Ku Chumayela Ni Ku Dyondzisa eMisaveni Hinkwayo

Maine, U.S.A.: Hi ku landzela xikombiso xa Yesu, vamakwerhu va hina i “vaphasi va vanhu”

MISAVA HINKWAYO

• MATIKO 239

• VAHUWELERI 7 782 346

• NTSENGO WA TIAWARA LETI HETIWEKE EVUTIRHELINI BYA NSIMU 1 748 697 447

• TIDYONDZO TA BIBELE 8 759 988

AFRIKA

• MATIKO 58

• VAAKA-TIKO 968 989 710

• VAHUWELERI 1 312 429

• TIDYONDZO TA BIBELE 2 999 639

A A Nga Fanelanga A Humesa Khwiri

EAddis Ababa, laha ku nga ntsindza wa Ethiopia, ku tshama n’wini wa xitolo loyi a vuriwaka Saba. Siku rin’wana, vamakwerhu vambirhi va xisati va n’wi endzerile va n’wi khomele magazini wa Xalamuka! lowu vulavulaka hi ku humesa khwiri. Saba u va rhurherile kutani a va byela a ri karhi a rila leswaku a a ehleketa hi ku humesa khwiri. Loko va ri karhi va bula hi mhaka yoleyo, havunharhu ka vona va khumbekile kutani va sungula ku rila. Hi siku rero, Saba u endle xiboho xo hlayisa n’wana wakwe kutani a hlamusela nuna wakwe xivangelo xa kona. Hi ku famba ka nkarhi, u veleke n’wana wa nhwanyana wo saseka. U tlhele a sungula ku dyondza Bibele kutani a khuvuriwa. Sweswi i phayona leri tsakeke. Nakambe nuna wakwe u dyondzeriwe Bibele kutani a va makwerhu wa hina naswona hi April 2012, vana van’wana va vona vambirhi va khuvuriwile.

‘Xana Swi Nga Koteka Leswaku Hi Vulavula Na Yena?’

Mulanguteri wa xifundzha wa le Ethiopia a a ri karhi a chumayela hi yindlu ni yindlu ni makwerhu un’wana. Emutini wun’wana, va kume wansati loyi a tirhaka kwalaho kutani va n’wi kombela ku vulavula ni wanuna wa muti. Loko a va byela leswaku sweswo a swi nge koteki, va kombele ku siyela n’wini wa muti minkandziyiso. U ye a ya kombela mpfumelelo eka wanuna wa muti kutani loko a vuya a vula leswaku a a lava ku rhanga a yi vona.

Kutani vamakwerhu va n’wi nyike magazini leswaku a ya n’wi komba. Endzhaku ka timinete ti nga ri tingani, u vuyile kutani a vula leswaku u pfumerile ku wu hlaya. Hiloko un’wana wa vamakwerhu a ku: “Loko a nga humi, xana swi nga koteka leswaku hi nghena kutani hi ya vulavula na yena?” Nakambe mutirhi yoloye u ye a ya n’wi vutisa. Hi nkarhi wolowo u ye a ya hlwelanyana ku tlula eku sunguleni naswona vamakwerhu se a va tivutisa loko a ta tlhela a vuya. Eku heteleleni u vuyile kutani a va byela leswaku va nghena. Vamakwerhu va kume leswaku n’wini wa muti, loyi ku nga Yirgu, a a dyuharile naswona a a ri ni malembe ya khume a tshama a etlele emubedweni a nga koti ku pfuka hambi ku ri ku tshama. Xivangelo lexi endleke leswaku wansati yoloye a teka nkarhi wo leha hileswi a ha n’wi pfuna ku ambala ni ku basisa kamara.

Vamakwerhu va n’wi chumayele mahungu lamanene. Hikwalaho ko tsakisiwa hileswi a swi tweke, Yirgu u amukele dyondzo ya Bibele. Loko va ri karhi va ya emahlweni va dyondza, rihanyo rakwe ri ve leri antswaka. Endzhaku ka nkarhi, se a swi kota ku pfuka emubedweni kutani a famba-famba hi xitulu xa lava lamaleke. A swi tekanga nkarhi leswaku a sungula ku ya eminhlanganweni naswona u khuvuriwile entsombanweni wa muganga lowu veke kona sweswinyana.

Tibuku Ta Kereke Ya Tata Wakwe

Calvin loyi a tshamaka eZimbabwe, a a ri ni malembe ya mune loko tata wakwe a fa a n’wi siya ni bege leyi a yi ri ni Vuhundzuluxeri Bya Misava Leyintshwa ni buku leyi nge Vuprofeta Bya Esaya—I Rivoningo Eka Vanhu Hinkwavo, Vholumo 1 ntsena. A a byele Calvin a ku: “Khomelela eka kereke leyi kandziyiseke tibuku leti. Yi dyondzisa ntiyiso.”

Loko mana wakwe a fa, Calvin u ye a ya tshama ni kokwa wakwe wa xisati. Ku ringana malembe ya mune Calvin a ri karhi a ala ku ya ekerekeni ya kokwa wakwe, a phikelela a vula leswaku siku rin’wana u ta kuma “kereke” leyi kandziyiseke minkandziyiso leyi tata wakwe a n’wi nyikeke yona.

Siku rin’wana, kokwa wa mufana yoloye u hlangane ni un’wana wa vamakwerhu va hina va xisati. Leswi a a nga swi tivi leswaku a a ri Mbhoni, u n’wi hlamusele leswaku u ni ntukulu loyi a omeke nhloko loyi a nga laviki ku ya ekerekeni yakwe. Ematshan’weni ya sweswo, hi Tisonto u hlaya buku leyi a siyeriweke yona hi tata wakwe. Makwerhu wa xisati u vutise vito ra buku ya kona. Hiloko kokwa wakwe a vula leswaku u anakanya leswaku a yi ri “yin’wana ya tibuku ta vuphukuphuku ta Mawatchtower.”

Makwerhu wa xisati u vule leswaku a a ta tsakela ku hlangana ni mufana yoloye. Loko a hlangana na Calvin a a tsake no tlurisa. Makwerhu wa xisati u nambe a sungula ku dyondza na yena Bibele a tirhisa buku leyi nge Xana Bibele Yi Dyondzisa Yini Hakunene? naswona u nambe a sungula ku ya eminhlanganweni ku nga khathariseki nkaneto wa tihanyi wa kokwa wakwe wa xisati. U tiyimisele ku namarhela ntiyiso naswona u wu langutele hi mahlo-ngati nkarhi wa ku pfuxiwa ka vafi laha a nga ni ntshembo wo tlhela a hlangana ni mana wakwe swin’we ni tata wakwe. Calvin u khuvuriwe hi August 2012.

“Xikwembu Lexi U Xi Gandzelaka Xi Ni Matimba”

Caro u tshama eUganda. Endzhaku ka n’hweti a sungule ku dyondza Bibele, nuna wakwe, Martin, loyi a a loya, u sungule ku n’wi kaneta swinene. U te: “Va le hansi a va nge he ngheni laha ndlwini hikwalaho ka tibuku ta wena.” U n’wi xanisile ni ku xungeta ku n’wi dlaya loko a nga tshiki ku dyondza Bibele. U tlhele a tshika ku wundla ndyangu wakwe. Caro u ve la rhuleke, a rima exirhapeni leswaku ndyangu wakwe wu ta kuma swakudya kutani a hambeta a nghenisa vutivi lebyi kongomeke. Endzhakunyana, loko swi va erivaleni leswaku hakunene vutomi byakwe a byi ri ekhombyeni, Caro u baleke ekaya. Swi n’wi tikerile swinene ku va a tiwundla. Kambe loko a twe leswaku vana va vabya, u teke swimalana leswi a ri na swona a va xavela mirhi.

Endzhaku ka nkarhinyana, Caro u kume riqingho leri humaka eka nuna wakwe. U te: “Ndzi lava u vuya ekaya. Ndzi swi vonile leswaku Xikwembu lexi u xi gandzelaka xi ni matimba naswona xi ve na wena. Ndzi lava u byela vanhu lava u dyondzaka na vona va ta dyondza na mina. Hakunene ndzi lava ku cinca vutomi bya mina.” Martin a a tiyimiserile. Sweswi ndyangu wolowo wu ni vun’we ni ntsako. Martin na Caro va khuvuriwe entsombanweni lowu veke kona hi August 2012.

