Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2023 Watch Tower Bible and Tract Society of Pennsylvania
JANUARY 1-7
LESWI HI SWI DYONDZAKA EBIBELENI | YOBO 32–33
Chavelela Lava Karhatiwaka Hi Ku Vilela
it-1-E 710
Elihu
Elihu a a nga ri na xihlawuhlawu, a a nga nyiki munhu xikhundlha lexi nga n’wi faneriki. A a swi tiva leswaku ku fana na Yobo, na yena a endliwe hi vumba ni leswaku Lowa matimba hinkwawo i Muvumbi. Elihu a a nga lavi ku chavisa Yobo kambe u vulavule na yena tanihi munghana wa ntiyiso, u n’wi vitane hi vito, ku nga leswi Elifazi, Bilidadi na Sofara va nga swi endlangiki.—Yobo 32:21, 22; 33:1, 6.
Xana U Teka Ku Tsana Ka Van’wana Hilaha Yehovha A Ku Tekaka Hakona?
8 Hi ta va ni ntwela-vusiwana swinene loko hi tsundzuka leswaku van’wana va vamakwerhu lava rhandzekaka va tsanile hikwalaho ko langutana ni swiyimo swo tika—ku nga vi ni rihanyo lerinene, ku tshama endyangwini lowu swirho swin’wana swa wona swi nga riki Timbhoni kumbe ku va ni ntshikilelo wa mianakanyo. Siku rin’wana na hina hi nga ha tikuma hi ri exiyin’weni lexi fanaka. Loko va nga si nghena eTikweni leri Tshembisiweke, Vaisrayele lava a va ri swisiwana naswona va tsanile etikweni ra Egipta, va tsundzuxiwile leswaku a va nga fanelanga va ‘nonon’hwisa timbilu ta vona’ eka vamakwavo lava xanisekaka. Yehovha a a langutele leswaku va teka swisiwana tanihi leswi faneleke swi pfuniwa.—Det. 15:7, 11; Lev. 25:35-38.
9 Ematshan’weni yo avanyisa van’wana kumbe ku va sola, hi fanele hi va chavelela hi tlhelo ra moya lava langutaneke ni swiyimo leswi nga tsakisiki. (Yobo 33:6, 7; Mat. 7:1) Hi xikombiso: Loko munhu la vavisekeke loyi a a famba hi xithuthuthu a fika exibedlhele, xana madokodela ni vaongori va heta nkarhi va ri karhi va burisana hi leswaku xana ku nga ha va ku ri yena la vangeke mhangu yoleyo? Doo, va namba va n’wi pfuna. Hilaha ku fanaka, loko mupfumeri-kulorhi a tsanile hikwalaho ka swiphiqo swa yena, nchumu wo sungula lowu hi faneleke hi wu endla ku fanele ku va ku n’wi pfuna hi tlhelo ra moya.—Hlaya 1 Vatesalonika 5:14.
10 Loko ho anakanyisisa hi xiyimo xa vamakwerhu, hi nga ha kuma leswaku a va tsananga nikatsongo. Anakanya hi vamakwerhu va xisati lava nga ni malembe yo tala va ri karhi va tiyisela ku kanetiwa hi vanuna va vona. Van’wana va nga ha vonaka va ri swisiwana naswona va tsanile, kambe xana a va kombisi ripfumelo lerikulu ni matimba ya moya? Loko u vona manana la nga yexe a ta eminhlanganweni nkarhi na nkarhi swin’we ni n’wana wakwe kumbe vana vakwe, xana ripfumelo ra yena ni ku tiyimisela ka yena a swi ku tsakisi? Naswona ku vuriwa yini hi vantshwa lava namarhelaka ntiyiso ku nga khathariseki nkucetelo wo biha wa le xikolweni? Ha swi xiya leswaku vanhu vo tano lava nga ha vonakaka va tsanile va nga ha va va ‘fuwile eripfumelweni’ ku fana ni lava nga exikarhi ka hina lava swilo swi va fambelaka kahle.—Yak. 2:5
Hi Wihi Nkarhi Lowunene Wa Ku Vulavula?
17 Wanuna wa vumune loyi a endzeleke Yobo, a ku ri Elihu xaka ra Abrahama. A a rhiye ndleve loko Yobo ni vavanuna lavan’wana vanharhu va ri karhi va vulavula. Leswi swi vonaka kahle eka ndlela ya rirhandzu leyi a tshinyeke Yobo ha yona leswaku a n’wi pfuna a lulamisa langutelo rakwe. (Yobo 33:1, 6, 17) Xa nkoka eka Elihu, a ku ri ku vangamisa Yehovha, ku nga ri yena n’wini kumbe munhu un’wana. (Yobo 32:21, 22; 37:23, 24) Eka Elihu hi dyondza leswaku ku ni nkarhi wa ku miyela ni nkarhi wo yingisela. (Yak. 1:19) Hi tlhela hi dyondza leswaku loko hi tshinya van’wana, xikongomelo xa hina ku fanele ku va ku vangamisa Yehovha, ku nga ri hina vini.
18 Loko hi yingisa xitsundzuxo xa Bibele loko swi ta emhakeni ya ku vulavula, hi kombisa leswaku hi xixima nyiko ya ku vulavula. Hosi yo tlhariha Solomoni u te: “Rito leri vuriweke hi nkarhi wa kona ri fana ni maapula ya nsuku exibyeni xa silivhere.” (Swiv. 25:11) Loko hi rhiya ndleve loko van’wana va vulavula hi tlhela hi ehleketa hi nga si vulavula, marito ya hina ma ta fana ni maapula wolawo ya nsuku, ma ta va lama akaka. Swi nga ri na mhaka leswaku hi rhandza ku vulavula kumbe a hi vulavuli ngopfu, leswi hi swi vulaka swi ta tiyisa van’wana naswona Yehovha u ta tinyungubyisa hi hina. (Swiv. 23:15; Efe. 4:29) Loko hi endla tano, hi kombisa leswaku ha yi tlangela swinene nyiko leyi, leyi humaka eka Xikwembu!
