Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
MAY 3-9
LESWI HI SWI DYONDZAKA EBIBELENI | TINHLAYO 27-29
“Tekelela Yehovha, U Nga Vi Na Xihlawuhlawu”
Ti Tlangele Swinene Timfanelo Ta Yehovha
14 Vamakwavo lava va ntlhanu va ye eka Muxe kutani va n’wi vutisa va ku: “Ha yini vito ra tatana ri fanele ri susiwa exikarhi ka ndyangu wakwe hileswi a nga vangiki na n’wana wa jaha?” Va n’wi komberile va ku: “Wena hi nyike ndzhaka exikarhi ka vamakwavo va tatana.” Xana Muxe u hlamule a ku, ‘Nawu wu vula sweswo naswona a ku na lexi ndzi nga mi pfunaka ha xona’? Doo, u “[vike] mhaka ya vona emahlweni ka Yehovha.” (Tinhl. 27:2-5) Yehovha u te yini? U byele Muxe a ku: “Vana va vanhwanyana va Selofehada va vulavula kahle. Hakunene u fanele u va nyika ndzhaka exikarhi ka vamakwavo va tata wa vona, u fanele u va hundzisela ndzhaka ya tata wa vona.” Yehovha a nga yimanga kwalaho. U byele Muxe ku katsa mhaka yoleyo eka Nawu a ku: “Loko munhu un’wana ni un’wana o tshuka a fa a nga ri na n’wana wa jaha, mi fanele mi hundzisela ndzhaka yakwe eka n’wana wakwe wa nhwanyana.” (Tinhl. 27:6-8; Yox. 17:1-6) Ku sukela hi nkarhi wolowo ku ya emahlweni, vavasati hinkwavo va Vaisrayele lava a va ri exiyin’weni lexi fanaka a va ta kuma ndzhaka.
Ti Tlangele Swinene Timfanelo Ta Yehovha
15 Xolexo a xi ri xiboho xa musa ni xa ku nga yi hi nghohe! Vamakwavo volavo va ntlhanu a va nga ri na munhu loyi a a ta va pfuna, naswona Yehovha u va khome hi ndlela leyinene ni hi xichavo hilaha a a va khoma hakona Vaisrayele lavan’wana. (Ps. 68:5) Lexi ko va xikombiso xin’we ntsena xa marungula yo tala ya le Bibeleni lama kombisaka ntiyiso lowu lowu khutazaka: Yehovha a nga yi hi nghohe eka ndlela leyi a ma khomaka ha yona malandza ya yena hinkwawo.—1 Sam. 16:1-13; Mint. 10:30-35, 44-48.
Ti Tlangele Swinene Timfanelo Ta Yehovha
16 Hi nga ku tekelela njhani ku nga yi hi nghohe ka Yehovha? Tsundzuka, ku nga yi hi nghohe ku vumbiwa hi swilo swimbirhi. Loko hi nga yi hi nghohe a hi nge vi na xihlawuhlawu eka van’wana. I ntiyiso, hinkwerhu ka hina hi titeka tanihi vanhu lava nga yiki hi nghohe. Kambe, wa pfumela leswaku a hi minkarhi hinkwayo swi olovaka ku tiva ndlela leyi hi titwaka ha yona hi van’wana. Hikwalaho, hi nga endla yini leswaku hi tiva loko hi tiviwa tanihi vanhu lava nga yiki hi nghohe? Loko Yesu a lava ku tiva leswi vanhu a va swi vula malunghana na yena, u vutise vanghana va yena lava a va tshembaka a ku: “Xana vanhu va ri N’wana wa munhu i mani?” (Mat. 16:13, 14) Ha yini u nga tekeleli Yesu emhakeni yoleyo? U nga ha vutisa munghana wa wena loyi a nga ta ku byela ntiyiso, loko u ri ni ndhuma ya ku nga yi hi nghohe. Loko a ku byela leswaku minkarhi yin’wana u khoma vanhu va rixaka ro karhi hi ndlela leyinene ku tlula va rixaka ro karhi kumbe a vula leswaku u ni musa eka vanhu lava nga ni mali kumbe lava dyondzekeke, u fanele u endla yini? Khongela eka Yehovha, u n’wi kombela leswaku a ku pfuna u cinca ndlela leyi u titwaka ha yona hi van’wana leswaku u ta fana swinene na yena naswona u nga yi hi nghohe eka vanhu hinkwavo.—Mat. 7:7; Kol. 3:10, 11.
Endla Ndzavisiso
it-2-E 528 ¶5
Magandzelo
Magandzelo ya swakunwa. Magandzelo ya swakunwa a ma nyikeriwa swin’we ni magandzelo laman’wana, ngopfungopfu endzhaku ka loko Vaisrayele va tshamisekile eTikweni leri Tshembisiweke. (Tin 15:2, 5, 8-10) A ma katsa vhinyo (“byala”) naswona a yi chuluriwa ehenhla ka alitari. (Tin 28:7, 14; ringanisa na Eks 30:9; Tin 15:10.) Muapostola Pawulo u tsalele Vakreste va le Filipiya a ku: “Hambiloko ndzi chuluriwa ku fana ni gandzelo ra swakunwa, ndzi endla gandzelo leri na n’wina mi ri endlaka ni ntirho lowu mi wu endlelaka Xikwembu hi ku tshembeka. Ndza tsaka.” Laha u tirhise gandzelo ra swakunwa hi ndlela yo fanekisela, ku hlamusela ku tiyimisela kakwe leswaku a pfuna Vakrestekulobye. (Flp 2:17) Loko a ri ekusuhi ni ku fa, u tsalele Timotiya a ku: “Hikuva se ndza chuluriwa ku fana ni gandzelo ra swakunwa naswona nkarhi wa leswaku ndzi tshunxiwa wu tshinele.”—2Tm 4:6.
