Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
MAY 6-12
LESWI HI SWI DYONDZAKA EBIBELENI
“U Nga Khunguvanyisiwi Hi Vanhu Vo Homboloka”
I Yini Leswi Nga Ta Herisiwa Loko Mfumo Wa Xikwembu Wu Ta?
4 Vanhu vo biha va byi khumba njhani vutomi bya hina sweswi? Endzhaku ka loko muapostola Pawulo a huhuteriwe ku vula ka ha ri emahlweni leswaku enkarhini wa makumu a ku ta fika “minkarhi ya mangava leyi swi nonon’hwaka ku langutana na yona,” u tlhele a huhuteriwa ku tsala a ku: “Vanhu vo homboloka ni vaxisi va ta ya emahlweni va nyanya evubihini bya vona.” (2 Tim. 3:1-5, 13) Xana se u ku vonile ku hetiseka ka marito lawa? Vo tala va hina hi tshame hi hlaseriwa hi vanhu vo homboloka, vo tanihi vanhu va madzolonga, lava nga ni xihlawuhlawu ni hi tinsulavoya leti nga ni tihanyi. Van’wana a va byi tumbeti vubihi bya vona kasi van’wana va byi tumbeta va tiendla onge va lulamile. Hambiloko hi nga si tshama hi hlaseriwa kambe swa hi khumba swilo leswi endliwaka hi vanhu vo homboloka. Hi twa ku vava swinene loko hi twa swilo swo biha leswi va swi endlaka. Ngopfungopfu loko hi vona vana, vadyuhari swin’we ni lava nga kotiki ku tisirhelela va xanisiwa. Vanhu vo biha va kombisa moya wa vuharhi ni wa vudimona. (Yak. 3:15) Ha tsaka hikuva Rito ra Xikwembu ri vula leswaku swilo swo biha swi ta hela.
Yehovha U Katekisa Lava Rivalelaka
10 Loko hi va ni xikhomela ha tivavisa. Yehovha u lava hi tshika xikhomela leswaku hi ta va ni ku rhula emoyeni. (Hlaya Vaefesa 4:31, 32.) U hi byela leswaku ‘hi nga hlundzuki ni leswaku hi tshika vukarhi.’ (Ps. 37:8) I vutlhari ku yingisa xitsundzuxo xexo. Swi nga hi vavisa emirini ni le miehleketweni loko hi va ni xikhomela. (Swiv. 14:30) Loko hi khoma munhu hi mbilu a swi nge n’wi vavisi tanihi leswi loko munhu a nwa chefu swi vavisaka yena n’wini ku nga ri munhu un’wana. Hikwalaho, loko hi rivalela van’wana hi ti rhula ndzhwalo. (Swiv. 11:17) Hi va ni ku rhula naswona hi kota ku ya emahlweni hi tirhela Yehovha.
“Kuma Ntsako Lowu Heleleke Eka Yehovha”
20 Kutani “lavo rhula va ta dya ndzhaka ya misava.” (Pisalema 37:11a) Kambe, xana i vamani vanhu “lavo rhula” lava ku vulavuriwaka ha vona? Rito leri hundzuluxeriweke ri va “rhula” ri huma eka rimitsu leri vulaka “ku xanisa, ku tsongahata, ku khomisa tingana.” Ina, “lavo rhula” hi lava va rindzelaka Yehovha hi ku titsongahata leswaku a lulamisa vuhomboloki hinkwabyo lebyi va weleke. “Hakunene va ta kuma ntsako lowu heleleke eku rhuleni lokukulu.” (Pisalema 37:11b) Hambi ku ri sweswi hi va ni ku rhula lokukulu eparadeyisini ya moya leyi fambisanaka ni vandlha ra ntiyiso ra Vukreste.
Endla Ndzavisiso
it-2-E 445
Tintshava
Ku nga cinca cinci, ku tshama hilaha ku nga heriki kumbe ku tlakuka. Ku nga cinca cinci na ku tshama hilaha ku nga heriki swi fambisana kahle na tintshava. (Esa 54:10; Hb 3:6; ringanisa na Ps 46:2.) Hikwalaho loko mupisalema a fanise ku lulama ka Yehovha ni “tintshava ta Xikwembu” (Ps 36:6) kumbexana a vula leswaku ku lulama ka Yehovha a ku cinca cinci. Kumbe tanihi leswi tintshava ti tlakuke, leswi swi nga ha vula leswaku ku lulama ka Yehovha ku ku tlula ekule ku lulama ka vanhu. (Ringanisa na Esa 55:8, 9.) Loko swi ta etimhakeni ta vukarhi bya Xikwembu lebyi chuluriwaka exindhichanini xa vunkombo, Nhlavutelo 16:20 yi ri: “tintshava a ta ha kumekanga.” Leswi swi kombisa leswaku hambi ku ri tintshava leti tlakukeke a ti nge ku balekeli ku chuluriwa ka vukarhi bya Xikwembu.—Ringanisa na Yr 4:23-26.
MAY 13-19
LESWI HI SWI DYONDZAKA EBIBELENI
Tshika Ku Titwa Nandzu Ku Tlula Mpimo
“Languta eMahlweni”
12 Hlaya 1 Yohane 3:19, 20. Hinkwerhu hi pfa hi titwa nandzu mikarhi yin’wana. Hi xikombiso, van’wana va titwa nandzu hikwalaho ka swilo leswi va swi endleke va nga si tiva ntiyiso. Van’wana va titwa nandzu hikwalaho ka swihoxo leswi va swi endleke se va khuvuriwile. (Rhom. 3:23) I ntiyiso leswaku hi lava ku endla swilo leswinene. Kambe “hinkwerhu hi endla swihoxo ko tala.” (Yak. 3:2; Rhom. 7:21-23) Hambileswi hi nga swi tsakeliki ku titwa nandzu kambe swi nga hi pfuna. Hikwalahokayini? Hikuva ku titwa nandzu swi nga endla hi lulamisa laha ku faneleke ni ku tiyimisela ku nga ha endli swihoxo leswi fanaka.—Hev. 12:12, 13.
13 Mikarhi yin’wana hi nga titwa nandzu ku tlula mpimo, leswi vulaka leswaku hi nga ya emahlweni hi titwa nandzu niloko se hi hundzukile naswona Yehovha a hi rivalerile. Ku titwa nandzu hi ndlela yoleyo swi ni khombo. (Ps. 31:10; 38:3, 4) Njhani? Twana hi ta makwerhu un’wana wa xisati loyi a a tshamela ku titwa nandzu hikwalaho ka swihoxo leswi a swi endleke khale. U ri: “A ndzi tibyela leswaku hambiloko ndzo tikarhata entirhweni wa Yehovha, ndzi ta va ndzi tikarhatela swa hava hikuva a ndzi nge ponisiwi.” Vo tala va hina hi tshame hi titwa ku fana ni makwerhu loyi. Hikwalaho, hi fanele hi tivonela eka ntlhamu lowu wa ku titwa nandzu ku tlula mpimo. Phela loko ho tshika ku tirhela Yehovha hikwalaho ko titwa nandzu ku tlula mpimo hambileswi se a hi rivaleleke, Sathana u ta tsaka!—Ringanisa na 2 Vakorinto 2:5-7, 11.
