Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2022 Christian Congregation of Jehovah’s Witnesses
JANUARY 2-8
LESWI HI SWI DYONDZAKA EBIBELENI | 2 TIHOSI 22-23
“Hikwalahokayini Hi Fanele Hi Titsongahata?”
Yosiya La Titsongahataka A Tsakeriwa Hi Yehovha
Ku sukela nimixo, valunghisi va tempele va tirha hi matimba. Yosiya wa tlangela swinene leswi vatirhi va lunghisaka ku onhaka ka yindlu ya Xikwembu loku vangiweke hi vakokwa wakwe lavo homboloka. Loko ntirho wu ri karhi wu ya emahlweni, hiloko Xafani a tisa xiviko. Kambe hi xihi xiviko xa kona? U khome buku! U hlamusela leswaku muprista lonkulu Hilikiya u kume “buku ya Nawu wa Yehovha leyi tsariweke hi Muxe.” (2 Tikronika 34:12-18) Mayana buku yo sungula ya Nawu leyi kumiweke!
Yosiya u swi langutele hi mahlongati ku twa rito rin’wana ni rin’wana leri nga ebukwini leyi. Loko Xafani a ri karhi a hlaya, hosi yi ringeta ku vona ndlela leyi swileriso hinkwaswo swi va khumbaka ha yona vanhu ku katsa na yona. Ngopfungopfu u tsakisiwa hi ndlela leyi ha yona buku leyi yi hlamuselaka vugandzeri bya ntiyiso ni ku vhumba makhombo ni ku khotsiwa loku a ku ta va kona loko vanhu va gandzela swifaniso. Loko a vona leswaku milawu ya Xikwembu a yi landzeleriwanga hinkwayo, Yosiya a handzula swiambalo swakwe kutani a lerisa Hilikiya, Xafani ni van’wana a ku: ‘Vutisani Yehovha mayelana ni marito lama tsariweke ebukwini leyi, hikuva Yehovha u hi karihele ngopfu hikwalaho ka leswi vakokwa wa hina va nga yingisangiki marito ya buku leyi.’—2 Tihosi 22:11-13; 2 Tikronika 34:19-21.
Yosiya La Titsongahataka A Tsakeriwa Hi Yehovha
Varhumiwa va Yosiya va ya eka muprofeta wa xisati Hulida kutani va vuya ni xiviko. Hulida u hlamusele rito ra Yehovha, a kombisa leswaku makhombo lama tsariweke ebukwini leya ha ku kumiwaka ma ta wela tiko leri xandzukeke. Hambiswiritano, hikwalalaho ka ku titsongahata ka yena eka Yehovha Xikwembu, Yosiya a a nga ta ri vona khombo. A a ta lahliwa ni vakokwa wakwe hi ku rhula.—2 Tihosi 22:14-20; 2 Tikronika 34:22-28.
Endla Ndzavisiso
U Nga Humelela Ku Nga Khathariseki Leswaku U Kurisiwe Njhani
Ku nga khathariseki swiyimo swo biha evuhlangini byakwe, Yosiya u ye emahlweni a endla leswinene ematihlweni ya Yehovha. Mfumo wakwe a wu ri kahle lerova Bibele yi ku: “A yi vanga kona hosi leyi faneke na yena loko a nga si va hosi, leyi tirheleke Yehovha hi mbilu ya yona hinkwayo ni hi vutomi bya yona hinkwabyo ni hi matimba ya yona hinkwawo, hi ku landza Nawu hinkwawo wa Muxe; naswona a yi vanga kona hosi leyi faneke na yena endzhaku ka yena.”—2 Tihosi 23:19-25.
Mayana xikombiso lexi khutazaka swonghasi lexi Yosiya a xi vekeleke lava va nga ha vaka va kurisiwe hi ndlela yo vava evuhlangini bya vona! Hi nga dyondza yini eka xikombiso xakwe? I yini lexi pfuneke Yosiya ku hlawula ni ku famba hi ndlela leyinene?
JANUARY 9-15
LESWI HI SWI DYONDZAKA EBIBELENI | 2 TIHOSI 24–25
“Tshama U Xalamukile”
Siku Ra Yehovha Ra Ku Avanyisa Ri Tshinele!
2 A swi kanakanisi leswaku vuprofeta bya Sofaniya byi n’wi pfule mahlo Yosiya lontsongo leswaku a vona xilaveko xa ku herisa vugandzeri lebyi thyakeke eYuda. Kambe magoza ya hosi yo herisa vukhongeri bya mavunwa etikweni a ma susanga vubihi hinkwabyo exikarhi ka vanhu kumbe ma endla leswaku va rivaleriwa swidyoho swa kokwa wakwe, Hosi Manase, loyi a a “[tate] Yerusalema hi ngati leyi nga riki na nandzu.” (2 Tihosi 24:3, 4; 2 Tikronika 34:3) Hikwalaho, siku ra Yehovha ra ku avanyisa a ri ta fika hakunene.