Muchumayeri Loyi A Nga Yexe eDorobeni Leri Nga Ekule

Loko a ha tshama edorobeni leri nga ekule ni kaya rakwe eKenya, David u sungule ku dyondza Bibele ni Timbhoni ta Yehovha. Kambe swi nga si ya kwihi, a a fanele a tlhelela eximutanini xa ka vona xa Lokichar, lexi nga ekule le n’walungu vupela-dyambu bya Kenya. A swi teka tikhilomitara ta kwalomu ta 165 ku ya evandlheni ra le kusuhi leri nga edorobeni ra Lodwar. Ku ringana malembe ya mune, David a a nga swi koti kahle ku hlangana ni Timbhoni ta Yehovha kambe a a chumayela vaakelani ni maxaka yakwe, a va byela swilo leswi a swi dyondzeke eka xinkarhana lexi a dyondzeke Bibele. Van’wana va angule hi ndlela leyinene naswona a swi tekanga nkarhi leswaku a fambisa tidyondzo ta Bibele to hlayanyana. Hi 2007, u vulavurisane ni vamakwerhu va le Lodwar kutani a sungula ku tlhela a dyondza, laha hi n’hweti a ya kambirhi a famba hi xithuthuthu, thekisi ni xibazana.

Loko vutivi byakwe byi ya byi engeteleka, David u ye a hiseka swinene evutirhelini. Hambileswi a a nga si khuvuriwa, u ake “Holo ya Mfumo” ya nkarhinyana ekusuhi ni kaya rakwe leyi akiweke hi switina swa misava ivi yi fuleriwa hi byanyi, laha a fambisa minhlangano ni vanhu lava tsakelaka. Hambiswiritano, a hi vaaki hinkwavo lava a va tsakela ntirho wakwe wo chumayela, naswona ku ringana malembe mambirhi a rhukaniwa ni ku biwa. Siku rin’wana, vaaki va n’wi be hi ndlela yo vava va n’wi hehla hi ku va a sungula “vugandzeri bya Diyavulosi” eximutanini. Hambiswiritano, endzhaku ka loko David a kombele mpfuno eka mutirhela-mfumo, madzolonga ma yimile kutani David a ya emahlweni a chumayela. David u te: “Ntiyiso i nchumu wa nkoka evuton’wini bya mina. Ku hava nkaneto lowu nga ndzi sivelaka.”

Hi 2009, David u khuvuriwile naswona sweswi i nandza wa vutirheli tlhelo phayona ra nkarhi hinkwawo. Yena ni n’wana wakwe wa jaha loyi a nga ni malembe ya 15 i vahuweleri va ri voxe eximutanini xexo, kambe hi April 2012 vaaki va kwalomu ka 60 va ye eka Xitsundzuxo xa rifu ra Kreste, lexi khomeriweke eholweni ya nkarhinyana leyi nga ekusuhi ni kaya ra David.

“Hlaya Matsalwa U Kombisa Leswaku U Hoxile”

Janet, makwerhu wa xisati loyi a nga phayona ra nkarhi hinkwawo eGhana, a a hlaya buku leyi nge Leswi Bibele Yi Swi Dyondzisaka hi nkarhi lowu a teke riendzo ro leha hi bazi. Mufundhisi u khandziye ebazini, a sungula ku chumayela kutani a kombela vakhandziyi leswaku va nyikela mali hikwalaho ka leswi a a va chumayela. Janet u n’wi byele leswi: “U vula leswaku Yesu u fana ni Xikwembu. Kutani xana i mani loyi a vulavuleke na Yesu loko a khuvuriwa?”

Mufundhisi u te: “A swi tiveki.”

Janet u pfule eka ndzima 4 ya buku leyi nge Leswi Bibele Yi Swi Dyondzisaka a hlawula Matsalwa yo karhi kutani a kombela vakhandziyi vo hlayanyana leswaku va hlaya tindzimana teto. U hlamusele ku hambana loku nga kona exikarhi ka Yesu ni Xikwembu xa Matimba Hinkwawo, ku nga Yehovha.

Mufundhisi u te: “U noyi.”

Loko vakhandziyi va twa sweswo, va sungule ku n’wi lamulela va ku: “U fanele u hlaya Matsalwa u kombisa leswaku u hoxile ematshan’weni yo n’wi vitana noyi.” Hikwalaho ko hlundzuka, mufundhisi u chike ebazini eka xitichi lexi landzelaka. Wansati loyi a tshame etlhelo ka Janet u n’wi byele leswi: “A ndzi anakanya leswaku Yehovha i vito ra muako wa kereke ya Timbhoni. A ndzi nga swi tivi leswaku i vito ra Xikwembu kukondza u bula ni mufundhisi luya.”

Endzhaku ka loko va burile, Janet u teke nomboro ya riqingho ya wansati yoloye kutani a n’wi tshembisa leswaku u ta n’wi fonela. Loko wansati a fika ekaya, u rungulele kokwa wakwe xiendlakalo xexo. Kokwana yoloye na yena u hlamarile loko a twa leswaku vito ra Xikwembu i Yehovha. Endzhakunyana, Janet u hlele leswaku Timbhoni tin’wana ti ya emahlweni ti bula ni wansati ni kokwa wakwe. Sweswi havumbirhi ka vona va va kona eminhlanganweni.

MATIKO YA AMERIKA

• MATIKO 57

• VAAKA-TIKO 946 087 916

• VAHUWELERI 3 861 145

• TIDYONDZO TA BIBELE 4 196 922

U Kume Ntiyiso eNdhawini Leyi A A Nga Anakanyi Leswaku A Nga Wu Kuma Eka Yona

Varindzi va le khotsweni eBolivia a va ri karhi va koka Andrea loyi a nga ni malembe ya 20 hi matimba leswaku a nghena ekhotsweni loko yena a ri karhi a rhuketela ni ku va xungeta. Leswi a a ri ni madzolonga a tlhela a va ni matimba, a vonaka a chavisa naswona vanhu a va n’wi chava. Leidy, loyi a nga Mbhoni ya Yehovha loyi a hehliweke hi xihoxo ni ku khotsiwa, a a nga n’wi chavi Andrea naswona a a n’wi twela vusiwana. Mixo wun’wana ni wun’wana, Leidy a ri ni ntolovelo wa ku hlaya risimu leri nga eka buku ya tinsimu hi rito ra le henhla. Loko Andrea a twa leswi, u vutise a ku: “Xana u Mbhoni ya Yehovha?”

Loko Leidy a hlamule leswaku i Mbhoni ya Yehovha, Andrea u te: “Mana wa mina i Mbhoni ya Yehovha naswona a ndzi ya na yena eminhlanganweni. A a dyondza na mina Bibele.” Andrea u sungule ku rila. Emasikwini lama landzeleke, Leidy u burisane na Andrea hi swilo swa moya naswona loko ku fika nkarhi wa leswaku Andrea a ya ehubyeni, va khongele swin’we leswaku Yehovha a n’wi pfuna ni ku n’wi kongomisa. Andrea u ntshunxiwile kutani a hambeta a dyondza hi Yehovha. A swi tekanga nkarhi leswaku a fanelekela ku va muhuweleri loyi a nga khuvuriwangiki naswona sweswi u tilulamisela ku khuvuriwa.

Leidy u wu tirhise hi vutlhari nkarhi lowu a khomiwe hi xihoxo kutani a sungula tidyondzo ta Bibele ta 21 emahlweni ko va a ntshunxiwa. Sweswi u ya ekhotsweni kanharhu hi vhiki leswaku a hlakulela ku tsakela.

A Ku Ri Web Site Ya www.jw.org

Siku rin’wana hi Sonto hi ximun’wana xa 2011, loko mpatswa lowu ambaleke kahle swin’we ni vana va wona vambirhi lava ha riki vatsongo va nghena eHolweni ya Mfumo ya le Canada, vanhu hinkwavo a va anakanya leswaku i Timbhoni ta Yehovha leti endzeke ku suka edorobeni rin’wana. Dominic, loyi a nga nandza wa vutirheli u hatle a tivana ni wanuna loyi a endzile evandlheni. Dominic a a tshame a dyondza Bibele ni wanuna yoloye eka malembe ya 17 lama hundzeke. Ku ringana malembe mambirhi lama hundzeke, Marc-André ni nsati wakwe, Josée, a va kopa ni ku hlaya timagazini ta Xihondzo xo Rindza na Xalamuka! eka Web site ya www.jw.org naswona va xiye leswaku ndyangu hinkwawo wu fanele wu ya eHolweni ya Mfumo. Hi ku hatlisa ku sunguriwe dyondzo ya Bibele naswona ndyangu wu sungule ku ya eminhlanganweni hinkwayo. Endzhaku ko dyondza Bibele tin’hweti timbirhi ntsena, ndyangu wu sungule ku va ni Vugandzeri bya wona bya Ndyangu bya nimadyambu vhiki na vhiki. Wu hambeta wu endla nhluvuko lowunene naswona Josée u nyikele nkulumo yakwe yo sungula eka Xikolo xa Vutirheli bya le Tilweni hi May 2012.

