Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2023 Watch Tower Bible and Tract Society of Pennsylvania
SEPTEMBER 4-10
LESWI HI SWI DYONDZAKA EBIBELENI | ESTERE 1-2
“Tirha Hi Matimba Leswaku U Titsongahata Ku Fana Na Estere”
Hambeta U Titsongahata Hambiloko U Langutana Ni Miringo
11 Loko hi bumabumeriwa ngopfu swi nga endla leswaku hi nga ha titsongahati. Anakanya hi ndlela leyi Estere a ti khomeke ha yona loko swiyimo swi cinca. A a ri mbhuri ya ku vatla naswona a a nyikiwa mafurha yo tola yo durha ngopfu yo tisasekisa ku ringana lembe. Siku ni siku a a tshama ni vanhwanyana lava a va huma eMfun’weni hinkwawo wa Peresiya lava hinkwavo a va lwela ku voniwa hi hosi. Kambe minkarhi hinkwayo a a titsongahata naswona a rhurile. Nakambe a nga tshikanga ku titsongahata hambiloko se hosi yi n’wi hlawurile leswaku a va hosi ya xisati.—Est. 2:9, 12, 15, 17.
U Yime A Tiyile Hikwalaho Ka Vanhu Va Xikwembu
15 Loko nkarhi wu fika wa leswaku Estere a tisiwa eka hosi, u nyikiwe ntshunxeko wo hlawula nchumu wun’wana ni wun’wana lowu a ta wu lava, kumbexana leswaku a ta sasekisa miri wakwe. Kambe leswi a a ringanisela, a nga kombelanga nchumu eka swilo leswi Hegayi a n’wi byeleke leswaku a swi kombela. (Est. 2:15) U xiye leswaku ku saseka ntsena a ku nge tsakisi mbilu ya hosi; ku ringanisela ni moya wo titsongahata swi ta kombisa ntirho lowukulu exivaveni xexo. Xana a tiyisile?
Hambeta U Titsongahata Hambiloko U Langutana Ni Miringo
12 Loko hi titsongahata swi hi pfuna leswaku minkarhi hinkwayo hi ambala ni ku tisasekisa hi ndlela leyi xiximekaka. Ha swi xiya leswaku loko hi lava ku pfuna vanhu leswaku va yingisa mahungu lamanene a hi fanelanga hi tilavela mahlo ya vanhu hi ku ambala hi ndlela leyi nga xiximekiki kambe hi fanele hi kombisa “moya wo rhula ni wo olova.” (Hlaya 1 Petro 3:3, 4; Yer. 9:23, 24) Leswi hi swi anakanyaka swi vonaka eka ndlela leyi hi endlaka swilo ha yona. Hi xikombiso, hi nga ha ringeta ku endla leswaku vanhu van’wana va anakanya leswaku hi ni malunghelo yo hlawuleka, hi tiva ngopfu kumbe hi vanghana lavakulu ni vamakwerhu lava rhangelaka. Kumbe hi nga ha ringeta ku endla leswaku vanhu va vona onge nchumu wo karhi wu endliwe hi hina ntsena hambiloko van’wana va pfunetile leswaku wu humelela. Nakambe Yesu u hi vekele xikombiso lexinene emhakeni leyi. Minkarhi yo tala loko a vulavula a tshaha eka Matsalwa ya Xiheveru. Leswi a a titsongahata a lava leswaku vayingiseri vakwe va yisa ku dzuneka eka Yehovha ku nga ri eka yena naswona a a lava leswaku va tiva ku vutivi ni vutlhari lebyi a ri na byona a swi huma eka Xikwembu.—Yoh. 8:28.
Endla Ndzavisiso
Xana A Wu Swi Tiva?
Valavisisi va kume tsalwa ra le Peresiya leri nga eribyeni leri boxeke vito ra wanuna loyi a vuriwaka Marduka (Hi Xitsonga i Mordekayi). A a tirha tanihi mulanguteri, kumbexana mulanguteri wa timali eXuxani. Arthur Ungnad, mutivi wa matimu u vule leswaku a ku ri “ro sungula ku va Mordekayi a boxiwa eka rungula leri a ri nga ri xiphemu xa Bibele.”
Endzhaku ka xiviko xa Ungnad, swidyondzi swi hundzuluxele matsalwa man’wana ya madzana ya le Peresiya lama nga emaribyeni. Swiphemu swin’wana leswitsongo swa maribye swi kumiwe emutini wa Persepolis lowu a wu ri marhumbi, laha a ku hlayisiwa swilo swa Nkoka ekusuhi ni makhumbi ya muti. Maribye lawa ma tsariwe hi nkarhi wa ku fuma ka Xerxes wo Sungula. A ma tsariwe hi ririmi ra Xielamite naswona ma ni mavito yo hlayanyana lama kumekaka ebukwini ya Estere.
Matsalwa yo hlayanyana ya maribye ya Persepolis ma boxa vito Marduka, loyi a ri mutsari endlwini ya vuhosi eXuxani hi nkarhi wa ku fuma ka Xerxes wo Sungula. Ribye rin’wana ri hlamusela leswaku Marduka a ri muhundzuluxeri. Rungula rolero ro kwatsaa, ni ndlela leyi Bibele yi n’wi hlamusela hayona Mordekayi. A a hlawuriwe ku va nandza wa Hosi Ahasuwerusi (Xerxes wo Sungula) naswona a a kota ku vulavula tindzimi timbirhi. Nkarhi ni nkarhi Mordekayi a a tshama egedeni ya yindlu ya vuhosi eXuxani. (Estere 2:19, 21; 3:3) Gede leyi a ku ri muako lowukulu laha malandza ya le vuhosini a ma tirhela kona.
Loku i ku yelana loku tsakisaka eka Marduka loyi a hlamuseriweke emaribyeni na Mordekayi loyi a hlamuseriweke eBibeleni. Va hanye hi nkarhi wu’nwe, endhawini yin’we naswona a va ri malandza laha a va tirha kona. Vumbhoni lebyi hinkwabyo byi vonaka byi kombisa leswaku Marduka na Mordekayi a ku ri munhu un’we.
