Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
MARCH 4-10
LESWI HI SWI DYONDZAKA EBIBELENI | PISALEMA 16-17
“Yehovha, Xihlovo Xa Mina Xa Vunene”
Vantshwa, Mi Nga Swi Kota Ku Hanya Vutomi Byo Tsakisa
KUMA VANGHANA VA NTIYISO
11 Hlaya Pisalema 16:3. Davhida a xi tiva xihundla xo kuma vanghana va ntiyiso. U kume “ntsako” eka vanghana lava a va rhandza Yehovha. Leswi va vuriwaka “vakwetsimi,” swi vula leswaku a va ri ni mahanyelo lamanene naswona a va tshembekile. Mupisalema un’wana u titwe hi ndlela leyi fanaka hi vanghana lava a va hlawuleke. U tsale a ku: “Ndzi munghana wa vanhu hinkwavo lava ku chavaka, ni wa lava va hlayisaka swileriso swa wena.” (Ps. 119:63) Tanihi leswi hi swi voneke eka xihloko lexi nga hundza, na wena u nga kuma vanghana vo tala lavanene lava chavaka Yehovha va tlhela va n’wi yingisa. Sweswo swi katsa vanhu va malembe yo hambanahambana.
“Vona Ku Tsakisa Ka Yehovha”
Davhida u yimbelelele Yehovha a ku: “U vutumbelo bya mina, xiavelo xa mina [kumbe ndzhaka] etikweni ra lava va hanyaka.” (Ps. 142:5) Davhida a a xi tlangela swinene “xiavelo” xakwe, hileswaku, ku va ni vuxaka lebyi amukelekaka na Yehovha ni lunghelo ra ku n’wi tirhela. Ku fana na Davhida, hi nga ha weriwa hi maxangu, kambe hi ni mikateko yo tala swinene ya moya! Hikwalaho a hi yeni emahlweni hi tsakela vugandzeri bya ntiyiso naswona minkarhi hinkwayo hi ‘languta hi ku tlangela’ eka tempele ya moya ya Yehovha.
Rhangisa Yehovha Nkarhi Hinkwawo
2 Hinkwerhu ka hina hi nga dyondza swo tala eka leswi humeleleke vanhu lava tivekaka lava ku vulavuriwaka ha vona eBibeleni, ku nga Abrahama, Sara, Muxe, Rhuti, Davhida, Estere, muapostola Pawulo ni van’wana. Hambiswiritano, ni timhaka ta vanhu lava ku nga vulavuriwiki ngopfu ha vona ti nga hi pfuna. Ku anakanyisisa hi timhaka ta le Bibeleni swi nga hi pfuna leswaku hi hanya hi ku pfumelelana ni marito ya mupisalema loyi a nga te: “Ndzi ve*ke Yehovha emahlweni ka mina nkarhi hinkwawo. Hikuva u le vokweni ra mina ra xinene, a ndzi nge tsekatsekisiwi.” (Ps. 16:8) Xana ma vula yini marito lawa?
3 Hi ntolovelo socha a ri va ri nga sirhelelekanga exineneni hikuva a ri khoma savula hi voko rero, kutani ri khoma xitlhangu hi lera ximatsi. Kambe, a ri ta sirheleleka loko socha-kulobye ri lwa ri yime exineneni xa rona. Loko hi tshama hi ri karhi hi anakanya hi Yehovha hi tlhela hi endla ku rhandza ka yena, u ta hi sirhelela. A hi voneni ndlela leyi ku kambisisa marungula ya le Bibeleni swi nga ri tiyisaka ha yona ripfumelo ra hina leswaku “minkarhi hinkwayo, [hi] rhangisa [Yehovha].”—Bibele—Mahungu Lamanene.
Endla Ndzavisiso
it-2-E 714
Ndzololo
Rito ra Xiheveru leri nge ʼi·shohnʹ (Dt 32:10; Swiv 7:2), loko ri tirhisiwa ni leri nge ʽaʹyin (tihlo), hi ku kongoma ma vula ximunhwana xa tihlo, hilaha ku fanaka rito ra xiheveru leri nge bath (nhwanyana) ri tirhisiwile eka Swirilo 2:18 ku hlamusela n’wana wa tihlo naswona tinhlamuselo teto timbirhi ti kombetela eka ndzololo. Tinhlamuselo teto ti hlanganisiwile eka tsalwa ku kandziyisa mhaka yoleyo eka Pisalema 17:8 (ʼi·shohnʹ bath-ʽaʹyin), ku nga (“ximunhwana n’wana wa tihlo”). Swi le rivaleni leswaku nhlamuselo leyi yi kombetela eka ndlela leyi u ti vonaka hayona loko u langute tihlo ra un’wana.
Tihlo a ri tiyelanga naswona ri vaviseka hi ku olova hambi ku ri nsisi wutsongo kumbe ritshuri ra vonaka loko ri ri etihlweni. Xifunengeto lexi vonikelaka xa ndzololo xi fanele xi tshama xisirhelelekile ni ku khathaleriwa hikuva loko xifunengeto xexo xo vavisiwa kumbe xi va ni papa hikwalaho ka mavabyi swi nga endla leswaku tihlo ri nga ha voni. Hi ndlela ya matimba kambe leyi oloveke Bibele yi tirhisa “ndzololo ya matihlo ya wena” loko yi vulavula hi nchumu lowu faneleke wu khomiwa hi vukheta ku nga ndlela milawu ya Xikwembu yi faneleke yi khomiwa hayona. (Swiv 7:2) Loko yi vulavula hi ndlela leyi Xikwembu xi khathaleleke Vaisrayele hayona, Deteronoma 32:10 yi vula leswaku xi va hlayise “ku fana ni ndzololo ya tihlo ra xona.” Davhida u khongelele leswaku a sirheleriwa ni ku hlayisiwa hi Xikwembu “ku fana ni ndzololo ya tihlo ra xona” hikuva a a lava leswaku Yehovha a hatla a n’wu pfuna loko a hlaseriwa hi valala vakwe. (Ringanisa na Zk 2:8; laha rito ra Xiheveru ba·vathʹ ʽaʹyin, “ndzololo” ri tirhisiweke kona.)—Vona TIHLO.