MAY 10-16
LESWI HI SWI DYONDZAKA EBIBELENI | TINHLAYO 30-31
“Endla Leswi U Swi Hlambanyeke”
it-2-E 1162
Xihlambanyo
Munhu A A Endla Xihlambanyo Hi Ku Swi Rhandza Kambe A A Boheka Ku Xi Hetisisa. Swihlambanyo a swi kwetsima kambe munhu a a swi endla hi ku swi rhandza. Nilokoswiritano, loko munhu o endla xihlambanyo, a swi boha leswaku a xi hetisisa hi ku ya hi nawu. Hikwalaho, a ku vuriwa leswaku xihlambanyo i ku ‘titsona swo karhi,’ leswi vulaka leswaku vutomi bya munhu a byi ta va ekhombyeni loko a nga xi hetisisi xihlambanyo xakwe. (Tin 30:2; tlhela u vona Rhm 1:31, 32.) Leswi a xi khumba vutomi bya munhu, swa twisiseka leswi matsalwa a ma khutaza munhu leswaku a ehleketisisa kahle a nga se endla xihlambanyo, kahle kahle a a fanele a rhanga hi ku kambisisa loko ku ve u ta swi kota ku xi hetisisa. Nawu a wu vula leswaku: “Loko wo tshembisa Yehovha Xikwembu xa wena nchumu wo karhi . . . Yehovha . . . u ta lava leswaku u endla tano; loko swi nga ri tano, u ta va u endle xidyoho. Kambe loko u nga tshembisanga nchumu, a wu nge vi na xidyoho.”—Dt 23:21, 22.
it-2-E 1162
Xihlambanyo
Xitshembiso lexi munhu a xi endlaka eka Xikwembu leswaku u ta endla swo karhi, leswi katsaka ku nyikela magandzelo kumbe nyiko, ku endla ntirho wo karhi kumbe ku va eka xiyimo xo karhi kumbe ku titsona swilo swo karhi leswi nga hoxangiki hi ku ya hi nawu. Xihlambanyo a ku ri nchumu lowu munhu a wu endla hi ku swi rhandza. Leswi ku nga xitshembiso lexi munhu a xi endleke eka Xikwembu swa fana ni xihlambanyo kumbe ku tiboha naswona mikarhi yin’wana marito lawa ma tirhisiwa swin’we eBibeleni. (Tin 30:2; Mt 5:33) “Xihlambanyo” i xitshembiso lexi munhu a xi endlaka kasi “ku hlambanya” i ku tiboha eka valawuri ku tiyisekisa leswaku leswi u swi vulaka i ntiyiso naswona u ta swi hetisisa. Hakanyingi ku hlambanya i nchumu lowu endliwaka ku tiyisekisa ntwanano lowu endliweke.—Gn 26:28; 31:44, 53.
Tinhla-nkulu Ta Buku Ya Tinhlayo
30:6-8—Xana wanuna la nga Mukreste a nga swi herisa switshembiso leswi hlambanyiweke swa nsati wakwe? Malunghana ni switshembiso leswi hlambanyiweke, Yehovha sweswi u yisa nyingiso eka leswi mugandzeri un’wana ni un’wana wa yena a tiboheke ha swona. Hi xikombiso, ku tinyiketela eka Yehovha i xitshembiso lexi hlambanyiweke xa munhu hi xiyexe. (Vagalatiya 6:5) Wanuna a nga na mfanelo yo herisa xitshembiso lexi hlambanyiweke hi nsati wakwe. Kambe, wansati u fanele a papalata ku endla xitshembiso lexi hlambanyiweke lexi lwisanaka ni Rito ra Xikwembu kumbe leswi a faneleke a swi endlela nuna wakwe.
Endla Ndzavisiso
it-2-E 28 ¶1
Yefta
Munhu a a nyikeriwa leswaku a ya tirhela Yehovha endhawini yo kwetsima. A ku ri xiboho lexi endliwaka hi vatswari. Swi ve tano na hi Samuwele, loko a nga si velekiwa, mhani wakwe Hana u endle xihlambanyo xa leswaku u ta n’wi nyikela leswaku a ya tirha etabernakeleni. Nuna wakwe Elkana u pfumelelane ni xihlambanyo xexo. Loko Samuwele a ha ku lumuriwa, Hana u n’wi nyikele endhawini yo kwetsima. Hana u tlhele a nyikela ni xitlhavelo hi xifuwo. (1Sa 1:11, 22-28; 2:11) Samsoni i n’wana un’wana loyi a nyikeriweke leswaku a endla ntirho wa Xikwembu tanihi Munaziri.—Vaa 13:2-5, 11-14; Tin 30:3-5, 16.
MAY 17-23
LESWI HI SWI DYONDZAKA EBIBELENI | TINHLAYO 32-33
“Hlongolani Vaaki Hinkwavo”
Xana A Wu Swi Tiva?
Xana a ku ri yini ‘tindhawu leti tlakukeke’ leti nkarhi na nkarhi ku vulavuriwaka ha tona eMatsalweni ya Xiheveru?
Loko Vaisrayele va ri ekusuhi ni ku nghena eTikweni ra Xitshembiso, Yehovha u va byele leswaku va herisa tindhawu hinkwato leti Vakanana a va gandzela eka tona. U te: “Mi fanele . . . mi lovisa swifaniso swa vona hinkwaswo swa maribye, ni swifaniso swa vona hinkwaswo leswi n’okisiweke swa nsimbi mi ta swi lovisa, ni tindhawu ta vona hinkwato leti tlakukeke to kwetsima mi ta ti lovisa.” (Tinhlayo 33:52) Tindhawu teto ta vugandzeri bya mavunwa swi nga ha endleka leswaku miako ya tona a yi ri ni tindhawu leti nga pfuleka ehenhla leswaku ti nghenisa moya kumbe a ku ri ni tindhawu tin’wana leti vanhu a va hlangana eka tona, to tanihi le hansi ka mirhi ni le mitini yin’wana. (1 Tihosi 14:23; 2 Tihosi 17:29; Ezekiyele 6:3) A ti khavisiwe hi tialitari, tinsika to kwetsima, swifaniso, tindhawu leti a va hisela eka tona mirhi ya risuna ni swin’wana leswi a va swi tirhisa loko va gandzela.