SEPTEMBER 11-17
LESWI HI SWI DYONDZAKA EBIBELENI | ESTERE 3-5
“Pfuna Van’wana Leswaku Va Kulula Va N’watseka”
it-2-E 431 ¶7
Mordekayi
A Ala Ku Khinsamela Hamani. Hamani wa Muagaga a a vekiwe ku va holobyenkulu hi Ahasuwerusi, loyi a byeleke vanhu hinkwavo lava a va ri egedeni ya hosi leswaku va korhama emahlweni ka Hamani hikwalaho ka leswi a nyikiweke xikhundlha xa le henhla. Mordekayi a nga pfumelanga ku endla tano naswona swi ve erivaleni leswaku a a ri Muyuda. (Est 3:1-4) Mhaka ya leswaku ndlela leyi Mordekayi a a tikhome hayona a yi sekeriwe eka xivangelo lexi, yi tiyisekisa vuxaka lebyi a a ri na byona na Yehovha, tanihi Muyuda loyi a tiynyiketeleke, eka Xikwembu xakwe Yehovha. A a swi xiya leswaku ku korhama emahlweni ka Hamani a swi katsa swo tala ku tlula ku wela ehansi emisaveni u dzunisa munhu, hilaha Vaisrayele va endleke hakona enkarhini lowu nga hundza, va vula leswaku munhu wo tano la nga ni xikhundlha lexi tlakukeke i mufumi. (2Sa 14:4; 18:28; 1Th 1:16) Mordekayi a ri ni xivangelo lexi twalaka xa ku va a nga n’wi khinsameli Hamani. Hamani a a ri Muamaleke naswona Yehovha u vule leswaku u lwa na Amaleke “ni vana vakwe hinkwavo lava nga ta va kona endzhaku ka yena.” (Eks 17:16; vona nhlokomhaka leyi nge, HAMANI.) Mordekayi a a fanele a tshembeka eka Xikwembu ku nga ri eka swa tipolitiki.
it-2-E 431 ¶9
Mordekayi
U Tirhisiwe Ku Kutsula Vaisrayele. Mayelana ni xitiviso lexi endliweke leswaku ku dlayiwa Vayuda hinkwavo emfun’weni, Mordekayi a a ri na ripfumelo ra leswaku Estere a a ta tisiwa endlwini ya vuhosi leswaku a ta kutsula Vayuda. U kombe Estere ntirho wo tika lowu a a ri na wona naswona u n’wi byele leswaku a kombela mpfuno eka hosi ni ku endla leswaku yi n’wi komba tintswalo. Hambileswi Estere a vekeke vutomi byakwe ekhombyeni, u pfumerile.—Est 4:7–5:2.
U Yime A Tiyile Hikwalaho Ka Vanhu Va Xikwembu
22 Estere u fanele a khomiwe hi rhumbyana loko a twa rungula rero. Lowu a ku ri ndzingo lowukulu wa ripfumelo rakwe. A chava, hilaha a swi kombiseke hakona loko a hlamula Mordekayi. U n’wi tsundzuxe hi nawu wa hosi. Loko munhu a ya emahlweni ka hosi yi nga n’wi vitananga a dlayiwa. Loko ntsena hosi yi n’wi tlakusela nhonga ya yona ya vuhosi ya nsuku mudyohi a ta va a sirhelelekile. Xana Estere a ri ni xivangelo xo langutela leswaku hi musa u ta sirheleriwa, ngopfu-ngopfu hileswi a voneke leswi Vhaxiti a endliweke swona loko a ale xileriso xo ya emahlweni ka hosi? U byele Mordekayi leswaku hosi a yi nga n’wi vitananga ku ringana masiku ya 30! Leswi a yi nga n’wi vitananga ku ringana nkarhi wo leha, a nga ha va a tivutisile loko ku ri leswaku hosi a ya ha n’wi tsakela.—Est. 4:9-11.
23 Mordekayi u hlamule a tiyimiserile leswaku a ta seketela ripfumelo ra Estere. U n’wi tiyisekise leswaku loko o tsandzeka ku teka goza, ku ponisiwa ka Vayuda ku ta huma eka xihlovo xin’wana. Kambe, xana Estere a ta langutela ku tsetseleriwa loko nxaniso wu fika? Mordekayi u kombise ripfumelo rakwe leri tiyeke eka Yehovha, loyi a nga ta ka a nga pfuki a pfumelele vanhu Vakwe leswaku va lovisiwa ni switshembiso Swakwe leswaku swi nga hetiseki. (Yox. 23:14) Mordekayi u vutise Estere a ku: “I mani la tivaka leswaku lowu hi wona nkarhi wa leswaku u kuma ku fundzheka ka le vuhosini?” (Est. 4:12-14) Mordekayi a tshembela eka Xikwembu xakwe hi ku helela, ku nga Yehovha. Xana na hina hi endla hilaha ku fanaka?—Swiv. 3:5, 16.
Endla Ndzavisiso
Ku Lwela Ntshunxeko Wo Gandzela
14 Ku fana na Estere na Mordekayi va khale, vanhu va Yehovha namuntlha va lwela ku gandzela hi ku ntshunxeka hilaha a leriseke hakona. (Est. 4:13-16) Xana u nga hoxa xandla? Ina. Nkarhi na nkarhi u nga khongelela vamakwerhu va wena va moya lava sweswi va nga eku xanisekeni hikwalaho ko khomiwa ku biha hi tlhelo ra nawu. Swikhongelo swo tano swi nga va mpfuno swinene eka vamakwerhu lava xanisekaka. (Hlaya Yakobo 5:16.) Xana Yehovha wa swi hlamula swikhongelo swo tano? Ku hlula ka hina ka le hubyeni swi kombisa leswaku hakunene wa swi hlamula!—Hev. 13:18, 19.
SEPTEMBER 18-24
LESWI HI SWI DYONDZAKA EBIBELENI | ESTERE 6-8
“Leswi Hi Nga Swi Dyondzaka Eka Ku Vulavurisana Kahle Ni Van’wana”
U Endle Hi Vutlhari, Hi Xivindzi Naswona Handle Ka Vutianakanyi
15 Leswi Estere a lehiseke mbilu, a rindza siku rin’wana leswaku a vula xikombelo xakwe eka hosi, Hamani u nyikiwe nkarhi wa leswaku a titsongahata. Swi nga ha endleka leswaku Yehovha Xikwembu hi yena a endleke leswaku hosi yi va ni nkelunkelu. (Swiv. 21:1) A swi hlamarisi leswi Rito ra Xikwembu ri hi khutazaka ku kombisa “moya wo rindza”! (Hlaya Mikiya 7:7.) Loko hi rindzela Xikwembu, hi nga ha kuma leswaku ndlela leyi xi hi tlhantlhelaka swiphiqo swa hina ha yona yi yi tlula ekule ndlela leyi hina a hi ta swi tlhantlha ha yona.
U Vulavule Hi Xivindzi
16 Estere a nga ha ta ya emahlweni a ringa ku lehisa mbilu ka hosi; eka nkhuvo wakwe wa vumbirhi, a fanele a yi byela hinkwaswo. Kambe, xana a ta swi endla njhani sweswo? Hosi yi n’wi nyike nkarhi, yi tlhela yi n’wi vutisa leswaku xana xikombelo xakwe hi xihi. (Est. 7:2) ‘Nkarhi wa leswaku Estere a vulavula’ se a wu fikile.
