Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
JANUARY 3-9
LESWI HI SWI DYONDZAKA EBIBELENI | VAAVANYISI 15-16
“Ku Xenga Munhu Swi Bihile”
Vuxengi I Xiphemu Xa Xikombiso Xa Masiku Yo Hetelela
4 Xikombiso xo sungula i xa Delila loyi a a ri ni vukanganyisi, loyi a a rhandzana na Muavanyisi Samsoni. Samsoni a a lava ku lwa ni Vafilista hikwalaho ka vanhu va Xikwembu. Kumbexana leswi tihosi ta ntlhanu ta Vafilista a ti swi tiva leswaku Delila a a nga n’wi rhandzi hi mbilu hinkwayo Samsoni, ti n’wi tshembise ku n’wi nyika mali yo tala loko o kumisisa leswaku Samsoni u ma kuma kwihi matimba lamakulu leswaku ti ta kota ku n’wi dlaya. Leswi Delila a a ri ni makwanga, u pfumerile ku xenga Samsoni kambe matshalatshala yakwe yo kumisisa lomu matimba yakwe ma humaka kona ma tsandzekile minkarhi leyi ringanaka yinharhu. Kutani u hambete “a n’wi sindzisa hi marito nkarhi hinkwawo, naswona a hambeta a n’wi khongotela.” Eku heteleleni, “moya-xiviri [wa Samsoni] wu karhala ku yisa eku feni.” Kutani u n’wi byele leswaku misisi yakwe a yi si tshama yi byevuriwa naswona loko yo byevuriwa, u ta heleriwa hi matimba. Leswi Delila se a a tiva mhaka leyi, u vitane munhu leswaku a ta byevula Samsoni misisi loko a ha etlele ematsolweni yakwe kutani a n’wi nyiketa eka valala vakwe leswaku va ta n’wi endla xin’wana ni xin’wana lexi va xi lavaka. (Vaav. 16:4, 5, 15-21) Hakunene leswi a swi endleke a swi bihe ngopfu! Leswi Delila a a ri ni makwanga, u xenge wanuna loyi a a n’wi rhandza.
Tinhla-nkulu Ta Buku Ya Vaavanyisi
14:16, 17; 16:16. Ku tshikilela munhu un’wana hi ku n’wi rilela ni ku n’wi karhata swi nga onha vuxaka.—Swivuriso 19:13; 21:19.
Vuxengi I Xiphemu Xa Xikombiso Xa Masiku Yo Hetelela
15 Vanhu lava ngheneleke vukati va nga tshama va tshembekile eka vanghana va vona va vukati hi ndlela yihi? Rito ra Xikwembu ri ri: “Tsaka hi nsati [kumbe hi nuna] wa vuntshwa bya wena” naswona “Tiphine hi vutomi ni nsati [kumbe nuna] wa wena loyi u n’wi rhandzaka.” (Swiv. 5:18; Ekl. 9:9) Loko vatekani va ri karhi va kula, va fanele va endla hinkwaswo leswi va nga swi kotaka leswaku vuxaka bya vona byi tshama byi tiyile, hi tlhelo ra nyama ni ra mintlhaveko. Leswi swi vula leswaku va fanele va kombisana musa, va khathala hi swilaveko swa vona naswona va heta nkarhi swin’we. Va fanele va tikarhatela ku sirhelela vukati bya vona ni vuxaka bya vona na Yehovha. Leswaku va endla tano, va fanele va dyondza Bibele swin’we, va famba swin’we ensin’wini nkarhi ni nkarhi naswona va khongela swin’we va kombela mikateko eka Yehovha.
TSHAMA U TSHEMBEKILE EKA YEHOVHA
16 Ku ni swirho swa vandlha leswi tshameke swi endla swidyoho leswikulu kutani swi ‘tshinyiwa swinene leswaku swi ta tiya eripfumelweni.’ (Tito 1:13) Kambe swin’wana swi kale swi susiwa evandlheni hikwalaho ka mahanyelo ya swona. Hambiswiritano, ndzayo yi pfune swirho swa vandlha leswaku swi ‘hanya hi ndlela leyinene’ swi tlhela swi lunghisa vuxaka bya swona na Yehovha. (Hev. 12:11) I yini leswi hi nga ta swi endla loko hi ri ni xaka kumbe munghana lonkulu loyi a susiweke evandlheni? Leswi hi nga ta swi endla exiyin’weni xexo swi ta kombisa loko hi tshembeka eka munhu yoloye kumbe eka Xikwembu. Yehovha u hi langutile ku vona loko hi ta xi yingisa xileriso xakwe lexi vulaka leswaku hi nga tihlanganisi ni munhu wihi ni wihi loyi a susiweke evandlheni.—Hlaya 1 Vakorinto 5:11-13.
