Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2025 Watch Tower Bible and Tract Society of Pennsylvania
SEPTEMBER 1-7
LESWI HI SWI DYONDZAKA EBIBELENI SWIVURISO 29
Papalata Tidyondzo Ni Mikhuva Leyi Nga Fambisaniki Ni Matsalwa
wp16.06 6, bokisi
Swivono Leswi Vulavulaka Hi Lava Tshamaka eTilweni
Vanhu vo tala a va swi koti ku tiendlela swilo leswi va swi lavaka hikuva va chava vafi ni swiyilayilana onge hiloko va ri vabohiwa lava bohiweke hi tinketana. Va tirhisa switshungulo ni mintsembyana leswaku va tisirhelela. Kambe a wu fanelanga u chava madimona. Bibele yi hi tiyisekisa yi ku: “[Yehovha], mahlo yakwe ma fambafamba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikronika 16:9) Yehovha Xikwembu xa ntiyiso, loyi a nga ni matimba ku tlula Sathana, u ta ku sirhelela loko u n’wi tshemba.
Leswaku Yehovha a ku sirhelela, u fanele u dyondza swilo leswi n’wi tsakisaka u tlhela u swi endla. Hi xikombiso, eminkarhini ya vaapostola, Vakreste va le Efesa va hlengelete tibuku hinkwato ta vona ta masalamusi kutani va ti hisa. (Mintirho 19:19, 20) Hilaha ku fanaka, leswaku Xikwembu xi kota ku ku sirhelela, u fanele lahla switshungulo, swilo leswi fambisanaka ni vungoma, tibuku ta masalamusi, ni swilo hinkwaswo leswi fambisanaka ni madimona..
Seketela Leswi Bibele Yi Swi Vulaka Hi Rifu
13 Loko u kanakana hi mikhuva kumbe maendlelo yo karhi ya swilo, khongela eka Yehovha leswaku a ku nyika vutlhari. (Hlaya Yakobo 1:5.) Kutani u endla ndzavisiso eka mikandziyiso ya hina. Loko swi fanerile, vulavurisana na vakulu va le vandlheni ra ka n’wina. A va nge ku tekeli xiboho kambe va ta ku pfuna leswaku u kuma minsinya ya milawu ya le Bibeleni, yo fana ni leyi hi nga eku yi tlhuvutseni. Loko u ri karhi u endla sweswo, u letela “matimba ya [wena] ya ku twisisa” naswona matimba wolawo ya ta ku pfuna leswaku u kota ku “hambanisa leswi lulameke ni leswi hoxeke.”—Hev. 5:14.
“Ndzi Ta Famba eNtiyisweni Wa Wena”
12 Mikhuva ni swiendlo leswi nga sekeriwangiki eMatsalweni. Maxaka, vatirhikulorhi ni lava hi nghenaka na vona xikolo va nga ha ringeta ku hi endla hi hlanganyela eka minkhuvo ya vona. Hi nga lwisana njhani ni ntshikilelo wa ku hlanganyela eka mikhuva ni tiholideyi leswi nga n’wi tsakisiki Yehovha? Hi ku tshama hi ri karhi hi anakanya hi ndlela leyi Yehovha a yi tekaka ha yona mikhuva yoleyo. Swi nga pfuna ku kambisisa rungula leri kandziyisiweke eka minkandziyiso ya hina leri kombisaka laha tiholideyi leti dumeke ti sunguleke kona. Loko hi titsundzuxa hi swivangelo swa le Matsalweni swa ku nga hlanganyeli eka tiholideyi toleto, ha khorwiseka leswaku hi famba endleleni leyi “amukelekaka eHosini.” (Efe. 5:10) Loko hi tshemba Yehovha ni Rito rakwe leri nga ntiyiso hi ta sirheleleka leswaku hi nga ‘chavi vanhu.’—Swiv. 29:25.
Endla Ndzavisiso
it “Vukanganyisi” ¶1
Vukanganyisi
Ku ndhundhuzela munhu hi ndlela leyi hundzeletiweke hi xikongomelo xo n’wi kanganyisa. Swi endla leswaku loyi a dzunisiwaka a va ni makatla naswona sweswo swi nga n’wi vavisa. Ku ndhundhuzela munhu hi xikongomelo xo lava ku tsakeriwa kumbe ku vuyeriwa hi swo karhi eka yena kumbe ku n’wi dzunisa. Hakanyingi, ku ndhundhuzela ka muxaka lowu ku nga rhiyela munhu ntlhamu. (Swiv 29:5) Ku ndhundhuzela munhu hi ku n’wi kanganyisa a hi vumbhoni bya vutlhari lebyi humaka etilweni kambe i bya misava leyi, lebyi nga ni vutianakanyi, xihlawuhlawu ni vukanganyisi. (Yk 3:17) Xikwembu a xi tsakisiwi hi vanhu lava kanganyisaka, va hembaka ni ku dzunisa van’wana hi ndlela leyi hundzeletiweke.—2Ko 1:12; Ga 1:10; Ef 4:25; Kl 3:9; Nhl 21:8.
SEPTEMBER 8-14
LESWI HI SWI DYONDZAKA EBIBELENI SWIVURISO 30
“U Nga Ndzi Nyiki Vusiwana Kumbe Rifuwo”
I Rirhandzu Ra Muxaka Muni Leri Nga Hi Tiselaka Ntsako Wa Xiviri?
10 Hinkwerhu ha yi lava mali. Ya hi pfuna eka swin’wana. (Ekl. 7:12) Xana munhu a nga va ni ntsako hakunene loko a ri ni mali yo ringana ku tihlayisa? Swi tano. (Hlaya Eklesiasta 5:12.) Aguri n’wana wa Yake u tsale a ku: “U nga ndzi nyiki vusiwana kumbe rifuwo. Ndzi tshike ndzi dya swakudya leswi ndzi averiweke swona.” Hi swi twisisa kahle leswaku hikwalaho ka yini a nga lavi ku va xisiwana. Loko a ya emahlweni a hlamusela u vule leswaku a nga lavi ku nghena endzingweni wa ku yiva hikuva Xikwembu xa va venga lava yivaka. Kambe hikwalaho ka yini a khongelele leswaku a nga vi xifumi? U tsale a ku: “Leswaku ndzi nga xurhi kutani ndzi ku landzula ndzi ku: ‘Yehovha i mani?’” (Swiv. 30:8, 9) Kumbexana u tiva vanhu vo karhi lava titshegaka hi rifuwo ku nga ri Xikwembu.
11 Lava rhandzaka mali a va nge swi koti ku tsakisa Xikwembu. Yesu u te: “Ku hava loyi a nga vaka hlonga ra tihosi timbirhi; hikuva u ta venga yin’wana a rhandza leyin’wana, kumbe u ta namarhela yin’wana a yi langutela ehansi leyin’wana. A mi nge vi hlonga ra Xikwembu ni ra Rifuwo.” Loko a nga si vula sweswo, u rhange hi ku vula a ku: “Tshikani ku tihlayisela xuma emisaveni, laha nsumba ni nkurhe swi dyaka kona, ni laha makhamba ma tshovaka kona ma yiva. Ku ri na sweswo, tihlayiseleni xuma etilweni, laha nsumba ni nkurhe swi nga dyiki kona, ni laha makhamba ma nga tshoviki kona ma yiva.”—Mat. 6:19, 20, 24.