Hi Nga Ma Endla Njhani Masiku Ya Hina Leswaku Ma Va Lama Amukelekaka eMahlweni Ka Yehovha?
MASIKU ya ku hanya ka hina ma vonaka ma ri matsongo naswona ma hundza hi ku hatlisa. Mupisalema Davhida u anakanyisise hi ku koma ka vutomi kutani a susumeteleka ku khongela a ku: “Oho Yehovha, endla leswaku ndzi tiva makumu ya mina, ni mpimo wa masiku ya mina—leswi wu nga xiswona, leswaku ndzi ta tiva ku koma ka vukona bya mina. Waswivo! U endle masiku ya mina ma va matsongo; ni ku leha ka vutomi bya mina a hi nchumu emahlweni ka wena.” Lexi Davhida a a karhateka ha xona a ku ri ku hanya hi ndlela leyi tsakisaka Xikwembu, hi mavulavulelo ya yena ni hi swiendlo. Loko a hlamusela leswaku u titshege hi Xikwembu u te: “Ku langutela ka mina ku le ka wena.” (Pisalema 39:4, 5, 7) Yehovha u n’wi yingisile. Kunene u xiyisise mintirho ya Davhida kutani a n’wi nyika hakelo leyi faneleke.
Swa olova ku tikuma u khomekile hi mintirho yo tala evuton’wini. Leswi swi nga hi endla leswaku hi vilela, ngopfu-ngopfu loko hi ri ni swo tala swo swi endla kambe nkarhi wu ri wutsongo. Xana hi karhateka hi leswi Davhida a a karhateka ha swona—ku hanya hi ndlela leyi amukelekaka eka Xikwembu? Hakunene, Yehovha u xiya ni ku kambisisa un’wana ni un’wana wa hina hi vukheta. Eka malembe ya kwalomu ka 3 600 lama hundzeke, Yobo wanuna loyi a a chava Xikwembu, u pfumerile leswaku Yehovha u vona tindlela ta yena ni ku kambisisa mintirho ya yena hinkwayo. Yobo u tivutise xivutiso lexi nge: “Loko xi lava nhlamuselo, xana ndzi ta xi hlamula ndzi ku yini?” (Yobo 31:4-6, 14) Swa koteka ku endla leswaku masiku ya hina ma va ya risima emahlweni ka Xikwembu hi ku rhangisa swilo swa moya, hi yingisa milawu ya xona ni ku tirhisa nkarhi wa hina hi vutlhari. A hi kambisiseni timhaka leti hi vukheta.
Tlhela U Aka Vuxaka Bya Wena Na Yehovha
Vulavula na Yehovha nkarhi ni nkarhi. Tata wa wena wa le tilweni wa swi tiva leswaku ku titwa nandzu swi nga endla swi ku tikela ku khongela eka yena. (Rhom. 8:26) Hikwalaho, “phikelela exikhongelweni” u byela Yehovha ndlela leyi u swi tsakelaka hayona ku va munghana wakwe. (Rhom. 12:12) Andrej u ri: “A ndzi tivona nandzu ni ku khomiwa hi tingana. Kambe mikarhi hinkwayo loko ndzi heta ku khongela, a ndzi titwa ndzi antswa. A ndzi titwa ndzi ri ni ku rhula ka miehleketo.” Loko u nga swi tivi leswi u nga swi khongelelaka kambisisa xikhongelo xa ku hundzuka ka Hosi Davhida lexi kumekaka eka Pisalema 51 na 65.
Endla Ndzavisiso
Kombisa Leswaku Wa Tshembeka
16 Ku tikhoma i swa nkoka loko hi lava van’wana va hi tshemba. Loko hi kota ku tikhoma a hi nge ringeki ku byela van’wana leswi hi byeriweke leswaku hi nga byeli munhu. (Hlaya Swivuriso 10:19.) Swi nga hi tikela ku tikhoma, ngopfungopfu loko hi tirhisa ti-app to burisana eka tona. Loko hi nga tivoneli hi nga ha tikuma hi byele vanhu vo tala mhaka leyi a hi nga fanelanga hi yi vula. Loko ho kala hi swi vula, a hi nge he swi koti ku lawula ndlela leyi swi nga ta tirhisiwa hayona kumbe ndlela leyi swi nga ta vavisa van’wana hayona. Ku tikhoma ku tlhela ku hi pfuna leswaku hi miyela loko vakaneti va ringeta ku hi endla hi boxa vuxokoxoko lebyi nga vekaka vamakwerhu ekhombyeni. Leswi swi nga endleka loko hi konanisiwa hi maphorisa etikweni leri ntirho wa hina wu yirisiweke. Hi nga “veka tomu enon’wini” eka swiyimo leswi ni le ka swin’wana. (Ps. 39:1) Swi nga ri na mhaka leswaku hi tirhisana ni vandyangu, vanghana, vamakwerhu kumbe munhu un’wana ni un’wana hi fanele hi tshembeka. Hi fanele hi tikhoma loko hi lava ku tshembeka.
MAY 20-26
LESWI HI SWI DYONDZAKA EBIBELENI
Hikwalahokayini Hi Pfuna Van’wana?
Va Tsaka Vanhu Lava Hananaka
16 Vanhu lava hananaka hakunene a va nyiki hi leswi va lavaka ku kuma swo karhi. Yesu u te: “Kambe loko u endla nkhuvo, rhamba swisiwana, swigono, lava khutaka, lava feke mahlo; kutani u ta tsaka, hikuva a va na nchumu lexi va nga ku tlheriselaka xona.” (Luka 14:13, 14) Bibele yi ri: “Loyi a nga ni tihlo leri nga ni musa u ta katekisiwa.” Nakambe yi ri: “Wa tsaka un’wana ni un’wana la ehleketelaka xisiwana.” (Swiv. 22:9; Ps. 41:1) Hakunene hi fanele hi nyika hikuva ku pfuna van’wana swi tisa ntsako.
17 Loko Pawulo a tshaha marito ya Yesu lama nge, “ku nyika swi tisa ntsako lowukulu ku tlula ku amukela,” Pawulo a nga vulavuli ntsena hi ku nyika van’wana swo karhi kambe a vulavula na hi ku nyika xikhutazo ni nkongomiso eka lava swi lavaka. (Mint. 20:31-35) Hi marito ni hi xikombiso, muapostola u hi dyondzise nkoka wo nyikela hi nkarhi wa hina, matimba ni rirhandzu.
