Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2024 Watch Tower Bible and Tract Society of Pennsylvania
JANUARY 6-12
LESWI HI SWI DYONDZAKA EBIBELENI PSALMS 127-134
Vatswari—Yanani eMahlweni Mi Khathalela Ndzhaka Ya N’wina Ya Risima Ku Nga Vana Va N’wina
Tlangela Ku Va eNdyangwini Wa Yehovha
9 Yehovha u vumbe vanhu leswaku va kota ku tswala vana ni ku va nyika vutihlamuleri byo va dyondzisa ku n’wi rhandza ni ku n’wi tirhela. Loko u ri mutswari, xana wa yi tlangela nyiko leyi ya nkoka? Hambileswi Yehovha a nyikeke tintsumi vuswikoti byo tala byo hlamarisa kambe a nga ti nyikanga vuswikoti byo va ni vana. Hikwalaho loko u ri mutswari, tiphine hi vutihlamuleri lebyi u nga na byona byo kurisa vana. Vatswari va nyikiwe vutihlamuleri byo kurisa vana va vona hi ku va “tshinya ni hi swileriso swa Yehovha.” (Efe 6:4; Det 6:5-7; Ps 127:3) Nhlangano wa Yehovha wu humese tibuku, tivhidiyo ni vuyimbeleri leswi kumekaka eka website ya hina leswi nga pfunaka vatswari leswaku va kurisa vana va vona. Swi le rivaleni leswaku Tata wa hina wa le tilweni ni N’wana wakwe va va rhandza vana. (Luka 18:15-17) Yehovha wa tsaka loko vatswari va titshega ha yena ni ku tirha hi matimba leswaku va khathalela vana va vona. Loko va endla tano, va pfuna vana va vona leswaku va tsakela ku va endyangwini wa Yehovha hilaha ku nga heriki!
Vatswari Letelani Vana Va N’wina Leswaku Va Rhandza Yehovha
20 Va tive kahle. Pisalema 127 yi fanisa vana ni miseve. (Hlaya Pisalema 127: 4.) Tanihi leswi miseve yi endliwaka hi swilo swo hambanahambana naswona yi nga ringaniki, ni vana a va fani. Hikwalaho, vatswari va fanele va tirhisa vutlhari loko swi ta eku dyondziseni ka n’wana ha un’we. Vatekani van’wana va le Israel, lava pfuneke vana va vona vambirhi leswaku va tirhela Yehovha, va hlamusela leswi va pfuneke, va ri: “A hi dyondzisa n’wana ha un’we Bibele a ri yexe.” Nhloko ya ndyangu yi ta endla xiboho loko swi fanerile ku dyondzisa vana hi ndlela leyi.
Endla Ndzavisiso
it-1 E 543
Swimilana Swa Le Bibeleni
EBibeleni mupisalema u tirhise swin’wana swa leswi nsinya wa mutlhwari wu swi endlaka ku kombetela eka vanhu lava chavaka Yehovha u te: “Vana va wena va ta fana ni swihluke swa mutlhwari etafuleni ra wena.” (Ps 128:1-3) Swihluke leswi tsemiweke eka nsinya wa mutlhwari lowu kuleke, swi tala ku tirhiseriwa ku byala misinya yintshwa. Ku engetela kwalaho, nsinya wa mutlhwari lowu ku nga khale wu ri kona wu humesa swihluke ku suka etimitswini, hi ndlela yoleyo wu kota ku yela emahlweni wu hanya. Ku fana ni swihluke sweswo, vana va majaha a va ta va ekusuhi ni tata wa vona leswaku va endla muti wu va lowu kulaka wu tlhela wu va ni ntsako.
JANUARY 13-19
LESWI HI SWI DYONDZAKA EBIBELENI PSALMS 135-137
“Hosi Ya Hina Yi Tlakuke Ku Tlula Swikwembu Leswin’wana Hinkwaswo”
it-2 E 661 ¶4-5
Matimba, Mitirho Ya Matimba
Ndlela leyi Xikwembu xi tirhisaka matimba ya ntumbuluko hayona yi hlawulekile. Xikwembu a xi fanele xi tikombisa leswaku hi xona Xikwembu xa ntiyiso hi ndlela leyi xi lawulaka ntumbuluko hayona naswona loko xi endla tano, sweswo a swi ta fambisana kahle ni vito ra xona. (Ps 135:5, 6) Tanihi leswi dyambu, n’weti, tipulanete ni tinyeleti swi tirhaka hi ndlela leyi Yehovha a swi tumbuluxeke hayona, maxelo (ma endlaka leswaku ku va ni moya, mpfula ni swin’wana) hinkwaswo swi landzela milawu leyi swi vekeriweke yona ni leswi ntlawa wa tinjiya wu kotaka ku haha hi ku hleleka wu ya kun’wana ni swinyenyana swi rhurhaka hi nguva yo karhi hambiswiritano leswi hinkwaswo a swi enelangi ku kombisa matimba ya Xikwembu eka vanhu lava xi kanetaka ni vugandzeri bya mavunwa.
Hambiswiritano, Yehovha Xikwembu a nga endla leswaku ntumbuluko ni maxelo swi kombisa matimba yakwe hi ku swi tirhisa swi hetisisa swikongomelo swakwe hi nkarhi lowu faneleke. Hambiloko swiendlakalo swo fana ni dyandza, xidzedze kumbe maxelo man’wana yo fana ni wolawo swi endlekile, a hi swona swo hlawuleka kambe lexi endlaka swi va swo hlawuleka i ku va swi endleke hilaha Yehovha a profeteke hakona. (Ringanisa na 1Th 17:1; 18:1, 2, 41-45.) Hi mikarhi yo tala, leswi a swi endla leswaku swiendlakalo swi nga rivaleki, a ku ri hikwalaho ka leswi a swi endleka hi ndlela leyikulu (Eks 9:24) kumbe hi mikarhi leyi a swi nga tali ku endleka hayona.— Eks 34:10; 1Sa 12:16-18.