12 Vanhu vo tala va kume leswaku ku hanya vutomi byo olova swi va tisela ntsako swi tlhela swi va nyika nkarhi wo tala wo tirhela Yehovha. Jack loyi a tshamaka eUnited States u xavise yindlu yakwe leyikulu swin’we ni bindzu rakwe, hikuva a swi tiva leswaku ku endla tano swi ta endla leswaku a kota ku phayona swin’we ni nsati wakwe. U te: “A swi nga hi oloveli ku xavisa nhundzu ni kaya ra hina ro saseka. Kambe loko ndza ha tirha a ndzi vuya ndzi karhatekile hikwalaho ka swiphiqo swa le ntirhweni. Nsati wa mina loyi a nga phayona ra nkarhi hinkwawo, a tshama a tsakile. A tshamela ku vula a ku: ‘Ndzi ni muthori lonene ku tlula hinkwavo!’ Kambe leswi sweswi na mina ndzi nga phayona, hi tirhela Muthori un’we ku nga Yehovha.”
Chava Yehovha Kutani U Ta Kateka
◆ 30:15, 16—Yinhla ya swikombiso leswi i yini?
Swi komba ku nga aneriseki ka makolo. Tinyulu ti titata hi ngati, tanihi leswi vanhu va makolo nkarhi na nkarhi va lavaka mali kumbe matimba yo tala. Hi ku fanana, Xivandla xa Vafi a xi aneriseki kambe xi tshama xi pfulekile ku amukela vo tala lava hlaseriwaka hi rifu. Khwiri leri nga tswariki ri ‘rilela’ vana. (Genesa 30:1) Misava leyi nga ni dyandza yi nwa mati ya mpfula ivi hi ku hatlisa yi va leyi omeke nakambe. Na ndzilo lowu dyeke swilo leswi cukumetiweke eka wona wu humesa malangavi lama dyaka ni swin’wana leswi ma swi fikelelaka. Swi tano ni vanhu va makolo. Kambe lava kongomisiwaka hi vutlhari bya Xikwembu a va susumetiwi hi laha ku nga heriki hi vutianakanyi byo tano.
Ku Hanya Hileswi Hi Nga Na Swona—Ndlela Leyi Hi Nga Swi Endlaka Ha Yona
Hlayisa mali u nga si xava. Hambileswi swi nga ha vonakaka swi hundzeriwe hi nkarhi, ku hlayisa mali u nga si xava i ndlela yin’wana ya vutlhari yo endla leswaku u nga vi ni xiphiqo xa mali. Ku endla tano, swi ta endla leswaku u nga vi na swikweleti swo tala leswi nga endlaka leswaku u hakela ni ntswalo kumbe swi ku endla u xava swilo hi mali ya le henhla. EBibeleni, vusokoti byi hlamuseriwa tanihi lebyi ‘tlhariheke’ hikwalaho ko “hlengeleta swakudya swa byona hi nkarhi wa ntshovelo” leswaku byi ta swi tirhisa enkarhini lowu taka.—Swivuriso 6:6-8; 30:24, 25.
Tshama U Ri Muendzi Wa Yehovha Hilaha Ku Nga Heriki!
18 I swinene ku kambisisa langutelo leri hi nga na rona hi mali. Tivutise: ‘Xana ndzi tshamela ku ehleketa hi mali ni leswi ndzi lavaka ku swi xava? Loko ndzi lombe mali, xana ndza hlwela ku yi tlherisa hikuva ndzi tibyela leswaku loyi a ndzi lombeke a nga na xilaveko xa yona? Xana ndzi titwa ndzi ri wa nkoka loko ndzi ri na mali kambe swi ndzi tikela ku hanana? Xana ndzi teka vamakwerhu va rhandza rifuwo ntsena hileswi va nga na mali? Xana ndzi tiendla munghana wa swigwili ivi ndzi fambela ekule ni swisiwana?’ Hi nyikiwe xirhambo xa nkoka swinene xo va vaendzi va Yehovha. Hi nga tshama hi ri vaendzi va Yehovha loko hi nga rhangisi mali. Loko hi endla tano, Yehovha a nge pfuki a hi tshikile!—Hlaya Vaheveru 13:5.
Endla Ndzavisiso
Ntumbuluko Wu Paluxa Vutlhari Bya Yehovha
11 Mbila i xin’wana xa swihadyana leswitsongo lexi nga hi dyondzisaka dyondzo ya nkoka. (Hlaya Swivuriso 30:26.) Yi fananyana ni mpfundla kambe yi ni tindleve letitsongo ni milenge yo koma. Xihadyana lexi xi tshama laha ku nga tala maribye. Xi pfuniwa hi mahlo ya xona lama vonaka swinene ni mincele leyi xi tumbelaka eka yona loko xi vona vahlaseri. Timbila ti tshama hi mintlawa naswona leswi swi endla leswaku ti hlayiseka ni ku kufumetana hi vuxika.
12 I yini lexi hi nga xi dyondzaka eka mbila? Xo sungula, xihadyana lexi xi ni vuxiyaxiya. Xi ma tirhisa kahle mahlo ya xona lama vonaka swinene leswaku xi tisirhelela eka vahlaseri naswona xi tshama ekusuhi ni ncele leswaku xi ta hatla xi tsutsumela kona ku ya tumbela. Hilaha ku fanaka, na hina hi fanele hi va ni vuxiyaxiya hi tlhelo ra moya leswaku hi kota ku vona makhombo lama nga kona emisaveni leyi ya Sathana. Muapostola Petro u tsundzuxe Vakreste a ku: “Hlayisani mianakanyo ya n’wina leyi hlutekeke, mi hiteka. Xirha xa n’wina, Diyavulosi, xa famba-famba ku fana ni nghala leyi vombaka, yi lava wa ku n’wi dya.” (1 Pet. 5:8) Loko a ha ri laha misaveni, Yesu u tshame a hitekile, a lwisana ni matshalatshala wahi ni wahi ya Sathana yo lava ku N’wi endla a dyoha. (Mat. 4:1-11) Yesu u va vekele xikombiso lexinene valandzeri vakwe!
13 Ndlela yin’wana ya ku tshama hi xalamukile i ku kuma nsirhelelo wa moya lowu Yehovha a hi nyikaka wona. A hi fanelanga hi honisa ku dyondza Rito ra Xikwembu ni ku va kona eminhlanganweni ya Vukreste. (Luka 4:4; Hev. 10:24, 25) Ku tlula kwalaho, leswi timbila ti tshamaka hi mintlawa, na hina hi fanele hi va ni vun’we ni Vakreste-kulorhi leswaku hi “ta khutazana.” (Rhom. 1:12) Loko hi amukela nsirhelelo lowu Yehovha a hi nyikaka wona, hi kombisa leswaku hi pfumelelana na mupisalema Davhida, loyi a tsaleke a ku: “Yehovha i ribye ra mina ni khokholo ra mina ni Muponisi wa mina. Xikwembu xanga i ribye ra mina. Ndzi ta tumbela eka xona.”—Ps. 18:2.