Endla Ndzavisiso
Samsoni A Hlula Hikwalaho Hi Matimba Ya Yehovha!
Samsoni a a tiyimiserile eku hetisiseni ka xikongomelo xa yena, ku nga ku lwa ni Vafilisita. U tshame endlwini ya nghwavava eGaza hi xikongomelo xo lwa ni valala va Xikwembu. Samsoni a a lava ndhawu yo etlela eka yona emutini wa valala, kutani a a ya yi kuma endlwini ya nghwavava. Samsoni a nga yanga hi xikongomelo xo tikhoma hi ndlela yo biha ni wansati loyi. U hume emutini wa wansati loyi exikarhi ka vusiku, a khoma tinyangwa ta vungheno bya muti ni tinsika timbirhi ta le matlhelo, a swi yisa ehenhla ka ntshava ekusuhi ni le Hebroni, laha a ku ri mpfhuka wa tikhilomitara ta 60. Sweswo u swi endle hileswi a a tsakeriwa hi Xikwembu xi tlhela xi n’wi nyika matimba.—Vaavanyisi 16:1-3.
JANUARY 10-16
LESWI HI SWI DYONDZAKA EBIBELENI | VAAVANYISI 17-19
“Ku Nga Yingisi Nawu Wa Xikwembu Swi Nga Hi Vangela Swiphiqo”
it-2-E 390-391
Mikiya
1. Wanuna wa ndyangu wa Efrayimi. Mikiya u tshove Nawu wa vunhungu eka leya Khume (Eks 20:15), hi ku yivela mana wakwe swiphemu swa silivhere swa 1 100. U hetelele a vule ntiyiso kutani a swi tlherisa hikwalaho mana wakwe u te: “Ndzi ta nyika Yehovha silivhere leyi leswaku n’wana wa mina a endla xifaniso lexi vatliweke ni xifaniso xa nsimbhi. Hikwalaho silivhere leyi yi ta va ya wena.” Mana wakwe u teke swiphemu swa silivhere swa 200 a swi nyika munhu loyi a endlaka swilo hi silivhere, leswaku a endla “xifaniso lexi vatliweke ni xifaniso xa nsimbhi” leswi endzhaku swi yisiweke endlwini ya Mikiya. Mikiya loyi a a ri ni “yindlu ya swikwembu,” u endle efodi ni swifaniso swa terafimi kutani a hlawula un’wana wa vana vakwe leswaku a va muprista wakwe. Hambileswi lughiselelo leri a ri vonaka ku ri ndlela yin’wana yo gandzela Yehovha, a ri nyenyetsa hikuva a ri lwisana ni nawu lowu a wu yirisa ku gandzela swifaniso (Eks 20:4-6) naswona a ri nga fambisani ni lunghiselelo ra Yehovha ra tabernakele ni ra vuprista. (Vaa 17:1-6; Dt 12:1-14) Endzhaku Mikiya u teke Yonathani, un’wana wa vatukulu va Gerixomu n’wana wa Muxe, a n’wi yisa endliwni yakwe leswaku a va muprista wakwe. (Vaa 18:4, 30) Mikiya u sungule ku va ni makatla kutani a ku: “Sweswi ndza swi tiva leswaku Yehovha u ta ndzi katekisa.” (Vaa 17:7-13) Kambe Yonathani a a nga humi endyangwini wa Aroni naswona a a nga fanelanga a va muprisa kutani leswi hinkwaswo swi engetelele xidyoho xa Mikiya.—Tin 3:10.
it-2-E 391 ¶2
Mikiya
Endzhakunyana ka sweswo, Mikiya ni vavanuna van’wana va hlongorise va ka Dani. Loko va ri ekusuhi ni ku va khoma, va ka Dani va vutisile leswaku swi lo yini kutani Mikiya ute: “Mi teke swikwembu swa mina leswi ndzi nga swi endla naswona mi fambe ni muprista wa mina. A ndza ha salanga na nchumu.” Hiloko va ka Dani va byela Mikiya leswaku loko a ya emahlweni a va hlongorisa ni ku va bela huwa, va ta n’wi hlasela. Loko Mikiya a vona leswaku a a nga ta va hlula, u tlhelele endlwini yakwe. (Vaa 18:22-26) Hiloko va ka Dani va hlasela ni ku hisa muti wa Layixi kutani va aka muti wa Dani endhawini yoleyo. Yonathani ni vana vakwe vamajaha va ve vaprista va va ka Dani, “va yimisa xifaniso lexi vatliweke lexi endliweke hi Mikiya naswona xi ve kwalaho masiku hinkwawo lawa yindlu ya Xikwembu xa ntiyiso [tabernakele] a yi ri eXilo ha wona.”—Vaa 18:27-31.