Dyondza Swo Karhi Eka Vuyelo Bya Swihoxo Swa Vaisrayele
Namuntlha, hi langutana ni miringo yo tala leyi fanaka ni leyi Vaisrayele va langutaneke na yona. Manguva lawa ku ni swilo swo tala leswi vanhu va swi endlaka swikwembu swa vona. Swi katsa mali, vanhu lava dumeke eka ta vuhungasi, lava nga ni ndhuma eka ta mintlangu, minhlangano ya tipolitiki, varhangeri van’wana va vukhongeri hambi ku ri swirho swa ndyangu. Swin’wana swa swilo leswi hi nga ha swi teka swi ri swa nkoka swinene evuton’wini bya hina. Ku va ni xinghana lexikulu ni vanhu lava nga rhandziki Yehovha swi nga onha vuxaka bya hina na yena.
Vaisrayele vo tala va kokiwe rinoko ni ku phasiwa hi vuoswi lebyi a byi ri bya nkoka evugandzerini bya Bali. Mintlhamu leyi fanaka ni leyi ya ha phasa vagandzeri vo tala va Xikwembu. Hi xikombiso, munhu la nga riki na vuxiyaxiya a nga ha hlalela swifaniso swo navetisa rimbewu eka khompyuta yakwe a ri ekaya kutani sweswo swi onha ripfalo rakwe. Swi twisa ku vava loko Mukreste a phasiwa hi ku hlalela swifaniso swo navetisa rimbewu eka Internet!
it-1-E 404 ¶2
Kanana
Yoxuwa ‘a nga siyanga na xin’we eka hinkwaswo leswi Yehovha a swi leriseke Muxe’ mayelana ni ku lovisiwa ka Vakanana. (Yx 11:15) Kambe Vaisrayele va tsandzekile ku landzela ndlela leyinene leyi a a va rhangela ha yona ni ku herisa matiko lama a ma va dyohisa. Leswi Vaisrayele va tshikeke Vakanana va tshama na vona, swi va vangele khombo lerova a swi kanakanisi leswaku hi ku famba ka nkarhi swi endle leswaku ku dlayiwa vanhu vo tala (hi nga ha vuli vugevenga, ku tikhoma ko biha hi swa masangu ni ku gandzela swikwembu swa hava) ku tlula loko a va lo tshembeka va landzela xileriso xo herisa Vakanana hinkwavo. (Tin 33:55, 56; Vaa 2:1-3, 11-23; Ps 106:34-43) Yehovha a a lemukise Vaisrayele leswaku a a ta avanyisa hi vululami naswona a a nga ta va ni xihlawuhlawu, leswi vulaka leswaku loko Vaisrayele va endla xinghana na Vakanana, va tekana na vona, va gandzela swikwembu swa vona, va tlhela va landzela mikhuva ni swiendlo swa vugandzeri bya vona, a va ta humeleriwa hi khombo leri a ri ta wela Vakanana, a va ta lovisiwa naswona ‘tiko a ri ta va hlanta.’—Eks 23:32, 33; 34:12-17; Lv 18:26-30; Dt 7:2-5, 25, 26.
Endla Ndzavisiso
it-1-E 359 ¶2
Ndzilakano
Endzhaku ka loko vuhlolotwana byi kombe tlhelo leri nyimba a yi ta tshama eka rona, se a ku ta kambisisiwa leswaku yi fanele yi averiwa ndhawu yo tanihi kwihi hi ku landza nchumu wa vumbirhi: ku nga leswaku nyimba yi ni vanhu vangani. “Mi fanele mi ava tiko hi ku tirhisa vuhlolotwana ri va ndzhaka ya mindyangu ya n’wina. Lava nga tala mi va avela ndhawu leyikulu, kasi lava nga vatsongo mi va avela ndhawu leyitsongo. Un’wana ni un’wana u ta nyikiwa ndhawu leyi vuhlolotwana byi nga ta n’wi komba yona.” (Tin 33:54) Ndhawu leyi vuhlolotwana byi kombeke yona a yi nga ta cinca kambe a ku ta kambisisiwa vukulu bya ndhawu leyi va faneleke va averiwa yona tanihi ndzhaka. Hikwalaho, endzhaku ka loko ku xiyiwe leswaku ndhawu leyi a yi averiwe nyimba ya Yuda a yi ri yikulu ngopfu, yi hungutiwile kutani xiphemu xa yona xi nyikiwa nyimba ya Simiyomi.—Yx 19:9.
MAY 24-30
LESWI HI SWI DYONDZAKA EBIBELENI | TINHLAYO 34-36
“Tumbela Eka Yehovha”
Xana U Tumbela Eka Yehovha?
4 Kambe A ku endliwa yini hi Muisrayele loyi a dlayeke munhu un’wana hi xihoxo? Hambileswi munhu yoloye a nga dlayangiki hi vomu, kambe a ri na nandzu wo halata ngati leyi nga riki na nandzu. (Gen. 9:5) Kambe a a pfumeleriwa ku balekela eka wun’wana wa miti ya tsevu ya vutumbelo leswaku a kombisiwa tintswalo. Eka miti yoleyo a a ta kuma nsirhelelo. Munhu la dlayeke munhu un’wana hi xihoxo a a fanele a tshama eka muti wa vutumbelo ku fikela loko muprista lonkulu a fa.—Tinhl. 35:15, 28.
Xana U Tumbela Eka Yehovha?