SEPTEMBER 15-21
LESWI HI SWI DYONDZAKA EBIBELENI SWIVURISO 31
Leswi Hi Swi Dyondzaka Eka Swiletelo Leswi Humaka Eka Manana Swa Rirhandzu
Dyondzisa Vana Va Wena Mahanyelo Lamanene
Va byele ntiyiso hinkwawo hi timhaka ta masangu. Switsundzuxo swa laveka. (1 Vakorinto 6:18; Yakobo 1:14, 15) Hakanyingi Bibele yi kombisa leswaku vuxaka bya rimbewu i nyiko leyi humaka eka Xikwembu, ku nga ri ntlhamu lowu Sathana a hi phasaka ha wona. (Swivuriso 5:18, 19; Risimu Ra Solomoni 1:2) Ku byela vana wa wena lava nga emalembeni ya kondlo-a-ndzi-dyi hi makhombo lama vangiwaka hi timhaka ta masangu ntsena, swi nga ha endla leswaku va va ni vonelo leri hoxeke hi mhaka leyi naswona va yi vona yi nga fambisani na Matsalwa. Nhwanyana un’wana wa le Furwa la vuriwaka Corrina u ri: “Vatswari va mina va vulavula ngopfu hi ku tikhoma loko biha hi tlhelo ra rimbewu, kutani leswi swi endle leswaku ndzi swi teka swi nga ri swinene ku endla timhaka ta masangu.”
Tiyiseka leswaku vana va wena va tiva ntiyiso hinkwawo malunghana ni timhaka ta masangu. Manana un’wana wa le Mexico la vuriwaka Nadia u ri: “Leswi ndzi tshamelaka ku swi dyondzisa vana va mina hileswaku swa tsakisa ku endla timhaka ta masangu, i swa ntumbuluko naswona Yehovha Xikwembu u swi endlele leswaku vanhu va tiphina ha swona. Kambe ti fanele ti endliwa ntsena hi vanhu lava tekaneke. Ti nga hi tisela ntsako kumbe ku xaniseka, swi titshege hi ndlela leyi hi ti endlaka ha yona.”
ijwhf xihloko xa vu-4 ¶11-13
Ku Vulavurisana Ni Vana Hi Byala
Teka goza ro vulavula hi mhaka leyi. Mark, tatana wa le Britain, u ri, “Loko vana va nwa byala va nga pfilunganyeka. Ndzi vutise n’wana wa mina wa jaha loyi a nga ni malembe ya nhungu loko a vona swi hoxile kumbe swi ri swinene ku nwa byala. Ndzi n’wi endle a ntshunxeka leswaku a kota ku phofula vonelo rakwe.”
N’wana u ta yi tekela enhlokweni mhaka yoleyo loko u vulavula ha yona ko hlayanyana. Loko u bula ni n’wana wa wena hi byala hi ku ya hi malembe lawa a nga na wona u nga ha katsa ni timhaka leti nga n’wi pfunaka evuton’wini, to tanihi milawu ya le magondzweni ni timhaka ta masangu..
Va na xikombiso lexinene. Vana va fana ni swi ponci—va tswonga mikhuva ya vanhu lava tshamaka na vona—naswona valavisisi va vula leswaku hakanyingi vana va tekelela vatswari. Leswi swi vula leswaku loko u tolovele ku nwa byala leswaku u rhulisa mbilu kumbe u susa ntshikilelo, nwana wa wena u ta anakanya leswaku loko a vilerisiwa hi swo karhi u fanele a nwa byala. Va na xikombiso lexinene. Tiyiseka leswaku wa ringanisela loko u nwa byala.
Dyondzisa Vana Ku Titsongahata
Va khutaze ku va ni malwandla. Kombisa n’wana wa wena leswaku “ku nyika swi tisa ntsako lowukulu ku tlula ku amukela.” (Mintirho 20:35) Njhani? Swin’we ni n’wana wa wena, tsalani mavito ya vanhu lava lavaka ku pfuniwa hi ku yeriwa exitolo, hi xo famba ha xona kumbe hi ku lunghiseriwa swin’wana ekaya ra vona. Kutani, loko u ya pfuna van’wana va vona, famba swin’we ni n’wana wa wena. N’wana wa wena u fanele a vona ntsako ni ku eneriseka leswi u vaka na swona loko u ri karhi u pfuna van’wana. Hi ndlela yoleyo u ta va u dyondzisa n’wana wa wena ku titsongahata hi ku n’wi vekela xikombiso, ku nga ndlela leyi nga ni matimba swinene yo dyondzisa.—Nsinya wa nawu wa le Bibeleni: Luka 6:38.
Endla Ndzavisiso
Dyondzo Ya Le Nkarhini Wa Bibele
7 EIsrayele, vana a a va dyondzisiwa ku sukela va ha ri vatsongo hi tatana na manana. (Deteronoma 11:18, 19; Swivuriso 1:8; 31:26) Eka Dictionnaire de la Bible ya Xifurwa, Mudyondzi wa Bibele E. Mangenot u tsale a ku: “Hi ku hatlisa, loko se a kota ku vulavula, n’wana u dyondza mitila yi nga ri yingani leyi nge Nawini. Mana wa yena u phindha-phindha ndzimana; loko se a yi tiva, u n’wi dyondzisa yin’wana. Endzhaku, tsalwa ra tindzimana leti se va kotaka ku ti vula hi nhloko, ri boheleriwa emavokweni ya vana. Xisweswo, va sungule ku dyondza ku hlaya, naswona loko se va kurile, a va ta ya emahlweni ni dyondzo ya vona ya vukhongeri hi ku hlaya ni ku anakanyisisa hi milawu ya Hosi.”
8 Leswi swi komba leswaku madyondziselo-nkulu lawa a ma tirhisiwa a ku ri ku dyondza swilo hi ku nhlokohata. Swilo leswi dyondziwaka malunghana ni nawu wa Yehovha swin’we ni ntirhisano wakwe ni vanhu va yena, a a swi fanele swi dzika embilwini. (Deteronoma 6:6, 7) A swi fanele ku anakanyiwa. (Pisalema 77:11, 12) Leswaku ku pfuniwa lavatsongo ni lavakulu leswaku va kota ku nhlokohata, swipfuneto swo hambana swa ku nhlokohata a swi tirhisiwa. Leswi a a swi katsa ku tlhandlamana ka marito lama hlayekaka ni loko ma hingakanyiwile, tindzimana leti tlhandlamanaka eka risimu leti sungulaka hi letere ro hambana, hi ntlhandlamano wa wona (tanihi Swivuriso 31:10-31, NW); ndzhundzuluko (marito lama sungulaka hi maletere yo fana kumbe ya mpfumawulo wo fana); ni ku tirhisa tinhlayo, ku fana ni leti tirhisiweke eka hafu yo hetelela ya Swivuriso ndzima 30. Lexi tsakisaka, Gezer Calendar, yin’wana ya swikombiso swa matsalwa ya khale ya Xiheveru, vadyondzi van’wana va yi ehleketela leswaku a a yi ri tsalwa ra mufana loyi a nghena xikolo ra ku tikambela ha rona leswi a swi nhlokohateke.
