“Famba Hi Ripfumelo, Ku Nga Ri Hi Ku Vona”

Loko ka ha sale nkarhi wutsongo leswaku muti wa Yerusalema wu rhendzeriwa ni ku lovisiwa, muapostola Pawulo u tsale leswaku Vakreste, tanihi masocha lamanene ya Kreste, va fanele va langutela swiyimo swo tika ku nga ri ku rhangisa rifuwo ni mintsako. (2 Tim. 2:3, 4) Leswi ku nga sala nkarhi lowutsongo leswaku misava leyi nga chaviki Xikwembu yi lovisiwa, hi fanele hi tiyisa ripfumelo ra hina leswaku hi tshama hi hisekela swilo swa moya. (2 Kor. 4:18; 5:7) Hlalela vhidiyo leyi nge, “Famba Hi Ripfumelo, Ku Nga Ri Hi Ku Vona.” (Nghena eka jw.org/ts, kutani u languta ehansi ka nhlokomhaka leyi nge MINKANDZIYISO > TIVHIDIYO.) Xiya ndlela leyi ku rhandza rifuwo swi veke ntlhamu ha yona eka Nahami na Abitali. Kutani u pfuxeta swivutiso leswi landzelaka.

(1) A ku ri yini “nchumu lowu nyenyetsaka . . . [lowu a] wu yime endhawini yo kwetsima” eminkarhini ya Vakreste vo sungula naswona hi rihi goza ra nkoka leri Vakreste lava a va ri eYerusalema a va fanele va ri teka? (Mat. 24:15, 16) (2) Ha yini ku baleka emutini a swi lava ripfumelo? (3) Leswaku swi nga va tikeli ku baleka a va fanele va endla yini? (4) Ha yini Nahami na Abitali va koke milenge? (Mat. 24:17, 18) (5) Hi wihi ndzingo wun’wana lowu Rahele a langutaneke na wona loko a baleka eYerusalema? (Mat. 10:34-37; Mar. 10:29, 30) (6) Ethani u xi veke njhani xikombiso lexinene xa ripfumelo ni ku tshembela eka Yehovha? (7) I swiyimo swihi swo tika leswi Vakreste va langutaneke na swona ePela? (8) Ripfumelo ra Nahami na Abitali ri tsane njhani hakatsongotsongo? (9) Yehovha u va khathalele njhani Vakreste lava a va tshama ePela? (Mat. 6:33; 1 Tim. 6:6-8) (10) Hi nga n’wi tekelela njhani Abrahama na Sara loko hi ri karhi hi langutana ni makumu ya fambiselo lawa ya swilo? (Hev. 11:8-10) (11) Ha yini Nahami na Abitali va teke xiboho xo tlhelela eYerusalema naswona ha yini a ku nga ri vutlhari ku endla tano? (Luka 21:21) (12) Xiyimo a xi ri njhani eYerusalema loko Nahami na Abitali va tlhelela? (13) Ha yini hi fanele hi tiyisa ripfumelo ra hina sweswi—makumu ma si fika?—Luka 17:31, 32; 21:34-36.

Ku famba hi ripfumelo swi vula (1) ku tshemba nkongomiso wa Yehovha (2) ku pfumelela ku kongomisiwa hi yena ni (3) ku kombisa leswaku hi rhandza swilo swa moya ku tlula rifuwo. Onge hi nga tiyimisela ku famba hi ripfumelo, hi tshemba leswaku “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yoh. 2:17.