Tinhlankulu Ta Buku Ya Yeremiya
A ku ri hi lembe ra 607 B.C.E. Sedekiyasi a a ri elembeni ra vu-11 ra ku fuma kakwe. Hosi Nebukadnetsara wa le Babilona u rhendzele Yerusalema ku ringana tin’hweti ta 18. Hi siku ra vunkombo ra n’hweti ya vuntlhanu hi lembe ra vu-19 ra ku fuma ka Nebukadnetsara, Nebuzaradani ndhuna ya varindzi, u ‘fike’ kumbe u te eYerusalema. (2 Tihosi 25:8) Kumbexana loko a ri enxaxeni wakwe lowu a wu ri ehandle ka marhangu ya muti, Nebuzaradani u kambisise xiyimo kutani a hlela ndlela leyi a a ta hlasela ha yona. Endzhaku ka masiku manharhu, hi siku ra vukhume ra n’hweti, u ‘nghene’ eYerusalema. Hiloko a wu hisa hi ndzilo.—Yeremiya 52:12, 13.
Endla Ndzavisiso
Tinhlankulu Ta Buku Ya Tihosi Ta Vumbirhi
24:3, 4. Hikwalaho ka nandzu wa ngati wa Manase, Yehovha “a nga pfumelanga ku va rivalela” Vayuda. Xikwembu xi xixima ngati ya lava nga riki na nandzu. Hi nga tiyiseka leswaku Yehovha u ta rihisela ngati ya lava pfumalaka nandzu, hi ku lovisa lava yi halateke.—Pisalema 37:9-11; 145:20.
JANUARY 16-22
LESWI HI SWI DYONDZAKA EBIBELENI | 1 TIKRONIKA 1-3
“Bibele I Buku Ya Ntiyiso, Ku Nga Ri Ya Mintsheketo”
Xana Adamu Na Evha A Va Ri Vanhu Va Xiviri?
Xiya xikombiso xa ku longoloxiwa ka rixaka ra Vayuda lexi rhekhodiweke eBibeleni ebukwini ya Tikronika to Sungula ndzima 1 ku ya eka ndzima 9 ni le ka evhangeli ya Luka ndzima 3. Ku longoloxiwa loku hlamarisaka ka tirhekhodo ta matimu ya switukulwana leswi, ku sukela eka 48 ku ya ka 75 hi ku landzelelana ka swona. Buku ya Luka yi vulavula hi rixaka leri Yesu Kreste a a huma eka rona, kasi buku ya Tikronika yi vulavula hi rhekhodo ya ku landzelelana ka vuhosi ni vuprista eka rixaka ra Israyele. Tibuku leti havumbirhi ka tona ti katsa mavito ya vanhu lava dumeke vo tanihi Solomoni, Davhida, Yakobe, Isaka, Abrahama, Nowa ti hetelela hi Adamu. Mavito hinkwawo lama longoloxiweke eka tibuku leti i mavito ya vanhu va xiviri, naswona Adamu loyi a tshahiweke eka tibuku leti hatimbiri a a ri munhu wo sungula wa xiviri.
Mhaka Ya Nowa Ni Ndhambi—I Ntiyiso, A Hi Ntsheketo
Swiviko swimbirhi swa tinyimba ta vanhu eBibeleni swi tiyisekisa leswaku Nowa a a ri munhu wa xiviri. (1 Tikronika 1:4; Luka 3:36) Ezra na Luka, ku nga vona lava tsaleke matimu lawa ya tinyimba ta vanhu, a va ri vaendli va ndzavisiso lava nga ni vurhon’wana. Luka u landzelerisise nxaxamelo wa tinyimba ta Yesu Kreste ku fikela eka Nowa.
Xana Adamu Na Evha A Va Ri Vanhu Va Xiviri?
Hi xikombiso, anakanya hi dyondzo yin’wana ya Bibele leyi vangheni va tikereke va yi rhandzaka, ku nga nkutsulo. Hi ku ya hi dyondzo leyi, Yesu Kreste u nyikele hi vutomi byakwe tanihi munhu loyi a hetisekeke leswaku a kutsula vanhu eka swidyoho swa vona. (Matewu 20:28; Yohane 3:16) Hilaha hi swi tivaka hakona nkutsulo i hakelo leyi ringanaka ni leswi lavekaka leswaku ku kutsuriwa kumbe ku xaviwa nchumu lowu lahlekeke. Hi yona mhaka leyi Bibele yi hlamuselaka Yesu tanihi “nkutsulo lowu yelanaka.” (1 Timotiya 2:6) Wu yelana ni yini? Bibele ya hlamula: “Tanihi leswi hinkwavo va faka eka Adamu, kutani hinkwavo va ta hanyisiwa eka Kreste.” (1 Vakorinto 15:22) Vutomi lebyi hetisekeke lebyi Yesu a nyikeleke hi byona leswaku a kutsula vanhu lava yingisaka bya yelana ni vutomi lebyi Adamu a byi lahleke hikwalaho ka xidyoho lexi a xi endleke aEdeni. (Varhoma 5:12) Swi le rivaleni leswaku loko Adamu a a nga ri munhu wa xiviri nkutsulo wa Kreste a wu ta va wa hava.