Endla Ndzavisiso
Bibele Leyi Twisisekaka Hi Ku Olova
6 Namuntlha, ku ni vumbhoni byo tala lebyi kombisaka leswaku hi fanele hi tirhisa vito ra Yehovha. Bibele leyi pfuxetiweke ya 2013 ya Matsalwa Yo Kwetsima Ya Misava Leyintshwa yi tirhisa vito ra Xikwembu minkarhi ya 7 216. Kutani ri engeteleke minkarhi ya tsevu eka nhlayo leyi a ri humelela ha yona eka Bibele ya khale. Ku engeteleka loku ku ve kona hikwalaho ka leswi vito ra Xikwembu ri humelelaka eka Tibukunsongwa ta le Lwandle leri Feke leta ha ku tshuburiwaka. Eka Bibele leyi pfuxetiweke ku engeteleka loku ku kumeka eka 1 Samuwele 2:25; 6:3; 10:26; 23:14, 16 ni le ka Vaavanyisi 19:18. Eka buku ya Vaavanyisi ri hoxiwe hikwalaho ka ndzavisiso lowu engetelekeke lowu endliweke eka matsalwa ya khale lama tsariweke hi voko ya Bibele.
JANUARY 17-23
LESWI HI SWI DYONDZAKA EBIBELENI | VAAVANYISI 20-21
“Yana Emahlweni U Lava Yehovha”
Xana U Nga Tekelela Finiyasi Loko U Langutana Ni Mintlhontlho?
Endzhaku ka ku pfinyiwa ni ku dlayiwa ka nhlantswa ya Mulevhi hi vavanuna va Gibiya lava humaka eka nyimba ya Benjamini, tinyimba letin’wana ti tilunghiselele ku ya lwa ni nyimba ya Benjamini. (Vaav. 20:1-11) Ti khongelele mpfuno wa Yehovha ti nga si ya lwa, kambe ti hluriwe kambirhi hi ndlela yo vava. (Vaav. 20:14-25) Xana a ti ta gimeta hi ku vula leswaku swikhongelo swa tona swi ve swa hava? Xana Yehovha a a swi lava hakunene leswaku ti tirihisela?
Xana U Nga Tekelela Finiyasi Loko U Langutana Ni Mintlhontlho?
Hi nga dyondza yini emhakeni leyi? Swiphiqo swin’wana swi nga phikelela swi va kona evandlheni hambiloko vakulu va endle matshalatshala hinkwawo naswona va kombele mpfuno eka Xikwembu. Loko swi va tano, vakulu va fanele va tsundzuka marito ya Yesu lama nge: “Hambetani mi kombela [kumbe mi khongela], mi ta nyikiwa; hambetani mi lava, mi ta swi kuma; hambetani mi gongondza, mi ta pfuleriwa.” (Luka 11:9) Hambiloko swikhongelo swa vakulu swi tikomba swi hlwela ku hlamuriwa, va nga tiyiseka leswaku Yehovha u ta swi hlamula hi nkarhi wakwe lowu faneleke.
Endla Ndzavisiso
Xana A Wu Swi Tiva?
Swipelupelu a swi tirhisiwa njhani enyimpini khale?
Xipelupelu i tlhari leri Davhida a ri tirhiseke ku dlaya Goliyadi lowa xihontlovila. Swi nga endleka leswaku Davhida u dyondze ku tirhisa tlhari leri a ha ri mufana loko a ri karhi a risa.—1 Samuwele 17:40-50.
Xifaniso xa xipelupelu xi kumeka eka swifaniso swa vutshila swa le Egipta ni swa le Asiriya swa le minkarhini ya ku tsariwa ka Bibele. Tlhari leri a ri ri ni xikhwama xa dzovo kumbe lapi leri rhungeleriweke eka tintambhu timbirhi. Mutirhisi wa xipelupelu a a ta hoxa ribye ra xirhendzevutana leri anameke ku sukela eka 5 ku ya eka 7,5 wa tisentimitara exikhwameni xexo naswona ri tika kwalomu ka 250 wa tigiramu. A a ta ndzulukisa xipelupelu ehenhla ka nhloko yakwe kutani a tshika ntambhu yin’we leswaku ribye ri ta kota ku tsutsuma hi rivilo lerikulu naswona ri kongome laha a lavaka ri ya kona.
Vayimburi va le Vuxa-xikarhi va kume maribye yo tala lawa a ma tirhisiwa eka xipelupelu etinyimpini ta khale. Swi nga ha endleka leswaku masocha lawa a ma ri ni vutshila a ma ndzulukisa maribye hi rivilo leri endlaka 160 ku ya eka 240 wa tikhilomitara hi awara. Swidyondzi a swi pfumelelani na yona mhaka ya leswaku xipelupelu a xi aname ku ringana ni vurha kambe xipelupelu a ku ri tlhari leri nga ni khombo.—Vaavanyisi 20:16.