‘U Ndzi Nyike Lanci Ni Xihuku Xakwe’

Loko a ri entsombanweni wa muganga wa 2010 le Chile, Marcelo u xiye mukhalabye loyi a tshame etlhelo ka yena a nga ri ni nkandziyiso ni wun’we.

U hlevele mana wakwe a ku: “Wanuna loyi a nga na Bibele.”

Mana wakwe u n’wi hlevele a ku: “Hlaya na yena hi leya ka wena.” Hiloko Marcelo a tshinela ekusuhi ni wanuna yoloye loyi a vuriwaka Victor, kutani a hlaya na yena Matsalwa lama tshahiweke hi ku tirhisa leya ka yena. Loko ku fika nkarhi wo wisa, Marcelo u ye eka mana wakwe kutani a ku: “A nga na lanci.” U ringanyete leswaku a dya na Victor lanci yakwe. Kutani Marcelo u n’wi nyike sangweji ni khapu ya tiya yo hisa. Loko Victor a dye lanci yakwe, Marcelo u n’wi kombe tindzimana hinkwato ta Bibele leti a a ti tsundzuka.

Ninhlikanhi, dyambu a ri hisa swinene. Marcelo u tlhele a ya eka mana wakwe kutani a ku: “A nga na xihuku.”

Mana wakwe u n’wi angule a ku: “N’wi nyike xa wena.” Hiloko a endla tano. Endzhaku ka nongonoko, Marcelo na Victor va lelanile.

Eka ntsombano wa muganga wa lembe leri landzelaka, Marcelo u lava-lave Victor ku vona loko a tile. U tsakile loko a kuma leswaku a a ri kona naswona sweswi a ambale ni thayi! Loko Victor a vona Marcelo u te: “Namuntlha ndzi laha hikwalaho ka mufana loyi. Lembe leri nga hundza, ndzi kume xirhambo xo ta entsombanweni hiloko ndzi ta. Mufana loyi u hlaye na mina Bibele yakwe a tlhela a ndzi nyika lanci ni xihuku xakwe. Sweswi ndzi dyondza Bibele!” Victor u ve muhuweleri loyi a nga khuvuriwangiki.

Marito Lamanene Lama Vuriweke Hi Mutsari Wa Maphepha-hungu

Eka xihloko xakwe xa le ka phepha-hungu, mutsari la dumeke wa maphepha-hungu wa le Venezuela u hlamusele leswi a hlanganeke na swona loko a be riqingho eka khamphani ya tinqingho ya le tikweni rero leswaku va n’wi pfuna hi swin’wana. Loyi a amukeleke riqingho rero u n’wi hlamule hi ku komisa naswona a a nga ri na xinghana kutani a nga n’wi pfunanga. Loko a ba riqingho ra vumbirhi, u hlamuriwe hi wanuna loyi a vuleke leswaku hi yena “Misael” loyi a n’wi pfuneke hi ndlela leyinene naswona a a ri ni xinghana. U tsale a ku: “Musa, xichavo, ku tinyiketela ku pfuna ni ntirhisano lowu wanuna loyi a a ri na wona loko a ri karhi a ndzi pfuna a swi hlamarisa. Hikwalaho ka mpfuno wakwe, ndzi swi kotile ku lulamisa xiphiqo xa mina naswona ndzi tlhele ndzi dyondza ndlela leyi ndzi nga swi endlaka ha yona enkarhini lowu taka.”

Loko wansati yoloye a n’wi bumabumela, u hlamusele leswaku tanihi Mbhoni ya Yehovha u tikarhatela ku khoma warikwenu hilaha Yesu a dyondziseke hakona. Mutsari wa maphepha-hungu u kombele ku vulavula na mukongomisi wa Misael. U bumabumele ntirho lowu hlamarisaka lowu endliwaka hi mutirhi wakwe. Eka xihloko xakwe, u vule leswaku Misael i xikombiso lexinene xa muaki wa le Venezuela tlhelo Mbhoni ya Yehovha. U gimete xiyenge xakwe hi ku vula leswi: “Hi lava vanhu vo fana na yena etindhawini hinkwato ta mani na mani leti pfunaka vanhu.”

“Mi Nga Tiomisi Tinhloko!”

Gabriela loyi a nga ni malembe ya 15 loyi a nga twiki a tsakile loko a khuvuriwa hi October 2011 entsombanweni wa muganga wa ririmi ra mavoko lowu khomeriweke le Ecuador. A a tsake ngopfu lerova loko a vuya exikolweni xakwe hi Musumbhunuku, u vutise mudyondzisi wakwe loko swi ta koteka ku endla xitiviso xo koma eka vadyondzi-kulobye. Mudyondzisi u pfumerile kutani Gabriela a yima emahlweni ka tlilasi kutani a vulavula hi ririmi ra mavoko a ku: “Ndzi tsakela ku mi tivisa leswaku hi Ravuntlhanu, Mugqivela ni Sonto a ndzi ri entsombanweni laha ndzi khuvuriweke ndzi va Mbhoni ya Yehovha. Ndzi tsakela ku tlhela ndzi mi byela leswaku hi hanya enkarhini wa makumu ya mafambiselo lawa ya swilo. Nkarhi lowu saleke wu komile! I swa xihatla leswaku mi endla ku cinca loku faneleke. Mi nga tiomisi tinhloko. Chavani Xikwembu!” Swichudeni-kulobye swi hlamarile.

Endzhaku ka nkarhi hi siku rero, hi nkarhi wa lanci, Katty loyi a nga twiki loyi a nga Mbhoni leyi holeke, u ye eka Gabriela a ya vutisa hi ta ntsombano. Gabriela u hlamule hi ku kongoma a ku: “A wu ri kahle! Kambe sweswi tanihi Mbhoni leyi khuvuriweke, ndzi lava ku tshama ndzi tshembekile eka Yehovha. Kutani ndzi lava ku ku byela leswaku a ndza ha lavi ku va munghana wa wena, hikuva u hanya vutomi lebyi nga basangiki. Ku va munghana wa wena swi nga khumba vuxaka bya mina ni Xikwembu. U fanele u hundzuka. I swa nkoka ku khongela eka Yehovha ni ku tlhela u vulavula ni vakulu. Ndza swi tiva leswaku u nga hundzuka kutani u va munhu lonene.” Xitsundzuxo xa rirhandzu xa Gabriela lexi kongomeke xi pfunile hikuva Katty u vulavule ni vakulu, a kuma mpfuno hi tlhelo ra moya kutani a tlhela a va la hisekaka ensin’wini.

U Tirhise Khompyuta Leyitsongo Ya Mudyondzisi Wakwe

Makwerhu wa xisati la nga ni malembe ya 16 wa le United States u vutisiwe swivutiso malunghana ni vukhongeri byakwe hi swichudeni-kulobye, kambe a a nga ri ni nkandziyiso ni wun’we hambi ku ri Bibele. Leswi a lava ku tirhisa Matsalwa leswaku a hlamula swivutiso swa swichudeni-kulobye, u lombe khompyuta leyitsongo ya mudyondzisi wakwe kutani a nghena eka Web site ya www.jw.org. A nga hlamulanga swivutiso swa vona hinkwaswo ntsena kambe u tlhele a va kombisa ndlela yo yi tirhisa. U va hlamusele leswaku loko va tshuka va va ni swivutiso swa Bibele naswona ku nga ri ni Timbhoni to va pfuna, minkarhi hinkwayo va nga nghena hi voxe eka Web site va kuma tinhlamulo. Loko vhiki ri ri karhi ri ya emahlweni, u xiye leswaku swichudeni-kulobye a swi nga ha ri ni swivutiso swo tala ku fana ni le ku sunguleni. Loko a swi vutisa leswaku hikwalaho ka yini swi ri tano, swin’wana swi vule leswaku nkarhi ni nkarhi a swi nghena eka Web site hi ku tirhisa tiselfoni ta swona. Hambi ku ri mudyondzisi wakwe na yena a a endla tano!

