Leswaku hi kota ku chumayela kahle “mahungu lamanene” eka “matiko hinkwawo ni tinyimba hinkwato ni tindzimi hinkwato ni vanhu hinkwavo,” hi humesa minkandziyiso hi tindzimi to tlula 750. (Nhlavutelo 14:⁠6) Hi swi kotisa ku yini ku endla ntirho lowu wo tika? Hi pfuniwa hi swirho leswi nga eka ndzawulo ya vutsari leswi nga le marhavini yo karhi ni hi ntlawa wa vahundzuluxeri lava tirhaka hi ku tirhandzela, hinkwavo i Timbhoni ta Yehovha.

Minkandziyiso yi ta yi tsariwe hi Xinghezi. Huvo leyi Fumaka yi langutela mintirho leyi endliwaka hi Ndzawulo ya Vutsari entsindza wa hina wa misava hinkwayo. Ndzawulo leyi yi langutela mintirho ya vatsari lava tirhaka entsindza wa hina swin’we ni le marhavini man’wana. Ku tsala hi swilo swo hambana-hambana swi endla leswaku vanhu va tinxaka to tala va tsakela minkandziyiso ya hina.

Rungula ri rhumeriwa eka vahundzuluxeri. Endzhaku ka loko rungula leri tsariweke ri kamberiwile naswona ku tiyisekiwa leswaku ri kahle, hi ku tirhisa khompyuta ri rhumeriwa eka mintlawa ya vahundzuluxeri emisaveni hinkwayo, lava ri hundzuluxelaka, va ri kambela ni ku ri hlaya. Va tikarhatela ku hlawula ‘marito lama pakanisaka ya ntiyiso’ lawa ma nga ta humesa mongo wa rungula leri tsariweke hi Xinghezi.—Eklesiasta 12:10.

Tikhompyuta ti hatlisisa ntirho. Khompyuta a yi tiendleli ntirho. Hambiswiritano, ntirho lowu endliwaka hi vatsari ni vahundzuluxeri wu nga hatlisisiwa hi ku tirhisa tikhompyuta ni swilo swo endla ndzavisiso ha swona. Timbhoni ta Yehovha ti endle progreme ya khompyuta leyi vitaniwaka Fambiselo Ra Elektroniki Ro Kandziyisa Hi Tindzimi To Tala (Multilanguage Electronic Publishing System [MEPS]) leyi eka yona rungula ri nga nghenisiwaka hi tindzimi ta madzana, ku hoxiwa ni swifaniso leswi fambisanaka ni rungula rolero kutani ri lulamiseriwa ku kandziyisiwa.

Ha yini hi endla matshalatshala lawa hinkwawo, hambi eka tindzimi leti vulavuriwaka hi vanhu va magidi ma nga ri mangani ntsena? Hikuva i ku rhandza ka Yehovha leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.”—1 Timotiya 2:3, 4.

• I ntirho wihi lowu katsekaka eku kandziyisiweni ka minkandziyiso ya hina?

• Ha yini hi hundzuluxela minkandziyiso ya hina hi tindzimi to tala swinene?

Nhlengeletano ya hina yi kandziyisa ni ku hangalasa madzana ya timiliyoni ta Tibibele ni minkandziyiso yin’wana lembe ni lembe handle ko hakerisa. Hi aka Tiholo ta Mfumo ni marhavi hi tlhela hi swi khathalela. Hi seketela magidi ya vatirhi va le Bethele ni varhumiwa naswona hi tlhela hi pfuneta laha ku veke ni mhangu. Kambe u nga ha tivutisa leswaku, ‘Xana mali yo endla swilo leswi hinkwaswo yi huma kwihi?’

A hi humesi vukhume kumbe ku lava minhlengo. Hambileswi ku seketela ntirho wa hina wo chumayela swi durhaka, a hi kombeli mali. Eka nkarhi lowu nga tlulaka dzana ra malembe lama hundzeke, nkandziyiso wa hina wa vumbirhi wa magazini wa Xihondzo xo Rindza wu vule leswaku hi tshemba leswaku Yehovha wa hi seketela naswona “a hi nge tshuki hi kombele leswaku vanhu va hi pfuna”—naswona a hi si tshama hi kombela!—Matewu 10:8.