Endla Ndzavisiso
Tshama U Ri Karhi U Tshinela Eka Yehovha
10 Hilaha ku fanaka, swa fanela ku khathala hi ndlela leyi hi langutekaka ha yona. Kambe a hi fanelanga hi ringeta ku languteka hi ri vatsongo ku tlula malembe ya hina. Swikombiso swa ku kula swi nga va vumbhoni bya ku wupfa, xindzhuti ni vuxongi bya le ndzeni. Hi xikombiso, Bibele yi ri: “Misisi ya mpunga i harhi ya ku saseka loko yi kumeka endleleni ya ku lulama.” (Swiv. 16:31) Yehovha u hi languta hi ndlela yoleyo, naswona hi fanele hi ringeta ku tilanguta hilaha a hi langutaka hakona. (Hlaya 1 Petro 3:3, 4.) Hikwalaho, xana i vutlhari ku endla vuhandzuri kumbe ku amukela vutshunguri lebyi nga ni khombo, ntsena leswaku hi ta languteka hi sasekile swinene? “Ntsako wa Yehovha” i xihlovo xa ku saseka ka ntiyiso loku humaka endzeni, ku nga khathariseki leswaku hi ni malembe mangani kumbe hi ni rihanyo ra njhani. (Neh. 8:10) Hi le misaveni leyintshwa ntsena laha hi nga ta tlhela hi va ni rihanyo lerinene ni vuxongi bya le vuntshweni. (Yobo 33:25; Esa. 33:24) Ku kondza ku fika nkarhi wolowo, hi fanele hi hlawula hi ndlela ya vutlhari hi tlhela hi va ni ripfumelo eka switshembiso swa Yehovha, hikuva sweswo swi ta hi pfuna leswaku hi tiphina hi vutomi sweswi naswona hi nga karhateki ku tlula mpimo hi rihanyo ra hina.—1 Tim. 4:8.
JANUARY 8-14
LESWI HI SWI DYONDZAKA EBIBELENI | YOBO 34-35
Loko Swilo Swo Biha Swi Vonaka Onge Swi Endlekela Vanhu Lavanene Ntsena
Hi Tihi Timfanelo Ta Xikwembu?
Mikarhi hinkwayo Xikwembu xi endla swo lulama. Hikwalaho, “a swi ve ekule swinene ni Xikwembu xa ntiyiso leswaku xi endla hilaha ku hombolokeke, ni Lowa Matimba Hinkwawo ku endla hilaha ku nga lulamangiki!” (Yobo 34:10) Vuavanyisi bya yena byi lulamile, hilaha mupisalema a kombiseke ha kona, loko a vulavula hi Yehohva u te: “Wena u ta avanyisa vanhu hi vululami.” (Pisalema 67:4) “Yehovha, u vona leswi mbilu yi nga swona,” a hi nge n’wi kanganyisi hikuva mikarhi hinkwayo u kota ku vona ntiyiso naswona u avanyisa hi ndlela leyinene. (1 Samuwele 16:7) Ku tlula kwalaho, Xikwembu xi kota ku vona swiendlo hinkwaswo swa ku pfumala vululami ni vukanganyisi lebyi nga kona emisaveni, naswona xi tshembise leswaku “lavo homboloka . . . va ta dlayiwa emisaveni.”—Swivuriso 2:22
I Yini Leswi Nga Ta Herisiwa Loko Mfumo Wa Xikwembu Wu Ta?
5 Yehovha u ta endla yini? Sweswi Yehovha u nyika vanhu vo biha nkarhi wo hundzuka. (Esa. 55:7) Vanhu vo biha a va si avanyiseriwa makumu. I misava leyi, leyi se yi avanyiseriweke makumu. Kambe ku vuriwa yini hi vanhu lava alaka ku hundzuka, va ya emahlweni va endla swilo swo biha ku fikela hi nkarhi wa nhlomulo lowukulu? Yehovha u tshembise leswaku u ta herisa vanhu volavo vo biha. (Hlaya Pisalema 37:10.) Vanhu vo biha va nga ha anakanya leswaku sweswo a swi nge endleki. Vo tala va tumbeta swilo swo biha leswi va swi endlaka naswona minkarhi yo tala swi vonaka swi va fambela kahle. (Yb 21:7, 9) Kambe Bibele yi hi tsundzuxa yi ku: “Hikuva mahlo [ya Yehovha] ma le henhla ka tindlela ta munhu, naswona u vona mikondzo yakwe hinkwayo. Munyama ni ndzhuti lowukulu a swi kona leswaku lava va hanyaka hi swo biha va tumbela kona.” (Yb 34:21, 22) A hi nge swi koti ku tumbelela Yehovha Xikwembu. A nga kona munhu loyi a nga n’wi kanganyisaka naswona a ku na ndzhuti lowu dzwihaleke ngopfu kumbe goji leri enteke ngopfu leri nga n’wi sivelaka ku vona leswi endlekaka. Endzhaku ka Armagedoni, hi ta languta laha vanhu vo biha a va tshama kona, kambe a hi nge he va voni. Va ta va va nga ha ri kona!—Ps. 37:12-15.
U Nga Pfumeleli Nchumu Ni Wun’we Wu Ku Tshikisa Ku Landzela Yesu
19 Xana ninamuntlha vanhu va ha ri tano? Ina. Vo tala namuntlha va hi kaneta hileswi hi nga voyameriki etlhelo ro karhi ra tipolitiki. Va lava hi vhota hi nkarhi wa nhlawulo. Kambe ha swi tiva leswaku hi ku ya hi Yehovha, loko ho vhotela munhu wo karhi leswaku a va murhangeri wa hina, hi ta va hi bakanya vuhosi bya Yena. (1 Sam. 8:4-7) Van’wana va vula leswaku a hi fanele hi aka swikolo ni swibedlhele ni ku endla swin’wana leswi nga ta pfuna vaakatiko. Leswi hi swona leswi endlaka va hi kaneta hikuva ntirho wa hina lowukulu i ku chumayela, ku nga ri ku tlhantlha swiphiqo leswi vanhu va nga na swona.
20 I yini lexi nga hi pfunaka leswaku hi nga tlangi hi nkarhi? (Hlaya Matewu 7:21-23.) Hi fanele hi teka ntirho lowu Yesu a hi nyikeke wona wu ri wa nkoka ku tlula swilo hinkwaswo. (Mat. 28:19, 20) Hi nga tlangi hi nkarhi hi ku ehleketa hi ndlela yo tlhantlha swiphiqo ni ku lulamisa xiyimo xa tipolitiki xa misava leyi. Ntiyiso wa mhaka hileswaku hi rhandza vanhu naswona ha khathala hi swiphiqo leswi va nga na swona kambe ndlela ya nkoka swinene leyi hi nga va pfunaka hayona, i ku va dyondzisa hi Mfumo wa Xikwembu ni ku va pfuna va va ni vuxaka na Yehovha.
Endla Ndzavisiso
Onge Ku Tinyiketela Ka N’wina Ko Tirha Hi Ku Tirhandzela Ku Nga Yisa Ku Dzuneka Eka Yehovha!