JANUARY 24-30
LESWI HI SWI DYONDZAKA EBIBELENI | RHUTI 1-2
“Rhandza Vanhu Van’wana”
Tekelela Vanghana Lavakulu Va Yehovha
5 Ndyangu wa ka va Rhuti a wu tshama eMowabu. A ta swi kota ku tlhelela kona naswona swi nga ha endleka a wu ta n’wi khathalela. A a tiva vanhu, ririmi ni ndhavuko wa Vamowabu. Nawomi a nga ta swi kota ku endlela Rhuti swilo leswi hinkwaswo eBetlehema. Nakambe Nawomi a vilerisiwa hileswaku a nga ta kumela Rhuti nuna kumbe kaya. Kutani Nawomi u n’wi byele leswaku a tlhelela eka varikwavo eMowabu. Hilaha hi hlayeke hakona, Orpa “u tlhelele eka vanhu va ka vona ni le ka swikwembu swakwe.” (Rhuti 1:9-15) Rhuti u endle xiboho xo ka a nga tlheleli eka varikwavo ni swikwembu swa vona swa mavunwa.
Tekelela Vanghana Lavakulu Va Yehovha
6 Swi vonaka onge Rhuti u dyondze hi Yehovha eka nuna wakwe kumbe eka Nawomi. U dyondze leswaku Yehovha a nga fani ni swikwembu swa Vamowabu. Rhuti a a rhandza Yehovha naswona a swi tiva leswaku u fanele a n’wi gandzela. Kutani Rhuti u endle xiboho xa vutlhari. U byele Nawomi a ku: “Vanhu va wena va ta va vanhu va mina, Xikwembu xa wena xi ta va Xikwembu xa mina.” (Rhuti 1:16) Ha khutazeka loko hi anakanyisisa hi ndlela leyi Rhuti a a n’wi rhandza ha yona Nawomi. Kambe lexi khutazaka swinene i ndlela leyi Rhuti a rhandza Yehovha ha yona. Leswi swi tlhele swi tsakisa na Bowasi, loyi hi ku famba ka nkarhi a n’wi bumabumeleke hikwalaho ka leswi a ‘teke ehansi ka timpapa ta Yehovha leswaku a kuma vutumbelo.’ (Hlaya Rhuti 2:12.) Marito lawa Bowasi a ma tirhiseke ma nga hi tsundzuxa ndlela leyi vondlo ri kumaka nsirhelelo ehansi ka timpapa ta mutswari wa rona. (Pisalema 36:7; 91:1-4) Hilaha ku fanaka, Yehovha u sirhelele Rhuti hi ndlela ya rirhandzu ni ku tlhela a n’wi katekisa hikwalaho ka ripfumelo rakwe. Rhuti a nga tisolanga hi xiboho xakwe.
Endla Ndzavisiso
Tinhla-nkulu Ta Buku Ya Rhuti
1:13, 21—Xana Yehovha hi yena a endleke leswaku Nawomi a twa ku vava, a n’wi vangela makhombo? E-e, naswona Nawomi a a nga lumbeti Xikwembu hi nchumu wo karhi. Kambe, a a vona onge Yehovha a a lwa na yena, loko a anakanya hi swilo hinkwaswo leswi a langutaneke na swona. U titwe a karhatekile, a nga twisisi leswaku ku humelela yini. Ku tlula kwalaho, enkarhini wolowo, ku kuma vana a swi tekiwa ku ri nkateko lowu humaka eka Xikwembu kasi vumhika a byi tekiwa ku ri ndzhukano. Leswi a a ri hava vatukulu, nileswi a a feriwe hi majaha ya yena mambirhi, Nawomi a nga ha va a teke sweswo swi ri xitiyisekiso xa leswaku Yehovha hi yena a n’wi tsongahateke.
JANUARY 31–FEBRUARY 6
LESWI HI SWI DYONDZAKA EBIBELENI | RHUTI 3-4
“Tikarhatele Ku Va Ni Ndhuma Leyinene”
“Wansati Lonene Ngopfu”
A swi kanakanisi leswaku ku vulavula ka Bowasi hi ndlela yo rhula ni hi rito leri chavelelaka swi rhulise mbilu ya Rhuti. U te: “Onge Yehovha a nga ku katekisa n’wananga. Sweswi u kombise rirhandzu lerikulu ku tlula eku sunguleni, hi ku ka u nga lavanga majaha lama nga swisiwana kumbe lama fuweke.” (Rhuti 3:10) Marito lama nge “enkarhini wo sungula” ma kombetela eka loko Rhuti a kombise rirhandzu ro tshembeka eka Nawomi hi ku famba na yena va tlhelela eIsrayele leswaku a ta n’wi khathalela. Kasi marito lama nge “eku heteleleni” ma kombetela eka nkarhi wolowo lowu a va ri swin’we. Bowasi a a swi tiva leswaku wansati lontsongo wo fana na Rhuti swi nga ha endleka leswaku a a ta va a kume nuna exikarhi ka vavanuna vo tala lavatsongo, ku nga khathariseki leswaku u fuwile kumbe i xisiwana. Ematshan’weni ya sweswo, a a lava ku endla leswinene ku nga ri eka Nawomi ntsena kambe ni le ka nuna wa Nawomi loyi a feke, leswaku a xi yisa emahlweni xivongo xa nuna wakwe loyi a feke etikweni ra rikwavo. Kutani ha swi twisisa leswaku ha yini mfanelo yakwe ya ku pfumala vutianakanyi yi yi khumbe swinene mbilu ya Bowasi.
