Endzhaku ka loko Adamu na Evha va hlongoriwe entangeni wa Edeni, va ve ni vana vo tala. Kayini, n’wana wa vona wa mativula u ve murimi naswona Avele, n’wana wa vona wa vumbirhi u ve murisi.

Siku rin’wana Kayini na Avele va endlele Yehovha magandzelo. Xana wa swi tiva leswaku gandzelo i yini? I nyiko yo hlawuleka. Yehovha u amukele gandzelo ra Avele, kambe a nga ri amukelanga ra Kayini. Sweswo swi hlundzukise Kayini. Yehovha u tsundzuxe Kayini leswaku ku hlundzuka kakwe ku ta endla leswaku a dyoha. Kambe Kayini a nga yingisanga.

Ku ri na sweswo, Kayini u byele Avele a ku: ‘A hi fambe enhoveni.’ Loko va ri kwalaho, Kayini u hlasele makwavo a n’wi dlaya. Yehovha u endle yini hi mhaka leyi? U xupule Kayini hi ku n’wi yisa ekule ni ndyangu wa ka vona. Kayini a nga ha pfumeleriwanga ku tlhela a vuya ekaya.

Hi dyondza yini emhakeni leyi? Hi nga ha sungula ku hlundzuka loko swilo swi nga vi hi ndlela leyi hi lavaka swi va ha yona. Loko hi twa onge hi ya hi hlundzuka kumbe loko van’wana va hi byela leswaku va vona onge hi hlundzukile, hi fanele hi hatla hi cinca ndlela leyi hi titwaka ha yona hi nga si dyoha.

Hikwalaho ka leswi Avele a a rhandza Yehovha ni leswi a endleke leswinene, Yehovha a nge n’wi rivali. Naswona u ta n’wi pfuxa loko se a endla misava yi va paradeyisi.

Hi ku famba ka nkarhi, vanhu va ye va tala emisaveni. Vo tala a va ri ni mahanyelo yo biha. Hambi ku ri tintsumi tin’wana ti ve to biha. Ti sukele kaya ra tona etilweni ti ta laha misaveni. Xana wa swi tiva leswaku ha yini ti endle tano? Ti endle tano leswaku ti tihundzula vanhu ni ku teka vavasati.

Tintsumi leti ti ve ni vana ni vavasati lava ti va tekeke. Loko vana lava va kula va ve ni matimba swinene naswona a va xanisa van’wana. Yehovha a a nga ta xi pfumelela xiyimo lexi leswaku xi ya emahlweni. Kutani u endle xiboho xo herisa vanhu hinkwavo vo biha hi ndhambi.

Kambe a ku ri ni munhu un’wana loyi a a nga fani ni vanhu lava vo biha. A a rhandza Yehovha. Vito ra yena a ku ri Nowa. A a ri ni nsati ni vana vanharhu va majaha, ku nga Xeme, Hamu na Yafeta lava hinkwavo ka vona a va ri ni vasati. Yehovha u byele Nowa leswaku a aka ngalava leyikulu leswaku yena ni ndyangu wakwe va ta pona Ndhambi. Ngalava i bokisi lerikulu leri kotaka ku phaphamala ehenhla ka mati. Yehovha u tlhele a byela Nowa leswaku a nghenisa swiharhi swo tala endzeni ka ngalava leswaku na swona swi pona.

Nowa u sungule ku aka ngalava hi nkarhi wolowo. Swi tekele Nowa ni ndyangu wakwe malembe ya kwalomu ka 50 ku heta ku aka ngalava. Va yi ake hilaha Yehovha a va leriseke hakona. Hi nkarhi wolowo, Nowa u byele vanhu hi Ndhambi leyi a yi ta va kona. Kambe a va n’wi yingisanga.

Ku fike nkarhi wa leswaku va nghena engalaveni. A hi twe leswi endlekeke endzhaku ka sweswo eka ndzima leyi landzelaka.