3 Yehovha a nga n’wi tshinyanga Elihu leswi a vutiseke a ku: “Loko u lulamile hakunene, u xi nyika yini [Xikwembu], kumbe xi amukela yini leswi humaka evokweni ra wena?” (Yb 35:7) Xana Elihu a vula leswaku matshalatshala lawa hi ma endlaka leswaku hi tirhela Xikwembu a ma pfuni nchumu? Doo! A a vula leswaku Yehovha a nga titsheganga hi ndlela leyi hi n’wi gandzelaka ha yona. Yehovha a nga pfumali nchumu. A hi nge swi koti ku n’wi nyika rifuwo kumbe matimba. Ku ri na sweswo, tinyiko tin’wana ni tin’wana letinene leti hi nga na tona ti huma eka Xikwembu naswona xa khathala hi ndlela leyi hi ti tirhisaka ha yona.
JANUARY 15-21
LESWI HI SWI DYONDZAKA EBIBELENI | YOBO 36–37
Xivangelo Xo Va U Tshemba Xitshembiso Xa Xikwembu Xa Vutomi Lebyi Nga Heriki
Xana Hi Nga Swi Kota Ku Va Vanghana Va Xikwembu?
XIKWEMBU A XI NA MASUNGULO NI MAKUMU: Bibele yi dyondzisa leswaku Xikwembu xi ve kona “enkarhini lowu nga riki ni makumu ku ya enkarhini lowu nga riki na makumu.” (Pisalema 90:2) Hi marito man’wana, Xikwembu a xi na masungulo naswona a xi nge vi na makumu. Hi ku ya hi vanhu, “malembe ya xona ma tele, a ma lavisiseki.”—Yobo 36:26.
Ndlela leyi swi ku pfunaka ha yona: Xikwembu xi ku tshembisa vutomi lebyi nga heriki, loko u dyondza ku xi tiva. (Yohane 17:3) Xana xitshembiso lexi a xi ta hetiseka loko ku ri leswaku Xikwembu a xi ta hanya nkarhinyana? I “Hosi leyi nga riki na makumu” leyi nga kotaka ku hetisisa xitshembiso xexo.—1 Timotiya 1:17.
Xana Wa Ti Tlangela Tinyiko Leti Xikwembu Xi Hi Nyikeke Tona?
6 Mati i swi halaki leswi kumekaka laha misaveni hikuva pulanete ya hina yi vekiwe eka mpfhuka lowu faneleke ku suka edyambyini. Loko misava a yi lo tshinela katsongo edyambyini, mati a ma ta va ma vile khale ivi misava yi sala yi ri ribye ro hisa leri nga riki na vutomi. Loko a yo va ekulenyana ni dyambu, mati hinkwawo a ma ta tiya ivi misava yi hundzuka ayisi leyikulu ya xirhendzevutana. Leswi Yehovha a vekeke misava endhawini leyi faneleke, ndzhendzheleko wa mati wu endla leswaku ku va ni vutomi emisaveni. Dyambu ri vavula mati lama nga elwandle ni le henhla ka rivala kutani ma humesa nkahelo lowu endlaka mapapa. Lembe ni lembe, dyambu ri virisa mati ya kwalomu ka 500 000 wa tikhubiki ta tikhilomitara leswaku ma hundzuka mapapa. Mati lawa ma tshama kwalomu ka khume wa masiku ma nga si wa tanihi mpfula kumbe gamboko. Eku heteleleni, mati ma tlhelela elwandle kumbe eswinambyanini kutani ku tlhela ku endleka leswi fanaka nakambe. Ndzhendzheleko lowu wa mati lowu endlaka hi kuma vutomi, wu kombisa leswaku Yehovha u tlharihile naswona u ni matimba.—Yb 36:27, 28; Ekl. 1:7.
Tshama U Ri Ni Ntshembo Lowu Tiyeke Tanihi Mukreste
16 Ntshembo lowu hi nga na wona wo hanya hilaha ku nga heriki i nyiko ya risima leyi humaka eka Xikwembu. Hi wu languterile nkarhi wolowo wo tsakisa lowu hi nga tiyisekaka leswaku wu ta fika. Ntshembo wa hina wu fana ni nsoma, lowu hi tiyisaka leswaku hi kota ku tiyisela miringo, ku xanisiwa hambi ku ri rifu. Wu fana ni xihuku, lexi sirhelelaka miehleketo ya hina leswaku hi papalata swilo swo biha ivi hi namarhela leswinene. Ntshembo wa hina lowu humaka eBibeleni, wu endla leswaku hi tshinela eka Xikwembu naswona wu kombisa ndlela leyi xi hi rhandzaka hayona. Ha vuyeriwa swinene loko hi tshama hi ri ni ntshembo lowu tiyeke.
Endla Ndzavisiso
it-1-E 492
Ku Vulavurisana
Marungula ni mavonelo a swi fambisiwa swi suka eka munhu un’wana swi ya eka un’wana hi tindlela to hambanahambana ematikweni ya khale ya le Bibeleni. Mikarhi yin’wana mahungu lama tolovelekeke ya le mugangeni ni ya le matikweni man’wana vanhu a va ma kuma hi ku va va vulavurisana hi ku kongoma. (2 Sam. 3:17, 19; Yb 37:20) Vanhu lava a va tala ku teka maendzo hi tikharavhani a va kuma mahungu etindhawini ta le kule loko va yima leswaku va kuma swakudya, mati ni swin’wana leswi nga kona emadorobeni kumbe eswitichini swa tikharavhani. Eka xikhundlha xo hlawuleka xa vuxaka lebyi Asia, Afrika na Yuropa, tikharavhani a ti tsemakanya hi le tikweni ra le Palestine tiya ematikweni ya le kule ti tlhela ti vuya hikona. Hikwalaho vanhu lava a va tshama ematikweni lawa a va kota ku kuma mahungu ya swiendlakalo swa nkoka swa le matikweni man’wana. Mahungu ya le tikweni ra vona ni ya le matikweni man’wana hi xitalo a va ma kuma edorobeni etindhawini ta vuxaviselo.
JANUARY 22-28
LESWI HI SWI DYONDZAKA EBIBELENI | YOBO 38–39
Xana Wa Tinyika Nkarhi Wo Kambisisa Ntumbuluko?
Xana U Ta Tshama U Rindzele Yehovha?