6 Munhu loyi a dlayeke munhu un’wana hi xihoxo a a fanele a rhanga a ya ‘hlamusela nandzu wakwe eka vakulukumba’ lava nga enyangweni ya muti lowu a balekeleke eka wona. A a fanele a amukeriwa hi malwandla. (Yox. 20:4) Endzhaku ka nkarhi, a va ta n’wi tlherisela eka rikwavo leswaku vakulukumba va kona va tenga nandzu wakwe. (Hlaya Tinhlayo 35:24, 25.) Endzhaku ka loko va kume leswaku a nga dlayanga hi vomu, munhu yoloye a tlheriseriwa emutini wa vutumbelo.
Xana U Tumbela Eka Yehovha?
13 Loko mudyohi a ri emutini wa vutumbelo a ta va a sirhelelekile. Malunghana ni miti yoleyo Yehovha u te: “Byi fanele byi va vutumbelo bya n’wina.” (Yox. 20:2, 3) Yehovha a nga lavi leswaku mudyohi a tlhela a avanyisiwa hi nandzu wolowo, hambi ku ri murihiseri a nga pfumeleriwi leswaku a n’wi landza emutini wa vutumbelo. Hikwalaho mudyohi a nga ta hanya hi ku chava. Loko a ri emutini wolowo Yehovha a ta n’wi sirhelela. Emutini wa vutumbelo a ku nga fani ni le khotsweni. Emutini wolowo a swi ta koteka leswaku mudyohi a tirha, a pfuna van’wana ni ku tirhela Yehovha hi ku rhula. Hakunene a swi ta koteka leswaku munhu a hanya vutomi lebyi tsakisaka lebyi nga ni xikongomelo!
Endla Ndzavisiso
Nkutsulo Lowu Faneleke Eka Hinkwavo
13 Hambiswiritano, Adamu na Evha a va vuyeriwi hi nkutsulo. Nawu wa Muxe wu ni nsinya lowu wa nawu: “Mi nga tshuki mi amukela mali yo ponisa mudlayi loyi a faneriwaka hi ku fa, hikuva u fanele a dlayiwa.” (Tinhlayo 35:31) Adamu a nga kanganyisiwanga, hikwalaho u endle xidyoho hi vomu, hi ku tiyimisela. (1 Timotiya 2:14) Swi vangele vatukulu va yena rifu, hikuva sweswi va kume ndzhaka ya ku nga hetiseki ka yena, xisweswo va va ehansi ka xigwevo xa rifu. Entiyisweni, Adamu a a fanele ku fa, hikuva tanihi munhu la hetisekeke, u hlawule ku tlula nawu wa Xikwembu hi vomu. A swi ta va swi hambanile ni milawu ya Yehovha yo lulama leswaku a tirhisa nkutsulo eka Adamu. Hikwalaho, ku hakela xidyoho xa Adamu, swi susa xigwevo xa rifu eka vatukulu va Adamu! (Varhoma 5:16) Hi ku ya hi nawu, xidyoho lexi dlayaka xi susiwa ku suka erimitswini ra xona. Mukutsuri ‘u fele vanhu hinkwavo,’ a byarha vuyelo bya xidyoho xa vana hinkwavo va Adamu.—Vaheveru 2:9; 2 Vakorinto 5:21; 1 Petro 2:24.
MAY 31–JUNE 6
LESWI HI SWI DYONDZAKA EBIBELENI | DETERONOMA 1-2
“Yehovha Hi Yena Muavanyisi”
Yehovha—Murhandzi Wa Vunene Ni Vululami
Vakulu evandlheni va ni vutihlamuleri byo avanyisa timhaka ta swidyoho leswikulu. (1 Vakorinto 5:12, 13) Loko va ri karhi va avanyisa, va tsundzuka leswaku ku kombisa vululami bya Xikwembu, swi lava va va ni tintswalo laha swi kotekaka. Loko ku nga ri na xivangelo—tanihi le mhakeni ya vadyohi lava nga hundzukiki—tintswalo ti nge kombisiwi. Kambe vakulu a va susi mudyohi evandlheni hileswi va lavaka ku n’wi twisa ku vava. Va tshemba leswaku ku susa mudyohi, swi ta n’wi pfuna leswaku a tiehleketa kahle. (Ringanisa Ezekiyele 18:23.) Ehansi ka vunhloko bya Kreste, vakulu va tirha hi vululami naswona leswi swi katsa ku va va fana ni “ndhawu yo tumbela eka yona loko ku ri ni moya.” (Esaya 32:1, 2) Hikwalaho va fanele va nga yi hi nghohe kambe va anakanyela.—Deteronoma 1:16, 17.
Yingisa Vulawuri Bya Xikwembu Hi Ku Titsongahata
4 Hambiswiritano, leswaku munhu a va muavanyisi, a swi nga lavi leswaku a tiva Nawu ntsena. Leswi a va nga hetisekanga, vavanuna lava, lava kuleke, a va fanele va lwa ni mboyamelo wa vona wo biha—wo tanihi vutianakanyi, xihlawuhlawu ni makwanga—ku nga swilo leswi nga endlaka leswaku va nga avanyisi hi mfanelo. Muxe u va byele a ku: “Mi nga tshuki mi ya hi nghohe loko mi avanyisa. Mi fanele mi yingisa lontsongo ku fana ni lonkulu. Mi nga tshuki mi chavisiwa hi munhu, hikuva ku avanyisa i ka Xikwembu.” Ina, vaavanyisi va tiko ra Israyele a va avanyisela Xikwembu. Mawaku lunghelo leri a va ri na rona!—Deteronoma 1:16, 17.