Endla Ndzavisiso
it-1-E 911 ¶3-4
Rixaka
Mavito Ya Vavasati. Vavasati a va nghenisiwa eka nxaxamelo wa rixaka loko ku ri ni xivangelo xa matimu xo endla sweswo. Eka Genesa 11:29, 30, ku vulavuriwa hi Sarayi (Sara), hikwalaho ka leswi Mbewu leyi tshembisiweke a yi ta huma eka yena, hayi eka nsati un’wana wa Abrahama. Milka a nga ha va a nghenisiwile eka nxaxamelo lowu fanaka hikwalaho ka leswi a a ri kokwa wa Raveka, nkata Isaka, kutani a komba leswaku rixaka ra Raveka ri huma eka maxaka ya Abrahama, hikwalaho ka leswi Isaka a a nga fanelanga a teka wansati la humaka eka tinxaka tin’wana. (Gn 22:20-23; 24:2-4) Eka Genesa 25:1, ku boxiwa vito ra nsati lontsongo wa Abrahama ku nga Ketura. Leswi swi kombisa leswaku Abrahama u tlhele a teka nsati un’wana endzhaku ka loko Sara a file ni leswaku matimba yakwe yo veleka a ma ha ri kona endzhaku ka 40 wa malembe loko Yehovha a ma pfuxete hi singita. (Rhm 4:19; Gn 24:67; 25:20) Nakambe, yi kombisa vuxaka lebyi a byi ri kona exikarhi ka Isirayele na Midiyani ni tinxaka tin’wana ta Arabiya.
Ku vulavuriwa hi Leya, Rahele ni vasati lavatsongo va Yakobo, kun’we ni vana lava va tswariweke hi vona. (Gn 35:21-26) Leswi swi hi pfuna ku twisisa ndlela leyi Xikwembu xi khomeke majaha lawa ha yona. Hi kuma ni mavito ya vavasati van’wana enxaxamelweni wa rixaka hikwalaho ka swivangelo leswi fanaka. Loko ndzhaka yi hundzisiwa hi ku tirhisa vona, mavito ya vona ma nga ha katsiwa. (Tin 26:33) Kavula, Tamari, Rahava na Ruti i swikombiso leswinene. Eka xiendlakalo ha xin’we, ku ni nchumu wo hlamarisa mayelana ni ndlela leyi vavasati lava va veke enxaxamelweni wa vakokwa wa Mesiya, Yesu Kreste. (Gn 38; Rt 1:3-5; 4:13-15; Mt 1:1-5) Exikarhi ka swikombiso swin’wana swa vavasati lava ku vulavuriweke ha vona enxaxamelweni wa rixaka ku ni 1 Tikronika 2:35, 48, 49; 3:1-3, 5.
JANUARY 23-29
LESWI HI SWI DYONDZAKA EBIBELENI | 1 TIKRONIKA 4–6
“Swikhongelo Swa Mina Swi Kombisa Leswaku Ndzi Munhu Wa Njhani?”
“Mutwi Wa Xikhongelo”
Yabese a a khongela swi huma embilwini minkarhi hinkwayo. U sungule xikhongelo xakwe hi ku kombela leswaku Xikwembu xi n’wi katekisa. Hiloko a endla swikombelo swinharhu leswi kombisaka leswaku a a ri ni ripfumelo leri tiyeke.
Xo sungula, Yabese u kombele Xikwembu a ku: “Kurisa ndhawu ya mina.” (Ndzimana 10) A a ri wanuna wo xiximeka naswona a a nga ri na makwanga yo teka ni tindhawu ta van’wana. Swi nga ha endleka leswaku xikombelo xakwe a xi khumba vanhu, ku nga ri ku va ni ndhawu leyikulu. Swi nga ha endleka leswaku a a lava ndhawu leyikulu leswaku vagandzeri va ntiyiso va Xikwembu va enela eka yona.
Xa vumbirhi, Yabese u kombele leswaku “voko” ra Xikwembu ri va na yena. Voko ra Xikwembu ro fanekisela i matimba ya xona lawa xi ma tirhisaka ku pfuna vagandzeri va xona. (1 Tikronika 29:12) Leswaku a kuma leswi a swi kombeleke hi mbilu hinkwayo, Yabese u langutele eka Xikwembu lexi voko ra xona ri nga komangiki eka lava kombisaka ripfumelo eka xona.—Esaya 59:1.