7 Loko Bibele yi hlamusela ndlela leyi Yehovha a tumbuluxeke misava hayona, yi boxa ndlela leyi ‘yi pimiweke’ hayona, nileswaku ‘tiphuphu ta yona ti dzimiwe’ njhani ni ku vekiwa ka “ribye ra yona ra le khonweni.” (Yb 38:5, 6) U tlhele a tinyika nkarhi wo langutisa ntirho wakwe. (Gen. 1:10, 12) Ehleketa ndlela leyi tintsumi ti titweke hayona loko ti vona swilo hinkwaswo leswi Yehovha a swi tumbuluxeke. Swi tikomba onge a ti tsake ngopfu! Hikuva ti ‘sungule ku huwelela ti dzunisa.’ (Yb 38:7) Hi dyondza yini? Swi teke malembe ya magidi leswaku Yehovha a heta mitirho yakwe, endzhaku u yi kambele hinkwayo kutani a vula leswaku yi “saseke ngopfu.”—Gen. 1:31.
Ku Pfuxiwa Ka Vafi Ku Kombisa Leswaku Xikwembu Xa Hi Rhandza, Xi Tlharihile Naswona Xi Lehisa Mbilu
2 Yehovha u sungule hi ku tivumbela mutirhikulobye. Endzhaku, u tirhise N’wana wa yena ku tumbuluxa “swilo leswin’wana hinkwaswo,” ku katsa ni tintsumi ta ntsandzavahlayi. (Kol. 1:16) Yesu u swi tsakerile swinene ku tirha swin’we ni Tata wa yena. (Swiv. 8:30) Tintsumi na tona a ti tsakile. A ti ri kona loko Yehovha ni mutirhikulobye Yesu, va tumbuluxa tilo ni misava. Xana ti angule njhani? Ti sungule ku ‘huwelela ti dzunisa’ loko ku tumbuluxiwa misava, a swi kanakanisi leswaku loko Yehovha a tumbuluxa swilo leswin’wana hinkwaswo ku katsa ni vanhu, ti ye emahlweni ti dzunisa. (Yb 38:7; Swiv. 8:31) Ntumbuluko hinkwawo wu kombisa rirhandzu ra Yehovha ni vutlhari byakwe.—Ps. 104:24; Rhom. 1:20.
Dyondza Swo Tala Hi Yehovha Eka Ntumbuluko Wakwe
8 Hi nga n’wi tshemba Yehovha. Yehovha u pfune Yobo leswaku a ya emahlweni a N’wi tshemba. (Yb 32:2; 40:6-8) Loko Yehovha a vulavula na Yobo, u n’wi byele hi swilo swo tala hi ntumbuluko ku katsa tinyeleti, mapapa ni ndlati. Yehovha u tlhele a vulavula hi swiharhi swo fana ni nkuzi ya nhova ni hanci. (Yb 38:32-35; 39:9, 19, 20) Hinkwaswo leswi swi kombise matimba ya Xikwembu yo hlamarisa, rirhandzu ni vutlhari bya xona lebyikulu. Hikwalaho ka bulo leri, Yobo u ye emahlweni a tshemba Yehovha ku tlula eku sunguleni. (Yb 42:1-6) Hilaha ku fanaka, loko hi dyondza hi ntumbuluko, hi tsundzuxiwa leswaku vutlhari bya Yehovha byi navile swinene nileswaku u ni matimba lamakulu ku hi tlula. Yehovha a nga yi herisa miringo ya hina hinkwayo naswona u ta endla tano. Sweswo swi endla leswaku hi ya hi n’wi tshemba.
Endla Ndzavisiso
it-2-E 222
Munyiki Wa Nawu
Yehovha Tanihi Munyiki Wa Nawu. Entiyisweni Yehovha hi yena ntsena munyiki wa nawu emisaveni hinkwayo. Hi yena a endleke milawu yo lawula ntumbuluko lowu nga hanyiki (Yb 38:4-38; Ps 104:5-19) ni vutomi bya swiharhi. (Yb 39:1-30) Tanihi leswi Yehovha a tumbuluxeke munhu, munhu na yena wa katseka eka milawu ya Yehovha ya ntumbuluko hikuva wa swi kota ku hambanisa leswinene ni leswi nga riki swinene, u kota ku tiendlela swiboho, ku tiehleketelela ni ku va ni vuxaka ni Xikwembu hiyona mhaka u boheka ku yingisa milawu ya Xikwembu ya mahanyelo. (Rhm 12:1; 1Ko 2:14-16) Ku engetela kwalaho, nawu wa Yehovha wu khumba ni swivumbiwa swa moya ku nga tintsumi.—Ps 103:20; 2Pe 2:4, 11.
Milawu ya Yehovha ya ntumbuluko a yi cinci. (Yr 33:20, 21) Eka swilo hinkwaswo leswi hi kotaka ku swi vona emisaveni ni le matilweni milawu ya Yehovha a yi cinci, eka tindhawu leti van’wasayense va nga ni vutivi bya milawu leyi, va nga swi kota ku tiva leswaku n’weti wu suka nkarhi wo tanihi kwihi laha wu nga kona wu ya eka ndhawu yin’wana ku katsa ni tipulanete ni swilo swin’wana swa le mpfhukeni hi xinkarhana xitsongo naswona hi ndlela leyi nga cinciki. Loyi a endlaka leswi hambaneke ni milawu ya ntumbuluko u kuma vuyelo bya swiendlo swa yena. Hilaha ku fanaka, milawu ya Xikwembu ya Mahanyelo a yi hundzuki naswona a swi koteki leswaku u yi tlula kumbe u yi tshova kambe u nga xupuriwi. Yi tirha ku fana ni milawu ya Xona ya ntumbuluko, hambileswi vuyelo bya kona byi nga vonakiki hi nkarhi wolowo. “Xikwembu a xi vungunyiwi. Hikuva xin’wana ni xin’wana lexi munhu a xi byalaka, u ta tlhela a tshovela xona.”—Gal. 6:7; 1 Tim. 5:24
JANUARY 29–FEBRUARY 4
LESWI HI SWI DYONDZAKA EBIBELENI | YOBO 40–42
Leswi Hi Nga Swi Dyondzaka Eka Leswi Endlekeleke Yobo
“I Mani Loyi A Tivaka Mianakanyo Ya Yehovha?”
4 Loko hi ri karhi hi anakanyisisa hi mintirho ya Yehovha, hi fanele hi papalata mboyamelo wa ku avanyisa Xikwembu hi ku ya hi milawu ya vanhu. Mboyamelo lowu ku vulavuriwa ha wona eka marito ya Yehovha lama kumekaka eka Pisalema 50:21, lama nge: “A wu anakanya leswaku kunene ndzi ta fana na wena.” Swi hilaha mutivi un’wana wa Bibele a vuleke hakona malembe yo tlula 175 lama hundzeke a ku: “Vanhu va tala ku avanyisa Xikwembu hi ku ya hi milawu ya vona va tlhela va anakanya leswaku Xikwembu xi lawuriwa hi milawu leyi va anakanyaka leswaku vanhu va fanele va yi landzela.”
