Hi lembe-xidzana ro sungula ntlawa lowutsongo wa “vaapostola ni vakulukumba eYerusalema” wu tirhe tanihi huvo leyi fumaka leswaku wu endla swiboho swa nkoka wu yimela vatotiwa hinkwavo va vandlha ra Vukreste. (Mintirho 15:2) Va kote ku endla swiboho hi vun’we hikwalaho ko kambisisa leswi Matsalwa ma swi vulaka ni ku pfumelela moya wa Xikwembu wu va kongomisa. (Mintirho 15:25) Ninamuntlha ku endliwa leswi fanaka.

Yi tirhisiwa hi Xikwembu leswaku yi endla ku rhandza ka xona. Vamakwerhu lava totiweke lava nga swirho swa Huvo leyi Fumaka va titshega swinene hi Rito ra Xikwembu naswona va ni ntokoto wa ku endla swiboho hinkwaswo. Vhiki rin’wana ni rin’wana ya hlangana leswaku yi kambisisa swilaveko leswi khumbaka vamakwerhu emisaveni hinkwayo. Ku fana ni hi lembe-xidzana ro sungula, yi nyikela switsundzuxo leswi humaka eBibeleni hi ku tirhisa mapapila kumbe valanguteri va miganga ni van’wana. Sweswo swi endla leswaku vanhu va Xikwembu va va ni mianakanyo yin’we va tlhela va endla swilo hi ndlela leyi fanaka. (Mintirho 16:4, 5) Huvo leyi Fumaka yi langutela ku lunghiseleriwa ka swakudya swa moya, yi khutaza ku rhangisiwa ka ntirho wo chumayela hi Mfumo yi tlhela yi langutela ku hlawuriwa ka vamakwerhu lava faneleke ku va ni vutihlamuleri.

Yi landzela nkongomiso wa moya wa Xikwembu. Huvo leyi Fumaka yi langutele eka Hosi leyi Lawulaka ya Vuako Hinkwabyo, Yehovha, ni le ka Nhloko ya vandlha, Yesu, leswaku yi kuma nkongomiso. (1 Vakorinto 11:3; Vaefesa 5:23) Swirho swa yona a swi ti teki tanihi varhangeri va vanhu va Xikwembu. Vona swin’we ni Vakreste hinkwavo lava totiweke, va “[hambeta] va landzela Xinyimpfana [Yesu] ku nga khathariseki leswaku xi ya kwihi.” (Nhlavutelo 14:4) Huvo leyi Fumaka ya tsaka loko hi yi khongelela.

• I vamani lava a va ri swirho swa huvo leyi fumaka hi lembe-xidzana ro sungula?

• Huvo leyi Fumaka ya manguva lawa yi wu lava njhani nkongomiso wa Xikwembu?

Hi Xiheveru vito leri nge, Bethele ri vula “Yindlu ya Xikwembu.” (Genesa 28:17, 19) Vito leri ra yi fanela miako leyi akiweke hi Timbhoni ta Yehovha emisaveni hinkwayo laha eka yona ku kongomisiwaka ni ku seketela ntirho wo chumayela. Huvo leyi Fumaka yi tirha entsindza wa misava hinkwayo wa Timbhoni ta Yehovha eXifundzheni-nkulu xa New York, le U.S.A. naswona yi langutela mintirho hinkwayo leyi endliwaka emarhavini ematikweni yo tala. Tanihi ntlawa, lava tirhaka kwalaho va vitaniwa ndyangu wa Bethele. Ku fana ni ndyangu va tirha, va dya ni ku dyondza swin’we Bibele hi vun’we.—Pisalema 133:1.

Lava tirhaka eBethele va tirha hi ku tinyiketela. Ekaya rin’wana ni rin’wana ra Bethele ku ni Vakreste va xinuna ni va xisati lava tinyiketeleke leswaku va endla ku rhandza ka Xikwembu ni ku rhangisa Mfumo wa xona nkarhi hinkwawo. (Matewu 6:33) A ku na loyi a holeriwaka kambe hinkwavo va nyikiwa makamara, swakudya ni mali yitsongo leswaku va ta kota ku khathalela swilaveko swa vona. Un’wana ni un’wana eBethele u ni ntirho lowu a wu endlaka. Van’wana va tirha ehofisini, ekhixini, laha ku gandliseriwaka tibuku, ku basisa tindlu, laha ku hlantsweriwaka kona, endhawini yo lunghisa swilo ni mintirho yin’wana.