ASIA NI LE MIDDLE EAST

• MATIKO 48

• VAAKA-TIKO 4 222 869 785

• VAHUWELERI 674 608

• TIDYONDZO TA BIBELE 662 736

Mpfilumpfilu Lowu A Wu Ta Va Kona eXimutanini Wu Papalatiwa

Loko wu ri endleleni yo ya enkosini, ntlawa wa Timbhoni ta Yehovha wu fambe hi le ximutanini xa le Indonesia. Phayona ri vone vantshwa van’wana etlhelo ka gondzo. Ri vulavule na vona kutani ri va nyika broxara leyi nge Yingisa Xikwembu Kutani U Hanya Hilaha Ku Nga Heriki. Hi ku famba ka nkarhi, makwerhu wa xisati u hundze hi le xitarateni lexi fanaka loko a ri karhi a tlhelela ekaya. Wanuna loyi a khome broxara leyi nge Yingisa Xikwembu Kutani U Hanya u ye eka makwerhu yoloye kutani a n’wi nkhensa hileswi a nyikeke vana vakwe broxara yoleyo. U te: “Broxara leyi yi ponise vutomi bya vana va mina!” Leswi makwerhu loyi wa xisati a nga tivi nchumu hileswi endlekeke, u kombele leswaku a n’wi hlamusela swona. Tatana yoloye u hlamusele leswaku vana vakwe a va hlele ku hlasela ximutana xin’wana. Hi ku ya hi ndhavuko wa le ndhawini yoleyo, a va lava ku rihisela hileswi un’wana wa vanghana va vona a biweke. Kambe loko majaha yakwe ya hlaya broxara yoleyo, ya dyondze leswaku vanhu lava lwaka ni van’wana a va nge yi dyi ndzhaka ya Paradeyisi leyi taka. Kutani ma ehlise moya, ivi ma namba ma ku ri thya, rhengu ra wona kutani ma tlhelela ekaya. Mpfilumpfilu wolowo wu papalatiwile hikwalaho ka rungula ra Bibele leri nga eka broxara yoleyo.

Musodoma A Hundzuka

Rek u kulele endyangwini lowu rhandzaka ndhavuko eCambodia, kambe loko a ha ri ntsongo yena ni hahlwa rakwe a va vona onge i vavasati. A va tlanga hi swipopana naswona a va rhandza ku ambala swiambalo swa vanhwanyana. Mana wa vona a a pfilunganyekile ni ku khomiwa hi tingana naswona a a nga swi tivi leswaku a a ta va tshikisa njhani. A va ya exikolweni va ambale swiambalo swa majaha kambe hi ku hatlisa loko va fika kwale a va ambala tanihi vanhwanyana. Loko ma va ni malembe ya 16, mahahlwa ma nghenele mphikizano wa van’wambhuri lava nga vasodoma naswona ma rhandziwe hi khamphani ya vuhungasi. Leswi swi endle leswaku ma kombisiwa eka thelevhixini ni le ka mintlango ya swa mafenya. Hi ku hatlisa, Rek u tekelele mahanyelo ya vusodoma kutani a tihlanganisa ni vasodoma van’wana.

Mana wa Rek u sungule ku ya ekerekeni kutani a endla leswaku Rek a famba na yena. Hambileswi a pfumeleke ku ambala swiambalo swa vavanuna, u ale ku tsemeta misisi yakwe yo leha. Hi ku phindha-phindha, mufundhisi u chiche Rek xindzhuti ni ku hlekula ndlela leyi a hanyaka ha yona. Hambiswiritano, Rek a ehleketa leswaku a nga swi kota ku dyondza Bibele ekerekeni. Hi vhiki ro sungula, u hatle a pfuka kutani a famba hi xikanyakanya ku ringana tikhilomitara to karhi ku ya ekerekeni, kambe mufundhisi u vule leswaku a nga ta swi kota ku n’wi dyondzisa kutani a famba. Rek a karhatekile loko mufundhisi a nga n’wi dyondzisi ni le ka vhiki ra vumbirhi.

Hambiswiritano, loko Rek a fika ekaya, hahlwa rakwe ri n’wi byele leswaku a ku endze wansati un’wana kutani a kombela leswaku a ri fambisela dyondzo ya mahala ya le kaya ya Bibele. A a siye buku leyi nge Xana Bibele Yi Dyondzisa Yini Hakunene? Mahahlwa wolawo ma sungule ku dyondza ni makwerhu yoloye wa xisati ni nuna wakwe. Endzhaku ka tin’hweti ta tsevu, buti wa Rek u vone leswaku a a nga si swi lunghekela ku tshika ndlela leyi a hanya ha yona, ivi a tshika ku dyondza. Hi hala tlhelo, Rek u khumbiwe swinene hi 1 Vakorinto 6:9, 10 naswona a a swi vona kahle leswi a a fanele a swi endla. Hikwalaho ka ku dyondza hi ku hiseka, ku hlaya Bibele, xikhongelo ni minhlangano ya vandlha u kote ku cinca vutomi byakwe. Nakambe mana wa Rek u le ku dyondzeni naswona u endla nhluvuko lowunene. Loko Rek a khuvuriwa, mana wakwe u vule marito lawa a ri karhi a rila: “Ndzi tsake swinene ku vona n’wana wa mina wa jaha a khuvuriwe tanihi wanuna.” Sweswi i phayona ra nkarhi hinkwawo.

Mungoma A Cinca Tindlela Takwe

Or-Ya a a ri mungoma, mutshunguri, mutsundzuxi tlhelo muvhumbhi wa swilo swa nkarhi lowu taka. Mpatswa lowu nga maphayona yo hlawuleka lowu tirhaka eHaifa, le Israel, wu hlangane na yena eka ntirho wa yindlu ni yindlu. Loko a wu xeweta u te: “Loko mi te hi timhaka ta Xikwembu, nghenani!” Kaya rakwe a ri tele hi swilo leswi fambisanaka ni vungoma ni mihivahivana. U vule leswaku u kume marungula lama humaka eka Xikwembu, kasi man’wana a ma huma eka “moya” wa rhabi loyi a feke.

U swi tsakerile loko hi n’wi kombela ku n’wi fambisela dyondzo ya le kaya ya mahala ya Bibele hi ku tirhisa buku leyi nge Leswi Bibele Yi Swi Dyondzisaka. Emahlweni ka masiku mambirhi mpatswa lowu wu nga si ya ekaya rakwe, u khongele eka Xikwembu leswaku xi rhumela munhu loyi a nga ta n’wi dyondzisa Bibele mahala handle ko hlamuseriwa hi varhabi. Ku nga si hela n’hweti, u vutise a ku: “Xana va kona vanhu van’wana lava nga evukhongerini lebyi fanaka ni bya n’wina?” U ye eminhlanganweni ya vandlha naswona u tsakisiwe hi xinghana ni rirhandzu leri va n’wi kombeke rona. Ku sukela kwalaho, u sungule ku ya nkarhi na nkarhi.

Endzhaku ka tin’hweti timbirhi a ri karhi a dyondza, Or-Ya u vutise hi nhlengeletano leyi a yi ta va kona a ku: “Xana munhu u khuvuriwa etinhlengeletanweni? Loko swi ri tano, u ni tin’hweti timbirhi ntsena leswaku u ndzi endla ndzi lunghekela ku khuvuriwa!” Xo sungula, u cukumete nhundzu yakwe hinkwayo leyi durhaka ya vungoma. Kutani a tshika ku va mungoma ivi a sungula ku chumayela van’wana, a fambisa buku leyi nge Leswi Bibele Yi Swi Dyondzisaka ni timagazini eka vanhu hinkwavo lava a a va tshungula. Loko a vabya, u arile ku tlhelela eka swiendlo swakwe swa khale swa vutshunguri. Ku tshika kakwe vungoma swi n’wi siye a ri hava mali ku ringana tin’hweti ta mune. Eku heteleleni u kume ntirho wa kahle lowu eka wona a a tirha masiku ya mune hi vhiki, ku ringana tiawara ta tsevu hi siku—leswaku a va ni nkarhi wo dyondza, wo ya eminhlanganweni ni le nsin’wini. Kutani u xavise yindlu yakwe leyikulu ivi a hirha yindlu leyitsongo.

Hi ku famba ka nkarhi, Or-Ya u fanelekele ku khuvuriwa, kambe loko ku sele vhiki leswaku ku va ni nhlengeletano, u tshoveke nenge. Hambiswiritano, u khuvuriwile, hambileswi nenge wakwe a wu semendheriwile. Namuntlha Or-Ya i muhuweleri loyi a hisekaka, loyi a chumayelaka ni ku fambisa tidyondzo ta Bibele eka vanhu lava a a va tshungula.

Mahahlwa Lawa A Ma Wela Eka Mpambukwa Ma Kuma Ntiyiso

Ku sunguriwe dyondzo ya Bibele ni mahahlwa lama nga twiki lama tshamaka endhawini leyi nga ekule ya tintshava ePhilippines. Hinkwawo a ma ri eka mpambukwa lowu tshembaka leswaku matlhari a ma nge swi vavisi swirho swa wona ntsena loko swi vekela timhamba leswaku ti ta swi sirhelela. A ma leteriwe ku tirhisa mikwana ni swibalesa naswona ma katseke eka tinyimpi to tala leti a ma ti lwa ni mintlawa ya vapfukeri etintshaveni. Mpambukwa wolowo wu ma pfumelele ku dyondza Bibele wu ri karhi wu tiyiseka leswaku Timbhoni a ti nge ma sindzisi leswaku ma tshika vukhongeri bya wona.