MARCH 11-17
LESWI HI SWI DYONDZAKA EBIBELENI | PISALEMA 18
“Yehovha Hi Yena A Ndzi Ponisaka”
Ntsako Wa Yehovha I Khokholo Ra Hina
Bibele yi tlhela yi fanisa Yehovha ni swilo leswi nga hanyiki. U hlamuseriwa tanihi “Ribye ra Israyele” ni “khokholo.” (2 Samuwele 23:3; Pisalema 18:2; Deteronoma 32:4) Hi kwihi ku fana loku nga kona eka swiga-ririmi leswi? Tanihi leswi ribye lerikulu ri tshamaka ri tiyile naswona ri nga tsekatsekiki, kutani na Yehovha Xikwembu a nga va musirheleri wa hina lonkulu.
5 Buku ya Tipisalema yi tele hi swiga-ririmi leswi hlamuselaka swilo swo tala malunghana ni timfanelo ta Yehovha. Hi xikombiso, Pisalema 84:11 yi vula leswaku Yehovha “i dyambu ni xitlhangu” hikuva yena i Xihlovo xa ku vonakala, xa vutomi ni xa nsirhelelo. Ku hambana ni xiga-ririmi xo sungula, Pisalema 121:5 yi vula leswaku “Yehovha i ndzhuti wa wena evokweni ra wena ra xinene.” Tanihi leswi ndhawu leyi nga ni ndzhuti yi nga ku sirhelelaka eka dyambu leri vavulaka, Yehovha a nga sirhelela lava n’wi tirhelaka loko va ri emaxangwini, a va nyika nsirhelelo lowu fanaka ni ndzhuti wa “voko” rakwe kumbe wa “timpapa” takwe.—Esaya 51:16; Pisalema 17:8; 36:7.
it-2-E 1161 ¶7
Rito
Xikwembu xa ri twa rito ra malandza ya xona. Lava gandzelaka Xikwembu hi ntiyiso va nga tiyiseka leswaku Xikwembu xa ri twa rito ra vona, swi nga ri na mhaka leswaku va xi vitana hi ririmi rihi. Ku tlula kwalaho hambileswi ku nga vuriwiki rito hi ku kongoma vo tala va vula leswaku Xikwembu xi miyerile. Xikwembu lexi tivaka timbilu ta vanhu xa swi yingisa swikhongelo swa vona. (Ps 66:19; 86:6; 116:1; 1Sa 1:13; Neh 2:4) Xikwembu xa va twa lava tshikilelekeke lava kombelaka mpfuno eka xona naswona xa ri twa rito ni ku tiva swikongomelo swa lava xi kanetaka ni lava kunguhataka vubihi hi malandza ya xona.—Gn 21:17; Ps 55:18, 19; 69:33; 94:9-11; Yr 23:25.
Leswi Nga Hi Pfunaka Leswaku Hi Tshika Ku Vilela Ngopfu
2. Ehleketisisa. Loko u ehleketisisa hi leswi endlekeke evuton’wini bya wena, xana yi kona miringo leyi u koteke ku yi hlula hi ku pfuniwa hi Yehovha? Loko hi ehleketisisa hi ndlela leyi Yehovha a hi pfuneke hayona ku katsa ni malandza yakwe ya le mikarhini ya khale hi ta tiya ni ku tlhela hi n’wi tshemba. (Ps. 18:17-19) Nkulu loyi a vitaniwaka Joshua u ri: “Ndzi ni nxaxamelo wa swikhongelo leswi Yehovha a swi hlamuleke. Sweswo swi ndzi tsundzuxa ndlela leyi Yehovha a nga tshama a ndzi pfuna hayona.” Loko hi ehleketisisa hi ndlela leyi Yehovha a nga tshama a hi pfuna hayona hi kuma matimba yo lwisana ni ku vilela.
Endla Ndzavisiso
it-1-E 432 ¶2
Kerubu
Makerubu lawa a ma kombisa vukona bya Yehovha: “Ndzi ta tikombisa eka wena kwalaho kutani ndzi vulavula na wena ndzi ri ehenhla ka xifunengeto. Ndzi ta ku tivisa hinkwaswo leswi ndzi nga ta ku lerisa swona leswaku u swi byela Vaisrayele ndzi ri exikarhi ka makerubu mambirhi lama nga ehenhla ka areka ya Vumbhoni.” (Eks 25:22; Tin 7:89) Hikwalaho ku vuriwa leswaku Yehovha “u tshame exikarhi ka makerubu.” (1Sa 4:4; 2Sa 6:2; 2Th 19:15; 1Tk 13:6; Ps 80:1; 99:1; Esa 37:16) Hi xikombiso makerubu a ma tirhisiwa tanihi “xifaniso lexi yimelaka kalichi” leyi Yehovha a yi gadeke (1Tk 28:18) naswona timpapa ta makerubu a ti pfuna eka ku sirhelela ni ku pfuna leswaku kalichi yi tsutsuma hi rivilo lerikulu loko ku tekiwa maendzo. Hiyona mhaka Davhida eka risimu rakwe ra xiphato u hlamusele rivilo leri Yehovha a teke ha rona leswaku a ta n’wi pfuna ku fana ni munhu loyi a “teke a gade kerubu ni loyi a hahaka”.— 2Sa 22:11; Ps 18:10.
MARCH 18-24
LESWI HI SWI DYONDZAKA EBIBELENI | PISALEMA 19-21
“Matilo Ma Twarisa Ku Vangama Ka Xikwembu”
Vanhu Hinkwavo A Va Twarise Ku Vangama Ka Yehovha
DAVHIDA n’wana Yese, u kule a ri murisi ekusuhi ni le Betlehema. Swi tikomba onge a a tolovele ku tlakusa mahlo a languta vukulu bya matilo lama teleke tinyeleti nivusiku loko ku lo cowee, a ri karhi a risa mintlhambi ya tata wakwe emadyelweni ya tinyimpfu lawa a ma ri ekule ni miti! A swi kanakanisi leswaku sweswo swi tlhele swi vuya emianakanyweni loko moya lowo kwetsima wa Xikwembu wu n’wi huhutela leswaku a qambha ni ku yimbelela marito yo xonga ya Pisalema ya vu-19 lama nge: “Matilo ma twarisa ku vangama ka Xikwembu; ni xibakabaka xi vula ntirho wa mavoko ya xona. Ngoti ya wona ya ku pima yi humele emisaveni hinkwayo, marito ya wona ma fike ni le makumu ka tiko leri noneke.”—Pisalema 19:1, 4.