Mintirho ya hina yi seketeriwa hi minyikelo ya ku tirhandzela. Vanhu vo tala va tlangela ntirho wa hina wo dyondzisa Bibele kutani va nyikela leswaku wu hambeta wu endliwa. Hi ku tirhandzela Timbhoni na tona ti nyikela hi nkarhi wa tona, matimba ya tona, mali ni swilo swin’wana leswaku ku endliwa ntirho wa Xikwembu emisaveni hinkwayo. (1 Tikronika 29:⁠9) EHolweni ya Mfumo ni le tinhlengeletanweni ta hina ku ni mabokisi ya minyikelo laha un’wana ni un’wana loyi a navelaka ku nyikela a nyikelaka eka wona. Kumbe u nga nyikela hi ku tirhisa website ya jw.org/ts. Etindhawini to tala, mali leyi hi yi kumaka yi huma eka swisiwana swo fana ni noni leyi nga xisiwana leyi Yesu a vulavuleke kahle ha yona, leyi yi nga hoxa swimalana swimbirhi swa nsimbi eka vuhlayiselo bya xuma etempeleni. (Luka 21:​1-⁠4) Hikwalaho nkarhi na nkarhi un’wana ni un’wana a nga ‘veka swo karhi etlhelo’ leswaku a ta nyikela “hilaha a boheke hakona embilwini yakwe.”​—⁠1 Vakorinto 16:⁠2; 2 Vakorinto 9:⁠7.

Ha tshemba leswaku Yehovha u ta hambeta a susumetela timbilu ta lava va lavaka ku n’wi ‘xixima hi swilo swa vona swa nkoka’ eku seketeleni ka ntirho wa Mfumo leswaku ku rhandza ka yena ku ta hetiseka.—Swivuriso 3:9.

• I yini lexi endlaka leswaku nhlengeletano ya hina yi hambana ni vukhongeri byin’wana?

• Xana minyikelo ya ku tirhandzela leyi nyikeriwaka yi tirhisiwa njhani?

Tanihi leswi rito Holo ya Mfumo ri vulaka ndhawu leyi ku dyondziwaka Bibele, leswi swi dyondziwaka kwalaho swi dzike eka Mfumo wa Xikwembu lowu a ku ri nhloko-mhaka ya rungula ra Yesu.—Luka 8:1.

I tindhawu ta vugandzeri bya ntiyiso etikweni. ETiholweni ta Mfumo hi laha Timbhoni ta Yehovha ti hlelaka ntirho wo chumayela endhawini leyi ti tshamaka eka yona. (Matewu 24:14) Tiholo ta Mfumo ta hambana hi ku kula ni maakelo, kambe hinkwato ti akiwe hi ndlela leyinene naswona to tala ti tirhisiwa hi mavandlha yo tala. Emalembeni ya sweswinyana, hi ake Tiholo ta Mfumo letintshwa ta makume ya magidi (hi xiringaniso ku nga ta ntlhanu siku ni siku) leswaku hi ta kota ku langutana ni ku andza ka mavandlha ya hina lamantshwa. Xana leswi swi koteka njhani?—Matewu 19:26.

Ti akiwa hi minyikelo leyi nyikeriwaka eka bokisi ra ku akiwa ka Tiholo ta Mfumo emisaveni hinkwayo. Minyikelo leyi, yi rhumeriwa erhavini leswaku yi ta kota ku pfuna mavandlha lama lavaka ku aka kumbe ku lunghisa Holo ya Mfumo.

Ti akiwa hi vatirhi va ku tirhandzela vo hambana-hambana. Ematikweni yo tala ku hleriwe Mintlawa yo Aka Tiholo ta Mfumo. Mintlawa ya vatirhi va ku tirhandzela yi suka evandlheni rin’wana yi ya eka rin’wana etindhawini ta le tikweni rero, hambi ku ri eka tindhawu ta le makaya leswaku ma ya akela mavandlha ya kwalaho Tiholo ta Mfumo. Ematikweni man’wana, ku hlawuriwe Timbhoni leti fanelekaka leswaku ti langutela ku akiwa ni ku lunghisiwa ka Tiholo ta Mfumo exifundzheni xa tona. Hambileswi endhawini yin’wana ni yin’wana leyi ku akiwaka eka yona ku nga ni vatirhi va ku tirhandzela lava nga ni vutshila, swirho swa vandlha ra kwalaho swi tirha hi ku tirhandzela eka ntirho lowukulu wo aka. Moya wa Yehovha ni vanhu vakwe lava tirhaka hi moya-xiviri hinkwawo swi endla leswaku ku aka loku ku humelela.—Pisalema 127:1; Vakolosa 3:23.

• WHa yini tindhawu ta hina ta vugandzeri ti vitaniwa Tiholo ta Mfumo?

• Swi kotekisa ku yini leswaku Tiholo ta Mfumo ti akiwa emisaveni hinkwayo?