5 A hi fanelanga hi pfumelela ndlela leyi hi tekaka Yehovha ha yona leswaku yi lawuriwa hi milawu ni ku navela ka hina. Ha yini leswi swi ri swa nkoka? Loko hi ri karhi hi dyondza Matsalwa, swiendlo swin’wana swa Yehovha swi nga ha tikomba swi nga ri swinene hi ku ya hi langutelo ra hina leri tsaneke, leri nga hetisekangiki. Vaisrayele va khale va tshame va anakanya hi ndlela yoleyo kutani va endla xiboho lexi hoxeke malunghana ni ndlela leyi Yehovha a a tirhisana na vona ha yona. Xiya leswi Yehovha a va byeleke swona: “N’wina mi ta vula mi ku: ‘Ndlela ya Yehovha a yi lulamisekanga kahle.’ Ndzi kombela mi yingisa, N’wina yindlu ya Israyele. Xana ndlela ya mina a yi lulamisiwanga kahle? Xana tindlela ta n’wina a hi tona leti nga lulamisekangiki kahle?”—Ezek. 18:25.
6 Nchumu lowu nga hi pfunaka leswaku hi papalata ku avanyisa Yehovha hi milawu ya hina i ku xiya leswaku langutelo ra hina ri tsanile naswona minkarhi yin’wana ri hoxe swinene. Yobo a a fanele a dyondza dyondzo leyi. Loko Yobo a ri karhi a kayakayisiwa hi maxangu, u ve ni gome naswona u sungule ku anakanya hi xiyimo xa yena ntsena. U tshike ku anakanya hi timhaka ta nkoka swinene leti a ti fambisana ni maxangu yakwe. Kambe Yehovha u n’wi pfunile leswaku a antswisa langutelo ra yena. Yehovha u kandziyise leswaku ku twisisa ka Yobo a ku tsanile hi ku n’wi vutisa swivutiso swo tlula 70, leswi Yobo a tsandzekeke ku hlamula ni xin’we xa swona. Endzhaku ka sweswo, Yobo u titsongahatile a lulamisa langutelo ra yena.—Hlaya Yb 42:1-6
Ku Seketela Vuhosi Bya Yehovha A Ku Ve Nchumu Wa Nkoka eVuton’wini Bya Wena
12 Xana ku va Yehovha a tshinye Yobo endzhaku ka maxangu lawa a langutaneke na wona, a swi vula leswaku a nga n’wi tweli vusiwana? A swi tano naswona Yobo a nga anakanyi tano. Ku nga khathariseki maxangu yakwe, Yobo u cince langutelo rakwe. U tlhele a ku: “Ndzi tlhentlhela endzhaku, ndza hundzuka entshurini ni le nkumeni.” U vule sweswo hikwalaho ka leswi Yehovha a n’wi tshinyeke hi ku kongoma naswona hi ndlela leyi khutazaka. (Yb 42:1-6) Emahlweni ka kwalaho, Elihu loyi a ha ri muntshwa u tshinye Yobo. (Yb 32:5-10) Endzhaku ka loko Yobo a yingise ndzayo ya Xikwembu ivi a lulamisa langutelo rakwe, Yehovha u vule leswaku wa tsaka hileswi Yobo a tshameke a tshembekile eka yena hambiloko a langutane ni maxangu.—Yb 42:7, 8.
“Tshemba Yehovha”
17 Yobo i un’wana wa malandza ya Yehovha loyi a kombiseke xivindzi loko a ri emiringweni leyikulu. Eka papila leri muapostola Pawulo a ri tsaleleke Vaheveru, u vule leswaku van’wana i xiphemu xa “papa lerikulu swinene ra timbhoni.” (Hev. 12:1) Hinkwavo va weriwe hi miringo leyikulu; kambe va tshame va tshembekile eka Yehovha. (Hev. 11:36-40) Xana ku tiyisela ka vona ni ku tirha hi matimba swi ve nyuku wa mbyana? Nikatsongo! Hambileswi va feke va nga swi vonanga switshembiso swa Xikwembu swi endleka, va ye emahlweni va tshemba Yehovha. Leswi a va tiyiseka leswaku Yehovha wa va amukela, a va tshemba leswaku va ta swi vona switshembiso swakwe swi endleka. (Hev. 11:4, 5) Xikombiso xa vona xi nga hi tiyisa leswaku hi nga tshiki ku tshemba Yehovha.
18 Namuntlha hi hanya emisaveni leyi nyanyaka ku biha. (2 Tim. 3:13) Sathana u ya emahlweni a ringa vanhu va Xikwembu. Hambi hi langutana na yini enkarhini lowu taka, onge hi nga tiyimisela ku tirhela Yehovha hi matimba hi tiyiseka leswaku “hi tshemba Xikwembu lexi hanyaka.” (1 Tim. 4:10) Tsundzuka leswi Xikwembu xi nga n’wi endlela swona Yobo ku kombisa “leswaku Yehovha u ni ntwelavusiwana lowukulu ni tintswalo.” (Yak. 5:11) Na hina a hi tshameni hi tshembekile eka Yehovha hi tshemba leswaku u ta katekisa “lava [n’wi] lavaka hi mbilu hinkwayo.”—Hlaya Vaheveru 11:6.