Xana Rirhandzu Lerikulu Ra Yehovha Ri Vula Yini Eka Wena?
16 Loko Yehovha a ri vutumbelo bya hina, hi titwa hi hlayisekile. Kambe mikarhi yin’wana hi nga ha titwa hi hele matimba. Xana Yehovha u ta hi pfuna njhani loko hi titwa tano? (Hlaya Pisalema 136:23.) U ta hi vukarha ni ku hi pfuxa leswaku hi ya emahlweni. (Ps 28:9; 94:18) Ndlela leyi hi vuyeriwaka hayona: Ku tiva leswaku Yehovha u ta hi seketela mikarhi hinkwayo, swi hi pfuna hi vona leswaku hi katekile hi tindlela timbirhi. Yo sungula, hi ni nsirhelelo wa xiviri swi nga ri na mhaka leswaku hi tshama kwihi. Ya vumbirhi, Tata wa hina wa le tilweni loyi a hi rhandzaka swinene wa hi khathalela.
Endla Ndzavisiso
it-1 E 1248
Yah
Rito Yah ko tala ri fambisana ni ku dzunisa, ku yimbelela ni ku khongela, ri tirhisiwa loko vanhu va tsakile, va hlurile ni ku ponisiwa kumbe laha matimba ya Xikwembu ma vonakaka swinene. Swikombiso swa ku tirhisiwa ka vito leri swi tele. Xiga lexi nge “n’wina vanhu, Dzunisani Yah!” (Haleluya) xi humelela tanihi xidzuniso, lexi vulaka ku dzunisa Xikwembu eka Pisalema naswona xi sungula ku humelela eka Pisalema 104:35. Eka (Ps 111; 112) xiga lexi xi humelela emasungulweni ntsena, xi tlhela xi humelela eka pisalema (135:3), kun’wana xi humelela emakumu ntsena (Ps 104; 105; 115–117) kambe mikarhi yo tala xi humelela hinkwako emasungulweni ni le ku heteleleni (Ps 106; 113; 135; 146–150). Eka buku ya Nhlavutelo swivumbiwa swa le tilweni swi huwelele marito lawa hi ku phindhaphindha loko swi ri karhi swi dzunisa Yehovha.—Nhl 19:1-6.
Kun’wani laha rito “Yah” ri humelelaka kona ri kombetela eka ku dzunisa Yehovha hi tinsimu ni swikombelo. Ku ni risimu ra ku ponisiwa leri tsariweke hi Muxe. (Eks 15:2) Eka leti tsariweke hi Esaya u kandziyise mhaka leyi swinene hikuva a tirhisa mavito lawa hamambirhi, “Yah na Yehovha.” (Esa 12:2; 26:4) Hezekiya, eka swiphato swakwe swa ku dzunisa endzhaku ka loko a horisiwe hi ndlela ya singita loko a ri kusuhi na ku fa, u kombise ndlela leyi a ti twa ka hayona hi ku tirhisa rito Yah hi ku phindhaphindha. (Esa 38:9, 11) Ku ni ku hambana exikarhi ka lava feke, lava nga taka va nga koti ku dzunisa Yah ni lava tiyimiseleke ku n’wi dzunisa vutomi bya vona hinkwabyo. (Ps 115:17, 18; 118:17-19) Hambiswiritano tipisalema tin’wana ti vulavula hi xikhongelo xa ku khensa ku ponisiwa, ku sirheleriwa ni ku lulamisiwa.—Ps 94:12; 118:5, 14.
JANUARY 20-26
LESWI HI SWI DYONDZAKA EBIBELENI PSALMS 138-139
U Nga Pfumeleli Ku Chava Ku Ku Sivela Ku Hlamula
Dzunisa Yehovha Evandlheni
10 Xana nkarhi na nkarhi u khomiwa hi rhumbyana loko u ehleketa ku yimisa voko u hlamula? Loko swi ri tano, a wu wexe. Ntiyiso hi leswaku vo tala va hina hi va hi chuhilenyana loko hi hlamula. Leswaku u kota ku lwisana ni ku chava koloko, u fanele u tiva lexi ku vangelaka ku chava. Xana u chava leswaku u ta rivala leswi u lavaka ku swi vula kumbe u ta vula leswi hoxeke? Xana u vilerisiwa hileswaku nhlamulo ya wena yi nge vi leyi tsakisaka ku fana ni ta van’wana? Entiyisweni, a swi hoxanga ku chavisiwa hi swilo swo tano. Swi kombisa leswaku wa titsongahata naswona u teka van’wana va ri lava tlakukeke eka wena. Yehovha wa yi rhandza mfanelo yoleyo. (Ps 138:6; Filp 2:3) Kambe Yehovha u lava leswaku na wena u n’wi dzunisa naswona u khutaza vamakwerhu eminhlanganweni. (1 Tes 5:11) Wa ku rhandza naswona u ta ku pfuna leswaku u va ni xivindzi.