Xa vunharhu, Yabese u khongele a ku: “U ndzi sirhelela ekhombyeni, leswaku ri nga ndzi vavisi.” Xiga lexi nge “ri nga ndzi vavisi” xi nga ha va xi vula leswaku u khongelele leswaku a nga sirheleleki eka khombo ntsena kambe nileswaku a nga vi ni gome kumbe ku hluriwa hi swiendlo swo biha.
Xikhongelo xa Yabese xi kombisa leswaku a a karhateka ngopfu hi vugandzeri bya ntiyiso ni hi ripfumelo leri a a ri na rona eka Mutwi wa xikhongelo. Xana Yehovha u angule njhani? Rungula leri ro koma ri gimeta hi marito lama nge: “Kutani Xikwembu xi n’wi nyika leswi a swi kombeleke.”
Endla Ndzavisiso
Tinhlankulu Ta Buku Ya Tikronika To Sungula
5:10, 18-22. Emasikwini ya Hosi Sawulo, tinxaka ta le vuxeni bya Yordani ti hlule Vahageri hambileswi nhlayo ya vona a yi tlula ya tinxaka teto hi mpimo lowu andzisiweke kambirhi. Sweswo swi ve tano hikuva tinhenha ta tinxaka leti a ti tshemba Yehovha naswona a ti langutele yena leswaku a ti pfuna. A hi veni ni ntshembo lowu tiyeke eka Yehovha loko hi ri karhi hi lwa nyimpi ya moya ni valala va hina va ntsandza vahlayi.—Vaefesa 6:10-17.
JANUARY 30–FEBRUARY 5
LESWI HI SWI DYONDZAKA EBIBELENI | 1 TIKRONIKA 7-9
“Yehovha A Nga Ku Pfuna U Endla Swiavelo Swo Tika”
Tinhlankulu Ta Buku Ya Tikronika To Sungula
9:26, 27. Varindzi va tinyangwa va Valevhi a va nyikiwe xiavelo lexi lavaka vutihlamuleri lebyikulu. A va nyikiwe xilotlelo xo nghena etindhawini to kwetsima ta tempele. A va tshembeka entirhweni wa vona wo pfula tinyangwa teto siku ni siku. Hi nyikiwe vutihlamuleri byo fikelela vanhu ensin’wini ya hina, hi va pfuna leswaku va ta evugandzerini bya Yehovha. Xana a hi fanelanga hi kombisa ku va lava tshembekaka ku fana ni varindzi va tinyangwa va Valevhi?
Xana U Nga Tekelela Finiyasi Loko U Langutana Ni Mintlhontlho?
Finiyasi a a byarhe vutihlamuleri lebyikulu eIsrayele wa khale; kambe u swi kotile ku langutana ni mintlhontlho hileswi a a ri ni xivindzi, a a twisisa naswona a a titshege hi Xikwembu. Nakambe Yehovha u n’wi katekisile hileswi a a ri khathalela swinene vandlha rakwe. Endzhaku ka malembe ya kwalomu ka gidi, Ezra u huhuteriwe ku tsala a ku: “A ku ri Finiyasi n’wana wa Eliyazara loyi a a ri murhangeri wa vona eku sunguleni. Yehovha a a ri na yena.” (1 Tikr. 9:20) Onge swi nga va tano hi vanhu hinkwavo lava rhangelaka vanhu va Xikwembu namuntlha. Entiyisweni, onge swi nga va tano hi Vakreste hinkwavo lava tirhelaka Xikwembu hi ku tshembeka.
Endla Ndzavisiso
Yimbelelelani Yehovha!
6 Yehovha u tirhise vaprofeta vakwe ku lerisa vagandzeri vakwe leswaku va n’wi dzunisa hi tinsimu. Vayimbeleri va rixaka leri nga vaprista va kale va tshikisiwa mintirho leyi Valevhi van’wana a va boheka ku yi endla leswaku va ta tirhisa nkarhi wa vona wo tala ku va va qambha, kumbexana ni ku titoloveta ku yimbelela.—1 Tikr. 9:33.