Endla Ndzavisiso
it-2-E 808
Ku Hlekuriwa
Yobo a a ri wanuna wo lulama loyi a tshameke a tshembekile hambileswi a hlekuriwa. Kambe u sungule ku va ni vonela leri hoxeke kutani u endle xihoxo lexi a nga tlhela a lulamisiwa eka xona. Elihu u vule leswi hi yena: I mani la fanaka na Yobo, La nwaka ku sandziwa ku fana niloko a nwa mati? (Yb 34:7) Yobo u karhateke ngopfu hi vululami byakwe ku tlula bya Xikwembu naswona u endle swi vonaka onge ku lulama kakwe i ka nkoka ku tlula vululami bya Xikwembu. (Yb 35:2; 36:24) Loko a ri karhi a hlekuriwa hi ndlela leyikulu hi “vanghana” vakwe vanharhu, Yobo a a teka ku hlekuriwa koloko tanihi loko ku kongomisiwa eka yena ku nga ri eka Xikwembu. Hi ndlela yoleyo a fana ni munhu loyi a tinyikelaka eka ku sandziwa, ku hlekuriwa naswona a tlhela a tsaka hiswona a swi teka onge hiloko a ri eku tiphineni hi ku nwa mati. Endzhakunyana Xikwembu xi byele Yobo leswaku a ku ri ro hetelela vahlekuri lava va vulavula mavunwa hi Xona. (Yb 42:7) Hilaha ku fanaka, Yehovha u byele muprofeta Samuwele loko Vaisrayele va lava hosi a ku: “A va bakanyanga wena, kambe va bakanye mina tanihi hosi ya vona.” (1 Sam. 8:7) Nakambe Yesu u byele vadyondzisiwa vakwe a ku: “Mi ta vengiwa hi matiko hinkwawo hikwalaho ka vito ra mina.” (Mat. 24:9) Loko Mukreste a tshama a tsundzuka leswi swi ta n’wi pfuna leswaku a tiyisela ku hlekuriwa hi moya wa kahle naswona swi ta endla leswaku a kuma mikateko hikwalaho ka ku tiyisela kakwe. —Lk 6:22, 23.
FEBRUARY 5-11
LESWI HI SWI DYONDZAKA EBIBELENI | PISALEMA 1–4
Yima Ni Mfumo Wa Xikwembu
“Ndzi Ta Ninginisa Matiko Hinkwawo”
8 Xana vanhu va angule njhani eka mahungu lawa a va chumayeriwa wona? Vo tala a va nga lavi ku twa nchumu ha wona. (Hlaya Pisalema 2:1-3.) Matiko yo tala ma dye makala. Ma bave ma khalakhasa lerova a ma nga lavi ku amukela Mufumi loyi a hlawuriweke hi Yehovha. A ma pfumeli leswaku mahungu lawa hi ma chumayelaka wona ya Mfumo i “mahungu lamanene.” Hambi ku ri mifumo yin’wana yi kale yi yirisa ntirho wa hina wo chumayela! Hambileswi vafumi vo tala va vulaka leswaku va gandzela Xikwembu, a va swi lavi ku tshika vulawuri bya vona. Hilaha vafumi va le nkarhini wa Yesu va endleke hakona, vafumi namuntlha na vona va lwisana ni Muhlawuriwa wa Yehovha hi ku hlasela malandza yakwe yo tshembeka.—Mit. 4:25-28.
U Nga Katseki Eka Tipolitiki Ni Le Ka Tinyimpi eMisaveni Leyi Nga Riki Na Vun’we
11 Rifuwo. Loko mali ni swilo leswi hi nga na swona swi ri swa nkoka swinene eka hina, swi nga hi tikela ku tshama hi nga katseki eka tipolitiki. Endzhaku ka 1970 Timbhoni to tala eMalawi a ti fanele ti lahlekeriwa hi swilo hinkwaswo leswi ti nga na swona hi leswi ti aleke ku joyina ntlawa wo karhi wa politiki. Lexi twisaka ku vava van’wana va arile ku lahlekeriwa hi rifuwo ra vona. Makwerhu un’wana wa xisati la vuriwaka Ruth u ri: “Van’wana va fambe na hina loko hi ya tumbela, kambe endzhaku va joyine ntlawa wa politiki kutani va tlhelela emakaya ya vona hileswi a va nga lavi ku lahlekeriwa hi rifuwo ra vona.” Kambe vanhu vo tala va Xikwembu a va tano. A va katseki eka tipolitiki, hambileswi ku endla tano swi nga endlaka leswaku va kuma swimalana kumbe va lahlekeriwa hi swilo hinkwaswo.—Hev. 10:34.
Endla Ndzavisiso
it-1-E 425
Muhungu
Xiphambati lexitsongo lexi sirhelelaka timbewu ta maxalani ni koroni. Hambileswi muhungu eBibeleni wu tirhisiwaka hi ndlela yo fanekisela, wu hambanisa swiendlo swo biha eka leswinene leswi a swi tolovelekile emikarhini ya ku tsariwa ka Bibele. Endzhaku ka ku tshovela, swiphambati leswi a swi funengete mbewu leyi nga ya nkoka a swi nga ha pfuni nchumu naswona hi ndlela yoleyo a swi fanekisela nchumu lowu nga riki na ntikelo, lowu nga pfuniki nchumu nakambe lowu nga tsakeriwiki hi munhu naswona a swi hambanisiwa ni leswinene leswaku swi cukumetiwa.
Xo sungula, ku hambanisiwa muhungu lowu nga lavekiki eka mbewu. Kutani loko ku peperhiwa, swiphemu swa muhungu leswi nga lavekiki swa haha emoyeni ku fana ni ritshuri. (Vona KU PEPERHA.) Leswi swi kombisa kahle ndlela leyi Yehovha a susaka vagwinehi exikarhi ka vanhu vakwe a tlhela a susa vanhu vo homboloka ni matiko lama n’wi kanetaka. (Yb 21:18; Ps 1:4; 35:5; Esa 17:13; 29:5; 41:15; Hos 13:3) Mfumo wa Xikwembu wu ta pfotlosa valala va wona va va swiphemu leswi ntsongo leswi nga ta peperhiwa swi haha hi ku olova ku fana ni muhungu. —Dan. 2:35.
Muhungu lowu nga pfuniki nchumu mikarhi yo tala a wu hlengeletiwa kutani wu hisiwa leswaku wu nga hahi wu tlhela wu ya thyakisa mbewu. Hilaha ku fanaka, Yohane mukhuvuri u profete hi ndzilo lowu taka wa ku herisa vanhu vo homboloka lava hisekelaka vukhongeri bya mavunwa —Mugayi, Yesu Kreste, u ta hlengeleta koroni “ kambe muhungu u ta wu hisa hi ndzilo lowu nga timekiki.”—Mt 3:7-12; Lk 3:17; vona KU GAYA.
FEBRUARY 12-18
LESWI HI SWI DYONDZAKA EBIBELENI | PISALEMA 5–7
Tshama U Tshembekile Hambiloko Van’wana Va Nga Tshembeki
Ndlela Leyi Matsalwa Ma Hi Tiyisaka Hayona
7 Xana u tshame u twisiwa ku vava hi munghana kumbe xaka? Loko swi ri tano, ku dyondza hi leswi Hosi Davhida a swi endleke loko n’wana wakwe Absalomu a n’wi xenga hi xikongomelo xo lava ku n’wi tekela vuhosi, swi ta ku pfuna.—2 Sam. 15:5-14, 31; 18:6-14.