A Hi Khutazaneni Loko Hi Ri eTinhlengeletanweni Ta Vandlha
7 Swi nga ku pfuna ku kambisisa swiringanyeto swin’wana leswi nga eka timagazini ta khale ta Xihondzo xo Rindza. Hi xikombiso, lunghiselela kahle. (Swiv. 21:5) Loko u yi tiva kahle nhlokomhaka leyi dyondziwaka, swi ta ku olovela ku hlamula. Nakambe, u nga lehisi loko u hlamula. (Swiv. 15:23; 17:27) Nhlamulo yo koma a yi nge ku karhati. Nhlamulo yo koma, kumbexana leyi nga riki na marito yo tala, yi nga ha olovela vamakwerhu leswaku va yi twisisa ku ri ni nhlamulo yo leha leyi nga ni tinhla to tala. Loko u hlamula hi marito ya wena naswona u nga lehisi, u ta va u kombisa leswaku u lunghiselele kahle naswona u yi twisisa kahle nhlokomhaka leyi dyondziwaka.
Endla Ndzavisiso
it-1 E 862 ¶4
Ku Rivalela
Ku tlula kwalaho, ku rivalela van’wana ku nga khathariseki leswaku va ku dyohele kangani hi leswi Mukreste un’wana ni un’wana a faneleke a swi endla. (Lk 17:3, 4; Ef 4:32; Kl 3:13) Xikwembu a xi va rivaleli vanhu lava alaka ku rivalela van’wana. (Mt 6:14, 15) Hambiswiritano, hambi loko “munhu wo homboloka” a endle xidyoho lexikulu lexi endleke leswaku a kuma nxupulo lowu humaka evandlheni ra Vukreste, munhu yoloye hi nkarhi lowu faneleke a nga ha rivaleriwa loko o kombisa ku tisola eka xidyoho xexo. Hi nkarhi wolowo hinkwavo lava nga evandlheni va nga kombisa leswaku va n’wi rhandza. (1Ko 5:13; 2Ko 2:6-11) Hambiswiritano, a hi xikolokolo ku va Vakreste va rivalela munhu loyi a endlaka xidyoho hi vomu naswona a nga kombisiki ku tisola eka xona. Vanhu vo tano va hundzuka valala va Xikwembu.—Hv 10:26-31; Ps 139:21, 22.
JANUARY 27–FEBRUARY 2
LESWI HI SWI DYONDZAKA EBIBELENI PSALMS 140-143
Endla Swilo Hinkwaswo Leswi Fambisanaka Ni Swikhongelo Swa Wena
“Yingisa Marito Ya Lavo Tlhariha”
13 Loko u tshinyiwa swi teke ku ri ndlela ya Xikwembu ya ku ku komba leswaku xa ku rhandza. Yehovha u hi navelela leswinene. (Swiv. 4:20-22) Loko a hi tsundzuxa hi ku tirhisa Rito rakwe, mikandziyiso leyi humesiwaka hi nhlangano kumbe makwerhu, u kombisa leswaku wa hi rhandza. Vaheveru 12:9, 10 yi ri: “U endla tano leswaku hi vuyeriwa.”
14 Ehleketisisa ngopfu hi ndzayo, ku nga ri ndlela leyi u nyikiweke hayona. Mikarhi yin’wana hi nga ha vona onge ndlela leyi hi nyikiweke ndzayo hayona a yi nga ri yinene. Loyi a nyikelaka ndzayo, u fanele a endla tano hi ndlela leyi swi nga ta olova ku yi amukela. (Gal. 6:1) Kambe loko ku ri hina hi nyikiwaka ndzayo, hi fanele hi anakanyisisa hi leswi hi swi dyondzaka hambiloko hi vona onge ku ni ndlela yo antswa leyi a hi ta va hi tshinyiwe ha yona. Hi nga ha tivutisa leswi: ‘Hambileswi ndzayo yi nyikeriweke hi ndlela leyi nga ndzi tsakisiki, xana ku ni leswi ndzi nga swi dyondzaka eka yona? Xana ndzi nga swi kota ku swi ba hi makatla swihoxo swa loyi a ndzi nyikeke yona leswaku ndzi pfuneka?’ Ku ta va ku ri vutlhari ku lavisisa tindlela leti hi nga vuyeriwaka ha tona eka ndzayo leyi hi nyikiweke yona.—Swiv. 15:31.
Hlayisa “Ku Tenga Ka Mbilu” eMinkarhini Leyi Ya Mangava
Ntshikilelo lowu humaka eka vakaneti, swiphiqo swa timali swin’we ni vuvabyi lebyikulu, i swilo leswi heteke malandza man’wana ya Xikwembu matimba. Minkarhi yin’wana timbilu ta wona na tona ti khumbekile hi ndlela yo biha. Hosi Davhida na yena u langutane ni xiyimo lexi fanaka, u te: “Moya wa mina wa tsana endzeni ka mina; mbilu ya mina yi vonaka yi hele matimba endzeni ka mina.” (Ps. 143:4) I yini lexi n’wi pfuneke leswaku a hlula swiyimo sweswo? Davhida u tsundzuke ndlela leyi Xikwembu xi tirhisaneke ha yona ni malandza ya xona swin’we ni ndlela leyi xi n’wi poniseke ha yona. U anakanyisise hi leswi Yehovha a swi endleke hikwalaho ka vito ra Yena lerikulu. Davhida a a tshamela ku khathala swinene hi mintirho ya Xikwembu. (Ps. 143:5) Hilaha ku fanaka, ku anakanyisisa hi Muvumbi wa hina ni hinkwaswo leswi a hi endleleke swona swin’we ni leswi a yaka emahlweni a hi endlela swona, swi ta hi pfuna loko hi ri endzingweni.
Ku Nghenela Vukati “eHosini Ntsena”—Xana Swa Ha Vuyerisa?