2 Matilo lama vumbiweke hi Yehovha lama nga vulavuliki ni lama chavisaka, ma twarisa ku vangama ka yena vusiku ni nhlikanhi. Ntumbuluko wu tshama wu ri karhi wu twarisa ku vangama ka Xikwembu, naswona swi endla leswaku munhu a titwa a nga ri nchumu loko a xiya vumbhoni lebyi nga vulavuliki byi tikombisa “emisaveni hinkwayo,” leswaku vaaki va yona hinkwavo va byi xiya. Kambe vumbhoni lebyi miyeleke bya ntumbuluko a byi enelanga. Vanhu lava tshembekaka va khutaziwa leswaku va hlanganyela hi rito leri mbvangamulaka. Mupisalema loyi vito rakwe ri nga boxiwangiki u vulavule ni vagandzeri lava tshembekaka, a va byela marito lama huhuteriweke lama nge: “Nyikani Yehovha ku vangama ni ntamu. Nyikani Yehovha ku vangama loku nga ka vito rakwe.” (Pisalema 96:7, 8) Lava nga ni vuxaka lebyikulu na Yehovha va swi endla hi ntsako leswi marito wolawo ma va khutazaka ku endla swona. Kambe ku vangamisa Xikwembu swi katsa yini?
Ntumbuluko Wu Twarisa Ku Vangama Ka Xikwembu!
8 Davhida u ye emahlweni a hlamusela xihlamariso xin’wana xa ntumbuluko wa Yehovha: “[Xikwembu] xi veke ntsonga wa dyambu eka [matilo ya xiviri], ri fana ni muteki loko a huma ekamareni rakwe ra vukati; ri khana ku fana ni leswi munhu wa matimba a khanisaka xiswona loko a tsutsuma endleleni. Ri huma emakumu man’wana ya matilo, ri rhendzeleka ri ya fika emakumu man’wana; a ku na nchumu lowu tumbeleleke ku hisa ka rona.”—Pisalema 19:4-6.
9 Dyambu i ritsongo loko ri ringanisiwa ni tinyeleti. Kambe dyambu i nyeleti yo hlamarisa, leyi endlaka leswaku tipulanete leti rhendzelekaka etlhelo ka yona ti vonaka ti ri titsongo swinene. Buku yin’wana yi vula leswaku ntiko wa dyambu wu endla “tibiliyoni ta tibiliyoni ta tibiliyoni ta tithani ti andzisiwe kambirhi”—99,9 wa tiphesente ta ntiko lowu patsanyetiweke wa tipulanete hinkwato leti rhendzeleke dyambu! Nkokelo wa rona wu endla leswaku misava yi rhendzeleka hi rona yi ri empfhukeni lowu endlaka 150 wa timiliyoni ta tikhilomitara kambe yi nga tlhenguki kumbe ku tshinela eka rona. Mpimo wa miseve ya dyambu leyi fikaka laha misaveni i wutsongo swinene, kambe yi endla leswaku swilo swi kota ku ya emahlweni swi hanya.
10 Mupisalema u vulavula hi dyambu hi ndlela yo fanekisela, a ri fanisa ni “munhu wa matimba” loyi a tsutsumaka a suka evugimamusi a ya fika evugimamusi ninhlikanhi kutani nivusiku a wisa ‘entsongeni.’ Loko nyeleti yoleyo ya matimba yi nghena evugimamusi, hilaha swi vonakaka hakona loko u ri emisaveni, yi vonaka onge hi loko yi nghena ‘entsongeni’ yi ya wisa. Nimixo yi vonaka onge hiloko yi bulumuka kunene, yi vangama swinene, “[y]i fana ni muteki loko a huma ekamareni rakwe ra vukati.” Tanihi murisi, Davhida a a swi tiva kahle leswaku ku titimela njhani nivusiku. (Genesa 31:40) U tsundzuke ndlela leyi miseve ya dyambu a yi hatlisa yi n’wi kufumeta ha yona, yi tlhela yi kufumeta ni ndhawu leyi a a ri eka yona. Kunene, a ri va ri nga karhalanga hi “riendzo” leri ri ri tekeke ku suka evuxeni ku ya evupela-dyambu, kambe a ri fana ni “munhu wa matimba,” ri lunghekele riendzo rin’wana.
Mutshila La Honisiwaka Swinene Wa Le Nkarhini Wa Hina
Ku twisisa ka hina ku kurisa vutshila lebyi nga entumbulukweni, swi nga hi pfuna ku tiva Mutumbuluxi wa hina, loyi mintirho yakwe ya mavoko yi hi rhendzeleke. Eka khamba rin’wana Yesu u byele vadyondzisiwa vakwe leswaku va xiyisisa swiluva swa le nhoveni leswi a swi mila le Galeliya. U te: “Xiyani mukhuva lowu swiluva swa le nhoveni leswi va nge i makhon’wa swi kulaka ha wona a swi tirhi, a swi swuri; kambe ndza mi byela leswaku hambi a ri Solomoni evukosini bya yena hinkwabyo, a nga ambalanga tanihi xin’wana xa swona.” (Matewu 6:28, 29) Vuxongi bya xiluva xa nhova lexi nga vuriki nchumu byi nga hi tsundzuxa leswaku Xikwembu a xi swi honisi swilaveko swa ndyangu wa vanhu.
Endla Ndzavisiso
Ku Dyondza—Ka Vuyerisa Naswona Ka Tsakisa
Ku hlaya ni ku dyondza Rito ra Xikwembu ku nga phyuphyisa ku tlhela ku nyika matimba. Mupisalema u te: “Nawu wa Yehovha wu hetisekile, wu vuyisa moya-xiviri. Xitsundzuxo xa Yehovha xa tshembeka, xi tlharihisa la nga riki na ntokoto. Swileriso leswi humaka eka Yehovha swi lulamile, swi tsakisa mbilu; xileriso xa Yehovha xi basile, xi hatimisa mahlo.” (Pisalema 19:7, 8) Milawu ni switsundzuxo swa Yehovha swi pfuxelela moya-xiviri wa hina, swi antswisa vuhlayiseki bya hina bya moya, swi hi tisela ntsako wa mianakanyo naswona swi endla mahlo ya hina ma hatima ma swi vona kahle swikongomelo leswi hlamarisaka swa Yehovha. Swa tsakisa hakunene!
MARCH 25-31
LESWI HI SWI DYONDZAKA EBIBELENI | PISALEMA 22
Bibele Yi Hlamusele Ka Ha Ri Emahlweni Hi Rifu Ra Yesu
Va Kume Mesiya!