8(1) Khongela. Loko munhu un’wana a ku twise ku vava, khongela u byela Yehovha ndlela leyi u titwaka hayona. (Ps. 6:6-9) N’wi byele hi ku kongoma leswi munhu wa kona a ku endleke swona. U tlhela u n’wi kombela a ku pfuna u kuma tsalwa leri nga ku pfunaka u teka xiboho lexinene.
Tiyiseka Leswaku U Kume Ntiyiso
3 Ripfumelo ra hina a ri fanelanga ri titshega ntsena hi ku rhandza vanhu va Xikwembu. Hikwalahokayini? A hi nge makwerhu wo karhi, ku nga ha va nkulu kumbe phayona, u endle xidyoho lexikulu, xana u ta endla yini? Ku vuriwa yini loko makwerhu wo karhi a ku twise ku vava? Kumbe makwerhu un’wana a hundzuka mugwinehi? Xana loko sweswo swo endleka, u ta khunguvanyeka kutani u tshika ku tirhela Yehovha? Mhaka hi leyi: Loko wo aka ripfumelo ra wena eka Xikwembu hi ku vona leswi van’wana va swi endlaka, ku nga ri hikwalaho leswi u nga ni vuxaka na Yehovha, ripfumelo ra wena ri ta tsekatseka. Ripfumelo ra wena a ri fanelanga ri titshega hi ku rhandza vanhu van’wana kambe ri fanele ri titshega hi swilo leswi u swi dyondzaka hi Yehovha. U fanele u khorwiseka leswaku leswi Bibele yi swi dyondzisaka hi Yehovha i ntiyiso.—Rhom. 12:2.
4 Yesu u vule leswaku van’wana a va ta amukela ntiyiso hi “ntsako” kambe ripfumelo ra vona a ri ta tsana loko va ringiwa. (Hlaya Matewu 13:3-6, 20, 21.) Swi nga endleka a va nga swi tivi leswaku loko va landzela Yesu, va ta langutana ni mitlhontlho. (Mat. 16:24) Kumbexana a va ehleketa leswaku ku va Mukreste swi vula ku hanya bya ka byandlana, va to kuma mikateko handle ko langutana ni mitlhontlho. Kambe emisaveni leyi, mitlhontlho yi lo vuya! Swiyimo swi nga cinca nkarhi wun’wana ni wun’wana kutani swi hi tekela ntsako wa hina.—Ps. 6:6; Ekl. 9:11.
Endla Ndzavisiso
it-1-E 995
Sirha
Eka Varhoma 3:13 muapostola Pawulo u tshaha Pisalema 5:9 hi ku vula leswaku “sirha leri ahlameke” ri fana ni nkolo wa lavo homboloka ni lava kanganyisaka. Tanihi leswi sirha leri ahlameke ri faneleke ri tala hi vafi ni vukanganyisi, nkolo wa vona wa pfuleka leswaku wu humesa marito lama dlayaka ni lama kanganyisaka.—Mat. 15:18-20.
FEBRUARY 19-25
LESWI HI SWI DYONDZAKA EBIBELENI | PISALEMA 8–10
“Yehovha, Ndzi Ta Ku Dzunisa”!
Tlangela Ku Va eNdyangwini Wa Yehovha
6 Yehovha u hi endlele kaya ro xonga. Loko a nga si vumba munhu wo sungula, Yehovha u rhange hi ku tumbuluxa misava. (Yb 38:4-6; Yer. 10:12) Leswi a nga ni musa ni malwandla, u hi nyike swilo swo tala leswinene leswaku hi tiphina hi swona. (Ps. 104:14, 15, 24) Nakambe u tinyike nkarhi wo languta swilo hinkwaswo leswi a swi tumbuluxeke kutani a “vona leswaku swi sasekile.” (Gen. 1:10, 12, 31) U kombise vanhu leswaku i va nkoka hi ku va nyika “matimba yo fuma” swilo hinkwaswo leswi a swi tumbuluxeke emisaveni. (Ps. 8:6) Xikwembu xi lava leswaku enkarhini lowu taka vanhu lava nga riki na xidyoho va tiphina hi ku khathalela ntumbuluko wa xona wo saseka hilaha ku nga heriki. Xana nkarhi ni nkarhi wa n’wi khensa Yehovha hi xitshembiso xolexo xo tsakisa?
Xana Wa Ti Tlangela Tinyiko Leti Xikwembu Xi Hi Nyikeke Tona?
10 Ndlela yin’wana leyi hi nga swi kombisaka hayona leswaku ha yi tlangela nyiko yo vulavula, i ku byela van’wana hi ripfumelo ra hina eka Xikwembu lava lavaka ku tiva xivangelo xo va hi nga pfumeli eka dyondzo ya ku tiendlekela ka swilo. (Ps. 9:1; 1 Pet. 3:15) Lava pfumelaka eka dyondzo leyi, va nga ringeta ku hi kanganyisa hi tshemba leswaku misava ni swilo leswi nga eka yona swi lo tiendlekela. Bibele ni tinhla tin’wana leti hi buleke hatona eka nhlokomhaka leyi, ti ta hi pfuna hi kota ku yimela Tata wa hina wa le tilweni ni ku hlamusela van’wana xivangelo lexi endlaka hi tiyiseka leswaku Yehovha i Muvumbi wa tilo ni misava.—Ps. 102:25; Esa. 40:25, 26.
Xana U ‘Xikombiso Lexinene Eku Vulavuleni’?
13 Yimbelela hi mbilu hinkwayo. Loko hi yimbelela tinsimu ta Mfumo, xikulu i ku va hi dzunisa Yehovha. Makwerhu wa xisati loyi a vuriwaka Sara u titeka a ri munhu loyi a nga swi kotiki ku yimbelela. Kambe wa swi lava ku dzunisa Yehovha hi ku yimbelela. Hikwalaho, ku praktisa tinsimu leti nga ta yimbeleriwa loko a ri ekaya swa n’wi pfuna tanihi laha swi n’wi pfunaka hakona loko a lunghiselela tinhlengeletano ta vandlha. Loko a ri karhi a praktisa u ringeta ku vona ndlela leyi marito ya risimu ma fambisanaka hayona ni nhlokomhaka leyi ku dyondziwaka hayona. U ri: “Sweswo swi ndzi pfuna ndzi nga karhateki ngopfu hi ma yimbelelelo ya mina kambe ndzi languta marito ya risimu.”