Minkarhi yin’wana u nga ha titwa ku fana na Davhida loyi a nga te: “Oho Yehovha, hatlisa, ndzi hlamule. Moya wa mina wu fike emakumu. U nga ndzi tumbeteli xikandza xa wena.” (Pisalema 143:5-7, 10) U nga heli matimba. Nyika Yehovha nkarhi wo ku kombisa leswi a lavaka leswaku u swi endla. Yingisa Yehovha hi ku hlaya Bibele u tlhela u anakanyisisa swinene hi leswi u swi hlayeke. Leswi swi ta ku pfuna ku tiva leswi Yehovha a swi languteleke eka wena ni ndlela leyi a ma pfuneke ha yona malandza yakwe ya le nkarhini lowu hundzeke. Loko u n’wi yingisa, u ta va ni xivindzi xo ya emahlweni u n’wi yingisa.
Endla Ndzavisiso
it-2 1151
Vuxungu
Byi Tirhisiwe Hi Ndlela Yo Fanekisela. Mavunwa, ku hemba ka munhu wo homboloka, swi nga onha ndhuma ya munhu un’wana naswona sweswo swi fanisiwa ni vuxungu lebyi dlayaka bya nyoka. (Ps 58:3, 4) Lava onhaka van’wana mavito ku vuriwa leswi hi vona “Milomu ya vona yi ni vuxungu bya timhiri”, hambi ku ri vuxungu bya nyoka byi tshama ehansi ka nomu ni le henhla ka wona. (Ps 140:3; Rhm 3:13) Ririmi ra munhu, loko ri nga tirhisiwi kahle ri nga onha ndhuma ya munhu un’wana, ku vulavula ku biha hi vanhu van’wana loko va nga ri kona, ku dyondzisa tidyondzo ta mavunwa kumbe ku vula marito lama nga vavisaka vanhu van’wana “ri tele hi chefu leyi dlayaka.”—Yk 3:8.
FEBRUARY 3-9
LESWI HI SWI DYONDZAKA EBIBELENI PSALMS 144-146
“Va Tsaka Vanhu Lava Xikwembu Xa Vona Ku Nga Yehovha!”
Swivutiso Swa Vahlayi
2. Marito lama pfuxetiweke ma fambisana kahle na pisalema hinkwayo. Leswi ku tirhisiweke rito, “kutani” eka ndzimana 12, swi vula leswaku mikateko leyi landzelaka leyi boxiweke eka tindzimana 12 ku ya eka 14 yi tirha eka lavo lulama lava kombelaka ku ‘ntshunxiwa ni ku kutsuriwa’ eka lowo homboloka (ndzimana 11). Ku antswisiwa loku ku tlhele ku kombisiwa ni le ka ndzimana 15 laha ku humelelaka xiga lexi nge, “va tsaka” kambirhi. Hi marito man’wana, eka swiyimo leswi ha swimbirhi, loko yi vulavula hi vanhu lava tsakeke yi kombetela eka vanhu van’we, “lava Xikwembu xa vona ku nga Yehovha!” Nakambe tsundzuka leswaku Xiheveru xa khale a xi nga ri na swona swihikahato, swo fana ni mimfungho ya ntshaho. Hikwalaho, leswaku vahundzuluxeri va twisisa leswi ndzimana yi vulaka swona, a va fanele va ma tekela enhlokweni mavekelo ya swiphato swa Xiheveru, mongo swin’we ni tindzimana tin’wana ta Bibele leti yelanaka na yona.
3. Marito ya vuhundzuluxeri lebyi pfuxetiweke ma pfumelelana ni tindzimana tin’wana ta Bibele leti boxaka mikateko leyi Xikwembu xi yi tshembisaka vanhu vo tshembeka. Leswi ku antswisiweke mavekelo ya rito asher, pisalema yoleyo yi kombisa ntshembo lowu Davhida a ri na wona wa leswaku endzhaku ka loko Xikwembu xi kutsule tiko ra Israyele eka valala, a xi ta va katekisa hi ntsako ni ku eneriseka. (Lev. 26:9, 10; Det. 7:13; Ps. 128:1-6) Hi xikombiso Deteronoma 28:4 yi ri: “Mbhandzu wa khwiri ra wena wu ta katekisiwa ni mbhandzu wa misava ya wena ni mbhandzu wa xifuwo xa wena, rhole ra tihomu ta wena ni swinyimpfana swa ntlhambi wa wena wa tinyimpfu.” Entiyisweni, hi nkarhi wa ku fuma ka Solomoni n’wana wa Davhida, tiko a ri tiphina hi ku rhula ni ntsako. Ku tlula kwalaho, swin’wana leswi a swi endleka hi nkarhi wa ku fuma ka Solomoni swi kombisa leswi nga ta endleka hi nkarhi wa ku fuma ka Mesiya.—1 Tih. 4:20, 21; Ps. 72:1-20.
Tshama U Ri Ni Ntshembo Lowu Tiyeke Tanihi Mukreste
16 Ntshembo lowu hi nga na wona wo hanya hilaha ku nga heriki i nyiko ya risima leyi humaka eka Xikwembu. Hi wu languterile nkarhi wolowo wo tsakisa lowu hi nga tiyisekaka leswaku wu ta fika. Ntshembo wa hina wu fana ni nsoma, lowu hi tiyisaka leswaku hi kota ku tiyisela miringo, ku xanisiwa hambi ku ri rifu. Wu fana ni xihuku, lexi sirhelelaka miehleketo ya hina leswaku hi papalata swilo swo biha ivi hi namarhela leswinene. Ntshembo wa hina lowu humaka eBibeleni, wu endla leswaku hi tshinela eka Xikwembu naswona wu kombisa ndlela leyi xi hi rhandzaka hayona. Ha vuyeriwa swinene loko hi tshama hi ri ni ntshembo lowu tiyeke.