I ntiyiso leswaku vamakwerhu va khutaze mahahlwa wolawo leswaku ma endla xiboho xa wona lexi sekeriweke eka leswi a ma swi dyondza eBibeleni. Rin’wana ra mahahlwa wolawo ri vone onge a ri nge swi koti ku endla ku cinca loku lavekaka evuton’wini bya rona leswaku ri tirhela Xikwembu hilaha ku amukelekaka. Hambiswiritano, lerin’wana ri hambete ri dyondza. Leswaku a ri khutaza, makwerhu loyi a a dyondza na rona, u pfule Bibele kutani a hlamusela hi ririmi ra mavoko a ku: “Vito ra wena, leri nge Samuel, ri kona eBibeleni. Samuwele wa le Bibeleni u tirhele Xikwembu xa ntiyiso, ku nga Yehovha, kukondza a dyuhala swinene. Na wena u nga yingisa Yehovha hi ku tshembeka.” Leswi swi khumbe mbilu ya Samuel. U te: “Loko vito ra mina ri ri kona eBibeleni, kutani na mina ndzi fanele ndzi yima etlhelweni ra Yehovha.” U byele mpambukwa wolowo leswaku wa suka entshaveni naswona u hise timhamba ni swilo swakwe hinkwaswo leswi fambisanaka ni vungoma kutani a endla nhluvuko hi ku hatlisa. Sweswi i nandza wa Yehovha loyi a khuvuriweke, loyi a hisekelaka ku pfuna vanhu van’wana lava nga twiki leswaku va dyondza ntiyiso wa Bibele.

N’wana A Langutana Ni Nxaniso

Rajiv u tshama eximutanini lexi nga ekule en’walungu wa Indiya. Loko a ri ni malembe ya kaye naswona a ri eka gredi ya vumune, mudyondzisi wakwe loyi a nga Mbhoni ya Yehovha a a dyondzisa vana hi milawu ya mahanyelo hi ku pfuniwa hi buku leyi nge Dyondza Eka Mudyondzisi Lonkulu. Hi ku hiseka, Rajiv u amukele rungula leri kutani a sungula ku ri tirhisa. U byele mudyondzisi wakwe leswaku u tshike mavunwa ni ku lwa ni vadyondzi-kulobye naswona u dya lanci ni lava nga riki na yona.

Loko a ri karhi a dyondza leswi engetelekeke hi xitshembiso xa Paradeyisi ya laha misaveni, u sungule ku byela van’wana eximutanini xa laha a tshamaka kona ni le ka vanhu lava a a hlangana na vona loko a ri karhi a famba hi xitimela hi mahungu lawa lamanene. Leswi swi khunguvanyise ni ku khomisa vatswari vakwe tingana. Va n’wi byele leswaku a tshika ku vulavula hi Yehovha na Yesu. Loko a ya emahlweni, va sungule ku n’wi mbeyetela naswona mana wakwe a a teka swiambalo swakwe loko a vuya exikolweni leswaku a nga swi koti ku huma a ya vulavula hi ntshembo wakwe lowuntshwa. Vatswari vakwe a va nga n’wi pfumeleli leswaku a etlela emubedweni wakwe naswona a va n’wi tsona swakudya. Nakambe, loko marhengu lawa ma tsandzekile, va vitane muprista leswaku a ta cinca mianakanyo ya jaha leri.

Muprista u tshame ekaya ra ka va Rajiv ku ringana masiku yo hlayanyana naswona u ringete ku n’wi sindzisa ku nkhinsamela xifaniso. Loko Rajiv a vule leswaku xifaniso xexo ko va ribye ntsena a hi xikwembu lexi hanyaka, muprista u vule leswaku jaha leri ri fanele ri ‘languta xifaniso lexi hi mbilu.’ Hi kona a ri ta vona xikwembu eka xifaniso xexo. Rajiv u teke phepha kutani eka rona a tsala “ti-rupee ta 100.” U ri nyike mufundhisi kutani a n’wi byela leswaku a ya xava tichokoleti a tlhela a vuya na cinci. Muprista u vule leswaku a a nga ri xiphunta; leri a ko va phepha ntsena naswona a ri nga ri na ntikelo. Rajiv u hlamule a ku: “Loko wo ri languta hi mbilu u ta swi vona leswaku ri ni ntikelo.” Hikwalaho ko hlundzuka, mufundhisi u susumete jaha rero hi nhloko leswaku ri korhama emahlweni ka xifaniso. Rajiv u te: “U sindzise nhloko ya mina leswaku yi korhama emahlweni ka xifaniso lexi, kambe a wu nge swi koti ku endla leswaku mbilu ya mina yi xi nkhinsamela.” Eku heteleleni, mufundhisi u fambile, a vula leswaku a swi koteki ku hundzula jaha rero nileswaku loko o tshama nkarhi wo leha na rona a nga tshika leswi a swi pfumelaka. Kutani vatswari va Rajiv va n’wi rhurhisele exikolweni xin’wana. Kambe a nga tshikanga ku vulavula ni un’wana ni un’wana loyi a a ta yingisa leswi a swi vula hi Yehovha ni hi Paradeyisi leyi tshembisiweke. Sweswi hambileswi a nga ni malembe ya khume, u hambeta a ya emahlweni a tshembela eka mpfuno wa Yehovha leswaku a hlayisa ripfumelo rakwe ri hambeta ri tiyile.

U Kume Bibele Leyi A Yi Lava

Loko Larisa a ri karhi a chumayela muthori wakwe exitolo xa tibuku lexi nga eArmenia, wansati u nghenile a vutisa muxavisi loko ku ri ni Bibele ya “Misava Leyintshwa.” Muxavisi u vule leswaku a nga na yona kambe a nga n’wi nyika vuhundzuluxeri bya kwalaho bya ririmi ra le Armenia. Muxavi u vutise a ku, “Xana yi twisiseka hi ku olova?” Muxavisi u hlaye tindzimana ti nga ri tingani a ku, “Yi vonaka yi twisiseka.” Leswi a nga n’wi tshembi, muxavi u sindzise leswaku u lava Bibele ya “Misava Leyintshwa.” Hi ku hatlisa Larisa u tsundzuke leswaku a a ri na Bibele yakwe ya ririmi ra le Armenia ebegeni yakwe. U yi kombe wansati yoloye kutani a n’wi kombela leswaku a hlaya nhloko-mhaka ya yona. Wansati u hlaye a ku, “Vuhundzuluxeri Bya Misava Leyintshwa.” A ku ri yona Bibele leyi a a yi lava!

Muxavi u hlamusele leswaku n’wana wakwe wa nhwana ni mukon’wana wakwe lava nga eGreece a va ha ku sungula dyondzo ya Bibele ni Timbhoni ta Yehovha. Leswi a va nga dyondzanga ririmi ra le Greece, va kombele mana wa vona leswaku a va tela ni “Vuhundzuluxeri Bya Misava Leyintshwa” hi ririmi ra le Armenia loko a tlhela a va endzela. Makwerhu wa hina wa xisati u nyike wansati yoloye Bibele kutani a ku: “Ndzi kombela u va nyika Bibele leyi kutani u va byela leswaku i nyiko leyi humaka eka Yehovha.” Wansati loyi a a tsakile loko Larisa a n’wi byela leswaku a nga n’wi pfuna ku dyondza Bibele. Va nyikane tinomboro ta tinqingho leswaku wansati loyi a ta sungula ku dyondza hi ku hatlisa loko a vuya eGreece.

YUROPA

• MATIKO 47

• VAAKA-TIKO 738 679 198

• VAHUWELERI 1 595 888

• TIDYONDZO TA BIBELE 841 260

U Tlherise Xipachi

Nina, makwerhu wa xisati la nga phayona ra nkarhi hinkwawo loyi a tshamaka eBosnia, u hlaya ni ndyangu wa Varoma. Loko siku rin’wana a ri karhi a famba exitarateni, nhwanyana wa ndyangu wolowo loyi a nga ni malembe ya khume u thumbe xipachi lexi a xi ri na mali, makhadi ya xikweleti ni maphepha man’wana. Loko a nga si dyondza ntiyiso, a a ta va a teke ku thumba xipachi lexi tanihi nyiko ya risima, kambe endzhaku ka loko a byele mana wakwe, u endle xiboho xo yisa xipachi xexo emaphoriseni. Xiboho lexi a xi ri xa nkoka hikuva ndyangu lowu a wu swerile lerova a wu pfumala ni mali ya ku xava swakudya. Endzhaku ka tiawara timbirhi va tlherise xipachi eka phorisa leri hlamaleke, va kume riqingho leri va kombeleke ku tlhelela exitichini xa maphorisa. N’wini wa xipachi a rindze kwalaho leswaku a ta va nkhensa ni ku va nyika hakelo. U va nyike mali leyi ringanaka kwalomu ka R240, ku nga mali leyi ringanaka ni muholo wa masiku mambirhi.