FEBRUARY 6-12
LESWI HI SWI DYONDZAKA EBIBELENI | 1 TIKRONIKA 10-12
“Tiyisa Ku Navela Ka Wena Ko Endla Ku Rhandza Ka Xikwembu”
“Ndzi Dyondzise Ku Endla Ku Rhandza Ka Wena”
12 Hi fanele hi tekelela ndlela leyi Davhida a a yi twisisa ha yona ndlela yo tirhisa misinya ya Nawu ni ku navela ka yena ku hanya ha yona. Xiya leswi humeleleke loko Davhida a vule leswaku u navela ku “nwa mati ya xihlovo xa Betlehema.” Vavanuna vanharhu va Davhida va manyukute va nghena emutini—lowu hi nkarhi wolowo a ku tshama Vafilisita—kutani va vuya ni mati. Hambiswiritano, “Davhida a nga pfumelanga ku ma nwa kambe [u] ma [chululele] eka Yehovha.” Ha yini? Davhida u te: “A hi swinene eka mina, malunghana ni Xikwembu xanga, ku endla leswi! Xana ndzi nga nwa ngati ya vavanuna lava nghenisaka mimoya-xiviri ya vona ekhombyeni? Hikuva va nghenise mimoya-xiviri ya vona ekhombyeni leswaku va ma tisa.”—1 Tikr. 11:15-19.
13 Davhida a a swi tiva hi ku ya hi Nawu leswaku ngati a yi fanelanga yi dyiwa kambe yi fanele yi chululeriwa eka Yehovha. Naswona a a swi twisisa leswaku ha yini leswi swi fanele swi endliwa. Davhida a a swi tiva leswaku “moya-xiviri wa nyama wu le ngatini.” Kambe, leswi a ku ri mati a ku nga ri ngati. Ha yini Davhida a ale ku ma nwa? A a dyondze nsinya wa nawu lowu vulavulaka hi ngati. Eka Davhida, mati lawa a ma ri ya risima ku fana ni ngati ya vavanuna lavanharhu. Hikwalaho, a nga ta ma nwa mati wolawo. Ematshan’weni yo ma nwa, u endle xiboho xo ma chululela emisaveni.—Lev. 17:11; Det. 12:23, 24.
Pfumelela Milawu Ya Xikwembu Yi Ku Letela
5 Leswaku hi vuyeriwa eka milawu ya Xikwembu, a hi fanelanga hi yi hlaya kumbe ku tolovelana na yona ntsena. Hi fanele hi yi rhandza ni ku yi xixima. Rito ra Xikwembu ri ri: “Vengani leswo biha, mi rhandza leswinene.” (Amo. 5:15) Kambe hi nga swi endla njhani sweswo? Hi fanele hi dyondza ku languta swilo hi ndlela leyi Yehovha a swi langutaka ha yona. Hi xikombiso: A hi nge u ni nkelunkelu. Dokodela wa wena u ku nyika swiringanyeto mayelana ni ndlela leyi u faneleke u dya ha yona, u endla vutiolori ni ku endla ku cinca kun’wana evuton’wini bya wena. Endzhaku ko tirhisa swiringanyeto sweswo, u vona ku cinca! Kumbexana a wu ta n’wi khensa dokodela wa wena hileswi a ku pfuneke leswaku u antswisa rihanyo ra wena.
6 Hilaha ku fanaka, Muvumbi wa hina u hi nyike milawu leyi hi sirhelelaka eka vuyelo byo biha bya xidyoho kutani hi antswisa vutomi bya hina. Anakanya ndlela leyi swi hi vuyerisaka ha yona ku landzela milawu ya Bibele malunghana ni mavunwa, ku yiva, ku kunguhata swilo swo biha, ku tikhoma ko biha hi tlhelo ra masangu, madzolonga ni vungoma. (Hlaya Swivuriso 6:16-19; Nhlav. 21:8) Loko hi vona ndlela leyi hi vuyeriwaka ha yona loko hi endla swilo hi ndlela ya Yehovha, ha tsaka ni ku titwa hi rhandza Yehovha swin’we ni milawu yakwe.
Endla Ndzavisiso
it-1-E 1058 ¶5-6
Mbilu
Ku Tirha Hi “Mbilu Hinkwayo.” Mbilu ya xiviri yi fanele yi va leyi heleleke leswaku yi tirha kahle, kambe mbilu yo fanekisela yi nga ha avana. Davhida u khongerile a ku: “Ndzi endle ndzi chava vito ra wena hi mbilu ya mina hinkwayo,” leswi vulaka leswaku mbilu ya munhu yi nga avana mayelana ni leswi yi swi rhandzaka ni leswi yi swi chavaka. (Ps 86:11) Munhu wo tano a nga va ni “timbilu timbirhi,” a hiseka loko a gandzela Xikwembu kumbe a nga hiseki. (Ps 119:113; Nhlav 3:16) Munhu a nga tlhela a va ni ‘timbilu timbirhi,’ a ringeta ku tirhela tihosi timbirhi, hi vuxisi a vula nchumu wun’wana loko hi hala tlhelo a ehleketa swin’wana. (1 Tk 12:33; Ps 12:2, ftn) Yesu u sole vukanganyisi byo tano bya ku va ni timbilu timbirhi.—Mt 15:7, 8.