17 Eka papila rakwe, muapostola Pawulo u khutaze Varhoma leswaku va “[tsaka] hikwalaho ka ntshembo.” (Rhom. 12:12) Pawulo a a tsaka hileswi a a tiyiseka leswaku loko o tshama a tshembekile, a a ta kuma vutomi lebyi nga heriki etilweni. Hilaha ku fanaka, hi nga tsaka hi ntshembo wa hina hikuva ha tiyiseka leswaku Yehovha u ta hetisisa switshembiso swakwe. Mupisalema u tsale a ku, “Wa tsaka loyi a . . . tshembaka Yehovha Xikwembu xakwe, . . . Loyi a tshamaka a tshembekile.”—Ps. 146:5, 6.
I Rirhandzu Ra Muxaka Muni Leri Nga Hi Tiselaka Ntsako Wa Xiviri?
19 Vanhu va ni malembe ya kwalomu ka 6 000 va ri karhi va xaniseka, kambe sweswi misava ya Sathana yi le kusuhi ni ku herisiwa. Misava yi tele hi vanhu lava tirhandzaka ngopfu, varhandzi va mali ni lava rhandzaka mintsako. Lava rhangisaka ku navela ka vona vini. Vanhu vo tano a va nge pfuki va kume ntsako wa xiviri. Ku hambana ni sweswo, mupisalema u tsale a ku: “Wa tsaka loyi Xikwembu xa Yakobe xi nga mupfuni wa yena, Loyi ntshembo wakwe wu nga eka Yehovha Xikwembu xakwe.”—Ps. 146:5.
20 Vanhu va Yehovha va kombisana rirhandzu ra Xikwembu naswona nhlayo ya vona ya engeteleka lembe ni lembe. Lebyi i vumbhoni bya leswaku Mfumo wa Xikwembu wa fuma ni leswaku ku nga ri khale wu ta tisela vanhu mikateko ya ntsandzavahlayi. Ntsako wa xiviri wu kumiwa hi lava endlaka ku rhandza ka Xikwembu, lava tivaka leswaku va tsakisa Mufumi la tlakukeke. Kutani lava rhandzaka Yehovha va ta tiphina hilaha ku nga heriki! Exihlokweni lexi landzelaka hi ta kambisisa timfanelo tin’wana ta vanhu lava tirhandzaka kutani hi vona ndlela leyi ti hambaneke ha yona ni timfanelo leti malandza ya Yehovha ma tikombisaka
Endla Ndzavisiso
it-1 E 111 ¶9
Swiharhi
Bibele yi vulavula hi ndlela leyi swiharhi leswi tekeriwaka ehansi swi khomiwa hayona. I ntiyiso leswaku Yehovha u tikombise a a ri Munyiki La Nga Ni Rirhandzu hi ndlela leyi a vumbeke swivumbiwa leswi ni ku swi khathalela hayona. (Swiv 12:10; Ps 145:15, 16) Nawu wa Muxe a wu vulavula hi ndlela leyi swifuwo swi nga khomiwaka hayona. Loko munhu o kuma xifuwo xi lahlekile a fanele a xi tlherisela eka n’wini wa xona na loko o xi kuma xi wile ni ndzhwalo wa xona a fanele a xi pfuxa ni ku tlhela a xi rhula ndzhwalo. (Eks 23:4, 5) A swi fanele swi khomiwa ku fana ni vanhu. (Dt 22:10; 25:4) Ku fana ni vanhu, na swona a swi fanele swi wisa hi Savata. (Eks 20:10; 23:12; Dt 5:14) Swiharhi leswi nga ni khombo a swi fanele swi lawuriwa kumbe swi herisiwa. (Gn 9:5; Eks 21:28, 29) Ku hlanganisa swilo kumbe swiharhi leswi hambaneke a swi yirisiwile.— Lv 19:19.
FEBRUARY 10-16
LESWI HI SWI DYONDZAKA EBIBELENI PSALMS 147-150
Hi Ni Swivangelo Swo Tala Swa Ku Dzunisa Yah
Ha Yini U Fanele U ‘Dzunisa Yah’?
5 Yehovha u chavelele tiko ra Israyele hinkwaro a tlhela a chavelela munhu ha un’we. Swi tano ninamuntlha. Mupisalema u tsale leswi malunghana ni Xikwembu: “U horisa vanhu lava timbilu ta vona ti vavisekeke, naswona u boha timbanga ta vona leti vavaka.” (Ps. 147:3) Yehovha wa va khathalela lava nga ni swiphiqo, ku nga khathariseki leswaku i swiphiqo swa muxaka muni. Namuntlha, Yehovha u tiyimiserile ku hi chavelela ni ku hi horisa loko hi ri ni gome. (Ps. 34:18; Esa. 57:15) U hi nyika vutlhari ni matimba leswaku hi kota ku langutana ni swiphiqo swihi ni swihi leswi hi nga langutanaka na swona.—Yak. 1:5.