“Wansati Lonene Ngopfu”
Wa nga vona ndlela leyi swi nga vaka swi n’wi tsakise ha yona Rhuti ku anakanyisisa hileswi Bowasi a swi vuleke—leswaku u tiveka tanihi “wansati lonene ngopfu” eka vanhu hinkwavo! A swi kanakanisi leswaku ku hiseka kakwe ko lava ku tiva Yehovha ni ku n’wi tirhela swi hoxe xandla swinene leswaku a va ni ndhuma. Nakambe u kombise musa lowukulu ni ntwela-vusiwana eka Nawomi ni le ka vanhu va ka vona, hi ku swi rhandza a fambisana ni tindlela ni mindhavuko leyi entiyisweni a nga yi tolovelanga. Loko hi tekelela ripfumelo ra Rhuti, hi ta tikarhatela ku xixima van’wana swin’we ni mindhavuko ya vona. Loko hi endla tano, na hina hi ta endla leswaku hi va ni ndhuma leyinene.
“Wansati Lonene Ngopfu”
Bowasi u tekane na Rhuti. Ha hlaya: “Yehovha a n’wi nyika matimba ya leswaku a tika, a tswala n’wana wa jaha.” Vavasati va le Betlehema va katekise Nawomi ni ku dzunisa Rhuti hileswi a antswaka eka Nawomi ku tlula vana va nkombo. Hi kuma leswaku hi ku famba ka nkarhi n’wana wa Rhuti u ve kokwa wa Davhida Hosi leyikulu. (Rhuti 4:11-22) Hilaha ku fanaka, Davhida u ve kokwa wa Yesu Kreste.—Matewu 1:1.
Endla Ndzavisiso
Tinhla-nkulu Ta Buku Ya Rhuti
4:6—Xaka a ri ta yi “onha” njhani ndzhaka ya rona loko ri lava ku tlhela ri yi xava? Xo sungula, loko munhu loyi se a nga evuswetini a xavise ndzhaka ya yena ya nsimu, loko xaka ri lava ku yi xava a ri fanele ri humesa mali yo xava nsimu leyi ringaneke malembe lama saleke ku nga se fika lembe ra ntsuxeko. (Levhitika 25:25-27) Leswi a swi ta endla leswaku nsimu leyi ya yena yi va ni nxavo wa le hansi. Ku tlula kwalaho, loko Rhuti o va ni n’wana wa jaha, nsimu ya kona a yi ta va ndzhaka ya jaha leri, ku nga ri ya un’wana wa maxaka ya le kusuhi ya xaka leri ri yi xaveke.
FEBRUARY 7-13
LESWI HI SWI DYONDZAKA EBIBELENI | 1 SAMUWELE 1-2
“Phofulela Yehovha Leswi Nga eMbilwini Ya Wena”
U Phofulele Xikwembu Leswi Nga eMbilwini Yakwe Hi Xikhongelo
12 Xisweswo, Hana u vekele malandza hinkwawo ya Xikwembu xikombiso loko swi ta emhakeni yo khongela. Hi musa, Yehovha u kombela vanhu vakwe leswaku va vulavula na yena va ntshunxekile handle ko kanakana, va n’wi byela leswi va vilerisaka ku fana ni n’wana la tshembaka mutswari wakwe la n’wi rhandzaka. (Hlaya Pisalema 62:8; 1 Vatesalonika 5:17.) Muapostola Petro u huhuteriwe ku vula marito lawa, lama khutazaka loko a vulavula hi ku khongela eka Yehovha a ku: “[Lahlelani] ku vilela ka n’wina hinkwako eka xona, hikuva xa khathala hi n’wina.”—1 Pet. 5:7.