U Tsakisiwe Hi Nhloko-mhaka Ya Yona

Nihad, loyi a tshamaka eBosnia, a a hete ntirho wakwe wa nsimu. Loko a ri karhi a ya emovheni wakwe, u vone wanuna a yime etlhelo ka wona. Loko Nihad a n’wi xeweta, wanuna yoloye u te: “Ndzi khomele, ndzi vone magazini emovheni ya wena leyi nga ni nhloko-mhaka leyi nge, ‘Ndlela Yo Va Tatana Lonene.’ Ndzi nga swi tsakela ku va na yona. Ndzi yime laha ku ringana kwalomu ka awara ku endlela leswaku n’wini wa movha a vuya. Xana u nga ndzi nyika yona?” Nihad a a tsake swinene loko a n’wi nyika magazini kutani a kuma nkarhi wo n’wi chumayela.

Ntlawa Wa Vatirhi Va Le Xikepeni Wu Kuma Nchavelelo

Loko mpatswa wu ri karhi wu chumayela ensin’wini leyi nga ehlalukweni leri nga eRotterdam le Netherlands wu hlangane ni ntlawa wa vatirhi va le xikepeni lava a va ri na gome. A ri karhi a rila, munjhiniyara u wu byele leswaku xikepe xi weriwe hi makhombo hi ku landzelelana, ku katsa ni ku tshoveka naswona xi onhakile. Kutani u vutise a ku: “Xana u nga hi khongelela?” Mpatswa lowu wu vule leswaku wu ta nyikela nkulumo leyi khutazaka ya Bibele eka vatirhi lava va le xikepeni. Hi siku leri landzelaka hi awara ya nkombo nimadyambu, vahuweleri ku katsa ni mimpatswa yin’wana yimbirhi yi rhurheriwe endhawini leyi nga emahlweni ka xikepe laha xi kongomisiwaka kona. A ku hlengeletane vanhu va 15 eka va 16. Endzhaku ka xikhongelo xo pfula, makwerhu u nyikele nkulumo leyi nga ni nhloko-mhaka leyi nge “Timhangu—Xana Ti Vangiwa Hi Xikwembu?” Ntlawa wolowo wu kote ku hlaya tindzimana ta Bibele hikuva vahuweleri a va te ni Tibibele to tala naswona va pfune un’wana ni un’wana leswaku a languta Matsalwa. Endzhaku ka xikhongelo xo pfala, vatirhi hinkwavo va tame va ha tshamile kutani va vulavurisana ni vamakwerhu. Vatluti va titwe va chaveleriwile va tlhela va nkhensa. Un’wana wa vona u te: “Leyi i nhlamulo ya swikhongelo swa mina.” Ntlawa lowu wu teke tibuku ta 20 ku katsa ni Tibibele ni minkandziyiso yin’wana, endzhaku ka sweswo, munjhiniyara u nyike vahuweleri mvhilopho leyi nga ni R1 600 ya minyikelo ya minkandziyiso.

U Khongerile Hileswi A A Lava Ku Pfuna

Irene loyi a tshamaka eSweden, u tsale a ku: “Ndzi ni malembe ya 80 naswona hikwalaho ka xitlhavi lexi ndzi nga na xona a ndzi swi koti ku ya ensin’wini. Ndzi khongele eka Yehovha leswaku ndzi pfuna munhu loyi ndzi n’wi endzeleke khale swinene naswona loyi sweswi a lavaka ku endzeriwa.

“Siku rin’wana, riqingho ra hina ri ririle kutani nuna wa mina a ri hlamula. A ku ri wansati loyi a n’wi byeleke marito lawa: ‘Ndzi khomeleni, hi n’wina ntsena lava ndza ha mi tsundzukaka, hi swona swi endleke leswaku ndzi mi bela riqingho. Xana nsati wa wena a nga swi tsakela ku ndzi endzela leswaku hi ta bula hi Rito ra Xikwembu? A hi dyondza swin’we eka malembe ya 15 kumbe 20 lama nga hundza, kambe nuna wa mina loyi a feke a a nga swi tsakeli, hiloko ndzi tshika ku dyondza na yena.’

“Ndzi tsundzuka leswaku ndzi endzele wansati yoloye ni makwerhu un’wana wa xisati loyi a a dyondza na yena. Lexi ndzi hlamariseke, wansati yoloye u ndzi tsundzukile. Leswi a ndzi tsakile, ndzi hlele ku hlangana na yena. Ku sukela kwalaho, hi sungule ku va ni dyondzo vhiki ni vhiki. U ve kona eXitsundzuxweni ni le ka nkulumo yo hlawuleka. Nakambe u va kona eminhlanganweni. Siku ni siku ndzi nkhensa Yehovha hileswi a hlamuleke xikhongelo xa mina.”

A Ku Cheriwi Chokoleti Eka Bokisi Ra Minyikelo

Sergio, la nga ni malembe ya nhungu loyi a tshamaka eItaliya, a a lava ku tiyisekisa vakulu leswaku a a swi lunghekerile ku va muhuweleri la nga khuvuriwangiki. Siku rin’wana, u fambe ni tata wakwe laha a tirhelaka kona, laha a a tirha ku lunghisa maloko ya mpatswa lowu nga ni malembe ya va-70. Sergio u fambe ni timagazini to hlayanyana. U ri: “Loko tatana a ri karhi a tirha ndzi fambisele wanuna un’wana timagazini loyi a hlamaleke swinene lerova u vitane nghamu yakwe kutani a n’wi komba tona. Kutani ndzi tsale mavito ya vona, adirese ya vona ni nomboro ya riqingho leswaku ndzi ta endla riendzo ro vuyela. Wansati yoloye u ndzi nyike rungula leri hinkwaro kutani a ndzi nyika chokoleti leyikulu.” Endzhaku ka masiku ma nga ri mangani, Sergio ni un’wana wa vakulu va endle riendzo ro vuyela eka mpatswa wolowo. Sergio u ririse bele naswona loko wansati a yi hlamula u hlamusele leswaku a a lava ku va nyika buku leyi nge Xana Bibele Yi Dyondzisa Yini Hakunene? Wansati yoloye a a tsakile loko a yi kuma. U tlhele a n’wi nyika chokoleti yin’wana. Sergio u te: “A ndzi swi kotanga ku hoxa chokoleti eka bokisi ra munyikelo kutani ndzi yi dyile naswona eku heteleleni vakulu va twisise ndlela leyi a ndzi swi lava ha yona ku va muhuweleri la nga khuvuriwangiki.”

Mufundhisi A A Lava Ku Dyondza Leswi Engetelekeke

Simeon a a ri mufundhisi wa kereke eGurkovo, le Bulgaria laha ku nga riki na Timbhoni. Ku hlaya kakwe Bibele swi n’wi endle a xiya ku hambana exikarhi ka leswi Bibele yi swi dyondzisaka ni leswi kereke yi swi dyondzisaka. Siku rin’wana u nyikiwe tin’wana ta timagazini ta hina loko a ri karhi a famba hi xitimela. Simeon a tsakile loko a dyondza leswaku Yehovha i Xikwembu xa ntiyiso ni leswaku a ku na Vunharhu-un’we. Leswi a a lava ku dyondza leswi engetelekeke, u tsalele rhavi ni tikereke hinkwato leti a ti tiva. I kereke yin’we ntsena leyi n’wi hlamuleke, yi n’wi byela leswaku a nga fanelanga a tikarhata hi vunwa byebyo. Ku hambana ni sweswo, rhavi ri hlele leswaku Timbhoni timbirhi ti famba tikhilomitara ta kwalomu ka 35 ku suka eKazanlŭk. Ti sungule dyondzo ya Bibele na Simeon ni ndyangu wakwe. Simeon a a rhandza leswi a swi dyondza kutani u rhambe vaakelani vakwe ni vanghana leswaku va va kona. Hi ku hatlisa vanhu va 25 a va va kona eka dyondzo ya Bibele ya vhiki ni vhiki. Endzhaku ko hlanganyela eka mabulo ya Bibele ro sungula, muakelani loyi a nga ni malembe ya 75 u vule marito lawa a ri karhi a rila: “Ndzi twisise swo tala hi awara yin’we ntsena ku tlula leswi ndzi swi dyondzeke ekerekeni ku ringana malembe ya 30.” Vanhu lava fikaka eka 60 va va kona eminhlanganweni leswi endlaka leswaku vamakwerhu va le Kazanlŭk va fambisa minhlangano eGurkovo n’hweti ni n’hweti naswona vanhu va 79 va ve kona eXitsundzuxweni.