6 Sweswi mupisalema u vulavula hi matilo, u hi byela leswaku Yehovha “u hlaya tinyeleti leswaku i tingani” ni leswaku “hinkwato ka tona u ti vitana hi mavito ya tona.” (Ps. 147:4) Ha yini a vulavule hi tinyeleti? Anakanya hi mhaka leyi: Mupisalema a a swi kota ku vona tinyeleti hi mahlo yakwe, kambe a a nga swi tivi leswaku i tingani. Loko malembe ma ri karhi ma famba, nhlayo ya tinyeleti leti hi kotaka ku ti vona yi engetelekile swinene. Van’wana va anakanya leswaku xirimela xa hina ntsena xa Milky Way xi ni tibiliyoni ta tinyeleti. Naswona swi nga ha endleka ku ri ni titriliyoni ta swirimela evuakweni. Hina a hi nge swi koti ku hlayela tinyeleti! Kambe Muvumbi u ti thye mavito hinkwato ka tona. Leswi swi vula leswaku nyeleti yin’wana ni yin’wana yi hlawulekile eka Yehovha. (1 Kor. 15:41) Ku vuriwa yini hi vanhu lava xi va vumbeke emisaveni? Xikwembu lexi tivaka laha nyeleti yin’wana ni yin’wana yi nga kona hi nkarhi wo karhi, xa ku tiva na wena leswaku u le kwihi, ndlela leyi u titwaka ha yona ni leswi u swi lavaka hi nkarhi wo karhi!
Ha Yini U Fanele U ‘Dzunisa Yah’?
7 Yehovha wa khathala hi wena a tlhela a va ni matimba ni ntwelavusiwana wo ku pfuna loko u ri ni swiphiqo. (Hlaya Pisalema 147:5.) U nga ha vona onge xiyimo xa wena xi tika ngopfu naswona a wu nge swi koti ku langutana na xona. Xikwembu xa swi tiva leswi u tsandzekaka ku swi endla naswona xa “tsundzuka leswaku [u] ntshuri.” (Ps. 103:14) Leswi hi nga hetisekangiki, hi tshamela ku endla swihoxo leswi fanaka. Ha tisola loko hi vule swilo swo karhi, loko hi ve ni ku navela ko biha kumbe loko hi vondzoka van’wana hikwalaho ka swilo leswi va nga na swona. Yehovha a nga swi endli swihoxo sweswo; kambe u yi twisisa kahle ndlela leyi hi titwaka ha yona!—Esa. 40:28.
Ha Yini U Fanele U ‘Dzunisa Yah’?
18 Mupisalema a a yi tiva ndlela leyi Xikwembu a xi va rhandza ha yona vanhu va xona va khale. A ku ri vona ntsena tiko leri nyikiweke “rito” ra Xikwembu ni ‘swileriso swa xona ni swiboho swa xona swa vuavanyisi.’ (Hlaya Pisalema 147:19, 20.) Hi katekile namuntlha leswi ku nga hina ntsena emisaveni hi vitaniwaka hi vito ra Xikwembu. Hi ni vuxaka lebyikulu na Yehovha hi leswi hi n’wi tivaka naswona Rito rakwe ri hi pfunaka evuton’wini. Xana a wu na swivangelo swo tala leswi twalaka swo huwelela ku fana ni mutsari wa Pisalema 147, u ku “Dzunisani Yah,” ni ku tlhela u khutaza van’wana leswaku na vona va endla tano?
Endla Ndzavisiso
it-1 E 316
Swinyenyana
Mupisalema u vule leswaku “swinyenyana” swi fanele swi dzunisa Yehovha (Ps 148:1, 10) naswona swi endla tano hi ndlela leyi swi vumbiweke hayona ni ndlela leyi swi endlaka swilo hayona. Xinyenyana xin’we xi nga va ni tinsiva to sukela eka 1,000 kumbe ku tlula 20,000. Ku ni ximhandzana xo tsindziyela exikarhi ka risiva lexi vuriwaka shaft, lexi nga ni mavoya lama tlhaveleke eka xona tanihi swirhabyana leswi endlaka risiva ri hlangana kahle ri va nchumu wun’we. Ku vuriwa leswaku ripapa rin’we ra tuva ri nga va ri ri ni tinsiva ta magidi kumbe timiliyoni. Swinyenyana swi haha kahle ku tlula swihahampfhuka hikwalaho ka timpapa ta swona to hlawuleka ni ndlela leyi mimirhi ya swona yi vumbiweke hayona. Marhambu ya xinyenyana lama nga ni mbhovo na wona ma xi pfuna leswaku xi vevuka, xisweswo xikeletoni xa xinyenyana xa frigate lexi nga ni timpapa ta 2-m loko xi ti pfurile, xi nga tika kwalomu ka 110 g. Swinyenyana swin’wana leswikulu swi ni swilo swo karhi leswi tshegaka timpapa loko swi ri karhi swi haha, ku fana ni swiseketelo endzeni ka timpapa ta xihahampfhuka.
FEBRUARY 17-23
LESWI HI SWI DYONDZAKA EBIBELENI PROVERBS 1
Vantshwa—Xana Mi Ta Yingisa Mani?
U Nga Pfumeleli Nchumu Leswaku Xi Ku Sivela Ku Kuma Hakelo
16 U ta endla yini loko u ri muntshwa naswona u vona onge vatswari va wena lava nga Timbhoni a va ku twisisi naswona va ku tikisela hi swinawanawana? Ku hlundzukisiwa hi mhaka yoleyo swi nga ku endla u kanakana loko ku tirhela Yehovha ku ri nchumu lowunene. Kambe loko u pfumelela ku hlundzuka ku ku tshikisa ku tirhela Yehovha, u nge va kumi emisaveni vanhu lava ku rhandzaka ku fana ni vatswari va wena swin’we ni vamakwerhu evandlheni.