Ndlela Leyi Hana A Kumeke Ku Rhula Ha Yona
Hi nga dyondza yini eka hinkwaswo leswi? Loko hi khongela eka Yehovha malunghana ni swikarhato swa hina, hi nga n’wi byela ndlela leyi hi titwaka ha yona kutani hi kombela mpfuno wakwe hi mbilu hinkwayo. Loko ku nga ha ri na lexi hi nga xi endlaka leswaku hi lunghisa xiphiqo xexo, hi fanele hi tshika mhaka yoleyo emavokweni ya yena. A yi kona ndlela yin’wana yo antswa leyi hi nga yi landzelaka.—Swivuriso 3:5, 6.
Endla Ndzavisiso
Tinhla-nkulu Ta Buku Ya Samuwele Wo Sungula
2:10—Ha yini Hana a khongelele leswaku Yehovha “a nyika hosi yakwe ntamu” kasi a ku nga ri na hosi leyi nga munhu wa nyama eIsrayele? Mhaka ya leswaku Vaisrayele a va ta va ni hosi leyi nga munhu wa nyama a yi vuriwe ka ha ri emahlweni eNawini wa Muxe. (Deteronoma 17:14-18) Eka vuprofeta lebyi a byi vuleke loko a ri kusuhi ni ku fa, Yakobe u te: “Nhonga ya vuhosi [xikombiso xa vulawuri bya vuhosi] a yi nge suki eka Yuda.” (Genesa 49:10) Ku tlula kwalaho, malunghana na Sara—kokwana wa xisati wa Vaisrayele—Yehovha u te: “Tihosi ta matiko ti ta huma eka yena.” (Genesa 17:16) Hikwalaho, Hana a a khongela hi hosi ya le nkarhini lowu taka.
FEBRUARY 14-20
LESWI HI SWI DYONDZAKA EBIBELENI | 1 SAMUWELE 3-5
“Yehovha Wa Anakanyela”
U Ni Matimba Hinkwawo Kambe Wa Anakanyela
3 Samuwele u sungule ku “tirhela Yehovha” etabernakeleni a ha ri ntsongo. (1 Sam. 3:1) Siku rin’wana loko Samuwele a ha etlele ku humelele nchumu lowu nga tolovelekangiki. (Hlaya 1 Samuwele 3:2-10.) U twe rito ri n’wi vitana hi vito. Hi ku anakanya leswaku a vitaniwa hi Muprista Lonkulu Eli, Samuwele u tsutsumele eka yena a ku: “Hi mina loyi, hikuva u ndzi vitanile.” Eli u te a nga n’wi vitananga. Loko ku endleka swilo leswi fanaka nakambe Eli u swi xiyile leswaku Samuwele a vitana hi Xikwembu. Hikwalaho u byele Samuwele ndlela leyi a faneleke a angula ha yona naswona u yingisile. Hikwalaho ka yini Yehovha a nga humelelanga eka Samuwele hi ku tirhisa ntsumi? Bibele a yi hi byeli hi ku kongoma kambe xiendlakalo lexi xi swi kombisa kahle leswaku Yehovha a khathala hi Samuwele. Hi swi tivisa ku yini?
U Ni Matimba Hinkwawo Kambe Wa Anakanyela
4 Hlaya 1 Samuwele 3:11-18. Nawu wa Yehovha a wu lerisa vana leswaku va xixima lava dyuhaleke, ngopfungopfu lava nga ni vulawuri. (Eks. 22:28; Lev. 19:32) Hi mahlo ya mianakanyo vona Samuwele a ya eka Eli nimixo kutani a n’wi byela rungula ra vuavanyisi bya Xikwembu hi xivindzi? Kahlekahle rungula leri ri hi byela leswaku Samuwele “a a chava ku byela Eli leswi humeleleke.” Hambiswiritano, Yehovha u swi veke erivaleni eka Eli Leswaku hi yena a vitanaka Samuwele. Hikwalaho Eli u byele Samuwele leswaku a vula leswi Xikwembu xi n’wi rhumeke swona. u te: ‘U nga ndzi fihleli rito ni rin’we ra leswi xi ku byeleke swona.’ Samuwele ‘u n’wi byele marito hinkwawo’ lawa Xikwembu xi n’wi leriseke wona.
Endla Ndzavisiso
Tinhla-nkulu Ta Buku Ya Samuwele Wo Sungula
3:3—Xana Samuwele hakunene a a etlela eNdhawini yo Kwetsima Ngopfu? Doo, a a nga etleli kona. Samuwele a a ri Mulevhi wa ndyangu wa Vakohata lava a va nga ri vaprista. (1 Tikronika 6:33-38) Hikwalaho ka sweswo, a a nga pfumeleriwi ku “nghena ku ta vona swilo swo kwetsima.” (Tinhlayo 4:17-20) Xiyenge xa xikwetsimisiso lexi Samuwele a a ri ni mfanelo yo nghena eka xona a ku ri xivava xa tabernakela. Swi nga ha endleka a a etlela kwalaho. Swi vonaka onge Eli na yena a a etlela kun’wana exivaveni. Xiga lexi nge “laha areka ya Xikwembu a yi ri kona” entiyisweni xi vula laha tabernakela a yi ri kona.