“Ndzi Kombela U Hambeta U Hanya Hi Ndlela Leyi”

Valya makwerhu wa xisati la nga ni malembe ya 15 loyi a tshamaka eUkraine u xiye leswaku mudyondzisi wakwe u te exikolweni a ambale swiambalo swa ntima naswona a a ri karhi a rila. Loko a twa leswaku mana wa mudyondzisi yoloye u file, Valya u endle xiboho xo n’wi chavelela hi Matsalwa malunghana ni ku pfuxiwa ka vafi. Valya u teke Bibele ni tibroxara timbirhi, leyi nge Ku Humelela Yini Hi Hina Loko Hi Fa? ni leyi nge Loko U Feriwa Hi Loyi U N’wi Rhandzaka naswona u endle xiboho xa leswaku loko xikolo xi huma a a ta ya eka mudyondzisi yoloye. U te: “Loko ndza ha yime enyangweni wa hofisi yakwe, ndzi khomiwe hi rhumbyana kutani ndzi khongela eka Yehovha leswaku a ndzi pfuna.”

Loko Valya a nghena ehofisini ya mudyondzisi, u n’wi vutise a ku: “Xana u lava yini?”

“Ndzi lava ku ku chavelela hikuva ndza yi twisisa ndlela leyi u titwaka ha yona. Eka malembe lama hundzuke ndzi feriwe hi kokwana wa mina wa xinuna.”

Mudyondzisi u khumbiwe hi ku khathala ka Valya. U vule a ri karhi a tenga-tengisa mihloti leswaku hambi ku ri maxaka yakwe kumbe lava a nghenaka na vona kereke a va nga si tshama va n’wi kombisa nkhathalelo lowu humaka embilwini hi ndlela yoleyo. Kutani Valya u hlaye Nhlavutelo 21:3, 4 a tlhela a yi hlamusela, ivi endzhaku ka loko a amukele tibroxara mudyondzisi u te: “U hambane swinene ni vana van’wana.”

Valya u hlamusele a ku: “Ndzi tikarhatela ku hlaya Bibele ni ku hanya hi ku pfumelelana na yona naswona ndzi yingisa vatswari va mina.”

Endzhakunyana, Valya u yisele mudyondzisi Bibele ni buku leyi nge Leswi Bibele Yi Swi Dyondzisaka hilaha a kombeleke hakona. Nakambe mudyondzisi u kombise ku tlangela kutani a ku eka Valya: “Vukhongeri bya wena i bya ntiyiso naswona u ni vatswari va kahle lava ku dyondzisaka leswi nga swinene. Ndzi kombela u hambeta u hanya hi ndlela leyi.”

U Be Nomboro Leyi Hoxeke

Eka siku ro sungula ra ntsombano wa muganga wa 2011 lowu a wu khomeriwe eMalakasa, le Greece, Natalie u tirhise selifoni yakwe leswaku a fonela tata wakwe malunghana ni bazi leri a ri ya entsombanweni. Hambiswiritano u be nomboro leyi hoxeke naswona ku hava loyi a yi hlamuleke. Endzhakunyana ka nkarhi, munhu loyi a n’wi beleke riqingho hi xihoxo u vone nomboro hiloko a yi fonela a lava ku tiva leswaku i mani. Leswi xiyimiso xa ntsombano se a xi sungurile, Natalie u ringete ku tima riqingho rakwe, kambe handle ko swi xiya u potose batheni yo hlamula ha yona. Hambileswi Natalie a nga swi tivi leswaku i mani a n’wi belaka riqingho, wanuna yoloye u kote ku yingisela xiphemu xa nkulumo ya mutshama-xitulu leyi n’wi kokeke rinoko.

Endzhakunyana, wanuna yoloye u rhumele rungula, kutani a vutisa a ku: “Hi wena mani? Xana u muprista?” Loko xiyimiso xa nimixo xi hela, Natalie u vone rungula rero kutani a hlamula a ku: “A ndzi muprista. Ndzi Mbhoni ya Yehovha naswona ndzi le ntsombanweni.”

Wanuna yoloye u tlhele a fona hi Mugqivela leswaku a vutisa loko xiyimiso xa ntsombano xa ha ya emahlweni. Tata wa Natalie u kote ku chumayela wanuna yoloye naswona endzhaku ka sweswo wanuna yoloye u te: “Hambileswi ndzi yingiseleke timinete ti nga ri tingani, nkulumo leyi ndzi yi tweke eka riqingho yi hlamule swivutiso swa mina swo tala leswi a swi ndzi karhata.” Ndyangu wa wanuna yoloye a wu karhatiwa hi madimona naswona a wu nga swi tivi leswaku mimoya yoleyo a ku ri vamani ni leswaku ha yini leswi a swi endleka. U te: “Eku sunguleni a ndzi nga swi lavi ku vulavula ni Timbhoni ta Yehovha kambe sweswi, ndzi nga tsakela ku vulavula ni wanuna loyi a nyikeleke nkulumo loko swi koteka.”

Hakunene sweswo swi kotekile. Wanuna yoleyo u ye entsombanweni hi Sonto naswona u hlamarisiwe hi leswi a swi voneke—mindyangu leyi ambaleke kahle ni vanhu lava tsakeke. A ku nga ri na thyaka leri a ri lo n’walala, a ku nga rhuketeriwi naswona a ku nga dzahiwi. U te: “A ndzi nga swi tivi leswaku ku ni vanhu vo fana na n’wina eka pulanete leyi! Ndzi twa onge ndzi nghene eka misava yin’wana.” Tata wa Natalie u fambe na yena eka hofisi ya mutshama-xitulu, laha a fikeke a vulavula na yena. U tsakisiwe hi ntsombano ni tinhlamulo leti a nyikiweke tona. U nyikiwe buku leyi nge Leswi Bibele Yi Swi Dyondzisaka, Bibele ni timagazini tin’wana naswona ku endliwe malunghiselelo ya leswaku a endzeriwa.

OCEANIA

• MATIKO 29

• VAAKA-TIKO 38 495 300

• VAHUWELERI 94 924

• TIDYONDZO TA BIBELE 59 431

“Risimu Ro Tsakisa Ku Tlula Hinkwato Leti Ndzi Nga Tshama Ndzi Ti Twa”

Hi ntolovelo eSavaii, le Samoa, siku ra xikolo ri sunguriwa hi ku yimbelela risimu ra kereke. Kambe Celina, loyi a nga ni malembe ya ntlhanu na Levaai, loyi a nga ni malembe ya tsevu, va byele nhloko ya xikolo hi xichavo leswaku a va nga ta yimbelela hileswi va nga Timbhoni ta Yehovha. Ku ala ku yimbelela risimu a swi ta endla leswaku va xupuriwa swinene. Hambiswiritano, swi tikomba onge nhloko ya xikolo a yi anakanya leswaku yi ta endla leswaku vana lava va khoma hi tingana loko va yimbelela kutani yi te: “Loko swi ta ka swi nga koteki leswaku mi yimbelela risimu ra hina, yimbelelani ra n’wina.” Xisweswo, Celina na Levaai va yimbelele risimu 111, leri nge “Xikwembu Xi Ta Vitana,” leri a va ha ku ri dyondza eka Vugandzeri bya Ndyangu bya nimadyambu. Loko va heta, nhloko ya xikolo a yi ri karhi yi tenga-tengisa mihloti. Yi te: “Leri i risimu ro tsakisa ku tlula hinkwato leti ndzi nga tshama ndzi ti twa. Ndzi kombela mi ri yimbelela nakambe.” Va tlhele va ri yimbelela. Kutani yi te: “Ku sukela sweswi, ndzi ta mi kombela leswaku mi yimbelela tinsimu ta n’wina ku nga ri ta hina.”

U Khongele Yesu Vutomi Byakwe Hinkwabyo

Wanuna wa le Fiji loyi a a ri mufundhisi ekerekeni ya le ndhawini ya kwalaho u endle xiboho xo tshama a yingisela loko munhu un’wana a ri karhi a fambiseriwa dyondzo ya Bibele. Loko dyondzo yi ri karhi yi ya emahlweni, u twe leswaku Yesu a hi Xikwembu. Leswi swi n’wi karhatile lerova a va ni nkelunkelu. Loko a vona ndlela leyi a karhatekeke ha yona, nsati wakwe u te: “U nga ha yi u ya yingisela vanhu lavaya!” Kambe mhaka leyi a yi tweke a yi n’wi dyisanga byi rhelela. Vhiki leri landzeleke u tlhele a va kona eka dyondzo ya Bibele. Ku nga si hela masiku ma nga ri mangani a ve kona eka dyondzo ya vumbirhi naswona emahlweni ko va a dyondzeriwa, u ye ekerekeni yakwe kutani a tshika vufundhisi. Leswi swi endle leswaku maxaka yakwe ni swirho swa kereke va tsemeka nhlana va tlhela va hlundzuka. A nga lo tshika kereke ntsena kambe u tlhele a tshika ni ntirho wakwe lowu holelaka kahle. A wu vona kahle ntiyiso lowu nga eBibeleni malunghana na Yesu kambe a swi n’wi tikela ku va a khongela Yehovha hileswi a khongela Yesu vutomi byakwe hinkwabyo. Kambe endzhaku ka loko a hete tin’hweti to tala, hi kona laha eku heteleleni a koteke ku khongela Yehovha. Sweswi u chumayela van’wana mahungu lamanene naswona u va pfuna ku tiva Yehovha ni ku n’wi rhandza.