Endla Ndzavisiso
Switsundzuxo Swa Yehovha Swa Tshembeka
9 Loko Vaisrayele va sungula riendzo ra vona leri tekeke malembe ya 40 ‘emananga lama chavisaka swinene,’ Yehovha a nga va hlamuselanga hi vuenti ka ha ri emahlweni leswaku u ta va kongomisa, a va sirhelela ni ku va khathalela hi ndlela yihi. Nilokoswiritano, nkarhi ni nkarhi u swi kombisile leswaku va nga n’wi tshemba va tlhela va tshemba swileriso swa yena. Loko a tirhisa papa lerikulu ninhlikanhi ivi nivusiku a tirhisa ndzilo lowukulu, Yehovha a a tsundzuxa Vaisrayele leswaku a a va seketela loko a ri karhi a va kongomisa eka riendzo ra vona leri a ri tika. (Det. 1:19; Eks. 40:36-38) U tlhele a tiyiseka leswaku va kuma swilo hinkwaswo leswi a va swi lava. “Tinguvu ta vona a ti hlakalanga, ni milenge ya vona a yi pfimbanga.” Hakunene, “a va pfumalanga nchumu.”—Neh. 9:19-21.
JUNE 7-13
LESWI HI SWI DYONDZAKA EBIBELENI | DETERONOMA 3-4
“Milawu Ya Yehovha Yi Kombisa Vutlhari Byakwe Naswona Yi Lulamile”
it-2-E 1140 ¶5
Ku Twisisa
Loko munhu a dyondza Rito ra Xikwembu hi ku tiyimisela, a tlhela a hanya hi swileriso swa rona, u ta tlhariha ku tlula vadyondzisi vakwe ni ku twisisa ku tlula vanhu lavakulu. (Ps 119:99, 100, 130; ringanisa na Lk 2:46, 47.) Leswi swi vangiwa hileswi vutlhari ni ku twisisa swi kumekaka eka milawu ya Xikwembu leyinene ni le ka swiboho swa xona swo lulama kutani loko Vaisrayele va swi yingisa, matiko lawa va akelaneke na wona a ma ta va teka va ri “vanhu vo tlhariha ni lava twisisaka.” (Dt 4:5-8; Ps 111:7, 8, 10; ringanisa na 1Th 2:3.) Munhu la twisisaka wa swi xiya leswaku Rito ra Xikwembu ri lulamile, u lava ku hanya hi rona naswona u kombela Xikwembu xi n’wi pfuna leswaku a endla tano. (Ps 119:169) U pfumelela Rito ra Xikwembu ri khumba mbilu ni miehleketo yakwe (Mt 13:19-23), u ri tsala embilwini ya yena (Swiv 3:3-6; 7:1-4), naswona u venga “tindlela hinkwato ta mavunwa” (Ps 119:104). Loko n’wana wa Xikwembu a ha ri la misaveni u kombise ku twisisa hi ndlela yoleyo lerova a nga ri balekelanga rifu emhandzini ya nxaniso hikuva a fanele a fa hi ndlela yoleyo leswaku ku hetiseka Matsalwa.—Mt 26:51-54.
Loko Ku Ri Ni Moya Wa Ku Hanana
Hi ku hlamarisiwa hi leswi yi swi tweke ni ku swi vona, hosi leyi ya xisati hi ku titsongahata yi hlamurile yi ku: “Ma tsaka ni malandza ya wena lama yimaka emahlweni ka wena nkarhi ni nkarhi ma yingisa vutlhari bya wena!” (1 Tihosi 10:4-8) A yi vulanga leswaku malandza ya Solomoni ma tsaka hikwalaho ka leswi a ma ri ni rifuwo ro tala—hambileswi a ri va talerile. Ku ri na sweswo, malandza ya Solomoni a ma katekile hikuva nkarhi hinkwawo a ma yingisa vutlhari lebyi Solomoni a nyikiweke byona hi Xikwembu. Mawaku xikombiso lexinene lexi hosi ya xisati ya le Xeba yi nga xona namuntlha eka vanhu va Yehovha, lava tiphinaka hi vutlhari bya Muvumbi hi yexe ni bya N’wana wa yena, Yesu Kreste!
Nakambe lexi xiyekaka a ku ri marito lama landzelaka lama vuriweke hi hosi ya xisati eka Solomoni: “A ku dzunisiwe Yehovha Xikwembu xa wena.” (1 Tihosi 10:9) Handle ko kanakana, yi vone leswaku vutlhari ni ku humelela ka Solomoni a swi huma eka Yehovha. Leswi swi fambisana ni leswi Yehovha a swi tshembiseke Israyele eku sunguleni. U te: ‘Yingisani milawu ya mina,’ “hikuva loko mi endla tano vanhu lava nga ta twa hi ta milawu leyi hinkwayo va ta xiya leswaku mi ni vutlhari ni ku twisisa kutani va ta ku, ‘A swi kanakanisi leswaku tiko leri lerikulu i ra vanhu vo tlhariha ni lava twisisaka.’”—Deteronoma 4:5-7.
Xana U ‘Fuwile Eka Xikwembu’?
13 Loko Yehovha a nyika vanhu va yena mikateko, u va nyika leyinene ngopfu. (Yakobo 1:17) Hi xikombiso, loko Yehovha a nyika Vaisrayele tiko leri a va ta tshama eka rona, u va nyike ‘tiko leri khulukaka ntswamba ni vulombe.’ Hambileswi ku vuriwaka leswaku tiko ra Egipta na rona a ri ri tano, ku ni nchumu wun’we lowu tiko leri Yehovha a ri nyikeke Vaisrayele a ri hambane ngopfu ni ra Egipta ha wona. Muxe u byele Vaisrayele a ku: “I tiko leri Yehovha Xikwembu xa n’wina a ri langutelaka.” Hi marito man’wana, swilo a swi ta va fambela kahle hikuva a va ta va va khathaleriwa hi Yehovha. Loko ntsena Vaisrayele a va lo tshama va tshembekile eka Yehovha, a va ta katekisiwa hilaha ku fuweke naswona a va ta tiphina hi vutomi lebyi a byi nga pimanisiwi nikatsongo ni bya matiko hinkwawo lama va rhendzeleke. Hakunene, nkateko wa Yehovha hi wona “lowu fuwisaka”!—Tinhlayo 16:13; Deteronoma 4:5-8; 11:8-15.