U Endle Hi Vutlhari, Hi Xivindzi Naswona Handle Ka Vutianakanyi
17 Hi nga ha ehleketa loko Estere a khongela Xikwembu xakwe hi mbilu emahlweni ko va a vula marito lawa: “Loko ndzi kume tintswalo ematihlweni ya wena, Wena hosi, naswona swi vonaka swi ri swinene eka hosi, a ndzi nyikiwe moya-xiviri wa mina loko ndzi wu kombela ni varikwerhu loko ndzi va lava.” (Est. 7:3) Xiya leswaku u tiyisekise hosi leswaku a xixima xiboho xa yona malunghana ni leswi vonakaka swi ri swinene eka yona. Hakunene Estere a hambanile na Vhaxiti, nsati wo sungula wa hosi, loyi a khomiseke nuna wakwe tingana hi vomu! (Est. 1:10-12) Ku tlula kwalaho, Estere a nga solanga vuphukuphuku bya hosi byo tshembela eka Hamani. Ematshan’weni ya sweswo, u kombele hosi leswaku yi sirhelela vutomi byakwe lebyi a byi ri ekhombyeni.
U Endle Hi Vutlhari, Hi Xivindzi Naswona Handle Ka Vutianakanyi
18 Xikombelo xexo xi hlamarise hosi. Xana i mani loyi a endla leswaku vutomi bya nsati wa yona byi va ekhombyeni? Estere u ye emahlweni a ku: “Hi xavisiwile, mina ni varikwerhu, leswaku hi lovisiwa, hi dlayiwa ni ku herisiwa. Loko hi xaviseriwe vanhu hi va mahlonga ni malandza ya xisati ya vanhu, a ndzi ta va ndzi miyerile. Kambe maxangu a ma faneli loko swi vavisa hosi.” (Est. 7:4) Xiya leswaku Estere u xi boxe hi ku kongoma xiphiqo xakwe naswona u engetele hi ku vula leswaku a ta va a miyerile hi mhaka yoleyo loko vutomi bya vona a byi nga ri ehansi ka nxungeto. Kambe hosi a swi ta yi tikela swinene ku tshama hi mhaka yoleyo ya ku herisiwa ka rixaka.
19 Xikombiso xa Estere xi hi dyondzisa swo tala hi ndlela leyinene yo khorwisa munhu. Loko u lava ku byela munhu loyi u n’wi rhandzaka kumbe munhu la nga ni vulawuri lebyi tlakukeke xiphiqo lexikulu, ku va la lehisaka mbilu, la nga ni xichavo ni ku tshembeka swi nga ku pfuna swinene.—Swiv. 16:21, 23.
Endla Ndzavisiso
Tinhla-nkulu Ta Buku Ya Estere
7:4—Xana ku lovisiwa ka Vayuda a ku ta “vavisa hosi” hi ndlela yihi? Loko a vulavula hi vutlhari hi ta ku xavisiwa ka Vayuda tanihi mahlonga, Estere u kombise ndlela leyi hosi a yi ta lahlekeriwa ha yona hi ku lovisiwa ka vona. Swiphemu swa silivhere swa 10 000 leswi Hamani a swi tshembiseke, a swi nga ri nchumu eka vuhlayiselo bya xuma xa hosi loko swi pimanisiwa ni rifuwo leri a yi ta ri kuma loko Hamani a a lo endla kungu ro xavisa Vayuda va va mahlonga. Loko kungu ra Hamani a ri lo humelela, swi vula leswaku ni hosi a yi ta lahlekeriwa hi nsati wa yona.
SEPTEMBER 25–OCTOBER 1
LESWI HI SWI DYONDZAKA EBIBELENI | ESTERE 9-10
“U Tirhise Vulawuri Byakwe Leswaku A Pfuna Vanhu Va Ka Vona”
it-2-E 432 ¶2
Mordekayi
Sweswi Mordekayi u siva Hamani ku va holobyenkulu kutani a nyikiwa xingwavila xa hosi leswaku a hamba a sayina maphepha ya le vuhosini. Estere u veke Mordekayi endlwini ya Hamani, leyi hosi yi nga n’wi nyika yona. Kutani Mordekayi u tirhise xileriso xa hosi ivi a nyika Vayuda mfanelo ya leswaku va tisirhelela. Vayuda va te hefu va tlhela va tsaka. Vo tala eMfun’weni wa Peresiya va tihlanganise na Vayuda naswona loko siku ra Adara ya vu-13, ku nga siku ra leswaku ku simekiwa milawu ri fika, Vayuda a va lunghekile. Varhangeri va yime emahlweni ka vona hikwalaho ka xikhundlha lexi Mordekayi a a ri na xona. Nyimpi yi hundziseriwe eka siku rin’wana eXuxani. Valala va Vayuda eMfun’weni wa Peresiya vo tlula 75 000 va dlayiwile, ku katsa ni vana va khume va Hamani. (Est 8:1–9:18) Hi ku landza xitiyisekiso xa Estere, Mordekayi u lerise leswaku ku tlangeriwa nkhuvo wa lembe hi siku ra vu-14 ni ra vu-15 ra Adara, ku nga “masiku ya Purimi,” laha a ku tsakiwa, ku dyiwa, vanhu va nyikana tinyiko va tlhela va nyika ni swisiwana. Vayuda va swi amukerile kutani va tlhela va hundzisela nkhuvo lowu eka vana va vona lava a va ta velekiwa ni vanhu hinkwavo lava a va va joyina. Mordekayi loyi a a ri wa vumbirhi emfun’weni, a a xiximiwa swinene hi Vayuda ku nga vanhu va Xikwembu lava a va tinyiketerile naswona u ye amahlweni a va tirhela.—Est 9:19-22, 27-32; 10:2, 3.