Munhu loyi a lavaka ku tsakisa Xikwembu a nga fanelanga a va ni mbilu leyi avaneke kumbe a va ni timbilu timbirhi kambe u fanele a xi tirhela hi mbilu leyi heleleke. (1Tk 28:9) Leswi swi lava ku tikarhata lokukulu hikwalaho ka leswi mbilu yi kanganyisaka naswona yi rhandzaka ku endla swo biha. (Yer 17:9, 10; Ge 8:21) Hi leswi swilo leswi nga hi pfunaka ku va ni mbilu leyi heleleke: xikhongelo lexi humaka embilwini (Ps 119:145; Swir 3:41), ku dyondza Rito ra Xikwembu mikarhi hinkwayo (Ezr 7:10; Swiv 15:28), ku hoxa xandla eku chumayeleni ka mahungu lamanene (ringanisa Yer 20:9), ni ku tshama ni vanhu lava va rhandzaka Yehovha hi timbilu ta vona hinkwato.—Ringanisa 2Th 10:15, 16.
FEBRUARY 13-19
LESWI HI SWI DYONDZAKA EBIBELENI | 1 TIKRONIKA 13-16
“Ku Landzela Nkongomiso Swa Vuyerisa”
Xana Wa Tivutisa Leswaku “Yehovha U Kwihi?”
12 Endzhaku ka loko areka ya ntwanano yi tshame malembe yo tala le Kiriyati-yeyarimi loko yi ta va yi tlheriseriwe eIsrayele, Hosi Davhida a a lava ku yi yisa eYerusalema. U kanele ni tindhuna ta vanhu kutani a vula leswaku Areka yi ta susiwa ‘loko swi vonaka swi ri swinene eka vona naswona swi amukeleka eka Yehovha.’ Kambe a nga lavisisanga hi ku hetiseka leswaku a tiyiseka hi ku rhandza ka Yehovha emhakeni leyi. Loko a a lavisise hi ku hetiseka, Areka a yi ta va yi nga rhwariwanga hi golonyi. A yi ta va yi rhwariwe hi Valevhi lava nga Vakohata, hilaha Xikwembu a xi lerise hakona. Hambileswi Davhida a a tshamela ku vutisa eka Yehovha, enkarhini lowu u tsandzekile ku n’wi vutisa hi ndlela leyi faneleke. Ku ve ni vuyelo byo biha. Endzhakunyana Davhida u pfumerile a ku: “Yehovha Xikwembu xa hina u hi hlaserile, hikuva a hi n’wi lavanga hi ku landza ntolovelo wa kona.”—1 Tikronika 13:1-3; 15:11-13; Tinhlayo 4:4-6, 15; 7:1-9.
Xana Wa Tivutisa Leswaku “Yehovha U Kwihi?”
13 Loko Areka yi ta va yi hetelele yi rhwariwe hi Valevhi va yindlu ya Obede-edomu va yi yisa eYerusalema, ku yimbeleriwe risimu leri qambhiweke hi Davhida. A ri ri ni xitsundzuxo lexi humaka embilwini lexi nge: “Lavisisani Yehovha ni ntamu wakwe, lavani xikandza xakwe nkarhi hinkwawo. Tsundzukani swiendlo swakwe swo hlamarisa leswi a swi endleke, masingita yakwe ni swiboho swa vuavanyisi swa nomu wakwe.”—1 Tikronika 16:11, 12.
Endla Ndzavisiso
Gandzelani Yehovha, Hosi Leyi Nga Riki Na Makumu
14 Davhida u tise areka yo kwetsima ya ntwanano eYerusalema. Hi nkarhi wolowo wo tsakisa, Valevhi va yimbelele risimu ro dzunisa leri a ri ri ni marito lawa ya nkoka, lama kumekaka eka 1 Tikronika 16:31, lama nge: “[Vulani] exikarhi ka matiko, ‘Yehovha i hosi!’” Munhu a nga ha vutisa a ku, ‘Leswi Yehovha a nga Hosi leyi nga riki na makumu, ha yini ku vuriwa leswaku u ve Hosi hi nkarhi wolowo?’ Yehovha u va Hosi loko a tirhisa vulawuri byakwe kumbe a veka munhu leswaku a va muyimeri wakwe hi nkarhi wo karhi kumbe leswaku muyimeri yoloye a tlhantlha xiphiqo xo karhi. Ku twisisa ndlela leyi Yehovha a vaka Hosi ha yona i swa nkoka swinene. Loko Davhida a nga si fa, Yehovha u n’wi tshembise leswaku vuhosi byakwe byi ta va kona hilaha ku nga heriki, a ku: “Ndzi ta yimisa mbewu ya wena endzhaku ka wena, leyi nga ta huma eka swirho swa wena swa le ndzeni; hakunene ndzi ta wu simeka wu tiya mfumo wa yona.” (2 Sam. 7:12, 13) Xitshembiso lexi xi hetiseke loko “mbewu” ya Davhida yi humelela endzhaku ka malembe yo tlula 1 000. A ku ri mani munhu loyi, naswona a a ta va Hosi rini?