FEBRUARY 21-27
LESWI HI SWI DYONDZAKA EBIBELENI | 1 SAMUWELE 6-8
“I Mani Hosi Ya Wena?”
it-2-E 163 ¶1
Mfumo Wa Xikwembu
Va Kombele Leswaku Ku hlawuriwa Munhu A Va hosi Ya Vona. Ku sukela kwalomu ka malembe ya 400 loko Vaisrayele va ha ku huma Egipta ni ku sukela eka malembe yo tlula 800 loko Yehovha a endle ntwanano na Abrahama, Vaisrayele va kombele ku va ni hosi leyi nga munhu leswaku yi va rhangela, hileswi matiko laman’wana a a ma ri ni tihosi. Xikombelo xa vona a xi vangiwa hileswi a va nga lavi leswaku Yehovha a va hosi ya vona. (1Sa 8:4-8) I ntiyiso leswaku vanhu a va langutele leswaku Yehovha ku va yena a va simekelaka mfumo, hi ku pfumelelana ni xitshembiso lexi a xi endleke eka Abrahama na Yakobo. Lexi a xi endla va langutela sweswo a ku ri hikwalaho ka leswi Yakobo a swi profeteke hi Yudha loko a ri ekusuhi ni ku fa (Gn 49:8-10), marito lama Yehovha a ma byeleke Vaisrayele loko va ha ku huma eEgipta (Eks 19:3-6), leswi ntwanano wa Nawu a wu swi vula (Dt 17:14, 15), ni xiphemu xa rungula leri Yehovha a endleke leswaku Balama a ri vula (Tin 24:2-7, 17). Hana mana wa Samuwele u vulavule hi ntshembo wolowo loko a khongela. (1Sa 2:7-10) Hambiswiritano, Yehovha a a nga se xi paluxa “xihundla xo kwetsima” malunghana ni Mfumo naswona a a nga se swi paluxa leswaku wu ta ta rini kumbe njhani ni leswaka wu ta va etilweni kumbe laha misaveni. Hikwalaho, loko vanhu va ti lavela hosi a swi kombisa ku tikukumuxa.
U Tiyiserile Hambiloko A Pfa A Hetiwa Matimba
Xiya ndlela leyi Yehovha a anguleke ha yona loko Samuwele a n’wi byela mhaka leyi hi xikhongelo: “Yingisa hinkwaswo leswi va ku byelaka swona; hikuva a va bakanyanga wena, kambe va bakanye mina tanihi hosi ya vona.” Marito lawa ma n’wi chavelele swinene Samuwele hambileswi entiyisweni Vaisrayele a va rhukana Xikwembu xa Matimba Hinkwawo! Yehovha u byele muprofeta wakwe ku lemukisa Vaisrayele hi makhombo lawa a va ta langutana na wona hikwalaho ko fumiwa hi hosi leyi nga munhu. Loko Samuwele a va lemukisa, va sindzise va ku: “E-e, hina hi lava hosi.” Leswi Samuwele a a yingisa Xikwembu minkarhi hinkwayo, u tote hosi leyi Yehovha a yi hlawuleke.—1 Samuwele 8:7-19.
Yehovha U Fuma Hi Ndlela Leyinene!
9 Matimu ma kombise leswaku xitsundzuxo xa Yehovha a xi ri ntiyiso. Ku fumiwa hi hosi leyi nga munhu swi endle leswaku tiko ra Israyele ri va ni swiphiqo leswikulu, ngopfu-ngopfu loko hosi yoleyo yi nga ha tshembeki. Loko hi anakanya hi xikombiso xa tiko ra Israyele, a swi hlamarisi leswi tihulumendhe ta vanhu lava nga tiviki Yehovha ti tsandzekeke ku enerisa swilaveko hinkwaswo swa vanhu. I ntiyiso leswaku van’watipolitiki van’wana va kombela leswaku Xikwembu xi katekisa matshatshala ya vona yo tisa ku rhula ni nsirhelelo, kambe xana Xikwembu xi nga va katekisa njhani lava nga titsongahateliki ndlela ya xona yo fuma?—Ps. 2:10-12.
Endla Ndzavisiso
Ha Yini U Khuvuriwa?