SEPTEMBER 22-28
LESWI HI SWI DYONDZAKA EBIBELENI EKLESIASTA 1-2
Yana eMahlweni U Letela Xitukulwana Lexi Landzelaka
“Swilo Leswi Swi Nyike Vanhu Vo Tshembeka”
3 Vo tala va hina ha yi rhandza mitirho leyi hi yi endlaka naswona hi lava ku ya emahlweni hi yi endla. Lexi twisaka ku vava sweswo a swi koteki hikuva ku sukela enkarhini wa Adamu, vanhu va dyuhala ivi va fa kutani ku velekiwa van’wana. (Ekl. 1:4) Sweswo swi ve xiphiqo ni le nkarhini lowu hi hanyaka eka wona eka Vakreste va ntiyiso. Ntirho lowu vanhu va Yehovha va wu endlaka wu ya emahlweni wu kula swinene. Loko hi endla mitirho leyintshwa ku va ni tindlela letintshwa to endla swilo naswona minkarhi yo tala tindlela leti ti fambisana ni ku cinca lokukulu ka thekinoloji. Vamakwerhu lava se va dyuhaleke swi nga ha va tikela ku fambisana ni ku cinca loku. (Luka 5:39) Handle xivangelo lexi, vantshwa va ha ri ni matimba lama eneleke ku tlula vamakwerhu lava dyuhaleke. (Swiv. 20:29) Kutani vamakwerhu lava kuleke va nga kombisa leswaku va ni rirhandzu ni vutlhari loko va letela vantshwa ku endla mitirho leyi engetelekeke evandlheni.—Hlaya Pisalema 71:18.
4 Vamakwerhu lava rhangelaka swi nga ha va tikela ku letela vamakwerhu lava ha riki vantshwa. Van’wana va chava leswaku va nga lahlekeriwa hi vutihlamuleri lebyi a va byi rhandza. Van’wana va vilerisiwa hi ku lahlekeriwa hi vulawuri naswona va vona onge vamakwerhu lava ha riki vantshwa a va nge swi koti ku endla swilo kahle. Van’wana va nga ha vona onge a va na wona nkarhi wo letela van’wana. Nakambe vantshwa a va fanelanga va hela mbilu loko va nga nyikiwi vutihlamuleri lebyi engetelekeke evandlheni.
Endla Ndzavisiso
it “Eklesiasta” ¶1
Eklesiasta
Vito ra Xiheveru leri nge Qo·heʹleth (leri vulaka “Muhlengeleti; Muhlanganisi”) ri wu hlamusela kahle ntirho lowu a wu endliwa hi Hosi eka mfumo lowu a wu lawuriwa hi Xikwembu lowu Vaisrayele a va tiphina eka wona. (Ekl 1:1, 12) A ku ri vutihlamuleri bya Hosi leswaku yi pfuna vanhu lava tinyiketeleke eka Xikwembu hi ku tshembeka leswaku va hlengeletana eka Hosi ya vona ni Xikwembu xa vona xa ntiyiso. (1Th 8:1-5, 41-43, 66) Hikwalaho ka sweswo, leswaku Hosi i yinene kumbe a hi yinene eka tiko, a swi ta tikomba eka ndlela leyi a yi ta kongomisa tiko hayona evugandzerini bya Yehovha. (2Th 16:1-4; 18:1-6) Muhlengeleti Solomoni, a a swi endla sweswo, u hlengelete Israyele ni vanghana vakwe ni vatshami va xinkarhana etempeleni. Eka buku leyi, u hlengelete vanhu va Xikwembu leswaku va va ekule ni mitirho ya misava leyi kutani a va kongomisa eka mitirho leyinene ya Xikwembu lexi a va tinyiketele eka xona tanihi tiko. Vito leri tirhisiweke eka Tibibele ta Xinghezi ri tekiwe eka vuhundzuluxeri bya Qo·heʹleth ya Septuagint ya Xigriki, leyi thyiweke, Ek·kle·si·a·stesʹ (Eklesiasta), leri vulaka “xirho xa ecclesia (vandlha; nhlengeletano).”
SEPTEMBER 29–OCTOBER 5
LESWI HI SWI DYONDZAKA EBIBELENI EKLESIASTA 3-4
Tiyisa Ntambhu Ya Wena Ya Miluko Yinharhu
ijwhf xihloko xa vu-10 ¶2-8
Ndlela Leyinene Yo Tirhisa Foni
● Vukati byi nga tsakisa loko u yi tirhisa kahle foni. Hi xikombiso, vatekani van’wana va burisana hi yona loko va nga ri swin’we.
“Ku tsalela nkataku meseji lowu nge ‘ndza ku rhandza’ kumbe ‘ndzi ehleketa hi wena’ swi nga endla leswaku mi ya mi rhandzana ngopfu..”—Jonathan.
● Matirhiselo yo biha ya foni ma nga endla vukati byi nga tsakisi. Hi xikombiso, vanhu van’wana va heta nkarhi wo tala va ri eka tifoni kumbe ti-tablet naswona sweswo swi va dyela nkarhi lowu a va ta wu heta va ri ni varingani va vona..
“Ndza tiyiseka leswaku mikarhi yin’wana nuna wa mina a a ta tsakela ku vulavula na mina loko a ndzi nga ri ku tirhiseni ka foni.”—Julissa.
● Van’wana va vula leswaku va nga va ni mabulo lamanene ni vanghana va vona va vukati hi hala tlhelo va ri karhi va tirhisa tifoni ta vona. Sherry Turkle mutivi wa ntshamisano u tshemba leswaku leswi a swi koteki. Hambiloko vanhu va ehleketa leswaku ku endla swilo swo tala hi nkarhi wun’we i swinene, kahlekahle a swi kahle. U vula leswaku loko hi ringeta ku endla swilo swo tala hi nkarhi wun’we, a hi nge swi endli kahle.”
“Swa tsakisa loko ndzi dya mabulo ni nuna wa mina, loko a nga ri ku endleni swilo swo tala hi nkarhi wun’we. Loko a endla swilo swo tala hi nkarhi wun’we swi ndzi endla ndzi titwa onge a nga na mhaka na mina kumbe a ndzi kona kwalaho.”—Sarah.
Ntiyiso wa mhaka: Ndlela leyi u yi tirhisaka ha yona foni yi nga pfuna kumbe yi onha vukati bya wena.
Tshama U Ri Karhi U Pfurhetela “Langavi Ra Yehovha”
12 Vatekani va nga va tekelela njhani Akhwila na Prisila? Ehleketa hi swilo swo tala leswi wena ni nkataku mi faneleke mi swi endla. Xana mi nga endla yin’wana ya mitirho leyi xikan’we ematshan’weni ya leswaku un’wana ni un’wana a ti endlela yona? Hi xikombiso, Akhwila na Prisila a va chumayela swin’we. Xana nkarhi ni nkarhi wa hlela leswaku mi endla hilaha ku fanaka? Nakambe Akhwila na Prisila a va tirha swin’we. Swi nga endleka wena ni nkataku mi nga tirhi swin’we kambe xana mi nga endla mitirho ya le kaya swin’we? (Ekl. 4:9) Loko mi pfunana ku endla mitirho ya le kaya swin’we, mi ya mi va nyandza yin’we naswona mi kuma nkarhi wo bula. Robert na Linda se va ni malembe yo tlula 50 va catile. Robert u ri: “A hi wu kumi nkarhi wo tala wo hungasa swin’we. Swa ndzi tsakisa swinene loko ndzi hlantswa swibye ivi nsati wa mina a swi sula kumbe loko a ta a ta ndzi pfuna loko ndzi tirhatirha ehandle. Loko hi pfunana hi va nyandza yin’we. Rirhandzu ra hina ri ya ri kula.”