18 Valavisisi va tidyondzo ta social science na vona va xiye leswaku ku nyika swi tisa ntsako. Hi ku ya hi xihloko xin’wana, ‘vanhu va vika leswaku va kuma ntsako lowukulu endzhaku ko endlela van’wana swiendlo swa musa.’ Valavisisi va vula leswaku ku ‘pfuna van’wana i swa nkoka leswaku hi ta titwa hi hanya vutomi lebyi nga ni xikongomelo’ hikuva ku endla tano ‘swi enerisa swilaveko swa vanhu.’ Hikwalaho, vativi va ringanyeta leswaku vanhu va fanele va tinyiketela ku endla mintirho leyi pfunaka vaaki leswaku va antswisa rihanyo ra vona ni ku kuma ntsako. Sweswo a swi va hlamarisi vanhu lava tekaka Bibele tanihi Rito ra Muvumbi wa vanhu la nga ni rirhandzu, ku nga Yehovha.—2 Tim. 3:16, 17.
Yehovha U Ta Ku Seketela
7 Kambe loko u vabya, Yehovha u ta ku chavelela ni ku ku seketela, hilaha a endleke hakona eka malandza ya yena ya khale. Hosi Davhida u tsale a ku: “Wa tsaka un’wana ni un’wana la ehleketelaka xisiwana; Hi siku ra khombo Yehovha u ta n’wi ponisa. Yehovha u ta n’wi rindza, a n’wi londzovota a hanya.” (Pisalema 41:1, 2) Entiyisweni, Davhida a a nga vuli swona leswaku vanhu lavanene lava a va hanya hi nkarhi wolowo lava a va swi khoma kahle swisiwana a va nga ta fa. Yehovha a a ta va pfuna njhani vanhu volavo vo lulama? Davhida wa hlamusela: “Yehovha u ta n’wi seketela ehenhla ka mubedo wa vuvabyi; kunene sangu ra yena u ta ri cinca hi nkarhi wa ku vabya.” (Pisalema 41:3) Yehovha u swi tiva kahle leswi karhataka malandza ya yena naswona a nge ma rivali. U ta ma nyika xivindzi ni vutlhari. Nakambe Yehovha u endle miri wa munhu leswaku wu swi kota ku titshungula.
Tekelela Ntwelavusiwana Wa Yehovha
17 Hambileswi ku kombisa van’wana ntwelavusiwana swi ku vuyerisaka kambe xexo a ku fanelanga ku va xivangelo xa wena lexikulu xo lava ku hlakulela mfanelo leyi. Xivangelo lexikulu xo kombisa ntwelavusiwana ku fanele ku va ku lava ku tekelela ni ku vangamisa Yehovha Xikwembu loyi rirhandzu ni ntwelavusiwana swi humaka eka yena. (Swiv. 14:31) Yehovha u hi vekela xikombiso lexi hetisekeke. Onge hi nga endla leswi hi swi kotaka leswaku hi n’wi tekelela hi ku kombisa van’wana ntwelavusiwana, sweswo swi ta endla leswaku hi rhandzana swinene tanihi vamakwerhu ni ku tlhela hi va ni vuxaka lebyinene ni vaakelani va hina.—Gal. 6:10; 1 Yoh. 4:16.
Endla Ndzavisiso
it-2-E 16
Yehovha
Swiendlakalo hinkwaswo swa le Bibeleni, swi vulavula hi ku kwetsimisiwa ka vuhosi bya Yehovha naswona swi le rivaleni leswaku xikongomelo xa Yehovha Xikwembu ku sukela eku sunguleni: a ku ri leswaku ku kwetsimisiwa vito ra xona. Ku kwetsimisiwa koloko ku ta basisa vito ra Xikwembu eka swihehlo hinkwaswo leswi xi hehliwaka ha swona. Kambe ku laveka swo tala ku tlula sweswo, ku nga leswaku swivumbiwa hinkwaswo swo tlhariha swa le matilweni ni le misaveni swi xixima vito ra xona tanihi leswi ri kwetsimaka. Hi hala tlhelo swi fanele swi xixima vuhosi byakwe, swi lava ku n’wi tirhela, swi tsakela ku endla ku rhandza ka yena naswona swi endla tano hi ku swi rhandza hikwalaho ka leswi swi n’wi rhandzaka. Xikhongelo xa Davhida eka Yehovha lexi nga eka Pisalema 40:5-10 xi swi hlamusela kahle leswi ni leswi ku kwetsimisa vito ra Yehovha swi vulaka swona. (Xiya leswi boxiweke hi muapostola eka pisalema ni leswi vuriweke hi Yesu Kreste eka Hv 10:5-10.)
MAY 27–JUNE 2
LESWI HI SWI DYONDZAKA EBIBELENI
Vuyeriwa Eka Ndzetelo Wa Yehovha
Tinhla-nkulu Ta Buku Ya Vumbirhi Ya Tipisalema
42:4, 5, 11; 43:3-5. Loko hi xivangelo xo karhi lexi hi nga kotiki ku xi lawula hi tikuma hi hambane ni vandlha ra Vukreste swa xinkarhana, ku anakanya hi ndlela leyi a hi tiphina ha yona loko hi hlangane ni vandlha swi nga hi tiyisa. Hambileswi eku sunguleni hi nga karhatiwaka hi xivundza, sweswo swi ta hi tsundzuxa leswaku Xikwembu i vutumbelo bya hina naswona hi fanele hi titshega hi xona leswaku xi hi ntshunxa.
Endla Leswaku Nkarhi Wo Dyondza Wu Va Lowu Tsakisaka Wu Tlhela Wu Vuyerisa
1 KHONGELA: Goza ro sungula leri hi nga ri tekaka i ku khongela. (Ps. 42:8) Ha yini? Hikuva hi fanele hi teka ku dyondza Rito ra Xikwembu tanihi xiphemu xa vugandzeri bya hina. Hikwalaho, hi fanele hi kombela Yehovha leswaku a hi pfula miehleketo ni ku hi nyika moya wakwe lowo kwetsima. (Luka 11:13) Barbara, murhumiwa un’wana wa khale, u ri: “Minkarhi hinkwayo ndza khongela ndzi nga si hlaya kumbe ku dyondza Bibele. Endzhaku ka sweswo, ndzi twa leswaku Yehovha u na mina nileswaku wa swi tsakela leswi ndzi swi endlaka.” Ku khongela emahlweni ko dyondza swi hi pfula miehleketo ni mbilu leswaku hi swi twisisa hi ku helela swilo leswi hi swi dyondzaka.
“Mavoko Ya Wena Ma Nga Tshuki Ma Lelemela”
11 Ha tiyisiwa hi tidyondzo leti hi ti kumaka eminhlanganweni ya Vukreste, etinhlengeletanweni ni le swikolweni leswi kongomisiwaka hi Xikwembu. Tidyondzo toleto ti nga hi pfuna leswaku hi va ni xikongomelo lexinene, hi tivekela tipakani ta moya ni ku endla swiavelo swa hina. (Ps. 119:32) Xana wa swi hisekela ku kuma tidyondzo toleto leti nga ta ku tiyisa?