17 Loko vatswari va wena va nga ku tshinyi xana sweswo a swi nga ta endla u vona onge a va ku rhandzi? (Hev. 12:8) Kumbexana u khunguvanyisiwa hi ndlela leyi vatswari va wena va ku tshinyaka ha yona. Ematshan’wini yo languta ndlela leyi va ku tshinyaka ha yona ringeta ku twisisa xivangelo xo va va ku tshinya. Rhurisa mbilu naswona u papalata ku va xopaxopa. Rito ra Xikwembu ri ri: “Un’wana ni un’wana la hlwelaka ku vula marito yakwe u ni vutivi, naswona munhu la nga ni ku twisisa u ni moya wo rhula.” (Swiv. 17:27) Kombisa leswaku se u le ku kuleni hikuva u nga nyenyeli loko u layiwa, u nga karhateki hi ndlela leyi u layiweke ha yona. (Swiv. 1:8) I nkateko ku va ni vatswari lava rhandzaka Yehovha naswona va lava ku ku pfuna leswaku u kuma hakelo ya vutomi lebyi nga heriki.
Ku Hlayisa Mfungho Wa Hina Wa Vukreste
11 Tiyimisele ku tsakisa Xikwembu ku nga ri vanhu. I swa ntumbuluko ku tiyisa mfungho wa hina hi ku tihlanganisa ni ntlawa wo karhi. Munhu un’wana ni un’wana wa va lava vanghana, naswona ha tsaka loko hi amukeriwa hi van’wana. Emalembeni ya kondlo-a-ndzi-dyi—hambiloko se hi kurile—ntshikilelo wa tintangha wu nga va ni matimba, wu vanga ku navela lokukulu ko lava ku tekelela kumbe ku tsakisa van’wana. Kambe a hi minkarhi hinkwayo vanghana ni tintangha va khathalaka hi vuhlayiseki bya hina. Minkarhi yin’wana vo lava munhu la nga ta va joyina eku endleni ka swilo leswo biha. (Swivuriso 1:11-19) Loko Mukreste a hluriwa hi ntshikilelo lowo biha wa tintangha, hi ntolovelo u ringeta ku fihla leswi a nga swona. (Pisalema 26:4) Muapostola Pawulo u tsundzuxile: ‘Mi nga tshuki mi tifanisa ni misava leyi.’ (Varhoma 12:2, Bibele Ya Xitsonga) Yehovha u hi nyika matimba ya le ndzeni lawa hi ma lavaka leswaku hi lwisana ni ntshikilelo wihi na wihi wo endla leswo biha.—Vaheveru 13:6.
12 Loko ntshikilelo wa le handle wu xungeta ku onha mfungho wa hina wa Vukreste, hi fanele hi tsundzuka leswaku ku tshembeka ka hina eka Xikwembu i ka nkoka swinene ku tlula langutelo ra vanhu kumbe mboyamelo wa vunyingi bya vanhu. Marito ya Eksoda 23:2 i nsinya wa nawu lowu sirhelelaka: “U nga tshuki u landzelela ntshungu lowu nga ni swikongomelo swo biha.” Loko Vaisrayele-kulobye vo tala va kanakane vuswikoti bya Yehovha byo hetisisa switshembiso Swakwe, Kalebe u ale ku landzelela ntshungu. A a tiyiseka leswaku switshembiso swa Xikwembu a swi tshembeka, naswona u hakeriwe hi ndlela leyikulu hikwalaho ka langutelo ra yena. (Tinhlayo 13:30; Yoxuwa 14:6-11) Xana na wena u tiyimiserile ku lwisana ni ntshikilelo wa langutelo leri andzeke leswaku u ta hlayisa vuxaka bya wena na Xikwembu?
Endla Ndzavisiso
it-1 E 846
Xiphukuphuku
Ematshan’wini yo ehleketa leswaku rito “xiphukuphuku” ri vula munhu la nga tlharihangiki, eBibeleni ri kombetela eka munhu un’wana ni un’wana loyi a nga laviki ku landzela milawu leyinene ya Xikwembu ya mahanyelo. Ku ni marito yo hambanahambana ya Xiheveru lama hlamuselaka xiphukuphuku yo tanihi kesilʹ (‘la nga riki na ntokoto’; Swiv 1:22), ʼewilʹ (“xiphukuphuku”; Swiv 12:15), na·valʹ (‘xiphukuphuku’; Swiv 17:7) ni lets (“muhlekuri.”; Swiv 13:1). Rito ra Xigriki aʹphron ri kombetela eka “loyi a nga anakanyiki” (Lk 12:20), a·noʹe·tos eka ku “hunguka” (Ga 3:1), naswona mo·rosʹ eka ‘xiphukuphuku’ kumbe “swiphukuphuku” (Mt 23:17; 25:2).
FEBRUARY 24–MARCH 2
LESWI HI SWI DYONDZAKA EBIBELENI PROVERBS 2
Hikwalahokayini U Fanele U Hisekela Dyondzo Ya Munhu Hi Yexe?
‘Yana eMahlweni U Famba eNtiyisweni’
16 Vo tala va hina a hi swi rhandzi ku hlaya ni ku dyondza. Kambe Yehovha u lava hi “ya emahlweni [hi] lava” ni ku “lavisisa” leswaku hi nga wu keli henhla ntiyiso. (Hlaya Swivuriso 2:4-6.) Loko hi tikarhata, mikarhi hinkwayo hi ta vuyeriwa. Corey loko a hlamusela ndlela leyi a hlayaka Bibele hayona, u vula leswaku u hlaya ndzimana yin’we ivi a yima. U ri: “Ndzi hlaya nhlamuselo yin’wana ni yin’wana ya le hansi, ndzi languta swikombo hinkwaswo swa matsalwa leswi nga etlhelo ndzi tlhela ndzi endla ndzavisiso lowu engetelekeke. . . . Ndlela leyi ndzi hlayaka ha yona yi endla leswaku ndzi kuma rungula ro tala swinene!” Hambi hi tirhisa endlelo leri kumbe rin’wana, hi kombisa leswaku ha wu khensa ntiyiso loko hi tinyika nkarhi ni ku endla matshalatshala yo wu dyondza.—Ps. 1:1-3.