13 Hambiswiritano, tsundzukani leswaku ku va mi tinyika nkarhi wo va swin’we a hi swona ntsena leswi endlaka mi va ni vun’we. Wansati la tekiweke wa le Brazil u ri: “Masiku lawa leswi ku nga ni swikavanyeto swo tala, hi nga ha tibyela leswaku leswi hi tshamaka swin’we hi heta nkarhi swin’we. Ndzi dyondze leswaku a swi enelanga ku va hi va swin’we ntsena kambe hi fanele hi endla leswi engetelekeke. Leswi swi vula leswaku ndzi fanele ndzi nyika nuna wa mina nkarhi wa mina.” Xiya ndlela leyi Bruno ni nsati wakwe Tays va endlaka sweswo hayona. Bruno u ri: “Hi nkarhi wa hina wo va swin’we hi veka tifoni ekule leswaku hi ta tiphina hi ku va swin’we.”
14 Kambe ku vuriwa yini loko wena ni nkataku mi nga swi rhandzi ku va swin’we? Kumbexana a mi rhandzi swilo swa ku fana kumbe ma nyangatsana. Mi nga endla yini? Ehleketa hi ndzilo lowu hi buleke ha wona eku sunguleni. A wo na swi pfuketana wu pfurha. Wu lava ku hlanganyetiwa hi swihunyana kutani hi ku famba ka nkarhi hi tihunyi letikulu. Hilaha ku fanaka, swi nga va njhani mi tinyika nkarhi lowutsongo wo va swin’we siku ni siku? Endlani leswi mi swi tsakelaka ha vumbirhi bya n’wina ku nga ri leswi nga ta mi holovisa. (Yak. 3:18) Loko mi endla tano, mi nga ha sungula ku pfurhetela rirhandzu ra n’wina.
Tshama U Ri Karhi U Pfurhetela “Langavi Ra Yehovha”
3 Leswaku “langavi ra Yehovha” ri nga timeki, nuna na nsati va fanele va tirha hi matimba leswaku va va ni vuxaka lebyi tiyeke na Yehovha. Xana ku endla leswi swi ta va pfuna njhani evukatini bya vona? Loko vatekani va teka vuxaka bya vona ni Tata wa vona wa le tilweni byi ri bya nkoka, va tshama va lunghekele ku tirhisa switsundzuxo swakwe, leswi va pfunaka va papalata ni ku hlula swiphiqo leswi nga endlaka leswaku rirhandzu ra vona ri hola. (Hlaya Eklesiasta 4:12.) Vanhu lava nga ni vuxaka lebyinene na Yehovha va tikarhatela ku n’wi tekelela ni ku va ni vumunhu byo fana ni lebyi a nga na byona byo tanihi hi ku va ni musa, ku lehisa mbilu ni ku rivalela. (Efe. 4:32–5:1) Vatekani lava kombisaka vumunhu byo tano, swa va olovela leswaku va ya va rhandzana swinene. Makwerhu waxisati Lena, loyi a nga ni malembe ya 25 a tekiwile u ri: “Swa olova ku rhandza ni ku xixima munhu loyi a nga ni vuxaka lebyinene na Yehovha.”
Endla Ndzavisiso
it “Rirhandzu” ¶39
Rirhandzu
“Nkarhi Wa Ku Rhandza.” Yehovha a nga va kombisi rirhandzu vanhu lava ri nga va faneriki kumbe lava endlaka swo biha. Yehovha u rhandza vanhu hinkwavo ku fikela loko va swi kombisa erivaleni leswaku a va n’wi rhandzi. Kutani ku fika nkarhi wa leswaku na yena a tshika ku va rhandza. Yehovha na Yesu Kreste va rhandza vululami kambe va venga vuhomboloki. (Ps 45:7; Hv 1:9) Lava vengaka Xikwembu xa ntiyiso a va fanelanga va kombiwa rirhandzu. I ntiyiso, vanhu vo tano a swi pfuni nchumu ku va komba rirhandzu hikuva va venga Xikwembu naswona rirhandzu ra Xikwembu a ri kona eka vona. (Ps 139:21, 22; Esa 26:10) Hikokwalaho ka sweswo, Xikwembu xa va venga naswona xi va vekele nkarhi wa ku va lovisa.—Ps 21:8, 9; Ekl 3:1, 8.
OCTOBER 6-12
LESWI HI SWI DYONDZAKA EBIBELENI EKLESIASTA 5-6
Ndlela Leyi Hi Nga Kombisaka Ku Xixima Xikwembu Xa Hina Lexikulu Hayona
Vangamisa Yehovha Hi Ku Va Ni Xindzhuti
17 Hi fanele hi xiximeka loko hi gandzela Yehovha. Eklesiasta 5:1 yi ri: “Rindza milenge ya wena nkarhi wun’wana ni wun’wana loko u ya endlwini ya Xikwembu xa ntiyiso.” Muxe na Yoxuwa va lerisiwe ku hluvula maphaxani ya vona loko va ri endhawini yo kwetsima. (Eks. 3:5; Yox. 5:15) A va fanele va endla tano ku kombisa xichavo. Vaprista va Vaisrayele a va boheka ku ambala swirhangiso swa ntsembyana “leswaku va funengeta nyama leyi nga ambalangiki.” (Eks. 28:42, 43) Leswi a swi endleriwa leswaku va xiximeka loko va ri karhi va tirha ealitarini. Xirho xin’wana ni xin’wana xa ndyangu wa vuprista a xi fanele xi namarhela milawu ya Xikwembu ya ku xiximeka.
18 Hikwalaho, ku gandzela hi ndlela leyi xiximekaka swi katsa xichavo. Leswaku hi xiximiwa hi fanele hi hanya hi ndlela leyi xiximekaka. Xichavo lexi hi xi kombisaka a xi fanelanga xi va xa vukanganyisi kumbe xa ku lava ku voniwa. Ku ri na sweswo xi fanele xi huma embilwini, xi voniwa hi Xikwembu ku nga ri hi vanhu ntsena. (1 Sam. 16:7; Swiv. 21:2) Xichavo xi fanele xi vonaka eka ndlela leyi hi hanyaka ha yona, langutelo ra hina, vuxaka bya hina ni van’wana hambi ku ri ndlela leyi hi va langutaka ha yona vanhu van’wana ni ndlela leyi hina vini hi titwaka ha yona. Hakunene, xichavo xi fanele xi vonaka minkarhi hinkwayo eka xin’wana ni xin’wana lexi hi xi vulaka ni ku xi endla. Loko swi ta eka mahanyelo, maambalelo ni ku tilunghisa ka hina, hi yingisa marito ya muapostola Pawulo lama nge: “A hi nyiki xivangelo ni xin’we xa ku khunguvanyeka hi ndlela hambi yi ri yihi, leswaku vutirheli bya hina byi nga kumiwi byi ri ni xihoxo; kambe hi ndlela yin’wana ni yin’wana hi tibumabumela tanihi vatirheli va Xikwembu.” (2 Kor. 6:3, 4) Hi “sasekisa dyondzo ya Muponisi wa hina, Xikwembu, eka swilo hinkwaswo.”—Tito 2:10.