12 Yehovha u pfune Vaisrayele leswaku va hlula Vaamaleke ni Vaetiyopiya naswona u nyike Nehemiya ni vanhu lava a ri na vona matimba leswaku va heta ntirho wo pfuxeta makhumbi. Hilaha ku fanaka Xikwembu xi ta hi nyika matimba leswaku hi lwisana ni nkaneto, ndzingo wo hetiwa matimba hi vanhu lava nga tsakeriki ni ku vilela leswaku hi endla ntirho wo chumayela. (1 Pet. 5:10) Nilokoswiritano, a hi langutelanga leswaku Yehovha a endla swilo leswi hinkwaswo hi singita. Ku ri na sweswo, hi fanele hi tikarhata. Sweswo swi katsa ku hlaya Rito ra Xikwembu siku ni siku, ku lunghiselela ni ku tlhela hi va kona eminhlanganweni vhiki ni vhiki, hi endla dyondzo ya munhu hi yexe swin’we ni vugandzeri bya ndyangu ni ku va minkarhi hinkwayo hi khongela eka Yehovha. Hi nga tshuki hi pfumelela swilo kumbe mintirho yin’wana yi kavanyeta ndlela leyi Yehovha a yi tirhisaka leswaku a hi tiyisa ni ku hi khutaza. Loko u xiya leswaku ku ni laha u faneleke u antswisa kona, kombela Xikwembu leswaku xi ku pfuna. Kutani xiya ndlela leyi moya wakwe wu ‘tirhaka ha yona endzeni ka wena leswaku u va ni matimba ya ku rhandza ni ku endla.’ (Filp. 2:13.) I yini leswi u nga swi endlaka leswaku u tiyisa mavoko ya van’wana?
Endla Ndzavisiso
it-1-E 1242
Mhungubye
Hi ndlela yo fanekisela ematsalweni mhungubye yi tirhisiwe ko hlayanyana ku hlamusela xiyimo xo karhi. Loko Yobo a hlamusela xiyimo xakwe lexi vavaka u vule leswaku “u hundzuke makwavo wa timhungubye.” (Yb 30:29) Loko vanhu va Xikwembu va hluriwa hi ndlela leyi khomisaka tingana, mupisalema u vule leswi loko a hlamusela ndlela leyi nyimpi a yi hisa, laha timhungubye a ti hlengeletane kona leswaku ti dya lava dlayiweke (ringanisa na Ps 68:23), ku rila: “u hi pfotlosile endhawini leyi ku tshamaka timhungubye.” (Ps 44:19) Loko Babilona a rhendzele muti wa Yerusalema hi 607 B.C.E. xiyimo lexi tshikileleka xa ndlala xi endle leswaku vamanana va khoma vana va vona hi tihanyi. Hi yona mhaka Yeremiya a kombiseke ku hambana exikarhi ka tihanyi ta “vanhu va yena” ni ndlela leyi timhungubye’ ti hlayisaka vana va tona hayona.—Swir 4:3, 10.
JUNE 3-9
LESWI HI SWI DYONDZAKA EBIBELENI
Risimu Ra Mucato Wa Hosi
Tsakani Hikwalaho Ka Nkhuvo Wa Vukati Bya Xinyimpfana!
8 Hlaya Pisalema 45:13, 14a. Mutekiwa u tisiwa a “vangama swinene” enkhubyeni wa vukati wa hosi. Eka Nhlavutelo 21:2, mutekiwa u fanisiwa ni muti, ku nga Yerusalema Lowuntshwa, naswona u “tisasekisele nuna wa yena.” Muti lowu wa le tilweni wu ni “ku vangama ka Xikwembu” naswona wa vangama, “ku fana ni ribye ra risima ngopfu, kukotisa ribye ra yaspere leri hatimaka ku fana ni kristala yo tenga.” (Nhlav. 21:10, 11) Ku vangama ka muti wa Yerusalema Lowuntshwa ku hlamuseriwe hi ndlela yo saseka ebukwini ya Nhlavutelo. (Nhlav. 21:18-21) A swi hlamarisi leswi mupisalema a hlamuselaka mutekiwa tanihi loyi a ‘vangamaka swinene’! Phela, nkhuvo wa vukati wa hosi wu endleka etilweni.
9 Mutekiwa u tisiwa eka Muteki—Hosi leyi nga Mesiya. A a ri karhi a n’wi lunghiselela, ‘a n’wi basisa hi ku n’wi hlantswa hi mati a tirhisa rito.’ Wa ‘kwetsima naswona a nga na xisolo.’ (Efe. 5:26, 27) Mutekiwa wakwe na yena u fanele a ambala a fanelekela xiendlakalo lexi. Ndlela leyi a nga ambala ha yona ya xi fanelekela xiendlakalo lexi. “Swiambalo swakwe swi khavisiwe hi nsuku,” naswona “u ta tisiwa eka hosi hi nguvu leyi lukiweke.” Eka nkhuvo wa vukati bya Xinyimpfana, “u pfumeleriwe ku ambala nguvu ya ntsembyana wa risima, yo vangama, leyi baseke, hikuva nguvu ya ntsembyana wa risima yi yimela swiendlo swo lulama swa vakwetsimi.”—Nhlav. 19:8.
Xana Buku Ya Nhlavutelo Yi Ri Yini Hi Vumundzuku Bya Wena?
10 Yehovha u ta endla yini loko vanhu vakwe va hlaseriwa hi tihanyi? U ri: “Ndzi ta kariha swinene.” (Ezek. 38:18, 21-23) Nhlavutelo ndzima 19 yi hlamusela leswi nga ta endleka. Yehovha u ta rhumela N’wana Wakwe leswaku a ya sirhelela vanhu Vakwe ni leswaku a hlula valala va vona. Yesu u ta joyiniwa hi “mavuthu ya le tilweni” ku nga tintsumi to tshembeka swin’we ni lava 144 000. (Nhlav. 17:14; 19:11-15) Yi ta hela njhani nyimpi leyi? Ku ta herisiwa vanhu ni mihlangano leyi kanetaka Yehovha.—Hlaya Nhlavutelo 19:19-21.
11 Ehleketa ndlela leyi vanhu lava tshembekaka laha misaveni va nga ta titwa hayona loko va pona ku heriseriwa makumu ka valala va Xikwembu! Mayana nkarhi wolowo wo tsakisa! Hambileswi ku nga ta va ni ntsako lowukulu etilweni loko Babilona Lonkulu a lovisiwa, kambe ku ni nchumu wun’wana lowu nga ta endla leswaku ku biwa mikulungwana. (Nhlav. 19:1-3) “Mucato wa Xinyimpfana” i xiendlakalo xa nkoka ebukwini ya Nhlavutelo.—Nhlav. 19:6-9.
