Matimba Ya Marito Lamanene

“Mbilu leyi nga ni ku vilela, yi phyuphyisiwa swinene hi marito lamanene!”—Swivuriso 12:25, Knox.

VAKRESTE na vona va langutana ni maxangu. Minkarhi yin’wana va va ni mivilelo hi mhaka ya leswi va hanyaka ‘eminkarhini leyi yo nonon’hwa ku hanya eka yona.’—2 Timotiya 3:1.

Loko u langutane ni maxangu yo tano, i nkateko lowukulu swinene loko u twa marito lamanene lama humaka eka munghana wo tshembeka! Bibele yi ri: “Munghana wa munhu wa ṅwi ranḍa hi masiku; i makwav̌o e makhombyeni.” (Swivuriso 17:17) Wanuna wo tshembeka Yobo a a tiviwa hi ku va munghana wa muxaka lowu. Hambi Elifasi u te eka yena: “Loko munhu a khunguvanyekile, a tsanile ni ku karhala, marito ya wena ma n’wi khutaza leswaku a yima.”—Yobo 4:4, Today’s English Version.

Hambi swi ri tano, loko Yobo hi yexe a lave xikhutazo, Elifasi ni vanakulobye a va vulanga marito lamanene. Va sole Yobo hikwalaho ka maxangu ya yena, va anakanya leswaku ku fanele ku ri ni xidyoho lexi a xi endleke exihundleni. (Yobo 4:8) The Interpreter’s Bible yi ri: “Leswi laviwaka hi Yobo i ntwela-vusiwana wa mbilu ya munhu. Leswi a swi kumaka i nongonoko wa swisandzu ni swisolo leswi ‘heleleke’ ni leswo saseka swa vukhongeri.” Yobo a a karhatekile swinene loko a twa marito ya Elifasi ni vanakulobye lerova u huwelele a ku: “Mi [ta] hlokohlisa moya wa mina, ni ku nḍi tikerisa hi marito ya ṅwina e ku yisa kwihi šana?”—Yobo 19:2.

Hi nga tshuki hi khomisa nandza-kulorhi wa Xikwembu gome hikwalaho ka marito ya hina ya vuhunguki, lama nga riki manene. (Ringanisa Deteronoma 24:15.) Xivuriso xa Bibele xa tsundzuxa: “Leswi u swi vulaka swi nga hlayisa vutomi kumbe swi byi herisa; kutani u fanele u amukela vuyelo bya marito ya wena.”—Swivuriso 18:21, TEV.

Tanihi leswi hi xiyaka matimba ya ririmi, a hi landzeleleni xikombiso xa muapostola Pawulo. Loko a ri eMakedoniya, u “khongoterile vamakwavo hi marito layo tala.”—Mintirho 20:2.