Antswisa Swikhongelo Swa Wena Hi Ku Dyondza Bibele
21 Yesu u khongele hi xichavo ni hi ripfumelo lerikulu. Hi xikombiso, loko a nga si pfuxa Lazaro “Yesu [u tlakusele] mahlo yakwe etilweni a ku: ‘Tatana, ndza nkhensa hikuva u ndzi twile. I ntiyiso, a ndzi swi tiva leswaku wa ndzi twa nkarhi hinkwawo.’” (Yoh. 11:41, 42) Xana swikhongelo swa wena swi kombisa leswaku u ni xichavo lexikulu ni ripfumelo? Hlaya xikhongelo xa xikombiso xa Yesu lexi kombisaka xichavo, kutani u ta swi xiya leswaku swilo swa nkoka eka xona a ku ri ku kwetsimisiwa ka vito ra Yehovha, ku ta ka Mfumo wa yena ni ku endliwa ka ku rhandza ka yena. (Mat. 6:9, 10) Anakanya hi swikhongelo swa wena n’wini. Xana swi kombisa leswaku u ni mhaka swinene ni Mfumo wa Yehovha, ku endla ku rhandza ka yena ni ku kwetsimisiwa ka vito ra yena ro kwetsima? Swi fanele swi kombisa leswaku wa khathala hi timhaka toleto.
Hetisisa ‘Xihlambanyo Lexi U Xi Endleke’
12 Nkhuvulo ko va masungulo ntsena. Endzhaku ko khuvuriwa, hi lava ku ya emahlweni hi hanya hi ku pfumelelana ni ku tinyiketela ka hina ko tirhela Xikwembu hi ku tshembeka. Kutani, hi nga tivutisa leswi: ‘Vuxaka bya mina na Yehovha byi kule ku fikela kwihi endzhaku ka loko ndzi khuvuriwile? Xana ndza ha ya emahlweni ndzi tirhela Yehovha hi mbilu hinkwayo? (Kol. 3:23) Xana ndza khongela, ndzi hlaya Rito ra Xikwembu ni ku va kona eminhlanganweni ku katsa ni ku chumayela nkarhi ni nkarhi? Kumbexana se a ndza ha swi hisekeli ku endla xin’wana xa leswi boxiweke laha henhla ku fana ni le ku sunguleni?’ Muapostola Petro u hlamusele leswaku hi nga papalata ku tsanisa vuxaka bya hina na Yehovha hi ku ya emahlweni hi engetela vutivi bya hina, hi tiyisela ni ku tinyiketela eka Xikwembu.—Hlaya 2 Petro 1:5-8.
Endla Ndzavisiso
Swivutiso Swa Vahlayi
Eklesiasta 5:8 yi vulavula hi mufumi loyi a tshikilelaka swisiwana naswona a nga ni mona. Mufumi yoloye u fanele a tsundzuka leswaku ku na un’wana loyi a nga ni vulawuri ku n’wi tlula loyi a n’wi tlhomeke tihlo. Swi nga endleka leswaku ku ri na van’wana lava nga ni vulawuri lebyi tlakukeke. Kambe lexi twisaka ku vava, swi nga endleka vafumi hinkwavo va ri ni vukungundzwana naswona sweswo swi endla leswaku vanhu va xaniseka.
Hambiloko swi vonaka onge a ku na laha hi nga rilelaka kona, swa chavelela ku tiva leswaku Yehovha u va langutile vafumi volavo. Hi nga kombela ku pfuniwa eka Xikwembu hi tlhela hi lahlela mindzhwalo ya hina eka xona. (Ps. 55:22; Filp. 4:6, 7) Ha swi tiva leswaku “matihlo ya Yehovha ma fambafamba emisaveni hinkwayo leswaku a pfuna lava n’wi tshembaka hi mbilu hinkwayo.”—2 Tikr. 16:9.
Eklesiasta 5:8, yi tsundzuxa vafumi leswaku va tshama va swi tiva leswaku mikarhi hinkwayo ku na un’wana loyi a nga ni vulawuri lebyi tlakukeke ku tlula bya vona. Xa nkoka swinene, tsalwa leri ri hi tsundzuxa leswaku Yehovha hi yena Mufumi Lonkulu. Sweswi wa fuma hi ku tirhisa N’wana wakwe Yesu Kreste, loyi a nga Hosi ya Mfumo wa Xikwembu. Lowa Matimba Hinkwawo, loyi a vonaka swilo hinkwaswo, u fuma hi ndlela leyinene swin’we ni N’wana wa yena.
OCTOBER 13-19
LESWI HI SWI DYONDZAKA EBIBELENI EKLESIASTA 7-8
‘Ya Na Endlwini Ya Xirilo’
it “Xirilo” ¶9
Xirilo
Nkarhi Wa Ku Rila. Eklesiasta 3:1, 4 yi vula leswaku ku ni “nkarhi wa ku rila ni nkarhi wa ku hleka; nkarhi wa ku kolola ni nkarhi wa ku cina.” Hi ku xiya xiyimo xa vanhu loko swi ta eka rifu, mbilu ya lowo tlhariha yi vonaka hi ku ya “endlwini ya xirilo” ku ri ni ku ya enkhubyeni. (Ekl 7:2, 4; ringanisa na Swiv 14:13.) Hikwalaho ka sweswo, munhu wo tlhariha u tirhisa nkarhi wolowo leswaku a twelana ni ku chavelela van’wana, ematshan’weni yo swi ba hi makatla a ya laha ku nga ni ntsako. Leswi swi ta n’wi pfuna leswaku a tsundzuka ku siku rin’wana na yena u ta va eka xiyimo lexi fanaka, sweswo swi ta endla leswaku a hlakulela ku va ni vuxaka lebyinene ni Muvumbi wakwe.
Pfuna Lava Tshikilelekeke Leswaku Va Kota Ku Tiyisela
15 William loyi a feriweke hi nsati emalembeni lama hundzeke u ri: “Swa ndzi chavelela loko van’wana va ndzi byela swilo leswinene leswi a va swi rhandza hi nsati wa mina; leswi swi endla ndzi swi xiya leswaku a rhandziwa ni ku xiximiwa. Sweswo swi ndzi chavelela ngopfu. Marito yo tano ya ndzi chavelela swinene hikuva nsati wa mina a a ri wa nkoka ngopfu evuton’wini bya mina.” Noni leyi vuriwaka Bianca, yi ri: “Swa ndzi chavelela loko van’wana va khongela na mina ni ku ndzi hlayela tsalwa rin’we kumbe mambirhi. Ndza swi rhandza ku va twa va vulavula hi nuna wa mina kumbe va rhiya ndleve loko ndzi vulavula ha yena.”
‘Rilani Ni Vanhu Lava Rilaka’
16 Ndlela yin’wana leyi hi nga va chavelelaka ha yona lava feriweke, i ku khongela na vona kumbe ku va katsa eswikhongelweni. Hambileswi swi nga ku tikelaka ku khongela ni loyi a feriweke hi nkarhi wolowo wo tika, kambe loko u khongela swi huma embilwini hambi u ri karhi u rila kumbe u mpfikula, xikhongelo xexo xi nga n’wi chavelela swinene. Dalene u ri: “Mikarhi yin’wana loko vamakwerhu va xisati va ta ndzi chavelela, a ndzi va kombela leswaku va khongela na mina. Hakanyingi loko va sungula ku khongela marito ya vona a ma nga humi kahle hikwalaho ka leswi a va twa ku vava kambe loko va ya emahlweni ni xikhongelo leswi a va swi vula a swi ndzi chavelela swinene. Ripfumelo, rirhandzu ni ndlela leyi a va ndzi twela ha yona swi tiyise ripfumelo ra mina.”