it-2-E 716 ¶5
Purimi
Xikongomelo. Hilaha swi vuriwaka hakona hi vativi van’wana leswaku Nkhuvo wa Purimi lowu tlangeriweke hi Vayuda emikarhini ya namuntlha i wa ku titsakisa ku nga ri wa swa vukhongeri naswona mikarhi yin’wana eka wona ku hundzeletiwa swilo, leswi a swi nga ri tano hi nkarhi lowu yi sunguriweke ha wona ni mikarhi yo sungula ya ku wu tlangela. Mordekayi na Estere a ku ri malandza ya Xikwembu xa ntiyiso, ku nga Yehovha naswona xikongomelo xa nkhuvo lowu a ku ri ku vangamisa Yena. I Yehovha Xikwembu loyi a kutsuleke Vayuda hi nkarhi wolowo, hikuva mhaka yi tlhekeke hi ku tshembeka ka Mordekayi hikwalaho ka leswi a gandzela Yehovha ntsena. Swi nga endleka leswaku Hamani a ri Muamaleke, ku nga tiko leri Yehovha hi ku kongoma a ri rhukaneke a tlhela a ri avanyisela rifu. Mordekayi u yingise xileriso xa Xikwembu kutani ala ku khinsamela Hamani. (Est 3:2, 5; Eks 17:14-16) Nakambe, marito lawa Mordekayi a ma byeleke Estere (Est 4:14) ma kombisa leswaku a tshemba leswaku ku na loyi a nga ni matimba lamakulu la nga ta kutsula Vayuda naswona ku va Estere a titsona swakudya a nga siya eka hosi mayelana ni xikongomelo xakwe, a yi rhamba eka nkhuvo, a swi kombisa leswaku a a kombela mpfuno eka Xikwembu.—Es 4:16.
“Vanani Vatekeleri Va Xikwembu” Eka Ndlela Leyi Mi Tirhisaka Matimba Ha Yona
12 Evandlheni ra Vukreste, Yehovha u veke valanguteri leswaku va rhangela. (Vaheveru 13:17) Vavanuna lava, lava fanelekaka va tirhisa vulawuri lebyi Xikwembu xi va nyikeke byona ku pfuna ni ku khathalela ntlhambi. Xana xiyimo xa vona xi nyika vakulu mpfumelelo wo kandziyela vapfumeri-kulobye? Doo! Vakulu va fanele va ringanisela, va nga titlakusi hikokwalaho ka vutihlamuleri lebyi va nga na byona evandlheni. (1 Petro 5:2, 3) Bibele yi byela valanguteri yi ku: “Risa[ni] vandlha ra Xikwembu, leri xi ri xaveke hi ngati ya N’wana wa xona.” (Mintirho 20:28) Lexi i xivangelo lexikulu lexi faneleke xi va endla va khoma xirho xin’wana ni xin’wana xa ntlhambi hi ndlela leyinene.
13 Leswi hi nga swi fanisa hi ndlela leyi. Munghana wa wena lonkulu u ku kombela leswaku u n’wi hlayisela nchumu wa risima. Wena wa swi tiva leswaku munghana wa wena u xave nchumu wolowo hi mali ya le henhla. Xana a wu nga ta wu khathalela swinene? Hilaha ku fanaka, Xikwembu xi nyike vakulu vutihlamuleri byo khathalela nchumu wa nkoka swinene: ku nga vandlha, leri swirho swa rona swi fanisiwaka ni tinyimpfu. (Yohane 21:16, 17) Yehovha wa ti rhandza tinyimpfu takwe—u ti rhandza lerova, u kale a ti xava hi ngati ya risima ya n’wana wakwe loyi a tswariweke a ri swakwe, ku nga Yesu Kreste. Yehovha u humese nxavo wa le henhla ku tlula hinkwayo eka tinyimpfu ta yena. Minkarhi hinkwayo vakulu lava titsongahataka va swi tsundzuka leswi, naswona va khoma tinyimpfu ta Yehovha hi ndlela leyi faneleke.
Endla Ndzavisiso
Tinhla-nkulu Ta Buku Ya Estere
9:10, 15, 16—Hambileswi a va pfumeleriwe ku phanga, ha yini Vayuda va papalate ku endla tano? Ku ala ka vona ku kombisa leswaku xikongomelo xa vona a ku ri ku ponisa vanhu va ka vona, ku nga ri ku kuma rifuwo.
OCTOBER 2-8
LESWI HI SWI DYONDZAKA EBIBELENI | YOBO 1-3
“Yana eMahlweni U Kombisa Ndlela Leyi U N’wi Rhandzaka Hayona Yehovha”
Tekelela Ripfumelo Ni Ku Yingisa Ka Nowa, Daniyele Na Yobo
16 Miringo leyi Yobo a langutaneke na yona. Vutomi bya Yobo a a byi cincacinca. Loko Yobo a nga si ringiwa a a ri wanuna “lonkulu ngopfu eka vanhu hinkwavo va le Vuxeni.” (Yobo 1:3) A fuwile, a tiveka naswona a xiximiwa swinene. (Yobo 29:7-16) Kambe, ku nga khathariseki swilo leswi hinkwaswo a nga titlakusanga kumbe ku vona onge a swi bohi ku va a gandzela Xikwembu. Entiyisweni Yehovha u n’wi vitane ‘nandza wa yena,’ Nakambe u te: “[I] munhu la pfumalaka xisandzu, wo lulama, la chavaka Xikwembu naswona a kendlukaka eka leswo biha.”—Yobo 1:8.
17 Hi xinkarhana vutomi bya Yobo byi cincile hi ndlela leyi chavisaka. U ve xisiwana lexikulu ni ku va ni gome. Ha n’wi tiva loyi a swi vangeke, i Sathana lowa mulumbeti loyi a hembeleke Yobo hi ku vula leswaku u tirhela Xikwembu hileswi a lavaka ku vuyeriwa. (Hlaya Yobo 1:9, 10.) Yehovha a nga xi banga hi makatla xihehlo xexo. Ku ri na sweswo u nyike Yobo nkarhi wo kombisa leswaku u tshembekile ni leswaku u gandzela Xikwembu swi huma embilwini.
Tshama U Tshembekile!
10 Sathana u tirhisa marhengu lama fanaka na le ka hina. Xana u katseka njhani eka leswi Sathana a hehleke Yobo ha swona? Hi marito man’wana Sathana u ri a wu n’wi rhandzi Yehovha Xikwembu naswona u ta tshika ku n’wi gandzela leswaku u tiponisa ni leswaku a wu nge swi koti ku tshama u tshembekile! (Yobo 2:4, 5; Nhlav. 12:10) Xana sweswo swi ku endla u titwa njhani? Swa vavisa hakunene! Nilokoswiritano, ehleketa hi leswi: Yehovha wa ku tshemba swinene lerova u ku nyika lunghelo ro hlamarisa. Yehovha u pfumelela Sathana leswaku a ringa ku tshembeka ka wena. Yehovha wa swi tiva leswaku u nga swi kota ku tshama u tshembekile kutani u paluxa mavunwa ya Sathana. U ku tshembisa leswaku u ta ku pfuna ku endla sweswo. (Hev. 13:6) Mawaku lunghelo ronghasi ro tshembiwa hi Muvumbi wa vuako hinkwabyo! Xana wa swi xiya leswaku hikwalaho ka yini ku tshembeka ku ri ka nkoka swinene? Ku hi pfuna leswaku hi lwisana ni mavunwa ya Sathana ni ku seketela vito lerinene ra Tata wa hina ni ndlela leyi a fumaka ha yona. Hi nga endla yini leswaku hi tshama hi tshembekile?