Endla Ndzavisiso
it-1-E 832
Rintiho
Hi ndlela yo fanekisela, ku vuriwa leswaku Xikwembu xi hetisisa mitirho ya xona hi “tintiho”, yo tanihi ku tsala Milawu ya Khume eka swiphepherhele swa maribye (Eks. 31:18; Det. 9:10), ku endla masingita (Eks. 8:18, 19) ni ku tumbuluxa matilo (Ps. 8:3). “Tintiho” teto ta Xikwembu leti tirheke eka ntirho wo tumbuluxa ti fambisana ni moya wa xona lowo kwetsima kumbe matimba lama tirhaka lama boxiweke eka rungula ra ku tumbuluxiwa ka swilo leri kumekaka eka buku ya Genesa, laha yi vuleke leswaku matimba ya Xikwembu lama tirhaka (ruʹach “moya”) a ma hunga ehenhla ka mati. (Gen. 1:2) Hambiswiritano, matsalwa ya Vukreste ya xigriki ma hi pfuna hi xi twisisa kahle xifaniso lexi tirhisiweke, hi xikombiso rungula ra Matewu ri hlamusela leswaku Yesu u hlongole madimona hi “moya wa Xikwembu” naswona Luka u hi byele leswaku a ku ri “ritiho ra Xikwembu.”—Mat 12:28; Luka 11:20, Bibele Ya Mahungu Lamanene.
FEBRUARY 26–MARCH 3
LESWI HI SWI DYONDZAKA EBIBELENI | PISALEMA 11–15
Tivone U Ri eMisaveni Leyintshwa Ya Xikwembu Leyi Nga Ni Ku Rhula
Tinhla-nkulu Ta Buku Yo Sungula Ya Tipisalema
11:3—I masungulo wahi lama hirimuxiwaka? Lawa i masungulo lawa vanhu va titshegaka ha wona—ku nga nawu, xileriso ni vululami. Loko ma nga hlelekanga, ku va ni mpfilumpfilu naswona vululami a byi vi kona. Ehansi ka swiyimo swo tano, “un’wana ni un’wana la lulameke” u fanele a tshemba Xikwembu hi ku helela.—Ps 11:4-7.
Xana Madzolonga Ma Ta Hela?
Bibele yi tshembisa leswaku Xikwembu ku nga ri khale xi ta herisa madzolonga emisaveni. Madzolonga lama tateke misava namuntlha ma ta herisiwa hi “siku ra [Xikwembu ra] vuavanyisi ni ra ndzoviso wa vanhu lava va nga xiximiki Xikwembu.” (2Pe 3:5-7)Ku nge he vi ni vanhu va madzolonga lava nga ta xanisa van’wana. Hi nga tiyiseka njhani leswaku Xikwembu xi lava ku herisa madzolonga?
Bibele yi vula leswaku Xikwembu xa “n’wi venga un’wana ni un’wana la rhandzaka madzolonga.” (Ps 11:5) Muvumbi u rhandza ku rhula ni vululami. (Ps 33:5; 37:28) Hi yona mhaka a nge ma tiyiseleli hilaha ku nga heriki madzolonga.
Lehisa Mbilu U Rindzela Yehovha
15 Ha yini Davhida a a tiyimisele ku lehisa mbilu a rindzela Yehovha? Davhida u hi nyika nhlamulo ya kona eka Pisalema leyi eka yona a vutiseke ka mune, a ku: “Ku fikela rini?” U ri: “Loko ku ri mina, ndzi tshembe musa wa wena wa rirhandzu; mbilu ya mina a yi tsake hi ku ponisa ka wena. Ndzi ta yimbelelela Yehovha, hikuva u tirhisane na mina hi ndlela leyi vuyerisaka.” (Ps. 13:5, 6) Davhida a a tiyiseka leswaku Yehovha wa n’wi rhandza. A a swi langutele hi mahlongati ku ponisiwa hi Yehovha naswona u anakanyisise hi ndlela leyi Yehovha a tshameke a n’wi katekisa ha yona. Swi le rivaleni leswaku Davhida u swi xiyile leswaku ku rindza a swi ta va ni vuyelo lebyinene.
Mfumo Wu hetisisa Ku Rhandza Ka Xikwembu eMisaveni
16 Nsirhelelo. Eku heteleleni, hi ta ma vona marito lama khutazaka lama nga eka Esaya 11:6-9 ma hetiseka hi ku helela. Vavanuna, vavasati ni vana va ta va hlayisekile ni ku tlhela va sirhelelaka kun’wana ni kun’wana laha va nga ta ya kona emisaveni. Ku hava xivumbiwa, ku nga khathariseki leswaku i munhu kumbe xiharhi, lexi nga ta tisa nxungeto. Anakanya hi nkarhi lowu u nga ta vona pulanete leyi hinkwayo yi ri kaya ra wena, laha u nga ta hlambela emilambyeni, emativeni ni le malwandle; u famba-famba entshaveni; ni ku teka maendzo u sirhelelekile hi ku helela. Loko ri pela, a wu nge vileli. Marito ya Ezekiyele 34:25 ma ta hetiseka, leswaku vanhu va Xikwembu va kota ku ‘tshama emananga va sirhelelekile, ni ku etlela emakhwatini.’
Endla Ndzavisiso
Xana U Hundzukile?
12 Khombo ra kona, emisaveni leyi hi hanya ni vanhu lava fanelaka nhlamuselo ya Pawulo. Va anakanya leswaku swi hundzeriwe hi nkarhi ku hanya hi milawu yo karhi nileswaku a ku na munhu la faneleke a sindzisa van’wana ku hanya ha yona. Vadyondzisi ni vatswari vo tala va pfumelela vana va vona ku endla xin’wana ni xin’wana lexi va xi lavaka. Eka vona, a swi koteki ku tiva leswinene ni leswo biha. Ni vanhu vo tala lava nghenaka kereke va anakanya leswaku va nga tiendlela leswi va anakanyaka leswaku swi lulamile, handle ko boheka ku yingisa Xikwembu ni swileriso swa xona. (Ps. 14:1) Langutelo ro tano ri nga va ni khombo eka Vakreste va ntiyiso. Lava nga xalamukangiki va nga ha va ni langutelo ro tano eka malunghiselelo ya swa le tilweni. Va nga ha va va nga tiyimiselanga ku fambisana ni ndlela leyi swilo swi endliwaka ha yona evandlheni naswona va nga ha gungula hi nchumu wihi na wihi lowu va nga wu tsakeliki. Kumbe swi nga ha endleka va nga pfumelelani hi ku helela ni ndzayo ya le Matsalweni leyi va yi kumaka malunghana ni vuhungasi, ndlela yo tirhisa Internet ni dyondzo leyi tlakukeke.