“Mbhoni yo Tshembeka eXibakabakeni”

VATLHOKOVETSERI ni vatsari va tinsimu se va ni nkarhi wo leha va ndhundhuzela n’weti tanihi nchumu wo saseka. Hi xikombiso, risimu leri huhuteriweke hi Xikwembu ri vulavula hi wansati loyi a “sasekeke ku fana ni n’weti lowu thwaseke.” (Risimu Ra Solomoni 6:10) Naswona mupisalema u vitana n’weti hi ndlela yo phata a ku i “mbhoni yo tshembeka exibakabakeni.” (Pisalema 89:37) Xiga lexi xi vulavulaka hi n’weti xi vula yini?

Handle ko cinca, n’weti wu teka masiku ya 27,3 ku hlanganisa ku rhendzeleka ka wona ehandle ka misava. Hikwalaho, ku tshembeka ka n’weti swi nga vula ku famba ka wona hi ku ya hi xiyimiso xa wona. Hambiswiritano, swi nga ha endleka leswaku mupisalema a a ri ni nhlamuselo leyi enteke swinene emiehleketweni yakwe. U vitane n’weti a ku i “mbhoni yo tshembeka” eka risimu ra vuprofeta leri vulavulaka hi Mfumo lowu Yesu a dyondziseke valandzeri vakwe leswaku va wu khongelela.—Matewu 6:9, 10.

Emalembeni lama tlulaka 3 000 lama hundzeke, Yehovha Xikwembu u endle ntwanano wa Mfumo na Hosi Davhida wa le Israyele wa khale. (2 Samuwele 7:12-16) Xikongomelo xa ntwanano wolowo a ku ri ku simeka xisekelo xa le nawini xa Yesu Kreste, tanihi mudyandzhaka wa Davhida leswaku a ta tshama exiluvelweni hilaha ku nga heriki. (Esaya 9:7; Luka 1:32, 33) Loko mupisalema a vulavula hi xiluvelo xa “mbewu” ya Davhida, u yimbelerile a ku: “Minkarhi hinkwayo ú ta yima a tiyile a kota n’weti, yona mbhoni yo tshembeka ya le henhla etilweni.”—Pisalema 89:36, 37, Bibele—Mahungu Lamanene.

‘Rivoni leri fumaka vusiku,’ ku nga n’weti—i xitsundzuxo lexi faneleke xa leswaku ku fuma ka Kreste ku ta tshama hi masiku. (Genesa 1:16) Malunghana ni Mfumo wakwe, Daniyele 7:14 yi ri: “Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.” N’weti i mbhoni leyi hi tsundzuxaka hi Mfumo wolowo ni mikateko leyi wu nga ta yi tisela vanhu.

Xana U Nga Swi Tsakela Ku Endzeriwa?

Hambi ku ri emisaveni leyi leyi nga ni maxangu, u nga wu kuma ntsako hi ku va ni vutivi lebyi kongomeke bya Bibele mayelana ni Xikwembu, Mfumo wa xona ni xikongomelo xa xona lexi hlamarisaka hi vanhu. Loko u lava ku kuma rungula leri engetelekeke, kumbe u swi tsakela leswaku un’wana a ku endzela a ta dyondza Bibele na wena mahala, hi kombela u tsalela eka Jehovah’s Witnesses, Private Bag X2067, Krugersdorp, 1740, South Africa, kumbe eka adirese leyi faneleke eka leti xaxametiweke eka tluka 2, u hi rhumela vito ra wena ni adirese ya le kaya.