Endla Ndzavisiso
Dyondza Eka Marito Ya Yesu Yo Hetelela
9 Yesu u te yini? Loko Yesu a nga si timeka, u huwelerile a ku: “Xikwembu xanga, Xikwembu xanga, u ndzi tshikele yini?” (Mat. 27:46) Bibele a yi hi byeli leswaku hikwalahokayini Yesu a vule marito lawa. A hi kambisiseni leswi hi swi dyondzaka eka wona. Loko Yesu a vula marito lawa, a a hetisisa vuprofeta lebyi nga eka Pisalema 22:1. Nakambe, marito lawa ma kombisa leswaku Yehovha a a nga vekanga nchumu lowu a wu ta “sirhelela [N’wana wakwe] matlhelo hinkwawo.” (Yobo 1:10) Yesu a a swi tiva leswaku Tata wakwe u n’wi nyikete emavokweni ya valala vakwe leswaku va n’wi ringa hi tindlela hinkwato naswona a ku na munhu ni un’we loyi a tshameke a ringiwa ku fana na yena. Ku engetela kwalaho, marito lawa ma kombisa leswaku Yesu a a nga dyohanga nchumu lerova a nga faneriwa hi ku dlayiwa.
OCTOBER 9-15
LESWI HI SWI DYONDZAKA EBIBELENI | YOBO 4-5
“Papalata Rungula Ra Mavunwa”
it-1-E 713 ¶11
Elifazi
2. Hi un’wana wa vanghana va Yobo vanharhu. (Yb 2:11) A a ri Mutemani, swi nga ha endleka leswaku a ri ntukulu wo Sungula loyi a tlakukeke, kahlekahle ntukulu wa Abrahama naswona a a nga ri xaka ra Yobo. Yena ni vatukulu vakwe a va tibuma hi vutlhari bya vona. (Yr 49:7) Eka “vachaveleri,” lavanharhu Elifazi u vonake onge i wa nkoka swinene a tlhela a va ni nkucetelo, leswi kombisaka leswaku swi nga ha endleka a ku ri yena lonkulu eka vona. U rhange a vulavula naswona leswi a swi vuleke a swi lehile.
Lwisana Ni Mianakanyo Yo Biha!
Loko a tsundzuka nchumu wo karhi lowu nga tolovelekangiki lowu tshameke wu n’wi humelela, Elifazi u te: “Moya hi woxe wu hundza exikandzeni xa mina; misisi ya nyama ya mina yi sungula ku yima yi ku jivinini! Hiloko wu yima wu nga fambi, kambe a ndzi ku tivanga ku languteka ka wona; xivumbeko xa wona a xi ri emahlweni ka mahlo ya mina; ku ve ni ku rhula, kutani ndzi twa rito.” (Yobo 4:15, 16) I moya wa muxaka muni lowu kuceteleke mianakanyo ya Elifazi? Marito yo xopaxopa lawa a ma vuleke ma kombise leswaku moya wa kona a wu nga humi eka ntsumi ya Xikwembu yo lulama. (Yobo 4:17, 18) A ku ri xivumbiwa xa moya lexo homboloka. Loko swi nga ri tano, ha yini Yehovha a sole Elifazi ni vanghana va yena vambirhi hikwalaho ko vulavula mavunwa? (Yobo 42:7) Ina, Elifazi a a kuceteriwa hi dimona. Leswi a swi vuleke swi kombise mianakanyo leyi nga fambisaniki ni ya Xikwembu.
Lwisana Ni Rungula Ra Sathana Ra Mavunwa
Sathana u tirhise Elifazi, un’wana wa vanghana vanharhu va Yobo lava n’wi endzeleke, leswaku a n’wi byela leswaku vanhu a va nge swi koti ku tshama va tshembekile eka Xikwembu. Loko a kombetela eka vanhu tanihi lava “tshamaka etindlwini leti akiweke hi misava,” u byele Yobo a ku: “Masungulo ya vona [ma le ntshurini]! Va pfotlosiwa hi ku hatlisa ku tlula nsumba. Va pfotlosiwa ku sukela nimixo ku fikela nimadyambu; va fela makumu, ku nga ri na loyi a swi tekelaka enhlokweni.”—Yobo 4:19, 20.
Kun’wana eMatsalweni hi fanisiwa ni ‘swibya swa vumba’ leswi fayekaka hi ku olova. (2 Kor. 4:7) Hi tsanile hikwalaho ka xidyoho lexi hi tswariweke na xona ni leswi hi nga hetisekangiki. (Rhom. 5:12) Swa olova leswaku Sathana a hi hlasela. Kambe leswi hi nga Vakreste, hi nga titshega hi Yehovha. Hambileswi hi tsaneke, hi va risima ematihlweni ya Xikwembu. (Esa. 43:4) Ku engetela kwalaho, vanhu lava kombelaka moya lowo kwetsima eka Yehovha u va nyika wona. (Luka 11:13) Moya wa yena wu nga hi nyika “matimba lama tlulaka lama tolovelekeke,” lama nga ta hi pfuna leswaku hi langutana ni swiphiqo swihi na swihi leswi Sathana a hi tiselaka swona. (2 Kor. 4:7; Filp. 4:13) Loko hi lwisana na Diyavulosi hi “tiya eripfumelweni,” Xikwembu xi ta hi tiyisa xi tlhela xi hi nyika matimba. (1 Pet. 5:8-10) Hikwalaho, a hi fanelanga hi n’wi chava Sathana Diyavulosi.
Tivonele Eka Rungula Ra Mavunwa
● Kambisisa laha ri humaka kona ni leswi ri vulavulaka ha swona
Leswi Bibele yi swi vulaka: “Kambisisani swilo hinkwaswo.”—1 Vatesalonika 5:21.
Loko u nga si tshemba kumbe u rhumela xitori xo karhi, hambi ku ri lexi dumeke kumbe lexi phindhaphindhiwaka eka mahungu, tiyiseka leswaku i ntiyiso. Njhani?
Kambisisa ku tshembeka ka xihlovo xa kona. Tikhamphani ta swa mahungu kumbe mihlangano yin’wana yi nga endla leswaku xitori xi tsakisa hikwalaho ka swa bindzu kumbe xihlawuhlawu eka swa politiki. Ringanisa leswi u swi vonaka eka mahungu ni swihlovo swin’wana. Mikarhi yin’wana, vanghana va nga hi rhumela rungula ra mavunwa hi ku tirhisa imeyili kumbe va ri hoxa eka swiyenge swa mabulo. Kutani, u nga tshembi mahungu handle ka loko u kambela xihlovo xa wona.
