Xana Yehovha U ta Ku Tsundzuka Njhani?
“OHO Xikwembu xanga, ndzi tsundzuke.” Nehemiya u kombele Xikwembu hi marito wolawo ko hlayanyana. (Nehemiya 5:19; 13:14, 31) Swi tolovelekile leswaku loko vanhu va tshikilelekile swinene, va ya eka Xikwembu va kombela hi marito lama fanaka ni lawa.
Kambe, xana i yini lexi vanhu va anakanyaka ha xona loko va kombela Xikwembu leswaku xi va tsundzuka? Swi le rivaleni leswaku va langutele leswaku Xikwembu xi nga tsundzuki mavito ya vona ntsena. A swi kanakanisi leswaku va ni ntshembo wo fana ni wa xigevenga lexi a xi beleriwe etlhelo ka Yesu. Ku hambana ni lexin’wana, xigevenga lexi xi kombele Yesu xi ku: “U ndzi tsundzuka loko u nghena emfun’weni wa wena.” A xi nga lavi ntsena leswaku Yesu a xi tsundzuka leswaku i mani kambe a xi lava ni leswaku a xi endlela swo karhi—a xi pfuxa.—Luka 23:42.
Hakanyingi, Bibele yi kombisa leswaku eka Xikwembu, ‘ku tsundzuka’ swi vula ku teka goza lerinene. Hi xikombiso, endzhaku ka loko misava yi funengetiwe hi mati ya ndhambi ku ringana masiku ya 150, “Xikwembu xi tsundzuka Nowa . . . , Xikwembu xi endla leswaku mheho yi hunga ehenhla ka misava, kutani mati ma sungula ku hunguteka.” (Genesa 8:1) Endzhaku ka malembe-xidzana, Samsoni, loyi a a xokoriwe mahlo ni ku bohiwa hi tinketani hi Vafilisita, u khongerile a ku: “Yehovha, . . . ndzi kombela u ndzi tsundzuka, ndzi kombela u ndzi nyika matimba, kan’we ntsena.” Yehovha u tsundzuke Samsoni hi ku n’wi nyika matimba lama tlulaka ya munhu leswaku a ta tirihisela eka valala va Xikwembu. (Vaavanyisi 16:28-30) Malunghana na Nehemiya, Yehovha u katekise matshalatshala ya yena, naswona vugandzeri bya ntiyiso byi vuyeteriwile eYerusalema.
Muapostola Pawulo u tsale a ku: “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) Loko hi tsundzuka Yehovha hi ku lava ku endla ku rhandza ka yena, hilaha malandza ya yena lama tshembekaka ya le nkarhini lowu hundzeke ma endleke hakona, hi nga tiyiseka leswaku Yehovha u ta hi tsundzuka hi ku hi pfuna leswaku hi kuma swilaveko swa hina swa siku na siku, hi ku hi seketela loko hi ri emiringweni ni hi ku hi ponisa loko a ta avanyisa vanhu lava nga n’wi chaviki.—Matewu 6:33; 2 Petro 2:9.