16 A swi ta tikomba onge Mesiya u tshikiwe hi Xikwembu. (Hlaya Pisalema 22:1.) Hi ku ya hi vuprofeta, “hi awara ya vukaye [kwalomu ka awara ya nharhu ninhlikanhi] Yesu a huwelela hi rito lerikulu a ku: ‘Eli, Eli, lama sabaktani?’ leswi loko swi hundzuluxeriwa swi vulaka: ‘Xikwembu xanga, Xikwembu xanga, u ndzi tshikele yini?’” (Mar. 15:34) A swi vuli swona leswaku Yesu u vule marito lawa hileswi a a nga ha n’wi tshembi Tata wakwe wa le tilweni. Xikwembu xi tshike ku n’wi sirhelela ivi xi pfumelela leswaku a xanisiwa hi valala vakwe leswaku ku tshembeka kakwe ku ta ringiwa hi ku helela. Kutani ku huwelela kakwe ku hetisese vuprofeta lebyi nga eka Pisalema 22:1.
Va Kume Mesiya!
13 Davhida u profete leswaku Mesiya a a ta tseketseriwa. (Hlaya Pisalema 22:7, 8.) Yesu u tseketseriwile loko a twa ku vava emhandzini ya nxaniso hikuva Matewu u te: “Vahundzi va ndlela va sungula ku vulavula hi ku n’wi tseketsela, va hlakahla tinhloko va ku: ‘Wena la nga ta wisa tempele u tlhela u yi aka hi masiku manharhu, tiponise! Loko u ri n’wana wa Xikwembu, xika emhandzini ya nxaniso!’” Hilaha ku fanaka, vaprista lavakulu, vatsari ni vakulukumba va endle xihlekiso ha yena va ku: “Van’wana u va ponisile; yena hi byakwe wa tsandzeka ku tiponisa! I Hosi ya Israyele; a a xike sweswi emhandzini ya nxaniso kutani hi ta n’wi kholwa. U veke ntshembo wakwe eka Xikwembu; a xi n’wi ponise loko xi n’wi lava, hikuva u te, ‘Ndzi N’wana wa Xikwembu.’” (Mat. 27:39-43) Kambe Yesu u tiyiselele ku tseketseriwa koloko hinkwako hi ku titsongahata. Hakunene i xikombiso lexinene eka hina!
Va Kume Mesiya!
14 A ku ta hoxiwa vuhlolotwana hikwalaho ka tinguvu ta Mesiya. Mupisalema u tsale a ku: “Va avelana tinguvu ta mina, naswona va hoxa vuhlolotwana hikwalaho ka swiambalo swa mina.” (Ps. 22:18) Sweswo swi humelerile hikuva ‘loko masocha ya Rhoma ma belele Yesu, ma ave tinguvu takwe ta le handle hi ku hoxa vuhlolotwana.’—Mat. 27:35; hlaya Yohane 19:23, 24.
Endla Ndzavisiso
Ku Xixima Minhlangano Ya Hina Leyi Kwetsimaka
7 Ku ni tindlela leti xiyekaka leti hi nga kombisaka ha tona leswaku hi xixima minhlangano ya hina. Ndlela yin’wana i ku hlanganyela eku yimbeleleni ka tinsimu ta Mfumo. To tala ta tona ti tamele marito ya swikhongelo, kutani ti fanele ku yimbeleriwa hi ndlela ya xichavo. Loko a tshaha Pisalema 22, muapostola Pawulo u tsale hi Yesu a ku: “Ndzi ta vula vito ra wena eka vamakwerhu; exikarhi ka nhlengeletano ndzi ta ku dzunisa hi risimu.” (Vaheveru 2:12) Hikwalaho, hi fanele hi swi endla mukhuva ku va hi tshamisekile loko mutshama-xitulu a nga si vula risimu naswona hi anakanyisisa hi nhlamuselo ya marito ya risimu loko hi ri karhi hi yimbelela. Onge ku yimbelela ka hina ku nga kombisa mintlhaveko yo fana ni ya mupisalema loyi a tsaleke a ku: “Ndzi ta dzunisa Yehovha hi mbilu ya mina hinkwayo entlaweni lowukulu wa lavo lulama ni le ntshungwini.” (Pisalema 111:1) Ina, ku yimbelelela Yehovha swidzuniso i xivangelo xin’wana lexi twalaka xo fika ka ha ri ni nkarhi eminhlanganweni ya hina ni ku tshama kukondza yi hela.
Dzunisa Yehovha “eXikarhi Ka Nhlengeletano”
Ku fana ni le minkarhini ya khale, namuntlha mupfumeri ha un’we u endleriwe malunghiselelo yo vula ripfumelo ra yena “exikarhi ka nhlengeletano.” Lunghelo rin’wana leri pfulekeleke vanhu hinkwavo i ra ku hlamula loko vayingiseri va vutisiwa swivutiso eminhlanganweni ya vandlha. U nga byi tekeli ehansi vuyelo lebyi hetisisiwaka hi ku hlamula koloko. Hi xikombiso, tinhlamulo leti kombisaka ndlela yo hlula kumbe yo papalata swiphiqo ti kurisa ku tiyimisela ka vamakwerhu ku landzela misinya ya milawu ya Bibele. Tinhlamulo leti hlamuselaka tindzimana ta Bibele leti kombisiweke kambe ti nga tshahiwanga kumbe leti katsaka ni rungula leri munhu a ri kumeke loko a tiendlela ndzavisiso, ti nga ha khutaza van’wana leswaku va va ni mikhuva leyinene yo dyondza.
APRIL 1-7
LESWI HI SWI DYONDZAKA EBIBELENI | PISALEMA 23-25
“Yehovha I Murisi Wa Mina”
“Yehovha I Murisi Wa Mina”
Yehovha u kongomisa tinyimpfu takwe. Loko tinyimpfu ti nga ri na murisi ta lahleka. Hilaha ku fanaka, na hina hi lava mpfuno leswaku hi famba hi ndlela leyinene evuton’wini bya hina. (Yeremiya 10:23) Loko Davhida a tsala u vule leswaku Yehovha u kongomisa vanhu vakwe “emadyelweni lama nga ni byanyi byo tala” ni le “tindhawini to wisela leti kumaka mati kahle.” U tlhela a va rhangela “emintileni ya ku lulama.” (Ndzimana 2, 3) Xifaniso lexi xa hi tiyisekisa leswaku hi tshembela eka Xikwembu. Hi ku landzela nkongomiso wa Xikwembu hilaha wu nga hakona eBibeleni, hi nga swi kota ku hanya vutomi lebyi enerisaka, lebyi phyuphyisaka ni lebyi sirhelelekeke.
