leswaku a tiyisisa ku hela ka misava ya khale hi Ndhambi leyi loviseke vanhu hinkwavo lava nga ehandle ka ngalava, hi mpimo lowukulu, u ta va na timbhoni laha misaveni malunghana ni xiendlo xa yena lexi nga phindhiwiki xa ku tikombisa hi yexe tanihi Mufumi Lonkulu. (2 Petro 3:6, 7, 13, 14) Lava va ta va lava tshembaka yena ehenhleni ka ku rhula ni nsirhelelo eka misava leyi avanyisiweke. U ta tsaka swinene swonghasi ku hlayiwa exikarhi ka Timbhoni teto leti tsakeriwaka ngopfu. Ku rhula ni nsirhelelo wa wena swi ta va swi kombisiwe tanihi leswi humaka eka Yehova Xikwembu naswona hayi eka nhlengeletano yin’wana ni yin’wana, kumbe xikhiri, ni mimfumo ya politiki ya mafambiselo ya swilo lama lawuriwaka hi Diyavulosi.

20. Xana Yehova u ta humelela hi ndlela yihi, naswona hi tiyimisele ku endla yini?

²⁰ Yehova Xikwembu u ta humelela hi ku kwetsima tanihi Loyi a faneriwaka hi ku gandzeriwa ni ku tirheriwa tanihi Munhu wa le Henhla lonkulu—Xikwembu xa swikwembu, Loyi a hlawulekeke loyi marito ya mupisalema loyi a huhuteriweke a ya kongomisiwe eka yena: “Hi mikari ni mikari, u Šikwembu.” (Psalma 90:2) Hi ku tlangela loku kulaka nkarhi na nkarhi, a hi hlayiseni ku tshemba ka hina ka Yehova Xikwembu ni ku hlangana ka hina na yena ha Yesu Kriste, Koreš Lonkulu.

Swivutiso Swa Vahlayi

◼ “Buku ya vutomi” ya Xikwembu i yini, naswona xana vito ra mina ri nga tsariwa njhani eka yona ni ku hlayisiwa kwalaho?

Matsalwa yo hambana-hambana ya Bibele ya kombisa leswaku Yehova Xikwembu u ni “buku,” kumbe “tsalwa-songwa,” leri xaxametaka vanhu lava tshembekaka lava nga enxaxamelweni wo amukela vutomi lebyi nga heriki, hambi ku ri ematilweni kumbe emisaveni.

Xi ri ematilweni, Xikwembu xa ntiyiso xi xiya vanhu lava kombisaka ripfumelo, lava faneriwaka hi ku amukeriwa ni ku tsundzukiwa hi xona. Mayelana ni Vayuda esikwini ra Malakia ha hlaya: “Kwalaho la’v̌a tšhav̌aka Yehova v̌a v̌ulav̌ula kuṅwe, . . . kutani Yehova a riya ndlev̌e, a yingisela; buku ya šiṭunḍušo yi ṭariwa e mahlweni ka yena, yi ṭaleriwa la’v̌a tšhav̌aka Yehova ni la’v̌a ṭunḍukaka v̌ito ra yena.”—Malakia 3:16.

Kahle-kahle, ku sukela enkarhini wa Avele ku ya emahlweni, Xikwembu a xi ri karhi xi xiya, onge hi loko xi tsala ebukwini, lava va nga emisaveni ya vanhu lava nga ponisiwaka lava faneleke ku tsundzukiwa malunghana ni vutomi lebyi nga heriki. (Matewu 23:35; Luka 11:50, 51) Nakambe, Vakriste lava totiweke va ni ‘mavito ya vona ebukwini leyi ya vutomi,’ kumbe buku ya xitsundzuxo yo amukela vutomi lebyi nga heriki, naswona eka vona byi ta va vutomi bya le tilweni. (Vafilipiya 3:14, 20; 4:3) Hi laha ku hambaneke, Nhlavutelo 17:8 yi ri hi lava va ‘hlamalaka’ mayelana ni “xivandzana”: ‘Mavito ya vona a ma nga tsariwangi ebukwini ya vutomi khale, misava yi nga si tumbuluka.’

Munhu loyi a xiyeriwaka ku tsundzukiwa ni ku amukeriwa (a ri na vito ra yena “ebukwini ya vutomi”) a swi vuli leswaku u tiyisekiseriwe vutomi lebyi nga heriki, onge hi loko leswi a swi kunguhatiwe ka ha ri emahlweni kumbe leswi nga cinciwiki. Mayelana ni Vaisrayele, Muxe u kombele Yehova a ku: “Kambe ŝeŝi wa nga v̌a riv̌alela e ku dyoha ka v̌ona! loko ŝi nga ri tano, hlangula v̌ito ra mina e bukwini ya wena leyi u yi ṭaleke.” Xikwembu xi hlamurile xi ku: “L’a nḍi dyoheleke, hi yena loyi nḍi nga ta ṅwi susa e bukwini ya mina.” (Eksoda 32:32, 33) Ina, hambi ku ri endzhaku ka loko Xikwembu xi tsale un’wana ni ku n’wi amukela “ebukwini” ya xona, munhu a nga ha va la nga yingisiki kumbe a fularhela ripfumelo ra yena. Loko sweswo swi endleka, Xikwembu xi ta “susa vito ra yena ebukwini ya vutomi.”—Nhlavutelo 3:5.

Hi tlhelo rin’wana, loko sweswi mavito ya hina ya ri “ebukwini ya vutomi” ya Xikwembu, kumbe “buku ya šiṭunḍušo,” hi fanele ku hambeta hi kombisa ripfumelo. Hi ndlela yoleyo hi ta hlayisa mavito ya hina ya ri kwalaho. Hi ku fanana, loko vanhu va ri karhi va pfuxiwa eka ‘ku pfuxiwa loku taka ka lava nga lulamangiki,’ va ta va ni nkarhi wo kombisa ripfumelo ivi kutani va fanelekela leswaku mavito ya vona ya rhekhodiwa ebukwini yoleyo. (Mintirho 24:15) Eku heteleleni, vanhu lava tsarisiweke sweswo va ta swi kota ku hlayisa mavito ya vona kwalaho hi laha ku nga heriki. Sweswo swi tano hi lava va totiweke loko va karhi va tikombisa va ‘tshembekile ku fikela eku feni.’ (Nhlavutelo 2:10; 3:5) Malunghana ni lava va nga ni ku langutela ka laha misava, hi ku tikombisa va ri lava tshembekaka sweswi, ku fikela eka ku Fuma Ka Kriste ka Gidi ra Malembe, ivi endzhaku va hundza hi le ka ndzingo lowu kanganyisaka lowu nga ta landzela, mavito ya vona ya ta “tsariwa ebukwini ya vutomi” hi laha ku nga heriki.—Nhlavutelo 20:5-15.