Vutlhari Bya Ntiyiso Bya Huwelela
3 Vutlhari byi nga hlamuseriwa tanihi vuswikoti byo tirhisa leswi hi swi tivaka leswaku hi endla swiboho leswinene. Kambe ku va ni vutlhari bya ntiyiso a swi vuli sweswo ntsena. Bibele yi ri “Ku chava Yehovha i masungulo ya vutlhari, naswona ku twisisa i ku tiva Lowo Kwetsima Ngopfu.” (Swiv. 9:10) Loko hi lava ku endla xiboho xa nkoka, hi fanele hi titshega hi “ku tiva Lowo Kwetsima Ngopfu” ku nga ku endla swilo hi ku ya hi langutelo ra Yehovha. Hi nga endla tano hi ku va hi hlaya Bibele ni ku tlhela hi kambisisa tibuku ta hina leti hi pfunaka ku twisisa Bibele. Loko hi endla tano, hi kombisa leswaku hi ni vutlhari bya ntiyiso.—Swiv. 2:5-7.
4 I Yehovha ntsena loyi a nga hi nyikaka vutlhari bya ntiyiso? (Rhom. 16:27) Hikwalahokayini ku ri yena Xihlovo xa vutlhari? Xo sungula, tanihi Muvumbi, u ni vutivi lebyi nga pimekiki naswona u wu tiva kahle ntumbuluko wakwe. (Ps. 104:24) Xa vumbirhi, hinkwaswo leswi Yehovha a swi endlaka, swi kombisa vutlhari byakwe. (Rhom. 11:33) Xa vunharhu, lava tirhisaka switsundzuxo swa Yehovha mikarhi hinkwayo swa va vuyerisa. (Swiv. 2:10-12) Loko hi lava ku kuma vutlhari bya ntiyiso, hi fanele hi amukela ntiyiso ni ku wu pfumelela loko hi endla swiboho niloko hi lava ku endla swo karhi.
Vantshwa Tiyisani Ripfumelo Ra N’wina
2 Tanihi mutirheli wa Yehovha la ha riki muntshwa kumbe wa ha ri ku dyondzeni ha Yena xana u titwa u boheka ku pfumela eka leswi vanhu vo tala va pfumelaka eka swona, ku fana ni dyondzo ya ku tihundzukela ka swilo ku ri ni ku pfumela eka Muvumbi? Loko swi ri tano, ku ni magoza lama u nga ma tekaka leswaku u tshama u ri ni ripfumelo leri tiyeke. Goza rin’wana i ku va u tirhisa vuswikoti byo ehleketa lebyi Xikwembu xi ku nyikeke byona, lebyi nga “ta ku rindza.” Swi ta ku sirhelela eka tidyondzo leti nga dlayaka ripfumelo ra wena.—Hlaya Swivuriso 2:10-12.
3 Ripfumelo leri tiyeke ri titshege hi ku xi tiva kahle Xikwembu. (1 Tim. 2:4.) Loko u dyondza Rito ra Xikwembu ni minkandziyiso ya hina, u nga hlayeli ku hetisisa nawu. Anakanyisisa hi leswi u swi hlayeke leswaku u twisisa ‘mongo wa kona.’ (Mat. 13:23) A hi xiyeni ndlela leyi ku endla tano swi nga ku pfunaka ha yona leswaku u tiyisa ripfumelo ra wena eka Xikwembu tanihi Muvumbi ni le Bibeleni—leyi tameleke “vumbhoni lebyi tiyeke.”—Hev. 11:1.
Endla Ndzavisiso
it-1 E 1211 ¶4
Ku Tshembeka
Hi nga swi kota ku tshembeka loko hi nga titshegi hi matimba ya hina kambe loko ntsena hi ri ni ripfumelo leri tiyeke, ku tshemba Yehovha ni le ka matimba Yakwe yo ponisa. (Ps 25:21) Xikwembu xi tshembisa leswaku xi ta va “xitlhangu” ni “khokholo” ni ku sirhelela lava fambaka hi ku tshembeka. (Swiv 2:6-8; 10:29; Ps 41:12) Loko va tirha hi matimba leswaku va tsakeriwa hi Yehovha swi endla leswaku va va ni mahanyelo lamanene, swi va pfuna leswaku va kota ku fikelela swikongomelo swa vona. (Ps 26:1-3; Swiv 11:5; 28:18) Hambileswi hi ku pfilunganyeka Yobo a xiyeke leswaku vanhu lava nga riki na nandzu va xaniseka hikwalaho ka mufumi lowo biha naswona va fa xikan’we na lavo homboloka, Yehovha u tiyisekisa leswaku wa ku vona ku fa ka vanhu lava nga riki na nandzu naswona u tshembisa leswaku vanhu vo tano a va nge rivariwi naswona mitirho ya vona leyinene yi ta sala yi tsundzukiwa hambiloko va nga ha ri kona, va ta va ni vumundzuku byo rhula, va tlhela va tiphina hi mikateko. (Yb 9:20-22; Ps 37:18, 19, 37; 84:11; Swiv 28:10) Hilaha swi veke hakona emhakeni ya Yobo, ku va munhu wo tshembeka, ematshan’weni ya rifuwo, hi swona swi endlaka munhu a va wa nkoka ni ku xiximiwa. (Swiv 19:1; 28:6) Eka vana lava nga ni vatswari vo tano i njombo eka vona naswona va fanele va tsaka (Swiv 20:7), va dyondza eka swikombiso leswinene swa va tata wa vona ni ku vuyeriwa eka ndhuma ya vona leyinene.