Vaaki Lava Nga Talangiki Va Amukela Ntiyiso

EMakatea laha ku nga xihlala xa le South Pacific ku tshama vanhu va 62 ntsena. Vandlha ra Timbhoni ta Yehovha ra le Tahiti ri dyondzisa vanhu lava hi Yehovha. Vaaka-tiko va kwalaho va kaye va fambiseriwa tidyondzo ta Bibele nkarhi na nkarhi hi riqingho. Vanhu va kwalomu ka 15 va hlangana ekaya ra xin’wana xa swichudeni swa Bibele naswona va yingisela minhlangano leyi khomiwaka hi Xitahiti. Exikarhi ka vanhu volavo lava sweswi va dyondzaka Bibele, ku ni wansati un’wana loyi a a ri ni xiphemu xa nkoka ekerekeni yakwe naswona a a languteriwe ku vekiwa tanihi mudiyakoni. A hi khale a tlhele a ya ekerekeni yakwe leswaku a ya va byela leswaku ha yini a nga ha ngheni kona kereke. U va kombise hi ku tirhisa Bibele leswaku ha yini wansati a nga fanelanga a dyondzisa evandlheni. U tlhele a hlamusela xiphemu lexi Yesu Kreste a nga na xona ni leswi Xilalelo xa Hosi xi vulaka swona, lexi faneleke xi tlangeriwa kan’we hi lembe ku nga ri Sonto yin’wana ni yin’wana. Ku tlula kwalaho, u swi kotile ku hlamusela leswaku hi lava 144 000 ntsena lava nga ta va na Kreste etilweni ni leswaku hi vona ntsena lava faneleke va dya swifanekiselo swa Xitsundzuxo. Hi ku khutaziwa hi xikombiso xexo, wansati un’wana u tshike kereke naswona sweswi u dyondza Bibele nkarhi ni nkarhi ni Timbhoni.

Ndyangu Wu Amukela Xirhambo

Eka matshalatshala ya ku rhambela vanhu lava holeke eXitsundzuxweni xa rifu ra Kreste, vakulu vambirhi va le Swihlaleni swa Solomon va endzele Joshua, loyi a nga ti eminhlanganweni ku sukela hi 1998. Joshua u fambe tiawara timbirhi ni swirho swa ndyangu wakwe swa 20 leswaku va va kona eXitsundzuxweni. Ndlela ya rirhandzu leyi va amukeriweke ha yona evandlheni yi endle leswaku Joshua a rila. Vo tala endyangwini wakwe va tlhele va va kona eka nkulumo yo hlawuleka laha endzhaku va byeleke vakulu leswaku a va tsakela ku va ni dyondzo ya Bibele. Ku endliwe malunghiselelo ya leswaku ku dyondziwa ni 15 wa vona.

A A Yi Tiva Nhlamulo

Eka swihlala swo tlula 1 000 leswi nga ehansi ka rhavi ra Guam, ku tlula 100 wa swona ku tshama vanhu. Hambiswiritano, ko va 13 wa swona ntsena leswi nga ekusuhi ni mavandlha. Leswi swihlala swo tala swi nga si tshamaka swi endzeriwa hi Timbhoni ta Yehovha, vamakwerhu va hambeta va endla matshalatshala yo swi fikelela. Hi April 2012, ntlawa wa vahuweleri wu fambe hi byatso wu ya ePolowat, ku nga xin’wana xa swihlala leswi ngo va swoxe. Vanhu va le Polowat a va swi tolovelanga ku hlangana ni vanhu va le tindhawini tin’wana. Vavanuna va ambala swo tipfala masenge, va endla swikwekwetsu naswona va tihanyisa hi ku rima.

Un’wana wa vahuweleri lava a va endzile u vutise jaha rin’wana kwale a ku: “Ku humelela yini loko hi fa?”

Jaha leri ra le xihlaleni ri te: “Ndza yi tiva nhlamulo ya xivutiso xexo!” Kutani ri yime hi ku hatlisa kutani ri teka buku leyi nge U Nga Hanya Hi Masiku aParadeyisini eMisaveni hi Xichuukese exelufini ya rona kutani ri pfula eka tluka leri kombisaka leswi nga endzeni. Hi ntsako, ri hlamusele leswi ri swi dyondzeke ebukwini yoleyo ri ri karhi ri kombetela eka ndzima 8 leyi nga ni nhloko-mhaka leyi nge “Ku Humelela Yini Eku Feni?”

Kambe, xana ri yi kume njhani buku leyi? Hi 2009, vahuweleri va le xihlaleni lexikulu xa Chuuk va chumayele emahlalukweni leswaku va kota ku fikelela vanhu vo tala swinene lava a va ya eswihlaleni leswi nga ekule leswi ngo va swoxe kutani va fambisa tibuku leti nge U Nga Hanya Hi Masiku. Munhu un’wana loyi a yaka ePolowat u pfumerile ku teka bokisi ra tibuku kutani a ya ti nyika vaakelani vakwe lava un’wana wa vona a ku ri jaha leri.

Loko va nga si suka ePolowat, vamakwerhu va endzele jaha leri minkarhi yo hlayanyana va ri khutaza ni ku ri komba ndlela leyi ri nga vuyeriwaka ha yona eka nongonoko wo dyondza. Va tlhele va ri dyondzisa ndlela leyi ri nga lavaka matsalwa ni ku tsala ehansi tinhla ta nkoka etlhelo ka tluka ra buku ya rona.

Swa tsakisa ku tiva leswaku eswihlaleni leswi nga ekule laha ku nga riki na thelevhixini, xiya-ni-moya, phepha-hungu kumbe Internet, minkandziyiso ya hina yi pfuna vanhu leswaku va dyondza ntiyiso hi ririmi ra vona!

Makulu Manharhu, Swivangelo Swinharhu

Anna a a ri muhuweleri loyi a nga khuvuriwangiki loyi a ri ni malembe ya kwalomu ka 20 loko nyimpi ya xin’wana-manana ya Bougainville yi ri karhi yi hisa ePapua New Guinea. Hi 1991 a a ri exikarhi ka ntlawa wa Timbhoni ta tsevu ni vana va nkombo va le Vandlheni ra Arawa lava bohekeke ku balekela enhoveni ni swilo swa vona swi nga ri swingani. Ku ringana malembe mambirhi, a va tshama etindlwini leti nga marhumbi naswona a va lava-lavana ni swakudya. A va khoma minhlangano hi ku tirhisa tibuku timbirhi leti a va ri na tona, Bibele ya Anna ni kopi ya Vun’we Eku Gandzeleni Ka Xikwembu Xi Ri Xin’we Xa Ntiyiso. Va khongele swin’we, va yimbelela tinsimu ta Mfumo va tlhela va chumayela lava a va hlangana na vona.

Swirho swa vuthu leri lavaka ku cinca swi va kumile naswona a swi lava leswaku vamakwerhu vambirhi lava a va ri entlaweni va joyina vuthu, kambe swi xixime Timbhoni hikwalaho ka leswi a ti nga ngheneleli eka swa tipolitiki. Socha ri tshame ri komba Anna makulu manharhu kutani ri n’wi byela ri ku: “Loko u nga tekani na mina, ndzi ta ku dlaya.” Anna u ri nyike swivangelo swinharhu—xivangelo xin’we xa kulu rin’wana ni rin’wana—swa leswaku ha yini a a nga ta tekana na rona, xivangelo-nkulu a ku ri leswaku Bibele yi vula leswaku hi teka “eHosini ntsena.” (1 Kor. 7:39) Wanuna loyi u suke a famba.

Hi 2012, endzhaku ka loko a twe hi xilaveko lexikulu xa vahuweleri va Mfumo eArawa, Anna, loyi sweswi a nga phayona ra nkarhi hinkwawo u tlhelele kwale swin’we ni loyi a a phayona na yena leswaku va ya pfuna ku simeka ntlawa lowu nga woxe. U vutisiwile loko swi n’wi karhata ku ya endhawini leyi a tshameke a vona vanhu vo tala va dlayiwa naswona a hlangavetaneke ni swiyimo swo tika kona hi nkarhi wa nyimpi. U hlamule a ku: “Ndza tsaka ku va ndzi vuyile. A xi kona lexi nga yimisaka ntirho wa Yehovha, hambi ku ri nyimpi ya xin’wana-manana.”