Tiyiseka leswaku rungula rero i ra sweswinyana naswona ra pakanisa. Languta masiku lawa ri humesiweke ha wona ni vumbhoni lebyi swi seketelaka swinene leswi vuriweke. Vana ni vuxiyaxiya loko rungula leri rharhanganeke ri vonaka ri olovisiwe swinene kumbe loko xiviko xi endleriwe ku phasa vanhu.
Endla Ndzavisiso
Tshama U Tiyile Leswaku U Hlula eMphikizanweni Wa Vutomi
Ku va xiphemu xa nhlengeletano ya misava hinkwayo ya vagandzeri va ntiyiso swi nga hi tiyisa swinene. I nkateko hakunene ku hlanganyela ni vamakwerhu vo tano lava nga ni rirhandzu emisaveni hinkwayo! (1 Petro 2:17) Naswona hi nga va tiyisa vapfumeri-kulorhi.
Anakanya hi swiendlo leswinene swa Yobo wanuna wo lulama. Hambi ku ri Elifazi muchaveleri wa mavunwa u boheke ku pfumela a ku: “Loko un’wana a khunguvanyeka, marito ya wena a ma n’wi pfuxa; naswona a wu tiyisa matsolo lama helaka matimba.” (Yobo 4:4) Xana ha va pfuna van’wana? Ha un’we wa hina u ni vutihlamuleri byo pfuna vamakwerhu va hina va moya leswaku va tiyisela entirhweni wa Xikwembu. Loko hi ri na vona, hi nga tirhisa marito lama nge: “Tiyisani mavoko lama tsaneke, mi tiyisa ni matsolo lama gudlagudlaka.” (Esaya 35:3) Ha yini u nga tivekeli pakani yo tiyisa u tlhela u khutaza Mukreste-kuloni un’we kumbe vambirhi nkarhi ni nkarhi loko u hlangana na vona? (Vaheveru 10:24, 25) Marito lama khutazaka ni yo nkhensa matshalatshala ya vona yo hambeta va tsakisa Yehovha ma nga va pfuna leswaku va tshama va tiyile va ri ni ntshembo wo hlula emphikizanweni wa vutomi.
OCTOBER 16-22
LESWI HI SWI DYONDZAKA EBIBELENI | YOBO 6-7
“Loko U Vona Onge Swiphiqo Swa Wena A Wu Nge Swi Tiyiseleli”
Tinhla-nkulu Ta Buku Ya Yobo
7:1; 14:14—“Ntirho wa nsindziso” kumbe ‘ntirho wo sindzisiwa’ i yini? Ntshikilelo wa Yobo a wu ri wukulu swinene lerova u kale a anakanya leswaku ku hanya i ntirho wa nsindziso, wo tika ni lowu karharisaka. (Yobo 10:17, nhlamuselo ya le hansi ya NW) Leswi nkarhi lowu munhu a wu hetaka a ri eSheol—ku sukela loko munhu a fa ku fikela loko a pfuxiwa—wu nga nkarhi wa nsindziso, Yobo u fanise nkarhi wolowo ni ntirho wo sindzisiwa.
“Yehovha . . . U Ponisa Lava Hetiweke Matimba”
MIKARHI yin’wana, hi nga ehleketa hi ndlela leyi vutomi bya hina byi komeke hayona ni ndlela leyi byi ‘taleriweke hi maxangu’ hayona. (Yobo 14:1) Leswi hi swona leswi endlaka leswaku mikarhi yin’wana hi pfa hi hela matimba. Malandza yo tala ya Yehovha ya khale na wona ma tshame ma titwa hi ndlela leyi fanaka. Man’wana a ma navela ni ku fa. (1 Tih. 19:2-4; Yobo 3:1-3, 11; 7:15, 16) Kambe mikarhi hinkwayo, Yehovha Xikwembu lexi a ma tshembele eka xona, u va chavelerile a tlhela a va tiyisa. Leswi va humeleleke swi tsaleriwe ku chavelela hina ni ku hi dyondzisa.—Rhom. 15:4.
Loko U Vona Swi Antswa Ku Tisunga
Hambiloko swiphiqo swa wena swi tikomba onge a swi nge lulami, tsundzuka leswaku a wu wexe naswona lexi twisaka ku vava hileswaku swi nga ha endleka leswaku ku ni vanhu lava langutaneke ni swiphiqo namuntlha. Bibele yi ri: “Ntumbuluko hinkwawo wu hambeta wu konya ni ku vaviseka swin’we.” (Varhoma 8:22) Loko u ri emaxangwini swi nga ha vonaka onge swiphiqo swa wena a swi nge pfuki swi lulamile, kambe swilo swa antswa hi ku famba ka nkarhi. Kambe sweswi, i yini lexi nga ku pfunaka?
Vulavula ni munghana wa wena la wupfeke loyi u n’wi tshembaka hi ndlela leyi u titwaka ha yona. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swivuriso 17:17) Wanuna wo lulama loyi ku vulavuriweke ha yena eBibeleni u phofulele van’wana ndlela leyi a a titwa ha yona loko a ri emaxangwini. Hi nkarhi lowu a a titwa a “nyenya vutomi [byakwe],” u te: “Ndzi ta humesa mhaka leyi yi ndzi karhataka. Ndzi ta vulavula moya-xiviri wa mina wu ri ni mbitsi!” (Yobo 10:1) Ku phofulela van’wana ta le mbilwini swi nga vohlisa ndlela leyi u titwaka ha yona naswona swi nga ku pfuna leswaku u cinca ndlela leyi u swi langutaka ha yona swiphiqo leswi u nga na swona..
Chulula mbilu ya wena eka Xikwembu hi xikhongelo. Vanhu van’wana va teka xikhongelo ku ri nchumu wo hungasa ha wona, kambe Bibele yi vula leswi hambaneke. Pisalema 65:2 yi vula leswaku Yehovha Xikwembu i “Mutwi wa xikhongelo,” nakambe 1 Petro 5:7 yi ri: “Xa mi khathalela.” Bibele yi kandziyisa nkoka wo tshemba Xikwembu. Hi xikombiso:
“Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”—SWIVURISO 3:5, 6.
“U ta enerisa ku navela ka lava va n’wi chavaka, naswona u ta ku twa ku rila ka vona va kombela ku pfuniwa, u ta va ponisa.”—PISALEMA 145:19.
“Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.”—1 YOHANE 5:14.
“Yehovha u le kule swinene ni lavo homboloka, kambe xikhongelo xa lavo lulama wa xi yingisa.”—SWIVURISO 15:29.