Endla Ndzavisiso
Tinhla-nkulu Ta Buku Ya Deteronoma
4:15-20, 23, 24—Xana ku yirisiwa ka ku endla swifaniso leswi vatliweke a ku vula leswaku swi bihile ku tiendlela swifaniso swo karhi hi xikongomelo xo khavisa? Doo! Ku yirisiwa loku vuriwaka laha a ku ri ka ku endla swifaniso swo swi gandzela—a ku lwisana ni ku ‘nkhinsamela swifaniso ni ku swi tirhela.’ Matsalwa a ma ku yirisi ku vatla kumbe ku mpfampfarhuta swifaniso swo khavisa ha swona.—1 Tihosi 7:18, 25.
JUNE 14-20
LESWI HI SWI DYONDZAKA EBIBELENI | DETERONOMA 5-6
“Letela Vana Va Wena Va Rhandza Yehovha”
Vatswari, Enerisani Swilaveko Swa Mindyangu Ya N’wina
11 Emhakeni leyi, kumbexana a ku na ndzimana yin’wana eMatsalweni leyi tshahiwaka swinene ku tlula Deteronoma 6:5-7. Hi kombela u pfula Bibele ya wena kutani u hlaya tindzimana toleto. Xiya leswaku vatswari va rhanga va byeriwa leswaku va kurisa vumoya bya vona, va kurisa ndlela leyi va rhandzaka Yehovha ha yona va tlhela va nghenisa marito ya yena embilwini. Ina, u fanele u va xichudeni lexi tiyimiseleke xa Rito ra Xikwembu, u hlaya Bibele nkarhi na nkarhi u tlhela u anakanyisisa hi yona leswaku u ta kota ku ti twisisa kahle tindlela, misinya ya milawu ni milawu ya Yehovha u tlhela u yi rhandza. Hikwalaho, mbilu ya wena yi ta tala hi mintiyiso leyi tsakisaka ya le Bibeleni leyi nga ta ku susumetela ku tsaka, ku xixima ni ku rhandza Yehovha. U ta va ni swilo swo tala leswinene swo swi dyondzisa vana va wena.—Luka 6:45.
Ndzi Nga Va Pfuna Njhani Vana Va Mina Leswaku Va Va Lava Dyondzisiweke Kahle?
Swilo leswi u swi navelaka, swikongomelo, mimpimanyeto ni swilo leswi u swi tsakelaka a swi vonakali ntsena eka leswi u swi vulaka kambe ni le ka leswi u swi endlaka. (Varhoma 2:21, 22) Ku sukela evutsongwanini, vana va dyondza hi ku langutisa vatswari va vona hi vukheta. Vana va xiya leswi nga swa nkoka eka vatswari va vona, kutani swilo sweswo hi swona leswi hakanyingi swi vaka swa nkoka eka vana. Loko hakunene u rhandza Yehovha, vana va wena va ta swi vona. Hi xikombiso, va ta swi vona leswaku ku dyondza Bibele i swa nkoka eka wena. Va ta swi lemuka leswaku u rhangisa swilaveko swa Mfumo evuton’wini. (Matewu 6:33) Ku va kona nkarhi na nkarhi eminhlanganweni ya Vukreste ni ku hlanganyela entirhweni wo chumayela hi Mfumo swi ta va kombisa leswaku ku nyikela ntirho wo kwetsima eka Yehovha i swa nkoka swinene eka wena.—Matewu 28:19, 20; Vaheveru 10:24, 25.
Vatswari, Enerisani Swilaveko Swa Mindyangu Ya N’wina
14 Hilaha Deteronoma 6:7 yi kombisaka hakona, ku ni mikarhi yo tala laha n’wina vatswari mi nga bulaka hi swilo swa moya ni vana va n’wina. Ku nga khathariseki leswaku mi famba swin’we, mi endla mitirho ya le kaya swin’we, kumbe mi le ku wiseni swin’we, mi nga ha kuma mikarhi yo enerisa swilaveko swa moya swa vana va n’wina. Ina, a mi fanelanga mi “chumayela” vana va n’wina hi mintiyiso ya Bibele nkarhi hinkwawo. Ku ri na sweswo, ringetani ku endla mabulo ya le ndyangwini ma va lama akaka, mi vulavula hi swilo swa moya. Hi xikombiso, magazini wa Xalamuka! wu ni swihloko swo tala leswi vulavulaka hi swilo swo hambana-hambana. Swihloko swo tano swi nga ha pfula ndlela yo bula hi swiharhi leswi tumbuluxiweke hi Yehovha, tindhawu leti sasekeke hi ntumbuluko emisaveni hinkwayo ni mindhavuko yo hambana-hambana leyi hlamarisaka ya vanhu ni ndlela leyi va hanyaka ha yona. Mabulo yo tano ma nga susumetela vana ku hlaya leswi engetelekeke hi tibuku leti humesiwaka hi ntlawa wa hlonga ro tshembeka ni ro tlhariha.—Matewu 24:45-47.
Endla Ndzavisiso
Ndlela Leyi Rirhandzu Ni Vululami A Swi Kombisiwa Ha Yona Eka Vaisrayele Va Khale
11 Leswi hi swi dyondzaka: Yehovha a nga voni ku languteka ka munhu ntsena. U vona leswi hakunene hi nga xiswona etimbilwini ta hina. (1 Sam. 16:7) A hi nge swi koti ku n’wi fihlela leswi hi swi ehleketaka, ndlela leyi hi titwaka ha yona ni swiendlo swa hina. U languta leswinene eka hina ni ku hi khutaza ku endla leswinene. Kambe u lava leswaku hi papalata miehleketo leyi hoxeke yi nga si hi endlisa swihoxo.—2 Tikr. 16:9; Mat. 5:27-30.
