, swiambalo, ndhawu yo tshama ni ku pfuniwa hi swa vutshunguri. Timbhoni to tala leti nga ni vutshila lebyi lavekaka ti ya laha ku humeleleke mhangu leswaku ti pfuneta hi ku tirhandzela eka ntirho wo phalala kumbe wo lunghisa makaya ni Tiholo ta Mfumo leti onhakeke. Ntsako lowu hi vaka na wona tanihi nhlengeletano ni ntokoto lowu hi wu kumaka hi ku tirha swin’we swi endla leswaku hi va ni vatirhi lava fanelekaka hi nkarhi wa maxangu. Hambileswi hi pfunaka “lava nga swin’we na hina eripfumelweni,” hi tlhela hi pfuna van’wana loko xiyimo xi hi pfumelela, ku nga khathariseki vukhongeri bya vona.—Vagalatiya 6:10.

Hi va chavelela hi Matsalwa. Lava hlaseriweke va lava nchavelelo. Hi nkarhi wolowo, hi kuma matimba eka Yehovha, “Xikwembu xa nchavelelo hinkwawo.” (2 Vakorinto 1:3, 4) Hi ntsako hi va chavelela hi switshembiso swa le Bibeleni lava nga ni gome, hi va tiyisekisa leswaku ku nga ri khale Mfumo wa Xikwembu wu ta herisa makhombo hinkwawo lama endlaka leswaku hi va ni switlhavi ni ku xaniseka.—Nhlavutelo 21:4.

• Ha yini Timbhoni ti kota ku pfuna hi xihatla hi nkarhi wa timhangu?

• Hi nga va chavelela njhani hi tlhelo ra moya lava poneke?

Emahlweninyana ka rifu rakwe, Yesu u bule ni vadyondzisiwa va yena va mune, ku nga Petro, Yakobo, Yohane na Andriya. Loko Yesu a ri karhi a profeta hi xikombiso xa vukona bya yena emasikwini yo hetelela, u vutise xivutiso lexi xa nkoka: “Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke?” (Matewu 24:3, 45; Marka 13:3, 4) Yesu a a tiyisekisa vadyondzisiwa vakwe leswaku yena “n’wini” wa vona, a a ta hlawula lava a va ta phamela valandzeri va yena swakudya swa moya nkarhi na nkarhi, enkarhini wa makumu. I vamani lava a va ta vumba hlonga leri?

I ntlawa lowutsongo wa valandzeri va Yesu lava totiweke. “Hlonga” i Huvo leyi Fumaka ya Timbhoni ta Yehovha. Ri phamela vagandzeri-kulobye va Yehovha swakudya swa moya leswi fikaka hi nkarhi. Hi titshege hi hlonga leri ro tshembeka leswaku ri tshama ri ri karhi ri hi nyika “mpimo . . . wa mphakelo wa swakudya hi nkarhi lowu faneleke.”—Luka 12:42.

Ri langutela ndyangu wa Xikwembu. (1 Timotiya 3:15) Yesu u nyike hlonga vutihlamuleri lebyikulu bya ku langutela ntirho wa xiphemu xa laha misaveni xa nhlengeletano ya Yehovha—ri langutela miako ya yona, ri kongomisa ntirho wo chumayela ri tlhela ri hi dyondzisa hi ku tirhisa mavandlha ya hina. Hikwalaho, leswaku ri hi nyika leswi hi swi lavaka hi nkarhi lowu hi swi lavaka ha wona, “hlonga ro tshembeka ni ro tlhariha” ri phamela swakudya swa moya hi ku tirhisa tibuku leti hi ti tirhisaka ensin’wini, ni hi minhlangano ya vandlha ni minongonoko ya le tinhlengeletanweni.

Hlonga ra tshembeka eka ntiyiso wa Bibele naswona ri lerisiwe ku chumayela mahungu lamanene, naswona ri tlharihile eka ndlela leyi ri khathalelaka ha yona swilo swa Kreste swa laha misaveni. (Mintirho 10:42) Yehovha u koka vanhu vo tala leswaku va va Timbhoni naswona u pfuna hlonga ro tshembeka ni ro tlhariha leswaku ri phamela swakudya swa moya hi xitalo.—Esaya 60:22; 65:13.

• I vamani lava hlawuriweke hi Yesu leswaku va ta phamela vadyondzisiwa va yena hi tlhelo ra moya?

• Xana hlonga ri tshembekile ni ku tlhariha hi tindlela tihi?