Loko u byela Xikwembu swiphiqo leswi u langutanaka na swona, xi ta ku pfuna. Ku ni xivangelo lexinene lexi endlaka leswaku Bibele yi hi khutaza ku ‘xi tshemba minkarhi hinkwayo. Hi chulula timbilu ta hina emahlweni ka xona.’—Pisalema 62:8.
Endla Ndzavisiso
Yingisa, U Dyondza U Tlhela U Va Ni Ntwelavusiwana
10 Hi nga tekelela Yehovha hi ku va lava tikarhatelaka ku tivana ku antswa. Tiva vamakwenu ku antswa. Vulavula na vona loko tinhlengeletano ta vandlha ti nga si sungula ni loko se ti herile, tirha na vona nsimu naswona loko swi koteka va rhambe leswaku u ta tiphina na vona hi swakudya. Loko u endla tano, u nga kuma leswaku makwerhu wa xisati loyi a vonakaka a nga ri na xinghana u ni tingana, makwerhu loyi a wu ehleketa leswaku u rhandza rifuwo u ni malwandla kumbe ndyangu lowu talaka ku fika leti etinhlengeletanweni ta vandlha wa kanetiwa ekaya. (Yobo 6:29) I ntiyiso leswaku a hi fanelanga hi “nghenelela etimhakeni ta vanhu van’wana.” (1 Tim. 5:13) Kambe swi kahle ku tiva swo karhi hi vamakwerhu ni swiyimo leswi endleke va hanya hi ndlela leyi va hanyaka ha yona.
OCTOBER 23-29
LESWI HI SWI DYONDZAKA EBIBELENI | YOBO 8-10
“Rirhandzu Lerikulu Ra Xikwembu Ra Hi Sirhelela Eka Mavunwa Ya Sathana”
Xana Hi Nga Swi Kota Ku Tsakisa Xikwembu?
Yobo u langutane ni swiyimo swo tala swo tika leswi a swi nga n’wi fanelanga. U ve ni langutelo leri hoxeke, a vula leswaku Xikwembu a xi nga khathali hi leswi a a kombisa ripfumelo eka xona. (Yobo 9:20-22) Yobo a a tivona a lulamile lerova eka van’wana a a tivula loyi a lulameke ku tlula Xikwembu.—Yobo 32:1, 2; 35:1, 2.
Xana Rirhandzu Lerikulu Ra Yehovha Ri Vula Yini Eka Wena?
14Rirhandzu lerikulu ra Xikwembu ri sirhelela vuxaka bya hina na xona. Loko Davhida a khongela eka Yehovha, u te: “U ndhawu ya mina yo tumbela eka yona; U ta ndzi sirhelela emaxangwini. U ta endla leswaku ku biwa mikulungwana hikuva u ndzi ponisile. . . . La tshembaka Yehovha wa n’wi sirhelela hikuva Wa n’wi rhandza.” (Ps. 32:7, 10) Ku fana ni makhumbi lamakulu lawa a ma sirhelela miti ya khale, rirhandzu lerikulu ra Yehovha ra hi sirhelela eka makhombo lama endlaka leswaku hi nga tshembeki eka yena. Nakambe ri n’wi susumetela leswaku a tshinela ekusuhi na hina.—Yer. 31:3.
Endla Ndzavisiso
“I Mani Loyi A Tivaka Mianakanyo Ya Yehovha?”
19 Hi dyondze yini malunghana ni “mianakanyo ya Yehovha”? Hi dyondze leswaku hi fanele hi pfumelela Rito ra Xikwembu leswaku ri hi endla hi yi twisisa kahle mianakanyo ya Yehovha. A hi fanelanga hi avanyisa Yehovha hi ku ya hi ku tsana ka hina, milawu ya hina ni ku anakanya ka hina. Yobo u te: “[Xikwembu] a hi munhu ku fana na mina lerova ndzi nga xi hlamula, leswaku hi nghena swin’we ehubyeni.” (Yobo 9:32) Loko hi sungula ku twisisa mianakanyo ya Yehovha ku fana na Yobo, hi susumeteleka ku vula hi ku: “Waswivo! Leswi ko va swiphemunyana swa tindlela ta xona, phela i mhaka leyi hleveteriwaka malunghana na xona! I mani la nga twisisaka ku dzindza ka xona ka matimba?”—Yobo 26:14.
20 Loko hi ri karhi hi hlaya Matsalwa, hi fanele hi endla yini loko hi hlangana ni ndzimana leyi swi tikaka ku yi twisisa, ngopfu-ngopfu malunghana ni mianakanyo ya Yehovha? Loko endzhaku ko endla ndzavisiso hi mhaka yoleyo hi nga kumi nhlamulo leyi twisisekaka, hi nga yi teka tanihi mhaka leyi ringaka ndlela leyi hi n’wi tshembaka ha yona Yehovha. Tsundzuka, minkarhi yin’wana tindzimana tin’wana to tika ti hi nyika nkarhi wo kombisa ripfumelo ra hina eka timfanelo ta Yehovha. A hi pfumeleni hi ku titsongahata leswaku a hi swi twisisi hinkwaswo leswi a swi endlaka. (Ekl. 11:5) Hikwalaho hi ta susumeteleka ku pfumelelana ni marito lawa ya muapostola Pawulo lama nge: “Mawaku ku enta ka rifuwo ni vutlhari ni vutivi bya Xikwembu! Vuavanyisi bya xona a byi lavisiseki, ni tindlela ta xona a ti landzeleriseki! Hikuva ‘i mani loyi se a tivaka mianakanyo ya Yehovha, kumbe i mani loyi a veke mutsundzuxi wa yena?’ Kumbe, ‘I mani loyi a rhangeke a n’wi nyika swo karhi, leswaku a ta tlheriseriwa swona?’ Hikuva swilo hinkwaswo swi huma eka yena, swi endliwe hi yena, i swa yena. Ku vangama a ku ve ka yena hi masiku. Amen.”—Rhom. 11:33-36.
OCTOBER 30–NOVEMBER 5
LESWI HI SWI DYONDZAKA EBIBELENI | YOBO 11-12
“Tindlela Tinharhu To Kuma Vutlhari U Tlhela U Vuyeriwa Eka Byona”
Yobo U Dzunise Vito Ra Yehovha
17 I yini lexi pfuneke Yobo leswaku a tshama a tshembekile? Swi le rivaleni leswaku loko a nga si ringiwa, ana se a a ri ni vuxaka lebyi tiyeke na Yehovha. Hambileswi hi nga riki na vumbhoni bya leswaku Yobo a a swi tiva leswaku Sathana u hehle Yehovha, kambe a a tiyimisele ku tshama a tshembekile. U te: “Ndzi nga ka ndzi nga tshiki vutshembeki bya mina kukondza ndzi timeka!” (Yobo 27:5) Xana Yobo u byi tiyise njhani vuxaka byebyo? A swi kanakanisi leswaku leswi a swi tweke hi ndlela leyi Xikwembu xi tirhisaneke ha yona ni maxaka ya yena, ku nga Abrahama, Isaka na Yakobe, swi n’wi tsakisile. Naswona Yobo u vone timfanelo to tala letinene ta Yehovha hi ku xiya ntumbuluko.—Hlaya Yobo 12:7-9, 13, 16.