FEBRUARY 20-26
LESWI HI SWI DYONDZAKA EBIBELENI | 1 TIKRONIKA 17-19
“Tshama U Tsakile Hambiloko U Hetiwa Matimba”
Anakanyisisa Hi Vunene Bya Nhlangano Wa Yehovha
DAVHIDA wa le tikweni ra Israyele ra khale i un’wana wa vanhu lava hlamarisaka swinene loyi ku vulavuriweke ha yena eMatsalweni ya Xiheveru. Murisi loyi, loyi a a ri muyimbeleri, muprofeta tlhelo hosi a a tshemba Yehovha Xikwembu hi ku helela. Vuxaka lebyikulu swinene lebyi Davhida a a ri na byona na Yehovha byi n’wi endle a navela ku akela Xikwembu yindlu. Yindlu yoleyo kumbe tempele a yi ta va xivindzi xa vugandzeri bya ntiyiso eIsrayele. Davhida a a swi tiva leswaku tempele ni ntirho lowu a wu ta endliwa eka yona a swi ta tisela vanhu va Xikwembu ntsako ni mikateko. Hikwalaho Davhida u yimbelerile: “Wa tsaka loyi [wena Yehovha] u n’wi hlawulaka, loyi u endlaka leswaku a tshinela, leswaku a ta tshama eswivaveni swa wena. Kunene hi ta enerisiwa hi vunene bya yindlu ya wena, ndhawu yo kwetsima ya tempele ya wena.”—Pisalema 65:4.
Tsaka Hi Leswi U Kotaka Ku Swi Endlela Yehovha Sweswi
11 Hilaha ku fanaka, na hina hi nga endla tano hi ku tirha hi matimba leswaku hi endla ntirho lowu Yehovha a hi nyikeke wona. Tiyimisele ku “khomeka ngopfu” entirhweni wo chumayela ni ku tirha hi matimba eka mitirho leyi endliwaka evandlheni. (Mit. 18:5; Hev. 10:24, 25) Lunghiselela leswaku u ta nyikela tinhlamulo leti akaka loko u ya etinhlengeletanweni ta vandlha. Yi teke yi ri ya nkoka mitirho leyi u nyikiweke yona etinhlengeletanweni ta vandlha ta le xikarhi ka vhiki. Loko u komberiwe ku pfuna hi mitirho yo karhi evandlheni, fika ka ha ri ni nkarhi u tlhela u yi endla kahle mitirho ya wena. U nga yi tekeli ehansi mitirho leyi u nyikiweke yona. Tikarhatele ku antswisa vuswikoti bya wena. (Swiv. 22:29) Loko u tinyiketela ku tirhela Yehovha, u ta va ni vuxaka lebyinene na yena naswona u ta va ni ntsako. (Gal. 6:4) Nakambe swi ta ku olovela ku tsaka ni van’wana loko va kuma vutihlamuleri lebyi na wena a wu navela ku byi kuma. I yini swin’wana leswi u nga tsakelaka ku swi fikelela—Rhom. 12:15; Gal. 5:26.
Endla Ndzavisiso
w20.02 12, bokisi
Ha N’wi Rhandza Swinene Yehovha, Tata Wa Hina
Xana Yehovha Wa Ndzi Tiva?
Xana u tshame u vutisa leswi, ‘Eka vanhu va tibiliyoni lava nga kona laha misaveni, hikwalaho ka yini Yehovha a fanele a ndzi tiva?’ Loko swi ri tano, a wu wexe. Hosi Davhida u te: “Oho Yehovha, xana munhu wo va yini lerova u nga n’wi lemuka, n’wana wa munhu wa nyama leswaku u nga n’wi tsundzuka?” (Ps. 144:3) Davhida a tiyiseka leswaku Yehovha wa n’wi tiva. (1 Tikr. 17:16-18) Hi ku tirhisa Bibele ni nhlangano wakwe, Yehovha wa ku tiyisekisa leswaku wa yi vona ndlela leyi u n’wi rhandzaka ha yona. Xiya rungula rin’wana leri kumekaka eBibeleni, leri nga ku tiyisekisaka hi mhaka leyi:
• Yehovha u ku tive u nga si velekiwa.—Ps. 139:16.
• Yehovha u tiva leswi nga embilwini ya wena ni leswi u swi ehleketaka.—1 Tikr. 28:9.
• Yehovha u yingisa swikhongelo swa wena hinkwaswo.—Ps. 65:2.
• Swiendlo swa wena swa yi khumba ndlela leyi Yehovha a titwaka ha yona.—Swiv. 27:11.