“Yehovha I Murisi Wa Mina”
Yehovha u sirhelela tinyimpfu takwe. Loko tinyimpfu ti nga ri na murisi ta chava naswona ti nga hlaseriwa hi ku olova. Yehovha u byela vanhu vakwe leswaku a va fanelanga va chava, hambiloko va “famba enkoveni wa ndzhuti lowukulu”—ku nga minkarhi yo nonon’hwa evuton’wini. (Ndzimana 4) Minkarhi hinkwayo wa va sirhelela naswona u tshama a lunghekele ku va pfuna. A nga ha nyika vagandzeri vakwe vutlhari ni matimba lawa va ma lavaka leswaku va langutana ni miringo.—Vafilipiya 4:13; Yakobo 1:2-5.
“Yehovha I Murisi Wa Mina”
Yehovha u wundla tinyimpfu takwe. Tinyimpfu ti titshege hi murisi wa tona leswaku ti kuma swakudya. Na hina hi ni xilaveko xa moya lexi hi nga xi enerisaka hikwalaho ko pfuniwa hi Xikwembu ntsena. (Matewu 5:3) Lexi tsakisaka hileswaku Yehovha wa hanana naswona u lunghiselela malandza yakwe swakudya swo tala swa moya. (Ndzimana 5) Bibele swin’we ni tibuku leti sekeriweke eBibeleni, to fana ni magazini lowu u nga eku wu hlayeni, i xihlovo xa swakudya swa moya leswi enerisaka xilaveko xa hina xo tiva xikongomelo xa vutomi ni xikongomelo xa Xikwembu hi vanhu.
Endla Ndzavisiso
Rhandza Ku Lulama Hi Mbilu Ya Wena Hinkwayo
YEHOVHA u kongomisa vanhu vakwe “emintileni ya ku lulama” hi ku tirhisa Rito rakwe ni moya wakwe lowo kwetsima. (Ps. 23:3) Hambiswiritano, leswi hi nga hetisekangiki hi tala ku hambuka emintileni yoleyo. Swi lava matshalatshala lamakulu ku va munhu a tlhela a endla leswinene. I yini leswi nga hi pfunaka leswaku hi humelela? Ku fana na Yesu, hi fanele hi rhandza ku endla leswinene.—Hlaya Pisalema 45:7.
2 ‘Mintila ya ku lulama’ i yini? Ntila i xindledyana xo khuma. ‘Mintila’ yoleyo yi lawuriwa hi milawu yo lulama ya Yehovha. Hi Xiheveru ni Xigriki, rito leri nge “vululami” ri vula ku namarhela milawu ya mahanyelo. Leswi Yehovha a nga “ndhawu yo lulama ya ku tshama eka yona,” vagandzeri vakwe va swi langutela hi ntsako ku va a va kongomisa entileni wo lulama wa mahanyelo lowu va faneleke va famba eka wona.—Yer. 50:7.
3 Hi nga kumiwa hi ri lava amukelekaka eka Xikwembu ntsena loko hi tikarhatela ku hanya hi milawu ya xona yo lulama. (Det. 32:4) Sweswo hi sungula ku swi endla loko hi dyondza hinkwaswo leswi hi nga swi kotaka hi Yehovha Xikwembu eRitweni rakwe, ku nga Bibele. Loko hi hambeta hi dyondza ni ku tshinela eka yena siku ni siku, hi ta ya hi ku rhandza swinene ku lulama kakwe. (Yak. 4:8) Nakambe hi fanele hi tirhisa nkongomiso wa Rito ra Xikwembu leri huhuteriweke loko hi lava ku endla swiboho swa nkoka evuton’wini.
APRIL 8-14
LESWI HI SWI DYONDZAKA EBIBELENI
Leswi Davhida A Swi Endleke Leswaku A Tshama A Tshembekile
Famba Hi Ndlela Ya Vutshembeki
8 Davhida u khongerile a ku: “Oho Yehovha, ndzi kambele, u ndzi ringa; tengisa tinso ta mina ni mbilu ya mina.” (Pisalema 26:2) Tinso ti le ndzeni-ndzeni ka miri wa munhu. Hikwalaho, tinso ti fanekisela miehleketo ni mintlhaveko ya munhu leyi dzikeke. Naswona mbilu yo fanekisela i munhu wa le ndzeni hi ku helela—minsusumeto ni vutivi byakwe. Loko Davhida a kombela Yehovha leswaku a n’wi kambela, kahle-kahle a a khongelela leswaku ku kambisisiwa miehleketo ni mintlhaveko yakwe leyi dzikeke.
9 Davhida u kombele leswaku tinso ta yena ni mbilu ya yena swi tengisiwa. Xana Yehovha u byi tengisa njhani vumunhu bya hina bya le ndzeni? Davhida u yimbelerile a ku: “Ndzi ta nkhensa Yehovha, la ndzi nyikeke xitsundzuxo. Kunene, nivusiku tinso ta mina ti ndzi lulamisile.” (Pisalema 16:7) Xana sweswo swi vula yini? Swi vula leswaku xitsundzuxo xa Xikwembu xi nghene xi twelela eka Davhida, xi lulamisa miehleketo ni mintlhaveko yakwe leyi dzikeke. Swi nga va tano ni le ka hina loko hi anakanyisisa hi ndzayo leyi hi yi kumaka eRitweni ra Xikwembu, eka vayimeri va xona ni le ka nhlengeletano ya xona, kutani hi yi pfumelela leswaku yi nghena yi dzika eka hina. Ku khongela eka Yehovha nkarhi na nkarhi leswaku a hi endla lava tengeke hi ndlela yoleyo swi ta hi pfuna leswaku hi famba hi vutshembeki.
Famba Hi Ndlela Ya Vutshembeki
12 Loko a vulavula hi nchumu wun’wana lowu n’wi pfuneke leswaku a hambeta a tshembeka, Davhida u te: “A ndzi tshamanga ni vanhu lava nga riki na ntiyiso; naswona a ndzi ngheni ni vanhu lava va fihlaka leswi va nga swona. Ndzi venga nhlengeletano ya vaendli va leswo biha, naswona a ndzi tshami ni lavo homboloka.” (Pisalema 26:4, 5) Davhida a a nga swi rhandzi ku tshama ni lavo homboloka. A a venga vanghana lavo biha.