Yehovha A Nge Ku Tshiki
10 Hlawula vanghana lavanene evandlheni. Hlawula vanghana lava u nga dyondzaka swo karhi eka vona, hambiloko va ri vakulu, va ri vatsongo kumbe va huma eka mindhavuko yin’wana. Bibele yi vula leswaku vutlhari “byi na lava kuleke.” (Yobo 12:12) Vamakwerhu lava kuleke va nga dyondza swo tala eka vantshwa. Davhida a a ri ntsongo eka Yonathani kambe sweswo a swi va sivelanga leswaku va va vanghana. (1 Sam. 18:1) Davhida na Yonathani va pfunanile leswaku va tirhela Yehovha hambiloko va langutana ni mitlhontlho. (1 Sam. 23:16-18) Irina, makwerhu wa xisati loyi a nga Mbhoni a ri yexe ekaya ka vona u ri: “Vamakwerhu va nga va vatswari kumbe vamakwenu. Yehovha a nga va tirhisa leswaku va hi pfuna.”
11 A swi olovi ku kuma vanghana loko u ri ni tingana. Ratna, loyi a dyondzeke ntiyiso hambiloko a kanetiwa u ri: “Ndzi xiye leswaku ndza wu lava mpfuno ni nseketelo wa vamakwerhu.” Swa tika ku phofula ndlela leyi u titwaka hayona eka munghana wa wena kambe loko u endla tano, hi kona laha xinghana xa n’wina xi nga ta tiya. Leswaku vanghana va wena va ku khutaza ni ku ku pfuna, swi lava u tiphofula eka vona.
12 Ndlela yin’wana yo kuma vanghana lavanene i ku famba ni vamakwerhu ensin’wini. Carol, loyi a boxiweke eku sunguleni u ri: “Ndzi kume vanghana lavanene hi ku tshama ndzi ri ni vamakwerhu ensin’wini ni ku endla mitirho yin’wana na vona evandlheni. Yehovha u ndzi pfunile hi ku tirhisa vamakwerhu lava.” Loko u va ni vanghana lava nga Vakreste swi ta ku pfuna. Yehovha u tirhisa vanghana lava leswaku va hi pfuna loko hi ri ntshikilelo kumbe xivundza.—Swiv. 17:17.
it-2-E 1190 ¶2
Vutlhari
Vutlhari Bya Xikwembu. Vutlhari byi huma eka Yehovha Xikwembu, ku nga xona “ntsena lexi tlhariheke.” (Rhm 16:27; Nhl 7:12) Vutlhari byi fambisana ni ntiyiso naswona leswi Yehovha a nga Muvumbi, “ku sukela enkarhini lowu nga riki na makumu ku ya enkarhini lowu nga riki na makumu” (Ps 90:1, 2), u tiva swilo hinkwaswo leswi a faneleke a swi tiva hi vuako, ndlela leyi byi hleriweke hayona, swilo leswi swi nga eka byona ni matimu ya byona ku fikela sweswi. Milawu ya ntumbuluko, ku rhendzeleka ni milawu leyi munhu a titshegekaka hi ndzavisiso ni swilo leswi tshuburiwaka naswona handle ka swilo leswi a va nga ta tiva ta vona, a va nga ta kota ku endla nchumu, swilo leswi hinkwaswo swi endliwe hi Yena. (Yb 38:34-38; Ps 104:24; Swiv 3:19; Yr 10:12, 13) Kahlekahle, milawu yakwe ya mahanyelo i ya nkoka swinene hikwalaho ka leswi yi nga cinciki, yi nga na vululami naswona yi vuyerisaka vanhu. (Dt 32:4-6; vona nhlokomhaka leyi nge YEHOVHA [Xikwembu lexi nga ni milawu ya mahanyelo].) Hi yena loyi a nga ni ku twisisa lokukulu. (Esa 40:13, 14) Hambileswi a nga pfumelelaka swilo leswi nga fambisaniki ni milawu yakwe leswaku swi endleka hambi ku ri leswaku swi famba kahle swa xinkarhanana, kahlekahle vumundzuku byi titshege hi yena naswona byi ta fambisana ni ku rhandza kakwe naswona swilo leswi a swi vuleke ‘swi ta endleka.”—Esa 55:8-11; 46:9-11.
Endla Ndzavisiso
Ku Vulavurisana Ni Vana Va Wena Lava Nga eMalembeni Ya Vuntshwa
▪ ‘Xana ndza swi kota ku twisisa leswi a ringetaka ku ndzi byela swona hi marito lawa a ma vulaka?’ Yobo 12:11 yi ri: “Xana ndleve hi yoxe a yi ma ringeti marito hilaha malaka ma nantswaka swakudya hakona?” Kutani sweswi u fanele u ‘ringeta’ leswi n’wana wa wena a swi vulaka ku tlula rini na rini. Hakanyingi vantshwa va vulavula hi swilo onge hiloko minkarhi hinkwayo swi ri ntiyiso. Hi xikombiso, n’wana wa wena a nga ha ku, “Minkarhi hinkwayo u ndzi khoma ku fana ni n’wana!” kumbe “A wu ndzi yingiseli nikatsongo!” Ematshan’weni yo n’wi holovela u lava ku tiva leswaku sweswo swi humelele rini, xiya leswaku n’wana wa wena a nga va a nga vuli hi ku kongoma leswaku “minkarhi hinkwayo” u n’wi khoma ku fana ni n’wana kumbe a wu n’wi yingiseli “nikatsongo.” Hi xikombiso, marito lama nge “Minkarhi hinkwayo u ndzi khoma ku fana ni n’wana!” ma nga ha vula leswaku, “Ndzi ehleketa leswaku a wu ndzi tshembi,” kasi lama nge “A wu ndzi yingiseli nikatsongo,” ma nga ha vula leswaku “Ndzi lava ku ku byela ndlela leyi ndzi titwaka ha yona hakunene.” Kutani tikarhatele ku ringeta ku twisisa leswi n’wana wa wena a ringetaka ku ku byela swona hi marito lawa a ma vulaka.