• Yehovha hi yena loyi a ku kokeke leswaku u ta eka yena.—Yoh. 6:44.
• Loko wo fa, Yehovha u ku tiva kahle lerova u ta ku pfuxa. U ta ku nyika miri ni miehleketo leyintshwa naswona vumunhu bya wena a byi nge cinci.—Yoh. 11:21-26, 39-44; Mint. 24:15.
FEBRUARY 27–MARCH 5
LESWI HI SWI DYONDZAKA EBIBELENI | 1 TIKRONIKA 20-22
“Pfuna Vantshwa Leswaku Va Humelela”
“Swilo Leswi Swi Nyike Vanhu Vo Tshembeka”
8 Hlaya 1Tikronika 22:5. Davhida a nga ha va a anakanye leswaku Solomoni a nga faneleki ku va a langutela ntirho wolowo wa nkoka. Solomoni a a ha ri “ntsongo” hi nkarhi wolowo naswona tempele leyi a yi fanele yi akiwa a yi ta va “yikulu swinene.” Kambe Davhida a swi tiva leswaku Yehovha u ta pfuna Solomoni leswaku a endla ntirho lowu a n’wi nyikeke wona. Kutani Davhida u endle leswi a nga swi kotaka ku pfuna Solomoni hi ku lunghiselela nhundzu yo tala.
“Swilo Leswi Swi Nyike Vanhu Vo Tshembeka”
7 Davhida a nga tshikanga ku letela Solomoni kumbe a hlundzuka hikwalaho ka leswi a ku nga ta bumabumeriwa yena loko tempele se yi herile. Loko tempele yi herile a yi tiveka tanihi tempele ya Solomoni. Hambileswi Davhida a nga ha vaka a hele matimba hileswi a nga ri kumangiki lunghelo ro aka tempele yoleyo, kambe u ye emahlweni a seketela ntirho wolowo. U hlele mintlawa ya vanhu lava nga ta tirha ni ku hlengeleta tinsimbhi, koporo, silivhere, nsuku swin’we ni timhandzi ta mikedari. Ku engetela kwalaho, u khutaze Solomoni a ku: “N’wananga, onge Yehovha a nga va na wena, u fanele u humelela, u akela Yehovha Xikwembu xa wena yindlu, hilaha a vulavuleke hakona malunghana na wena.”—1 Tikr. 22:11, 14-16.
Vatswari, Xana Mi Pfuna Vana Va N’wina Leswaku Va Fanelekela Ku Khuvuriwa?
14 Tanihi varisi, vakulu va vandlha va nga pfuna vatswari eka matshalatshala ya vona, hi ku vulavula kahle hi tipakani to tirhela Yehovha. Makwerhu un’wana wa xisati loyi a phayoneke malembe yo tlula 70 u tsundzuka nkoka wa bulo leri a veke na rona na Makwerhu Charles T. Russell loko a ri na malembe ya tsevu. Loko a hlamusela u ri: “U bule na mina ku ringana 15 wa timinete mayelana ni tipakani ta mina entirhweni wa Yehovha.” Entiyisweni, marito lamanene ni xikhutazo swi nga va ni nkucetelo lowukulu. (Swiv. 25:11) Vakulu va nga tlhela va katsa vatswari ni vana eka mitirho leyi endliwaka eHolweni ya Mfumo, va nga ha avela vantshwa mitirho hi ku ya hi malembe ni vuswikoti bya vona.
15 Swirho hinkwaswo evandlheni swi nga pfuna vantshwa hi ku kombisa leswaku swa khathala hi vona. Sweswo swi katsa ku xiya matshalatshala lawa va ma endlaka leswaku va tiyisa vuxaka bya vona na Yehovha. Xana muntshwa u nyikele nhlamulo leyi humaka embilwini, leyi lunghiseleriweke kahle kumbe u nyikele nkulumo eminhlanganweni ya le xikarhi ka vhiki? Xana u hlule ndzingo lowu ringeke ku tshembeka kakwe kumbe u nyikele vumbhoni exikolweni? Kutani, hatla u n’wi bumabumela. Ha yini u nga buli na muntshwa loko minhlangano yi nga si sungula kumbe endzhaku ka yona ku kombisa leswaku wa khathala hi yena? Hi ndlela leyi ni tin’wana, vantshwa va ta swi xiya leswaku i xiphemu xa ‘nhlengeletano leyikulu.’—Ps. 35:18.
Endla Ndzavisiso
Tinhlakulu Ta Buku Ya Tikronika To Sungula
21:13-15. Yehovha u lerise ntsumi leswaku yi yimisa khombo hikuva U twa ku vava loko vanhu va Yena va xaniseka. Ina, “tintswalo ta yena ti tele ngopfu.”