‘Rilani Ni Vanhu Lava Rilaka’
17 Van’wana ku hundza nkarhi wo leha va ha ri ni gome kasi van’wana va hatla va hlakarhela. Hambeta u va chavelela niloko maxaka ni vanghana va mukile, niloko se ku hundze tin’hweti va feriwile. “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swiv. 17:17) Vamakwerhu va nga n’wi chavelela swinene makwerhu la feriweke ku nga khathariseki nkarhi lowu a wu hetaka a ri ni gome.—Hlaya 1 Vatesalonika 3:7.
18 Tsundzuka leswaku lava feriweke va nga va ni mabibi ya mbilu loko ku fika siku leri va cateke ha rona, va twa vuyimbeleri byo karhi, va vona swinepe, va endla mitirho yo karhi, va twa nun’hwelo ni mpfumawulo wo karhi kumbe loko ku fika nguva yo karhi. Lava feriweke va nga ha twa ku vava loko va ya enhlengeletanweni kumbe eXitsundzuxweni ro sungula endzhaku ko feriwa hi vanghana va vona va vukati. Makwerhu un’wana wa xinuna u ri: “A swi nga ndzi dyisi byi rhelela ku ehleketa leswaku loko siku leri hi cateke ha rona ri fika ndzi ta va ndzi ri ndzexe. Kambe vamakwerhu va nga ri vangani va ndzi endlele xinkhubyana leswaku ndzi nga tikumi ndzi ri ndzexe.”
19 Kambe u nga rivali leswaku lava feriweke va lava ku tshama va ri karhi va khutaziwa ku nga ri ntsena hi masiku yo hlawuleka. Junia u ri: “Ku endzeriwa hi vamakwerhu nkarhi ni nkarhi ku nga ri ntsena hi masiku yo hlawuleka yo tanihi siku leri u cateke ha rona swa chavelela swinene. Ku endzeriwa hi vamakwerhu u nga swi rindzelanga i swa nkoka naswona swa chavelela.” Ntiyiso wa mhaka hileswaku a hi nge swi koti ku herisa ku vava loku munhu la feriweke a ku twaka, kambe hi nga n’wi chavelela hi ku endla matshalatshala lawa hi nga ma kotaka leswaku hi n’wi seketela. (1 Yoh. 3:18) Gaby u ri: “Ndzi nkhensa Yehovha leswi a tirhiseke vakulu leswaku va ndzi seketela hi nkarhi wolowo wo tika. Va endle ndzi swi xiya leswaku Yehovha wa ndzi rhandza hakunene.”
Endla Ndzavisiso
“Hinkwavo Va Ta Tiva Leswaku Mi Vadyondzisiwa Va Mina”
18 Mikarhi yin’wana hi nga vona swi fanerile ku bula ni makwerhu la hi twiseke ku vava. Kambe hi endla kahle ku sungula hi ku tivutisa swivutiso swo fana ni leswi: ‘Xana ndzi ni vuxokoxoko hinkwabyo?’ (Swiv. 18:13) ‘Xana swi nga endleka a a nga tiyimiselanga ku ndzi twisa ku vava?’ (Ekl. 7:20) ‘Xana ndzi tshame ndzi endla xihoxo lexi fanaka?’ (Ekl. 7:21, 22) ‘Xana ku bula ni makwerhu yoloye swi ta endla leswaku xiyimo xi nyanya ematshan’weni yo va xi antswa?’ (Hlaya Swivuriso 26:20.) Loko hi tinyika nkarhi wo kambisisa swivutiso swo fana ni leswi, hi nga kuma leswaku ndlela leyi hi rhandzaka makwerhu hayona yi nga endla hi xi ba hi makatla xihoxo xakwe..
OCTOBER 20-26
LESWI HI SWI DYONDZAKA EBIBELENI EKLESIASTA 9-10
Va Na Ni Langutelo Lerinene Hi Miringo Leyi U Langutanaka Na Yona
U Nga ‘Kariheli Yehovha’
20 Tsundzuka xivangelo xa xiviri xa swiphiqo swa hina. Ha yini hi fanele hi endla tano? Swiphiqo swin’wana swa hina ho tivangela. Loko hi lo tivangela, hi fanele hi pfumela mhaka yoleyo. (Gal. 6:7) U nga ringeti ku sola Yehovha hikwalaho ka swiphiqo swa wena. Ha yini sweswo swi nga twali? Anakanya hi xikombiso lexi: Movha yi nga ha va yi swi kota ku famba hi rivilo ra le henhla. A hi nge muchayeri wa yona u tsutsuma swinene loko a jika ekhonweni, ivi movha ya yena yi chayisa. Xana muchayeri u fanele a sola vaendli va movha wolowo? Doo! Hilaha ku fanaka, Yehovha u hi vumbe hi ri ni ntshunxeko wo tiendlela swiboho. Kambe u tlhele a hi dyondzisa ndlela yo endla swiboho swa vutlhari. Kutani ha yini hi fanele hi sola Muvumbi wa hina hikwalaho ka swihoxo swa hina?
21 I ntiyiso leswaku a hi swiphiqo swa hina hinkwaswo leswi vangiwaka hi swihoxo swa hina ni swiendlo swa hina leswi hoxeke. Swiendlakalo swin’wana swi endleka hikwalaho ka “nkarhi ni xiendlakalo lexi nga languteriwangiki.” (Ekl. 9:11) Kambe, a hi fanelanga hi rivala leswaku Sathana Diyavulosi hi yena muvangi lonkulu wa vuhomboloki. (1 Yoh. 5:19; Nhlav. 12:9) Hi yena nala—ku nga ri Yehovha!—1 Pet. 5:8.
Yehovha U Ma Teka Ma Ri Ya Risima Malandza Yakwe Lama Titsongahataka
10 Ku titsongahata swi endla hi va ni langutelo lerinene. Ku vula ntiyiso, mikarhi yin’wana hi pfa hi vona vanhu va nga khomiwi kahle. Hosi yo tlhariha, Solomoni u te: “Ndzi vone malandza ma gade tihanci kambe tihosana ti famba ehansi kukota malandza.” (Ekl. 10:7) Mikarhi yin’wana vanhu lava nga ni vuswikoti eka swilo swo karhi a va bumabumeriwi. Kambe lava nga riki na vuswikoti va bumabumeriwa swinene. Hambiswiritano, Solomoni u vule leswaku i vutlhari ku va ni langutelo lerinene ematshan’weni yo vilerisiwa hi swilo swo biha leswi endlekaka. (Ekl. 6:9) Loko hi titsongahata, swi ta hi olovela ku amukela ndlela leyi swilo swi fambaka ha yona hambiloko swi nga hi tsakisi.
Xana Vuhungasi Bya Wena Bya Ku Vuyerisa?