13 Ku vuriwa yini hi hina? Xana hi papalata ku dzumba ni vanhu lava nga riki na ntiyiso lava nga eka minongonoko ya thelevhixini, tivhidiyo, tibayiskopo, Internet kumbe kun’wana? Xana hi fambela ekule ni lava va fihlaka leswi va nga xiswona? Van’wana exikolweni kumbe entirhweni va nga tiendla vanghana va hina leswaku va ta hi dya swirhendze. Xana ha swi rhandza hakunene ku va ni vuxaka lebyikulu ni vanhu lava va nga fambiki entiyisweni wa Xikwembu? Hi ku tiendla van’wavunene, vagwinehi va nga pfala-pfala xikongomelo xa vona xa ku hi hambukisa eku tirheleni Yehovha. Ku vuriwa yini loko ku ri ni van’wana evandlheni ra Vukreste lava hanyaka vutomi bya mikoka yimbirhi? Na vona va fihla leswi va nga swona hakunene. Jayson, loyi sweswi a nga nandza wa vutirheli, a a ri ni vanghana vo tano loko a ha ri muntshwa. Malunghana na vona u ri: “Siku rin’wana, un’wana wa vona u ndzi byele a ku: ‘A swi na mhaka leswi hi nga swi endlaka sweswi, hikuva loko xiyimiso lexintshwa xi fika, hi ta ya endzhongweni. A hi nge swi tivi leswi hi swi kayeleke.’ Mavulavulelo wolawo ma ndzi phaphamisile. Mina a ndzi lavi ku fa loko ku fika mafambiselo lamantshwa.” Jayson u tirhise vutlhari a dlaya vuxaka bya yena ni vanhu vo tano. Muapostola Pawulo wa hi lemukisa a ku: “Mi nga xisiwi. Vunakulobye byo biha byi onha mikhuva leyi pfunaka.” (1 Vakorinto 15:33) I swa nkoka hakunene leswaku hi papalata vanghana vo biha!
Famba Hi Ndlela Ya Vutshembeki
17 Tabernakela ni alitari ya yona ya magandzelo a yi ri xitiko xa vugandzeri bya Yehovha le Israyele. Loko Davhida a hlamusela ndlela leyi a a tsakela ndhawu yoleyo ha yona, u khongerile a ku: “Yehovha, ndzi swi rhandzile ku tshama endlwini ya wena ni ndhawu leyi ku vangama ka wena ku tshamaka eka yona.”—Pisalema 26:8.
18 Xana ha swi rhandza ku hlengeletana etindhawini leti hi dyondzaka ha Yehovha eka tona? Holo ya Mfumo yin’wana ni yin’wana i xitiko xa vugandzeri bya ntiyiso endhawini leyi yi kumekaka eka yona, hikwalaho ka nongonoko lowu hambetaka wa vuleteri bya timhaka ta moya. Tlhandlakambirhi, lembe na lembe hi va ni ntsombano, nhlengeletano ya xifundzha ni nhlengeletano yo hlawuleka ya siku rin’we. “Switsundzuxo” swa Yehovha swa hlamuseriwa eminhlanganweni yo tano. Loko hi ringeta ku “swi rhandza swinene,” hi ta hisekela ku ya eminhlanganweni hi tlhela hi fika hi rhiya ndleve. (Pisalema 119:167) Swa phyuphyisa swinene ku va ni vapfumeri-kulorhi lava khathalaka hi vuhlayiseki bya hina ni lava va hi pfunaka ku hambeta hi famba hi ndlela ya vutshembeki!—Vaheveru 10:24, 25.
Endla Ndzavisiso
Yehovha U Kutsula La Xanisekaka
15 Mupisalema Davhida u yimbelerile: “Loko tatana na manana vo ndzi tshika, Yehovha u ta ndzi teka.” (Pisalema 27:10) A hi ku chavelela ka swona ku tiva leswaku rirhandzu ra Yehovha ri tlula ra mutswari wihi na wihi wa nyama! Tanihi leswi ku tshikiwa, ku khomiwa ku vava, kumbe ku fularheriwa hi mutswari swi nga ha vavaka, a swi yi khumbi ndlela leyi Yehovha a khathalaka ha yona ha wena. (Varhoma 8:38, 39) Tsundzuka leswaku Xikwembu xi koka lava xi va rhandzaka. (Yohane 3:16; 6:44) Ku nga khathariseki leswaku vanhu va ku khome njhani, Tata wa wena wa le tilweni wa ku rhandza!
APRIL 15-21
LESWI HI SWI DYONDZAKA EBIBELENI | PISALEMA 29-31
Ndzayo I Ndlela Ya Xikwembu Yo Kombisa Rirhandzu
it-1-E 802 ¶3
Xikandza
Ku tumbeta xikandza swi ni tinhlamuselo to hambanahambana swi ya hi xiyimo. Loko Yehovha Xikwembu a tumbeta xikandza xakwe mikarhi yo tala swi kombisa ku va a tshika ku seketela kumbe ku tirhisa matimba yakwe. Leswi swi nga vanga hikuva munhu a nga yingisi kumbe ntlawa wo karhi wu nga n’wi yingisi Yehovha hilaha tiko ra Israyele ri endleke hakona. (Yb 34:29; Ps 30:5-8; Esa 54:8; 59:2) Eka swiyimo swin’wana Yehovha a nga ha ti tumbeta hi ku va a nga teki goza kumbe ku hlamula swikhongelo hileswi a yimeleke ku endla swilo hi nkarhi wakwe lowu faneleke (Ps 13:1-3) Loko Davhida a ku languta ekule leswaku u nga swi voni swidyoho swa mina a kombela Xikwembu leswaku xi n’wi rivalela swidyoho swa yena.— Ps 51:9; ringanisa na Ps 10:11.
Tsakela Ku Rindza Yehovha
Ndlela leyi ku tshinyiwa hi Yehovha swi hi pfunaka ha yona yi nga fanisiwa ni ndlela leyi mihandzu yi vupfaka ha yona. Malunghana ni ku tshinyiwa hi Xikwembu, Bibele yi ri: “Ku veka mbhandzu wo rhula eka lava leteriweke hi kona, ku nga ku lulama.” (Vaheveru 12:11) Tanihi leswi mihandzu yi lavaka nkarhi leswaku yi vupfa, na hina hi lava nkarhi leswaku hi cinca langutelo ra hina, hi amukela ndlela leyi Xikwembu xi hi letelaka ha yona. Hi xikombiso, loko hi endle xihoxo ivi hi lahlekeriwa hi malunghelo evandlheni, ku tiyimisela ka hina ku rindza Xikwembu ku ta hi pfuna leswaku hi nga heli matimba. Eka swiyimo swo tano, marito lawa Davhida a nga huhuteriwa wona ma hi tiyisa: “Ku langutana ni ku hlundzuka [ka Xikwembu] i swa nkarhinyana, ku kuma vunene [bya xona] i swa vutomi hinkwabyo. Nimadyambu ku nga ha ririwa, kambe nimixo ku ni ku huwelela ka ku tsaka.” (Pisalema 30:5) Loko hi hlakulela moya wo rindza kutani hi tirhisa ndzayo leyi hi yi kumaka eka Rito ra Xikwembu ni le nhlengeletanweni ya xona, nkarhi wa hina wa ku “huwelela ka ku tsaka” wu ta ta.