12 Xana mucato lowu wu ta endleka rini? Loko ku nga si tlhekeka nyimpi ya Armagedoni hinkwavo lava 144 000 va ta va va ri etilweni. Hambiswiritano, wolowo wu ta va wu nga ri nkarhi wa mucato wa Xinyimpfana. (Hlaya Nhlavutelo 21:1, 2.) Mucato wa Xinyimpfana wu ta endleka endzhaku ka nyimpi ya Armagedoni naswona valala hinkwavo va Xikwembu va ta va va lovisiwile.—Ps. 45:3, 4, 13-17.
it-2-E 1169
Nyimpi
Loko nyimpi leyi yi fika emakumu, vanhu emisaveni va ta tiphina hi ku rhula ku ringana malembe ya gidi. Pisalema leyi nge “[Yehovha] u herisa tinyimpi emisaveni hinkwayo. U tshova vurha a tshovelela ni tlhari; U hisa makalichi ya nyimpi hi ndzilo,” yi hetiseke loko Xikwembu xi endla leswaku etikweni ra Israyele ku va ni ku rhula hikuva xi tshovelela switirhisiwa swa nyimpi swa valala va Vaisrayele. Endzhaku ka loko Kreste a hlule vahlohloteri va nyimpi eHar–Magedoni, vanhu emisaveni hinkwayo va ta tiphina hilaha ku heleleke naswona va ta eneriseka hi ku rhula loku nga ta va ku ri kona. (Ps 46:8-10) Lava nga ta kuma vutomi lebyi nga heriki, hi lava va nga ta va va hundzule “mabanga ya vona ma va swikomu ni matlhari ya vona ma va swikhutulo” naswona “a va nge he dyondzi nyimpi.” “Hikuva Yehovha wa mavuthu u swi vurile.”—Esa 2:4; Mik 4:3, 4.
Endla Ndzavisiso
I Yini Leswi Nga Ta Herisiwa Loko Mfumo Wa Xikwembu Wu Ta?
9 Ku ta sala yini loko minhlangano ya vukanganyisi yi nga ha ri kona? Xana ka ha ta va ni minhlangano ya tipolitiki endzhaku ka Armagedoni? Bibele yi ri: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” (2 Pet. 3:13) Matilo ya khale ni misava ya khale ni mifumo leyi nga ni vukanganyisi swin’we ni vanhu lava yi seketelaka va ta herisiwa. Xana swi ta siviwa hi yini? Xiga lexi nge, “matilo lamantshwa ni misava leyintshwa” xi vula leswaku ku ta va ni mfumo lowuntshwa swin’we ni vanhu lavanene lava nga ta fumiwa hi wona. Yesu Kreste hosi ya Mfumo lowu, u ta kombisa timfanelo ta Yehovha Xikwembu hi ku helela, tanihi leswi Yehovha a nga Xikwembu lexi hlelekeke. (1 Kor. 14:33) Kutani “misava leyintshwa” yi ta va yi hlelekile. Ku ta va ni vavanuna lavanene lava nga ta va tihosana emisaveni. (Ps. 45:16) Vanhu lava va ta kongomisiwa hi Kreste swin’we ni lava 144 000 a nga ta fuma na vona. Anakanya hi nkarhi lowu minhlangano hinkwayo yo homboloka yi nga ta herisiwa ha wona ivi yi siviwa hi hulumendhe leyi nga ni vun’we naswona yi nga riki na vukanganyisi!
JUNE 10-16
LESWI HI SWI DYONDZAKA EBIBELENI
Vatswari—Tiyisani Ndlela leyi Mindyangu Ya N’wina Yi Tshembaka Nhlangano Wa Yehovha Hayona
Vugandzeri Bya Ntiyiso Byi Ta Ku Endla U Tshama U Tsakile
11 Hi gandzela Yehovha loko hi dyondza Rito rakwe ni ku dyondzisa vana va hina ha yena. Vaisrayele a va tshika ku endla migingiriko ya siku hi Savata leswaku va ta kota ku tiyisa vuxaka bya vona na Yehovha. (Eks. 31:16, 17) Vanhu vo tshembaka a va dyondzisa vana va vona hi Yehovha ni hi vunene byakwe. Un’wana ni un’wana wa hina u fanele a tivekela nkarhi wo hlaya ni ku dyondza Rito ra Xikwembu. Leyi i ndlela yin’wana yo gandzela Yehovha naswona yi hi pfuna leswaku hi tshinela eka yena. (Ps. 73:28) Loko hi dyondza swin’we hi ri ndyangu, hi ta kota ku pfuna vana va hina leswaku va va ni vuxaka lebyinene na Tata wa hina wa rirhandzu la nge ematilweni.—Hlaya Pisalema 48:13.
U Ni Xivangelo Xo Tsaka
“Gwirimani mi rhendzela Siyoni, mi famba-famba eka wona, hlayani swihondzo swa wona. Vekani timbilu ta n’wina erirhangwini ra wona. Kambelani swihondzo swa wona swo tshama eka swona, leswaku mi ta rungulela xitukulwana xa nkarhi lowu taka.” (Ps. 48:12, 13) Kwalaho mupisalema u khutaze Vaisrayele ku languta Yerusalema va ri ekusuhi. Xana wa swi ehleketa swilo swa nkoka leswi a swi tsundzukiwa hi mindyangu ya Vaisrayele, leyi tekeke riendzo ro ya emutini wo kwetsima ku ya hlanganyela eminkhubyeni ya lembe ni lembe ni ku vona tempele ya wona yo saseka? Yi fanele yi susumeteleke ku swi “rungulela xitukulwana xa nkarhi lowu taka.”
Ehleketa hi hosi ya xisati ya le Xeba, leyi a yi nga swi tshembi swiviko swa mfumo lowukulu wa Solomoni ni vutlhari byakwe lebyikulu. I yini leswi yi susumeteleke ku pfumela leswaku swilo leswi yi swi tweke a swi ri ntiyiso? U te: “A ndzi vanga na ripfumelo emaritweni ya vona ku fikela loko ndzi ta leswaku mahlo ya mina ma tivonela hi woxe.” (2 Tikr. 9:6) Hakunene swilo leswi hi swi ‘vonaka hi mahlo ya hina’ swi nga hi khumba timbilu.
U nga va pfuna njhani vana va wena leswaku va vona swihlamariso swa nhlengeletano ya Yehovha hi ‘mahlo ya vona vini’? Loko ku ri ni rhavi ra Timbhoni ta Yehovha ekusuhi ni ndhawu leyi mi tshamaka eka yona, endla matshalatshala yo ri endzela. Hi xikombiso, Mandy na Bethany va kulele etikweni leri Bethele ya kona yi nga ekule ni laha va tshamaka kona hi tikhilomitara ta 1 500. Kambe vatswari va vona a va tshamela ku teka maendzo yo ya valanga eBethele, ngopfu-ngopfu enkarhini lowu vana va vona va vanhwanyana a va ha ri vatsongo. Va te: “Loko hi nga si ya eBethele, a hi ehleketa leswaku a ku ri ndhawu yo kwetsima ngopfu laha ku tshamaka vatswatsi ntsena. Kambe hi hlangane ni vantshwa lava a va tirhela Yehovha hi matimba naswona a va tiphina hi ntirho wa vona. Hi vone leswaku nhlengeletano ya Yehovha a yi nga heleli laha a hi tshama kona ntsena, naswona nkarhi wun’wana ni wun’wana lowu a hi endzela eBethele a hi kuma matimba lamakulu.” Ku vona nhlengeletano ya Xikwembu ekusuhi swi susumetele Mandy na Bethany leswaku va sungula ku phayona naswona va kale va vitaniwa eBethele leswaku va ya tirha tanihi vatirhi va ku tirhandzela va nkarhinyana.