JUNE 21-27
LESWI HI SWI DYONDZAKA EBIBELENI | DETERONOMA 7-8
“A Mi Fanelanga Mi Tekana Na Vona”
Ha Yini Xikwembu A Xi Lava Leswaku Vagandzeri Va Xona Va Tekana Ni Vagandzeri-kulobye Ntsena?
Yehovha a a swi tiva leswaku Sathana a a lava ku hambukisa vanhu va Yena, hi ku va endla va gandzela swikwembu swa hava. Xisweswo, Xikwembu xi lemukise valandzeri va xona leswaku vanhu lava nga riki vapfumeri va “ta hambukisa n’wana wa wena wa jaha, a nga ha ndzi landzeli, kunene va ta tirhela swikwembu swin’wana.” A va langutane ni ntlhontlho. Loko tiko ra Israyele a ro wela endzingweni wa ku gandzela swikwembu swa hava, Xikwembu a xi nga ha ta ri tsakela kumbe ku ri sirhelela, leswi a swi ta endla leswaku valala va rona va ri hlasela hi ku olova. Kutani xana tiko leri a ri ta n’wi humesa njhani Mesiya loyi a tshembisiweke? Swi le rivaleni leswaku Sathana a ri ni xivangelo lexi twalaka xo yenga Vaisrayele leswaku va tekana ni vanhu lava nga riki vapfumeri.
Ku Nghenela Vukati “eHosini Ntsena”—Xana Swa Ha Vuyerisa?
Nilokoswiritano, eBibeleni Yehovha u hi lerisa leswaku hi nghenela vukati eHosini ntsena. Ha yini? Hikuva wa swi tiva leswi nga hi vuyerisaka naswona u lava ku hi sirhelela. A nga lavi leswaku hi endla swiboho leswi nga riki swinene leswi nga ta hi twisa ku vava kumbe swi hi endla hi nga tsaki. Enkarhini wa Nehemiya, Vayuda vo tala a va teke vavasati lava a va nga tirheli Xikwembu. Hikwalaho Nehemiya u vulavule hi xikombiso xo biha xa Solomoni. A a “rhandza [hi] Xikwembu xakwe, lerova Xikwembu xi n’wi veke a va hosi ya tiko hinkwaro ra Israyele. Vasati vambe va n’wi dyohisile.” (Nehemiya 13:23-26) Yehovha wa swi tiva leswaku switsundzuxo swakwe swi vuyerisa hina, hi yona mhaka a leriseke Vakreste leswaku va nghenela vukati eHosini ntsena. (Pisalema 19:7-10; Esaya 48:17, 18) Ha swi tlangela swinene leswi a hi nyikaka ndzayo ya rirhandzu ni leyi tshembekaka. Loko hi yingisa Yehovha tanihi Mufumi wa hina, hi pfumela leswaku u ni mfanelo yo hi byela leswi hi faneleke hi swi endla.—Swivuriso 1:5.
Ku Nghenela Vukati “eHosini Ntsena”—Xana Swa Ha Vuyerisa?
12 Emisaveni leyintshwa, a hi mikarhi hinkwayo hi nga ta kuma leswi hi swi lavaka, swi nga ha endleka hi boheka ku rindza. Hi ta boheka ku va lava khensaka hi tlhela hi eneriseka exiyin’weni xin’wana ni xin’wana lexi hi nga ta va hi ri eka xona. Entiyisweni, hi ta boheka ku kombisa timfanelo leti Yehovha a hi dyondzisaka leswaku hi va na tona sweswi. Hikwalaho loko hi dyondza ku va ni timfanelo toleto sweswi, hi kombisa leswaku misava leyintshwa i ya xiviri eka hina nileswaku hi tilunghiselela ku ya hanya hilaha ku nga heriki. (Vaheveru 2:5; 11:1) Nakambe, hi ta kombisa leswaku ha swi lava hakunene ku ya hanya emisaveni leyi vanhu hinkwavo va yingisaka Yehovha ntsena.
Endla Ndzavisiso
Yehovha U Enerisa Swilaveko Swa Hina Swa Siku Ni Siku
4 Xikhongelo xa hina xa ku kombela xinkwa xa siku ni siku xi fanele xi tlhela xi hi tsundzuxa xilaveko xa hina xa swakudya swa moya swa siku ni siku. Hambileswi Yesu a a twa ndlala swinene endzhaku ko titsona swakudya nkarhi wo leha, u arile loko Sathana a n’wi ringa leswaku a hundzula maribye ma va xinkwa, a ku: “Ku tsariwile, ‘Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.’” (Matewu 4:4) Laha Yesu u tshahe muprofeta Muxe loyi a byeleke Vaisrayele a ku: “[Yehovha] u ku tsongahatile, a ku tshika u fa hi ndlala kutani a ku dyisa manna, leyi u nga yi tivangiki hambi ku ri vatata wa wena va nga yi tivangiki; ku endlela leswaku u swi tiva leswaku munhu a nga hanyi hi xinkwa ntsena, kambe munhu u hanya hi marito hinkwawo lama humaka enon’wini wa Yehovha.” (Deteronoma 8:3) Ndlela leyi Yehovha a phameleke Vaisrayele manna ha yona yi endle leswaku va kuma swakudya swa nyama va tlhela va dyondza tidyondzo ta swa moya. Dyondzo yin’wana hileswaku a va fanele va “rholela un’wana ni un’wana leswi ringaneke siku ha rin’we.” Loko vo hlengeleta swo tala ku tlula swa siku, leswi saleke a swi sungula ku nun’hwa kutani swi huma swivungu. (Eksoda 16:4, 20) Kambe leswi a swi nga humeleli hi siku ra vutsevu loko va fanele va hlengeleta mpimo lowu andzisiweke kambirhi leswaku va ta swi dya na hi Savata. (Eksoda 16:5, 23, 24) Kutani manna yi va dyondzise leswaku a va fanele va yingisa ni leswaku vutomi bya vona a byi nga titsheganga hi xinkwa ntsena kambe na hi “marito hinkwawo lama humaka enon’wini wa Yehovha.”