Swi Vula Yini Ku Hundzuka Hi Mbilu Hinkwayo?
18 Ku kombisa leswaku munhu la susiweke u hundzukile, u fanele a va kona etinhlengeletanweni ta vandlha nkarhi na nkarhi ni ku tlhela a yingisa xitsundzuxo xa vakulu xo khongela ni ku dyondza Bibele nkarhi na nkarhi. U fanele a tlhela a papalata swilo leswi nga n’wi ringaka ku endla xidyoho. Loko a tirha hi matimba leswaku a lulamisa vuxaka byakwe na Yehovha, u ta tiyiseka leswaku Yehovha u ta n’wi rivalela hi mbilu yakwe hinkwayo naswona vakulu va ta n’wi vuyisela evandlheni. I ntiyiso leswaku loko vakulu va tenga nandzu wa mudyohi va swi xiya leswaku milandzu a yi fani naswona va yi kambisisa hi vukheta.
Endla Ndzavisiso
Tinhla-nkulu Ta Buku Yo Sungula Ya Tipisalema
31:23—Munhu la titlakusaka u tlheriseriwa hilaha ku tlurisaka hi ndlela yihi? Hakelo leyi ku vulavuriwaka ha yona laha i nxupulo. Hakelo leyi munhu wo lulama a yi kumaka hikwalaho ka swihoxo swa yena leswi a nga swi endlangiki hi vomu i ndzayo leyi humaka eka Yehovha. Leswi munhu la titlakusaka a nga yi tshikiki ndlela ya yena yo biha, u tlheriseriwa hilaha ku tlurisaka hi nxupulo lowukulu.—Swivuriso 11:31; 1 Petro 4:18.
APRIL 22-28
LESWI HI SWI DYONDZAKA EBIBELENI | PISALEMA 32-33
Hikwalaho Ka Yini U Fanele U Vula Loko U Endle Xidyoho Lexikulu?
Musa Wa Yehovha Wu Hi Nyika Matimba
7 Loko hi ri ni nandzu wa ku tlula milawu leyikulu ya Xikwembu, hi nga swi kuma swi nonon’hwa ku boxa swidyoho swa hina, hambi ku ri eka Yehovha. Xana ku nga humelela yini ehansi ka swiyimo swo tano? Eka Pisalema 32, Davhida u pfumerile a ku: “Loko nḍi miyerile [ematshan’wini yo boxa swidyoho], marambu ya mina a ma gudlagudla, hi ku konya ka mina hi siku hikwaro. Hikuv̌a nhlekanhi ni v̌usiku v̌oko ra [Yehovha] ri ṭhama ri nḍi tikela, matimba ya mina ma hunḍukile ku oma ka šimumu.” (Tindzimana 3, 4) Davhida la hambukeke u tsanile hikwalaho ka ku ringeta ku fihla xidyoho xakwe ni ku kandziyela ripfalo leri ri n’wi byelaka leswaku u ni nandzu. Ku karhateka swi n’wi hete matimba swinene lerova a a fana ni murhi lowu hlaseriweke hi dyandza, lowu nga riki na ndzhongo lowu hanyisaka. Entiyisweni, swi nga ha endleka a xanisekile emianakanyweni ni le mirini. Entiyisweni u lahlekeriwe hi ntsako wakwe. Loko un’wana wa hina a tikuma a ri exiyin’weni lexi fanaka, xana u fanele a endla yini?
Xikwembu Lexi “Lunghekeleke Ku Rivalela”
8 Davhida loyi a tisolaka u te: “Eku heteleleni ndzi phofule xidyoho xa mina eka wena, nandzu wa mina a ndzi wu funengetanga. . . . Naswona wena u ndzi rivalele nandzu wa swidyoho swa mina.” (Pisalema 32:5) Rito leri nge “rivalele,” ri hundzuluxela rito ra Xiheveru leri kahle-kahle ri vulaka ku “teka” kumbe “susa.” Ndlela leyi ri tirhisiweke ha yona laha ri vula ku sula “nandzu, xidyoho.” Leswi swi vula leswaku Yehovha u teke swidyoho swa Davhida a swi cukumeta ekule. Leswi handle ko kanakana swi suse ndzhwalo wa ku tivona nandzu, lowu a wu ri emakatleni ya Davhida. (Pisalema 32:3) Na hina hi xi tshemba hilaha ku heleleke Xikwembu lexi susaka swidyoho swa lava va kombelaka ndzivalelo hi ku va ni ripfumelo eka gandzelo ra nkutsulo ra Yesu.—Matewu 20:28.
Ku Tiphofula Swidyoho Loku Hanyisaka Hi Tlhelo Ra Moya
Endzhaku ka loko Davhida a vule xidyoho xakwe, a nga ha tlhelanga a tivona a ri xikangalafula. Marito yakwe eka tipisalema lawa a ma tsaleke malunghana ni ku tiphofula ma kombisa leswaku a a tiyimisele ku tirhela Xikwembu hi ku tshembheka. Hi xikombiso, pfula Pisalema 32. Eka ndzimana yo sungula, ha hlaya: “Wa tsaka loyi a rivaleriweke swiendlo swakwe swo pfukela, loyi xidyoho xakwe xi funengetiweke.” Ku nga khathariseki leswaku xidyoho i xikulu ku fikela kwihi, munhu a nga rivaleriwa loko a hundzuka hi mbilu hinkwayo. Ndlela yin’wana yo kombisa leswaku u hundzukile hakunene, i ku byarha vutihlamuleri hinkwabyo bya leswi a swi endleke, hilaha Davhida a endleke hakona. (2 Samuwele 12:13) A nga ringetanga ku tiyimelela emahlweni ka Yehovha kumbe a ringeta ku sola van’wana. Ndzimana 5 yi ri: “Eku heteleleni ndzi phofule xidyoho xa mina eka wena, nandzu wa mina a ndzi wu funengetanga. Ndzi te: ‘Ndzi ta phofulela Yehovha ku tlula ka mina nawu.’ Naswona wena u ndzi rivalele nandzu wa swidyoho swa mina.” Ku tiphofula ka xiviri ku endla leswaku munhu a titwa a ntshunxekile, lerova ripfalo ra munhu a ra ha tshameli ku n’wi kingindza hikwalaho ka swidyoho swakwe swa nkarhi lowu hundzeke.