Tikhomeni Tanihi Vanhu Lava Nga Ta Hanya eMfun’weni Wa Xikwembu!
5 Dyondza hi matimu ya tiko ra kona. Munhu la lavaka ku va muaka-tiko emfun’weni wa vanhu a nga ha boheka ku dyondza matimu ya mfumo wolowo. Hilaha ku fanaka, lava lavaka ku va vaaka-tiko eMfun’weni wa Xikwembu va fanele va dyondza hinkwaswo leswi va nga swi kotaka hi Mfumo wa Xikwembu. Xiya xikombiso lexi vekiweke hi vana va Kora, lava a va tirha eIsrayele wa khale. A va wu rhandza muti wa Yerusalema ni ndhawu ya wona yo gandzela eka yona naswona a va rhandza ku vulavula hi matimu ya wona. A va nga tsakisiwi ngopfu hi ku saseka ka wona kambe a va tsakisiwa hileswi muti ni ndhawu yo gandzela eka yona a swi yimela swona. Yerusalema a wu ri “muti wa Hosi Leyikulu,” ku nga Yehovha hikuva a wu ri ntsindza wa vugandzeri byo tenga. Nawu wa Yehovha a wu dyondzisiwa kwalaho. Lava a va fumiwa hi Hosi ya le Yerusalema a va ri vanhu lava a va tsakeriwa ni ku rhandziwa hi Yehovha. (Hlaya Pisalema 48:1, 2, 9, 12, 13.) Ku fana na vona, xana wa swi tsakela ku dyondza ni ku byela van’wana hi matimu ya xiphemu xa laha misaveni xa nhlengeletano ya Yehovha? Loko u ya u dyondza hi nhlengeletano ya Xikwembu ni hi ndlela leyi Yehovha a seketelaka vanhu va yena ha yona, Mfumo wa Xikwembu wu ta ya wu va wa xiviri eka wena. Leswi swi ta kurisa ku navela ka wena ko chumayela mahungu lamanene ya Mfumo.—Yer. 9:24; Luka 4:43.
Endla Ndzavisiso
it-2-E 805
Rifuwo
Tanihi tiko leri fuweke, Vaisrayele a va swi kota ku tiphina hi swakudya ni swa ku n’wa (1Th 4:20; Ekl 5:18, 19), naswona rifuwo rero ri va sirhelerile eka swiphiqo leswi vangiwaka hi vusiwana. (Swiv 10:15; Ekl 7:12) Hambileswi a ku ri xikongomelo xa Xikwembu leswaku Vaisrayele va tiphina hi ntirho wa mavoko ya vona (ringanisa na Swiv 6:6-11; 20:13; 24:33, 34), hi yona mhaka a tlheleke a va tsundzuxa hi khombo ra ku va va n’wi rivala tanihi hi xihlovo xa rifuwo ra vona kutani va sungula ku veka ntshembo wa vona eka rifuwo. (Dt 8:7-17; Ps 49:6-9; Swiv 11:4; 18:10, 11; Yr 9:23, 24) Va tsundzuxiwile leswaku rifuwo hi rona kambe i ra xinkarhana (Swiv 23:4, 5), naswona a ri nge nyikiwi Xikwembu tanihi nkutsulo leswaku ri ntshunxa munhu eku feni (Ps 49:6, 7), naswona a hi ra nkoka eka vafi (Ps 49:16, 17; Ekl 5:15). Va kombisiwile leswaku loko va khomelela eka nkoka wa ku va ni rifuwo swi ta endla leswaku va dyelela van’wana naswona Yehovha a nga swi tsakeli sweswo. (Swiv 28:20; ringanisa na Yr 5:26-28; 17:9-11.) Va tlhele va khutaziwa ku “xixima Yehovha hi swilo swa [vona] swa nkoka.”—Swiv 3:9.
JUNE 17-23
LESWI HI SWI DYONDZAKA EBIBELENI
Leswi U Nga Swi Endlaka Leswaku U Papalata Ku Endla Swihoxo Leswikulu
U Nga Yi Hlayisa Njhani Mbilu Ya Wena?
4 Eka Swivuriso 4:23, rito “mbilu” ri fambisana ni leswi tindzimana tin’wana ta Bibele ti swi vulaka ‘miehleketo,’ ku nga nchumu lowu vanhu va nga kotiki ku wu vona. (Hlaya Pisalema 51:6 ni nhlamuselo ya le hansi.) Hi marito man’wana, “mbilu” yi vula leswi hi swi anakanyaka, ndlela leyi hi titwaka ha yona, leswi hi susumetelaka ku endla swo karhi ni leswi hi swi navelaka. Hi leswi hi nga xiswona hakunene endzeni ku nga ri leswi hi nga xiswona ehandle.
5 Xiya ndlela leyi rihanyo ra hina ri wu kombisaka ha yona nkoka wa leswi hi nga swona endzeni. Xo sungula, leswaku hi va ni rihanyo lerinene, hi fanele hi dya swakudya leswi nga ni rihanyo ni ku endla vutiolori nkarhi na nkarhi. Hilaha ku fanaka, leswaku hi hlayisa mbilu ya hina yo fanekisela yi ri leyi hanyeke kahle, hi fanele hi hlaya Bibele ni mikandziyiso leyi sekeriweke eBibeleni naswona hi tshama hi ri karhi hi kombisa leswaku hi ni ripfumelo eka Yehovha. Hi kombisa leswaku hi ni ripfumelo eka Yehovha hi ku tirhisa leswi hi swi dyondzaka ni ku byela van’wana hi ripfumelo ra hina. (Rhom. 10:8-10; Yak. 2:26) Xa vumbirhi, hi nga ha vonaka hi hanye kahle hambiloko endzeni hi ri karhi hi vabya. Hilaha ku fanaka, loko hi endla mitirho leyi fambisanaka ni vugandzeri bya hina, hi nga ehleketa leswaku hi ni ripfumelo leri tiyeke kambe ku navela ko biha ku ri karhi ku kula endzeni ka hina. (1 Kor. 10:12; Yak. 1:14, 15) Hi fanele hi tsundzuka leswaku Sathana u lava leswaku hi ehleketa ku fana na yena. Xana kahlekahle a nga swi endla njhani sweswo? Hi nga tisirhelela njhani?