I ndhawu leyi vatirhi va kona va tshamaka va khomekile hi ku seketela ntirho wa Mfumo. Xikongomelo-nkulu xa Bethele yin’wana ni yin’wana i ku endla leswaku ntiyiso wa Bibele wu fikelela vanhu vo tala hilaha swi nga kotekaka hakona. Ni broxara leyi yi kandziyisiwe kona. Yi tsariwe hi ku kongomisiwa hi Huvo leyi Fumaka, yi rhumeriwa hi ku tirhisa khompyuta eka mintlawa ya vahundzuluxeri va madzana emisaveni hinkwayo, yi kandziyisiwa emichinini leyi nga ni rivilo swinene leyi kumekaka eka Tibethele tin’wana kutani yi rhumeriwa eka mavandlha lama tlulaka 110 000. Eka mintirho hinkwayo leyi endliwaka, mindyangu ya Bethele yi seketela ku endliwa ka ntirho wa xihatla ku tlula hinkwayo, ku nga ku chumayeriwa ka mahungu lamanene.—Marka 13:10.

• I vamani lava tirhaka eBethele naswona hi wahi malunghiselelo lawa va endleriweke wona?

• Hi wihi ntirho wa xihatla lowu seketeriwaka hi mintirho leyi endliwaka eBethele yin’wana ni yin’wana?

Swirho swa ndyangu wa Bethele swi tirha etindzawulweni to hambana-hambana, swi khathalela ntirho wo chumayela etikweni rin’we kumbe yo hlayanyana. Swi nga ha tirha eka mintlawa ya vuhundzuluxeri, swi kandziyisa timagazini, swi hlanganisa tibuku, swi tirha laha ku hlayisiwaka tibuku, swi rhekhoda rungula leri ngo yingiseriwa kunene ni ku endla tivhidiyo kumbe swi khathalela timhaka tin’wana ta le ndhawini yoleyo.

Komiti ya Rhavi yi langutela ntirho. Huvo leyi Fumaka yi byarhise Komiti ya Rhavi ku langutela leswaku hofisi yin’wana ni yin’wana ya rhavi yi tirha kahle naswona komiti yoleyo yi vumbiwa hi vakulu vanharhu lava fanelekaka kumbe lava engetelekeke. Komiti yoleyo yi tivisa Huvo leyi Fumaka hi nhluvuko wa ntirho etikweni rin’wana ni rin’wana leri languteriwaka hi yona yi tlhela yi yi tivisa hi swiphiqo swihi na swihi leswi nga ha vaka kona. Swiviko swoleswo swi pfuna Huvo leyi Fumaka ku endla xiboho xa leswaku hi tihi timhaka leti nga tlhuvutsiwaka eka minkandziyiso ya le nkarhini lowu taka ni le minhlanganweni ni le tinhlengeletanweni. Vayimeri va Huvo leyi Fumaka va rhumeriwa nkarhi na nkarhi leswaku va endzela marhavi va tlhela va nyikela nkongomiso eka Tikomiti ta Marhavi malunghana ni ndlela leyi ti faneleke ti swi endla ha yona swiavelo swa tona. (Swivuriso 11:14) Ku hleriwa nongonoko wo hlawuleka lowu katsaka nkulumo leyi nyikeriwaka hi muyimeri wa ntsindza wa Timbhoni ta Yehovha wa rhavi leswaku a khutaza vanhu lava tshamaka ensin’wini ya rhavi rolero.

Ku pfuniwa mavandlha ya kwalaho. Vamakwerhu lava nga ni vutihlamuleri erhavini va nyika mpfumelelo wa ku simekiwa ka mavandlha lamantshwa. Vamakwerhu lava va tlhela va kongomisa ntirho wa maphayona, varhumiwa ni valanguteri va miganga lava nga le nsin’wini ya rhavi rolero. Va hlela tinhlengeletano, ku akiwa ka Tiholo ta Mfumo letintshwa naswona va tiyiseka leswaku minkandziyiso yi rhumeriwa emavandlheni leswaku yi enerisa swilaveko swa wona. Swilo hinkwaswo leswi endliwaka erhavini swi hoxa xandla leswaku ntirho wo chumayela wu endliwa hi ndlela leyi hlelekeke.—1 Vakorinto 14:33, 40.

• Tikomiti ta Marhavi ti yi pfuna njhani Huvo leyi Fumaka?

• Hi swihi swilo leswi endliwaka erhavini?