JUNE 28–JULY 4
LESWI HI SWI DYONDZAKA EBIBELENI | DETERONOMA 9-10
“Xana Yehovha Xikwembu Xa Wena U Lava Yini Eka Wena?”
I Yini Leswi Yehovha A Swi Kombelaka Eka Hina?
I yini leswi nga hi susumetelaka leswaku hi yingisa Xikwembu hi ku ti rhandzela? Muxe u boxe xivangelo xin’we lexi nge: “Chava Yehovha Xikwembu xa wena.” (Ndzimana 12) Leswi a swi vuli ku chava Xikwembu hikwalaho ka leswi xi nga ha hi xupulaka kambe swi vula ku xixima Xikwembu ni ku hanya hi tindlela ta xona. Loko hi xi chava swinene Xikwembu, hi ta papalata ku endla swilo leswi xi hlundzukisaka.
Hikwalaho, i yini lexi faneleke xi hi susumetela ku yingisa Xikwembu? Muxe u ri: ‘Rhandza Yehovha Xikwembu xa wena u tlhela u n’wi tirhela hi mbilu ya wena hinkwayo ni hi moya-xiviri wa wena hinkwawo.’ (Ndzimana 12) Ku rhandza Xikwembu swi katsa swilo swo tala ku tlula ndlela leyi u titwaka ha yona. Buku yin’wana yi ri: “Marito lama tirhisiweke tanihi hi maendli eka Xiheveru lama kombetelaka eka ndlela leyi hi titwaka ha yona, mikarhi yin’wana ma kombetela eka swiendlo leswi veke kona hikwalaho ka ndlela leyi hi titwaka ha yona.” Buku leyi fanaka yi vula leswaku ku rhandza Xikwembu swi vula ku xi “endlela swiendlo swa rirhandzu.” Hi marito man’wana, loko hi rhandza Xikwembu hakunene, hi ta endla swilo hi ndlela leyi nga ta xi tsakisa.—Swivuriso 27:11.
I Yini Leswi Yehovha A Swi Kombelaka Eka Hina?
Ku yingisa hi ku tirhandzela swi nga hi tisela mikateko. Muxe u tsale a ku: “Hlayisa . . . milawu . . . leyi ndzi ku lerisaka yona namuntlha, leswaku swi ku fambela kahle.” (Ndzimana 13) Milawu hinkwayo ya Yehovha, ku nga swilo hinkwaswo leswi a hi kombelaka swona, swi ta vuyerisa hina. I yini lexi nga hi tiyisekisaka leswaku sweswo swi ta hi vuyerisa? Bibele yi ri: “Xikwembu i rirhandzu.” (1 Yohane 4:8) Ku engetela kwalaho, xi hi nyike milawu yo tano, leyi vuyerisaka hina. (Esaya 48:17) Loko hi endla hinkwaswo leswi Yehovha a hi kombelaka swona, swi ta endla leswaku hi nga karhateki ngopfu sweswi swi tlhela swi hi tisela mikateko ya hilaha ku nga heriki loko ku fuma Mfumo wakwe.
Xana U Nga Swi Kota Hakunene “Ku Tshinela Eka Xikwembu”?
2 Abrahama wa khale hi wun’wana wa vanhu lava veke ni vunghana byo tano. Yehovha u vulavule hi kokwana-xinguwe yoloye tanihi “nakulorhi.” (Esaya 41:8) Ina, Yehovha a a languta Abrahama tanihi munghana wakwe. Abrahama u ve ni vunghana byebyo lebyikulu hikuva a a “ve[ke] ripfumelo eka Yehovha.” (Yakobo 2:23) Ninamuntlha, Yehovha u pfule tindlela ta ku ‘tihlanganisa’ ni lava va n’wi tirhelaka hikwalaho ka ku va va n’wi rhandza. (Deteronoma 10:15) Rito rakwe ra khongotela: “Tshinelani eka Xikwembu, kutani xi ta tshinela eka n’wina.” (Yakobo 4:8) Eka marito lawa, hi kuma xirhambo swin’we ni xitshembiso.
Endla Ndzavisiso
it-1-E 103
Vaanaka
I rixaka ra vanhu vo leha swinene lava a va tshama endhawini ya tintshava ya le Kanana ni le tindhawini tin’wana ta le kusuhi ni lwandle, ngopfungopfu edzongeni wa Kanana. Vavanuna vanharhu va Vaanaka lava dumeke ku nga Ahimani, Sexayi na Talimayi, va kale va tshama eHebroni. (Tin 13:22) Laha hi kona laha tinhlori ta 12 ta Vaheveru ti voneke Vaanaka ro sungula naswona tinhlori ta 10 ti kale ti nyikela xiviko xo chavisa xa leswi va swi voneke, va vule leswaku vavanuna lava a ku ri vana va Manefilimi lava veke kona ku nga si va ni Ndhambi ni leswaku loko Vaanaka va ringanisiwa na vona, Vaheveru a va fana ni “tinjiya.” (Tin 13:28-33; Dt 1:28) Leswi a va ri swihontlovila, a ku tirhisiwa vona leswaku ku hlamuseriwa vanhu vo leha va tlhela va va ni matimba va Vaemimi ni Varefayimi. Matimba lawa a va ri na wona ma endle leswaku ku va ni xivuriso lexi nge: “I mani loyi a nga tiyelaka vana va Anaka?”—Dt 2:10, 11, 20, 21; 9:1-3.