Hi Nga Swi Kota Ku Tshama Hi Tengile
5 Yehovha u ta hi pfuna leswaku hi lwisana ni mianakanyo leyi thyakeke loko hi kombela mpfuno wa yena hi xikhongelo nkarhi hinkwawo. U hi nyika moya wakwe lowo kwetsima leswaku hi kota ku tshama hi tengile. Loko hi khongela, hi nga byela Yehovha leswaku hi lava leswaku leswi hi swi anakanyaka swi n’wi tsakisa. (Pisalema 19:14) Hi ku titsongahata hi n’wi kombela leswaku a kambisisa loko ku ri ni ku navela loku nga ni khombo etimbilwini ta hina, loku nga hi endlaka hi dyoha. (Pisalema 139:23, 24) Minkarhi hinkwayo, kombela Yehovha leswaku a ku pfuna u papalata mahanyelo yo biha naswona u endla swilo leswinene, hambiloko swi tika.—Matewu 6:13.
6 Loko hi nga si dyondza hi Yehovha, swi nga ha endleka a hi rhandza ku endla swilo leswi a nga swi amukeliki naswona hi nga ha va ha ha lwisana ni ku navela koloko ko biha. Kambe Yehovha a nga hi pfuna leswaku hi hundzuka kutani hi endla leswi n’wi tsakisaka. Hi xikombiso, endzhaku ka loko Hosi Davhida a etlele na Bati-xeba, u hundzukile kutani a kombela Yehovha leswaku a n’wi nyika “mbilu yo tenga” a tlhela a n’wi pfuna leswaku a yingisa. (Pisalema 51:10, 12) Hikwalaho loko hi tshame hi va ni ku navela lokukulu ka swilo leswi thyakeke naswona ha ha lwisana na kona, Yehovha a nga hi pfuna leswaku hi swi navela swinene ku n’wi yingisa ni ku endla leswi lulameke. A nga hi pfuna leswaku hi lawula mianakanyo ya hina leyi nga hetisekangiki.—Pisalema 119:133.
Endla Ndzavisiso
it-1-E 644
Dowege
Muedomu loyi a tirha tanihi ndhuna ya varisi va hosi Sawulo naswona a ri ni vutihlamuleri byo va murhangeri. (1Sa 21:7; 22:9) Swi le rivaleni leswaku Dowege a ri wa vukhongeri bya xiyuda. Hikwalaho ka leswi a “pfaleriwe emahlweni ka Yehovha” eNobo, kumbexana hikwalaho ka xihlambanyo, ku tikhoma ku biha, kumbe hi leswi a ehleketeleriwa ku va ni nhlokonho, Dowege u vone muprista lonkulu Ahimeleke a ri karhi a nyika Davhida xinkwa ni banga ra Goliyadi. Endzhaku ka loko Sawulo, a vulavule ni malandza yakwe a vula leswaku va n’wi jikerile, Dowege u hlamusele leswi a swi voneke eNobo. Endzhaku ka loko a vitane muprista lonkulu swin’we ni va vaprista van’wana va le Nobo naswona a vutise Ahimeleke swivutiso, Sawulo u lerise varindzi leswaku va dlaya vaprista volavo. Loko varindzi va ala, hi ku ya hi xileriso xa Sawulo, Dowege handle ko kanakana u dlaye vaprista lava ringanaka 85. Endzhaku ka xiendlo xexo xo biha, Dowege u hlasele muti wa Nobo, a dlaya vaaki hinkwavo, lavatsongo ni lavakulu swin’we ni swifuwo swa vona.—1Sa 22: 6-20.
Hilaha xingheniso xa Pisalema 52 xi vulaka ha kona, Davhida u tsale leswi mayelana na Dowege: “Maxangu lawa ririmi ra wena ri ma bohaka, ma kariha kukota rikari, ma tirha vuxisi. U rhandze swo biha ku tlula leswinene, mavunwa ku tlula ku vulavula swo lulama. U rhandze marito hinkwawo lama lovisaka, Wena ririmi leri xisaka.”—Ps 52:2-4. Vuhundzuluxeri Bya Misava Leyintshwa.
JUNE 24-30
LESWI HI SWI DYONDZAKA EBIBELENI
Xikwembu Xi Na Wena
Tlhariha—U Chava Xikwembu!
10 Siku rin’wana, Davhida u balekele eka Akixi, hosi ya le mutini wa Vafilista lowu vuriwaka Gati, laha Goliyadi a a huma kona. (1 Samuwele 21:10-15) Malandza ya hosi ma vule leswaku Davhida i nala wa tiko ra vona. Xana Davhida u langutane njhani ni xiyimo xexo xa khombo? U khongele eka Yehovha swi huma embilwini. (Pisalema 56:1-4, 11-13) Hambileswi Davhida a bohekeke ku tiendla onge wa penga leswaku a ta kota ku huma eka xiyimo xexo, a a swi tiva leswaku kahle-kahle i Yehovha loyi a n’wi poniseke hi ku katekisa matshalatshala yakwe. Ku va Davhida a titshege hi Yehovha hi mbilu yakwe hinkwayo a swi kombisa leswaku a a chava Xikwembu hakunene.—Pisalema 34:4-6, 9-11.
11 Ku fana na Davhida, hi nga kombisa leswaku hi chava Xikwembu hi ku kholwa xitshembiso xa xona xa leswaku xi ta hi pfuna ku tiyisela swiphiqo swa hina. Davhida u te: “Andlala ndlela ya wena eka Yehovha, u n’wi tshemba, yena u ta teka goza.” (Pisalema 37:5) Leswi a swi vuli swona leswaku hi fanele hi veka swiphiqo swa hina emavokweni ya Yehovha kutani hi khondla mavoko hi ehleketa leswaku u ta hi tlhantlhela swona. Davhida a nga khongelanga eka Xikwembu ntsena leswaku xi n’wi pfuna kutani a tshama a khondla mavoko. U tirhise vuswikoti ni vutivi lebyi Yehovha a n’wi nyikeke byona kutani a langutana ni xiphiqo xa yena. Kambe, Davhida a a swi tiva leswaku matshalatshala ya munhu hi yexe a ma nge humeleli. Ni le ka hina swi fanele swi va tano. Loko hi endle hinkwaswo leswi nga ematimbeni ya hina, hi fanele hi tshika leswin’wana emavokweni ya Yehovha. Entiyisweni, hakanyingi ku hava lexi hi nga xi endlaka handle ko titshega hi Yehovha. Laha hi kona hi faneleke hi kombisa ku chava ka hina Xikwembu hi ku kongoma. Hi nga chaveleleka loko hi twa marito ya Davhida lama humaka embilwini loko a ku: “Lava va vaka ni xinakulobye na Yehovha hi lava va n’wi chavaka.”—Pisalema 25:14.