13 Hi fanele hi rhanga hi cinca loko hi nga si va Timbhoni ta Yehovha leti khuvuriweke. Ku cinca i xiendlo xa ku tirhandzela lexi endliwaka hi loyi a endleke xiboho lexi humaka embilwini xa ku landzela Kreste Yesu. Vanhu vo tano va fularhela tindlela ta vona ta khale leti hoxeke kutani va tiyimisela ku endla leswinene emahlweni ka Xikwembu. EMatsalweni, maendli ya Xiheveru ni ya Xigriki lama vulavulaka hi ku cinca, ma vula ku hundzuluka. Xiendlo lexi xi vula loko munhu a hundzuka kutani a endla ku rhandza ka Xikwembu. (1 Tihosi 8:33, 34) Ku cinca swi lava leswaku munhu a endla ‘mitirho leyi kombisaka leswaku u hundzukile.’ (Mitirho 26:20) Swi lava leswaku hi fularhela vugandzeri bya mavunwa, hi endla swilo hi ku pfumelelana ni swileriso swa Xikwembu kutani hi tinyiketela eka Yehovha ntsena. (Deteronoma 30:2, 8-10; 1 Samuwele 7:3) Ku cinca swi endla leswaku hi hundzula ndlela leyi hi anakanyaka ha yona, swikongomelo swa hina ni vumunhu bya hina. (Ezekiyele 18:31) Loko hi “hundzuka,” mikhuva leyi nga riki yinenene yi siviwa hi vumunhu lebyintshwa.—Mitirho 3:19; Vaefesa 4:20-24; Vakolosa 3:5-14.
FEBRUARY 28–MARCH 6
LESWI HI SWI DYONDZAKA EBIBELENI | 1 SAMUWELE 9-11
“Eku Sunguleni Sawulo A A Titsongahata”
Titsongahate Loko U Famba Ni Xikwembu Xa Wena
11 Tsundzuka leswi endlekeleke Hosi Sawulo. Loko a ha ri jaha a a titsongahata. A a swi tiva swipimelo swakwe naswona u kale a ala ku amukela vutihlamuleri lebyi engetelekeke. (1 Sam. 9:21; 10:20-22) Kambe hi ku famba ka nkarhi, u sungule ku mila makatla. U sungule ku humesa mavala loko se a ri hosi. Siku rin’wana, u tsandzeke ku lehisa mbilu hi nkarhi lowu a rindzele muprofeta Samuwele. Ematshan’weni yo titsongahata a rindzela Yehovha leswaku a teka goza, Sawulo u endle xitlhavelo hambileswi a nga ri na mpfumelelo wo endla tano. Sweswo swi endle leswaku Yehovha a nga ha n’wi tsakeli naswona eku heteleleni u lahlekeriwe hi vuhosi. (1 Sam. 13:8-14) Ku ta va ku ri vutlhari ku dyondza eka xikombiso lexi xo biha kutani hi papalata ku tikukumuxa.
Ndlela Yo Tshama Hi Ri Ni Moya Wa Ku Tinyikela
8 Hosi Sawulo wa le Israyele i xilemukiso eka hina malunghana ni ndlela leyi vutianakanyi byi nga wu onhaka ha yona moya wa hina wa ku tinyikela. Loko Sawulo a va hosi a a titsongahata. (1 Sam. 9:21) U arile ku xupula Vaisrayele lava vulavuleke ku biha hi vuhosi byakwe, hambileswi a va tlhontlha vulawuri lebyi Xikwembu a xi n’wi nyike byona. (1 Sam. 10:27) Hosi Sawulo u pfumele ku kongomisiwa hi moya wa Xikwembu hi ku rhangela Vaisrayele enyimpini leyi va hluleke Vaamone. Endzhaku ka sweswo, hi ku titsongahata u dzunise Yehovha hileswi va hluleke.—1 Sam. 11:6, 11-13.
Vaamoni—Vanhu Lava Tlheriseleke Musa Hi Tihanyi
Nakambe Vaamoni va tlherisele musa wa Yehovha hi tihanyi. Yehovha a nga wu honisanga nxungeto lowu wo biha. “Moya wa Xikwembu wu nyika Sawulo matimba loko a twa marito lawa [ya Nahaxi], kutani a hlundzuka ngopfu.” Hi ku kongomisiwa hi moya wa Xikwembu, Sawulo u vumbe vuthu ra vavanuna va nyimpi va 330 000 leri ri yayarheleke Vaamoni lerova “a ku salanga vanhu vambirhi va ri swin’we.”—1 Samuwele 11:6, 11.
Endla Ndzavisiso
Tinhla-nkulu Ta Buku Ya Samuwele Wo Sungula
9:9—I yini lexi nga xa nkoka malunghana ni xiga lexi nge “muprofeta a a vuriwa muvoni wa swivono emikarhini ya khale”? Marito lawa ma nga ha kombisa leswaku leswi vaprofeta a va dume swinene enkarhini wa Samuwele ni le nkarhini wa tihosi ta le Israyele, xiga lexi nge “muvoni wa swivono” xi siviwe hi rito “muprofeta.” Samuwele u tekiwa a ri wo sungula eka nxaxamelo wa vaprofeta.—Mitirho 3:24.