DYONDZO 17

Yesu A A Ri Munhu Wa Njhani?

Nkandziyiso Lowu Printiweke

Loko hi ri karhi hi dyondza hi swilo leswi Yesu a swi vuleke ni ku swi endla loko a ri laha misaveni, hi kota ku tiva swilo leswi hi endlaka hi lava ku va vanghana vakwe ni va Tata wakwe Yehovha. Hi swihi swilo sweswo? Hi nga n’wi tekelela njhani Yesu?

1. Yesu u fana njhani ni Tata wakwe?

Loko a ri etilweni, Yesu u hete tibiliyoni ta malembe a ri ni Tata wakwe a ri karhi a dyondza eka yena. Hikwalaho ka sweswo, u titwa ku fana na yena, u endla swilo hi ndlela leyi a endlaka ha yona ni ku ehleketa ku fana na yena. (Hlaya Yohane 5:19.) Yesu u tekelele vumunhu bya Tata wakwe hi ku helela lerova u kale a ku: “Loyi a ndzi voneke u vone na Tatana.” (Yohane 14:9) Loko u ri karhi u dyondza hi vumunhu bya Yesu, u ta ya u n’wi tiva kahle Yehovha. Hi xikombiso, ndlela leyi Yesu a a twela vanhu vusiwana ha yona yi kombisa ndlela leyi Yehovha a titwaka ha yona hi wena.

2. Yesu u swi kombise njhani leswaku u rhandza Yehovha?

Yesu u te: “Ndzi endla hilaha Tatana a ndzi leriseke hakona leswaku misava yi swi tiva leswaku ndza n’wi rhandza Tatana.” (Yohane 14:31) Loko a ri laha misaveni, Yesu u kombise leswaku u rhandza Tata wakwe swinene hi ku n’wi yingisa hambiloko swi nga olovi. Yesu a a swi rhandza ku vulavula hi Tata wakwe ni ku pfuna van’wana leswaku va va vanghana va Tata wakwe.—Yohane 14:23.

3. Yesu u swi kombise njhani leswaku u rhandza vanhu?

Bibele yi vula leswaku Yesu u “va rhandza swinene vanhu.” (Swivuriso 8:31) U kombise leswaku wa va rhandza hi ku va khutaza ni ku va pfuna swi huma embilwini. U endle masingita lama a ma kombisa leswaku u ni matimba ni ntwelavusiwana. (Marka 1:40-42) A a khoma vanhu kahle naswona a a nga ri na xihlawuhlawu. Marito yakwe ma chavelele vanhu va timbilu letinene lava a va n’wi yingisa ma tlhela ma va nyika ntshembo. Yesu a a tiyimisele ku xaniseka ni ku tlhela a fela vanhu hileswi a rhandzaka vanhu hinkwavo. Kambe u rhandza ngopfu vanhu lava yingisaka leswi a swi dyondzisaka.—Hlaya Yohane 15:13, 14.

ANAKANYISISA

Dyondza swo tala hi vumunhu bya Yesu. Vona ndlela leyi u nga rhandzaka van’wana ni ku va ni malwandla ha yona hilaha a a endla ha kona.

4. Yesu wa n’wi rhandza Tata wakwe

Xikombiso xa Yesu xi hi dyondzisa ndlela leyi hi faneleke hi rhandza Xikwembu ha yona. Hlaya Luka 6:12 na Yohane 15:10; 17:26. Loko mi hlaye tsalwa ha rin’we, bulani hi xivutiso lexi:

Hi nga swi kombisa njhani leswaku ha n’wi rhandza Yehovha ku fana ni ndlela leyi Yesu a n’wi rhandzaka ha yona?

Yesu a khongela. — Yesu a a rhandza Tata wakwe wa le tilweni naswona a a khongela eka yena nkarhi hinkwawo

5. Yesu wa khathala hi vanhu lava lavaka ku pfuniwa

Yesu a a rhangisa ku pfuna van’wana. Hambiloko a karhele a a tirhisa nkarhi ni matimba yakwe leswaku a pfuna van’wana. Hlaya Marka 6:30-44, ivi mi bula hi swivutiso leswi:

Eka tindzimana leti, Yesu u swi kombise njhani leswaku wa khathala hi van’wana?—Hlaya ndzimana 31, 34, 41, na 42.
I yini lexi endleke Yesu a lava ku pfuna vanhu?—Vona ndzimana 34.
Leswi Yesu a tekelelaka Yehovha, leswi swi ku dyondzisa yini hi Yehovha?
Hi nga endla yini ku kombisa leswaku ha khathala hi van’wana ku fana na Yesu?

Hi singita Yesu a phamela vanhu vo tala hi ku andzisa swinkwa swa ntlhanu ni tinhlampfi timbirhi letitsongo. Vadyondzisi va phakela vavanuna, vavasati ni vana swakudya.

6. Yesu wa hanana

Yesu a a hanana hambileswi a a nga ri na swilo swo tala, na hina u hi khutaza ku endla tano. Hlaya Mitirho 20:35, ivi mi bula hi xivutiso lexi:

Yesu u vule leswaku i yini lexi nga endlaka hi tsaka?

Tlanga VHIDIYO, ivi mi bula hi xivutiso lexi landzelaka.

VHIDIYO: “Ku Nyika Swi Tisa Ntsako Lowukulu Ku Tlula Ku Amukela”—Xiphemu (4:00)

Hi nga va nyika yini van’wana hambiloko hi nga ri na swo tala?

Xana a wu swi tiva?

Bibele yi dyondzisa leswaku hi khongela eka Yehovha hi vito ra Yesu. (Hlaya Yohane 16:23, 24.) Loko hi khongela hi ndlela yoleyo, hi kombisa leswaku ha swi khensa leswi Yesu a hi endleleke swona leswaku hi kota ku va vanghana va Yehovha.

VAN’WANA VA RI: “Xikwembu a xi na mhaka loko hi xaniseka.”