Ku Hava Lexi Nga Ta Hi “Hambanisa Ni Rirhandzu Ra Xikwembu”
9 Nakambe Yehovha a nga ku tekeli ehansi ku tiyisela ka hina. (Matewu 24:13) Tsundzuka, Sathana u lava leswaku u fularhela Yehovha. Siku rin’wana ni rin’wana loko ri pela wa ha tshembekile, u va u nyike Yehovha nhlamulo eka ntlhontlho wa Sathana. (Swivuriso 27:11) Minkarhi yin’wana a swi olovi ku tiyisela. Mavabyi, swiphiqo swa timali, ntshikilelo ni swihinga swin’wana swi nga endla leswaku siku rin’wana ni rin’wana ri va ndzingo. Loko munhu a langutela nchumu lowu tlheriseriwaka endzhaku, na swona swi nga n’wi heta matimba. (Swivuriso 13:12) Yehovha wa tsaka swinene loko a hi vona hi tiyisela ehansi ka mintlhontlho yo fana ni leyi. Hi yona mhaka leyi Hosi Davhida a kombeleke Yehovha leswaku a chela mihloti yakwe ‘eguleni ra dzovo,’ naswona u engeterile a ku: “Xana a yi kona ebukwini ya wena?” (Pisalema 56:8) Ina, Yehovha u yi teka yi ri ya nkoka naswona wa yi tsundzuka mihloti ni ku xaniseka loku hi ku tiyiselaka loko hi ri karhi hi lwela ku tshembeka eka yena. Na yona i ya nkoka ematihlweni ya yena.
Ndlela Leyi Rirhandzu Ri Hi Pfunaka Hayona Hi Tshika Ku Chava
16 Sathana wa swi tiva leswaku ha swi rhandza ku hanya. U vula leswaku hi nga pfumela ku lahlekeriwa hi swilo hinkwaswo hambi ku ri vuxaka bya hina na Yehovha leswaku hi ponisa vutomi bya hina. (Yobo 2:4, 5) Sathana u be ehansi! Leswi “a nga ni matimba yo vanga rifu,” u tirhisa ku chava ka hina rifu leswaku a hi tshikisa ku tirhela Yehovha. (Hev. 2:14, 15) Mikarhi yin’wana, vanhu lava kuceteriwaka hi Sathana, va xungeta ku dlaya vagandzeri va Yehovha hileswi va alaka ku tshika ku N’wi tirhela. Mikarhi yin’wana loko rihanyo ra hina ri ri ekhombyeni, Sathana a nga ha tirhisa nkarhi wolowo leswaku a hi endla hi tlula milawu ya Yehovha Xikwembu. Madokodela kumbe maxaka lama nga riki Timbhoni ma nga hi sindzisa ku cheriwa ngati ku nga leswi lwisanaka ni nawu wa Xikwembu. Kumbexana munhu un’wana a nga hi wonga leswaku hi tirhisa vutshunguri lebyi nga fambisaniki ni Matsalwa.
17 Hambileswi hi nga laviki ku fa, ha swi tiva leswaku Yehovha a nge tshiki ku hi rhandza hambiloko ho fa. (Hlaya Varhoma 8:37-39.) Loko vanghana va Yehovha va fa, a nga va rivali naswona eka yena swi fana niloko va nga fanga. (Luka 20:37, 38) Wa swi navela ku va pfuxa. (Yobo 14:15) Swi n’wi koxe swo tala Yehovha “leswaku . . . [hi] kuma vutomi lebyi nga heriki.” (Yoh. 3:16) Ha swi tiva leswaku Yehovha u hi rhandza ni ku khathala ha hina ku fikela kwihi. Ematshan’weni yo fularhela Yehovha loko hi vabya kumbe loko hi xungetiwa ku dlayiwa, hi ya eka yena leswaku a hi nyika vutlhari, a hi chavelela ni ku hi tiyisa. Sweswo hileswi nga endla hi Valérie ni nuna wakwe.—Ps. 41:3.
Endla Ndzavisiso
it-1-E 857-858
Ku tiva leswi nga ta endleka enkarhini lowu taka, Ni ku hlawula muendli wa swona
Yudasi Iskariyota tanihi muxengi u hetisise vuprofeta naswona sweswo swi kombise leswaku Yehovha i mutivi wa leswi nga ta endleka enkarhini lowu taka, swin’we ni leswi a swi ta endlekela N’wana wa yena. (Ps 41:9; 55:12, 13; 109:8; Mi 1:16-20) Kambe a hi nge vuli leswaku Xikwembu xi hlawule Yudasi ka ha ri emahlweni leswaku a endla sweswo. Vuprofeta byi boxe leswaku van’wana va vanghana va Yesu va le kusuhi hi vona a va ta n’wi xenga, kambe a byi boxanga hi ku kongoma leswaku hi wihi eka vanghana lava loyi a ta endla sweswo. Nakambe misinya ya milawu ya Bibele a yi pfumelelani na swona leswaku Xikwembu xi hlawule Yudasi ka ha ri emahlweni leswaku hi yena a nga ta n’wi xenga. Nawu wa Xikwembu wa mahanyelo lowu boxiweke hi muapostola wu ri: “U nga hatliseli ku tlhandleka munhu mavoko; naswona u nga katseki eswidyohweni swa van’wana; tshama u tengile.” (1Tm 5:22; ringanisa na 3:6.) Loko a fanele a hlawula vadyondzisiwa va yena lava 12 a tiyiseka leswaku sweswo u swi endla hi vutlhari ni hi ndlela leyi hlelekeke, hi yona mhaka Yesu a khongeleke vusiku hinkwabyo eka Tatana wa yena a nga si teka xiboho. (Lk 6:12-16) Loko ku ri leswaku Xikwembu a xi hlawule Yudasi ka ha ri emahlweni leswaku a va muxengi, sweswo a swi ta vula leswaku ndlela leyi Xikwembu xi fambisaka swilo ha yona ni ku swi kongomisa a yi tshembekanga naswona hi ku ya hi nawu a swi ta vula leswaku Xikwembu xa katseka eka swidyoho leswi munhu a swi endleke.
Swi le rivaleni leswaku Yudasi hi nkarhi lowu a nga hlawuriwa ku va muapostola mbilu yakwe a yi nga si ngheniwa hi moya wo biha wo va muxengi. U pfumelele rimitsu ra vuxungu leswaku ri n’wi nyamisa, sweswo swi vange leswaku a hambuka, a nga ha wu lavi nkongomiso wa Xikwembu kambe a lava leswaku sathana a n’wi kongomisa eka vukhamba ni vukanganyisi. (Hv 12:14, 15; Yh 13:2; Mi 1:24, 25; Yk 1:14, 15; vona YUDASI No. 4.) Loko Yudasi a hambuke hi ku helela Yesu hi xiviri u kote ku hlaya mbilu ya yena kutani a n’wi lemukisa leswaku hi yena a nga ta n’wi xenga.—Yh 13:10, 11.