Endla Ndzavisiso
Tinhla-nkulu Ta Buku Yo Sungula Ya Tipisalema
33:6—I yini “moya” wa nomu wa Yehovha? Moya lowu i matimba lama tirhaka ya Xikwembu kumbe moya lowo kwetsima, lowu xi wu tirhiseke ku tumbuluxa xibakabaka. (Genesa 1:1, 2) Wu vitaniwa moya wa nomu wa xona, hikuva ku fana ni ku hefemula ka matimba, wu nga rhumiwa leswaku wu ya endla swilo ekule.
APRIL 29–MAY 5
LESWI HI SWI DYONDZAKA EBIBELENI | PISALEMA 34-35
“Dzunisa Yehovha Mikarhi Hinkwayo”
A Hi Tlakuseni Vito Ra Yehovha Swin’we
11“Ndzi ta nkhensa Yehovha minkarhi hinkwayo; ku n’wi dzunisa ku ta va enon’wini wa mina nkarhi hinkwawo.” (Pisalema 34:1) Tanihi leswi a a tshama a ri eku balekeni, swi nga endleka Davhida a a kayivela swilo swo tala leswi vonakaka, kambe hilaha marito lawa ma kombisaka hakona, a nga pfumelanga leswaku mivilelo ya siku ni siku yi n’wi kavanyeta ku tiyimisela ka yena ku dzunisa Yehovha. Wa nga vona xikombiso lexinene eka hina loko hi langutana ni maxangu! Ku nga khathariseki leswaku hi le xikolweni, entirhweni, hi ni Vakreste-kulorhi kumbe hi le ku chumayeleni, ku navela ka hina lokukulu ku fanele ku va ku dzunisa Yehovha. Ehleketa hi swivangelo swa ntsandza-vahlayi leswi hi nga na swona swo endla tano! Hi xikombiso, hi nga kuma swilo swo tala leswi tsakisaka eka swihlamariso swa ntumbuluko wa Yehovha. Naswona xiya leswi a swi hetisiseke hi ku tirhisa xiphemu xa laha misaveni xa nhlengeletano yakwe! Hambileswi va nga hetisekangiki, Yehovha u tirhise vanhu vo tshembeka hi ndlela yo hlamarisa eminkarhini ya manguva lawa. Xana mintirho ya Xikwembu yi nga fanisiwa njhani ni ya vanhu lava endliwaka swikwembu? Xana a wu pfumelelani na Davhida loyi a tsaleke a ku: “A nga kona la fanaka na wena exikarhi ka swikwembu, Wena Yehovha, ni mintirho leyi fanaka ni ya wena a yi kona”?—Pisalema 86:8.
A Hi Tlakuseni Vito Ra Yehovha Swin’we
13”Moya-xiviri wa mina wu ta tibuma eka Yehovha; lavo rhula va ta swi twa, kutani va tsaka.” (Pisalema 34:2) Davhida a nga tibanga xifuva hi leswi a nga swi fikelela. Hi xikombiso, a nga tibumanga hileswi a kanganyiseke hosi ya le Gati. U swi xiyile leswaku u sirheleriwe hi Yehovha loko a ri eGati ni leswaku u kote ku baleka hikwalaho ko pfuniwa hi Yehovha. (Swivuriso 21:1) Hikwalaho, Davhida u bumabumele Yehovha ku nga ri yena n’wini. Hikwalaho ka sweswo, lava titsongahataka va tshinele eka Yehovha. Hilaha ku fanaka, Yesu u twarise vito ra Yehovha, naswona sweswo swi endle leswaku vanhu lava titsongahataka, lava dyondzisekaka va ta eka Yena. Namuntlha, vanhu lava titsongahataka va tinxaka hinkwato va nghena evandlheni ra misava hinkwayo ra Vakreste lava totiweke, leri Nhloko ya rona ku nga Yesu. (Vakolosa 1:18) Timbilu ta vanhu volavo lava titsongahataka ta khumbeka loko va twa vito ra Xikwembu ri vangamisiwa hi malandza ya xona lama titsongahataka ni loko va twa rungula ra Bibele, leri moya lowo kwetsima wa Xikwembu wu endlaka leswaku va ri twisisa.—Yohane 6:44; Mintirho 16:14.
A Hi Tlakuseni Vito Ra Yehovha Swin’we
15 “Ndzi vutise Yehovha, kutani a ndzi hlamula, u ndzi kutsurile eku chaveni ka mina hinkwako.” (Pisalema 34:4) Ntokoto lowu a wu ri wa nkoka eka Davhida. Hikwalaho, u ye emahlweni a ku: “Loyi a xanisekaka u vitanile, Yehovha a n’wi twa. Kutani U n’wi ponisile emaxangwini yakwe hinkwawo.” (Pisalema 34:6) Loko hi tihlanganisa ni vapfumeri-kulorhi, hi kuma nkarhi wo tala wo hlamusela mintokoto leyi akaka ya ndlela leyi Yehovha a hi pfuneke ha yona leswaku hi tiyisela swiyimo swo tika. Leswi swi tiyisa ripfumelo ra vapfumeri-kulorhi, hilaha marito ya Davhida ma tiyiseke ripfumelo ra vaseketeri vakwe hakona. Loko ku ri Davhida, vanghana va yena va “langute eka [Yehovha] kutani va vangama, ni swikandza swa vona a swi nga ta khomiwa hi tingana.” (Pisalema 34:5) Hambileswi a va balekela Hosi Sawulo, a va khomiwanga hi tingana. A va tiyiseka leswaku Xikwembu a xi pfuna Davhida, kutani swikandza swa vona a swi vangama. Hilaha ku fanaka, lava ha ku tsakelaka xikan’we ni lava ku nga khale va ri Vakreste va ntiyiso va langute eka Yehovha leswaku a va seketela. Leswi va voneke mpfuno wakwe, swikandza swa vona leswi vangamaka swi kombisa ku tiyimisela ka vona ku tshama va tshembekile.
Endla Ndzavisiso
Tinhla-nkulu Ta Buku Yo Sungula Ya Tipisalema
35:19—Xi vula yini xikombelo xa Davhida xa leswaku lava va n’wi vengaka va nga tsopeti tihlo ra vona? Ku tsopeta tihlo ku nga kombisa leswaku valala va Davhida a va tsaka loko makungu ya vona yo biha yo lwisana na yena ma humelela. Davhida a a kombela leswaku sweswo swi nga humeleli.