EBIBELENI hi kuma marito lama kombisaka leswaku Yehovha a nga lavi leswaku hi hanya ntsena kambe u lava leswaku hi tlhela hi tiphina hi vutomi. Hi xikombiso, Pisalema 104:14,15 yi vula leswaku Yehovha u humesa “swakudya emisaveni, ni vhinyo leyi tsakisaka mbilu ya munhu wa nyama, leswaku xikandza xi hatima hi mafurha, ni xinkwa lexi tiyisaka mbilu ya munhu wa nyama.” Hakunene Yehovha u kurisa swimilana leswaku swi tswala mavele, mafurha ni vhinyo leswaku hi ta kuma swakudya. Kambe vhinyo yi tlhela yi ‘tsakisa mbilu.’ Hambileswi vhinyo yi nga hi nyikiki vutomi, kambe yi endla leswaku hi tsaka. (Ekl. 9:7; 10:19) Entiyisweni, Yehovha u lava leswaku hi tsaka naswona timbilu ta hina ti tala hi ku “khana lokukulu.”—Mint. 14:16, 17.
2 Kutani a hi fanelanga hi ehleketa leswaku swi hoxile ku va hi tinyika nkarhi wo ‘xiyisisa swinene tinyenyana ta tilo’ ni “makhon’wa ya nhova” kumbe ku tiphina hi mintirho yin’wana leyi hi phyuphyisaka ni leyi endlaka vutomi bya hina byi tsakisa. (Mat. 6:26, 28; Ps. 8:3, 4) Vutomi lebyi tsakisaka i “nyiko leyi humaka eka Xikwembu.” (Ekl. 3:12, 13) Kutani loko hi teka vuhungasi tanihi xiphemu xa nyiko yoleyo swi ta hi susumetela ku yi tirhisa hi ndlela leyi nga ta tsakisa Munyiki wa yona.
Endla Ndzavisiso
it “Rihlevo, Ku Lumbeta” ¶4, 8
Rihlevo, Ku Lumbeta
Ku hleva swi nga hetelela swi onha van’wana mavito naswona ku va ni swi ta ndzhaku swo vava eka loyi a endlaka tano. Marito ya vutlhari lama kumekaka eka Eklesiasta 10:12-14 ma boxa mhaka leyi nga ntiyiso loko ma ku: “Leswi vulavuriwaka hi xiphukuphuku swi xi vangela khombo. Loko xi sungula ku vulavula ku huma swa vuphukuphuku ni loko xi heta xi vula mijamujamu leyi nga ni khombo. Kambe xiphukuphuku xi tshamela ku vulavula.”
Nkarhi wun’wana rihlevo ri nga onha swinene kumbe katsongo (hambileswi ri nga endlaka hi onha van’wana mavito), mikarhi hinkwayo ku lumbeta swa vavisa ni ku vanga timholovo. Swi nga ha endliwa hi xikongomelo kumbe hi xihoxo. Swi nga ri na mhaka leswaku swi endliwe hi xikongomelo kumbe hi xihoxo, mulumbeti u tionhela vito eka Xikwembu hi ku va loyi a “vangaka timholovo exikarhi ka vamakwavo,” leswi hi swin’wana swa swilo leswi Xikwembu xi swi vengaka. (Swiv 6:16-19) Rito ra Xigriki leri nge “mulumbeti” kumbe “muhehli” i di·aʹbo·los. Rito leri ri tlhele ri tirhisiwa eBibeleni ku kombetela eka Sathana “Diyavulosi”, muhehli lonkulu wa Xikwembu. (Yh 8:44; Nhl 12:9, 10; Gn 3:2-5) Leswi swi kombisa leswaku hi yena xihlovo xa mavunwa.
OCTOBER 27–NOVEMBER 2
LESWI HI SWI DYONDZAKA EBIBELENI EKLESIASTA 11-12
Tiphine Hi Vutomi
Xana Moya Lowu Tengeke Ni Ku Vonakala Ka Dyambu I “Swidlayaswitsongwatsongwana” Swa Ntumbuluko?
Nakambe ku vonakala ka dyambu ku ni tikhemikhali ta ntumbuluko leti dlayaka switsongwatsongwana. Magazini wa Journal of Hospital Infection, wu hlamusela leswaku “switsongwatsongwana swo tala leswi vangaka mavabyi lama tlulelaka hi ku hefemula a swi swi koti ku hanya loko ku ri ni dyambu.”
Xana swi nga ku pfuna njhani leswi? U nga ya ehandle, laha u nga ta heta nkarhi lowu ringaneke u ri eku orheni ka masana ni ku hefemula moya wo tenga. Swi nga ku pfuna.
Tlangela Nyiko Ya Xikwembu Ya Vutomi
6 Hambileswi Bibele ku nga riki buku ya swa rihanyo kumbe ya madyelo kambe yi kombisa ndlela leyi Yehovha a titwaka hayona etimhakeni leti. Hi xikombiso, u hi khutaza ku “papalata ni swilo leswi nga onhaka” mimiri ya hina. (Ekl. 11:10) Bibele yi yirisa ku dakwa ni makolo ku nga swilo leswi nga vekaka vutomi bya hina ekhombyeni. (Swiv. 23:20) Yehovha u langutele leswaku hi tikhoma loko hi hlawula leswaku hi ta dya ni ku nwa yini naswona swa mpimo wo tanihi kwihi.—1 Kor. 6:12; 9:25.
7 Hi nga endla swiboho leswi kombisaka leswaku ha yi tlangela nyiko leyi Xikwembu xi hi nyikeke yona ya vutomi hi ku va lava twisisaka. (Ps. 119:99, 100; hlaya Swivuriso 2:11.) Hi xikombiso, hi endla swiboho leswinene loko swi ta eka leswi hi swi dyaka. Loko hi rhandza swakudya swo karhi kambe hi swi tiva leswaku swa hi vabyisa, ha swi papalata swakudya sweswo. Hi tlhela hi kombisa leswaku hi na ku twisisa hi ku va hi etlela nkarhi lowu ringaneke, hi endla vutiolori nkarhi ni nkarhi, hi tshama hi basile emirini ni le makaya ya hina..
“Vanani Vaendli Va Rito”
2 Hina vagandzeri va Yehovha hi tshama hi tsakile. Hikwalahokayini? Hi ni swivangelo swo tala kambe xa nkoka swinene hi leswaku hi hlaya Rito ra Xikwembu nkarhi na nkarhi hi tlhela hi tikarhatela ku tirhisa leswi hi swi dyondzaka.—Hlaya Yakobo 1:22-25.
3 Ku ni tindlela to hlayanyana leti hi vuyeriwaka hatona loko hi “[va] vaendli va rito.” Ha swi tiva leswaku ku endla tano i ndlela yin’wana yo tsakisa Yehovha. Ku tiva swoleswo swi endla hi tsaka. (Ekl. 12:13) Loko hi tirhisa leswi hi swi dyondzaka eRitweni ra Xikwembu, hi antswisa vuxaka lebyi hi nga na byona ni swirho swa ndyangu ku katsa ni vamakwerhu. Swi nga ha endleka leswaku sweswo swi ve tano evuton’wini bya wena. Ku tlula kwalaho, hi papalata swiphiqo swo tala leswi vanhu lava nga yingisiki swileriso swa Yehovha swi va welaka. Hakunene hi pfumelelana ni leswi Hosi Davhida a swi vuleke. Loko eka risimu rakwe a boxe nawu, swileriso ni swiboho swa Yehovha, u gimete a ku: “Swa vuyerisa swinene ku swi yingisa.”—Ps. 19:7-11..
Endla Ndzavisiso
it “Ku Huhuteriwa” ¶10
Ku Huhuteriwa
Vumbhoni byi kombisa leswaku vavanuna lava Xikwembu xi va tirhiseke ku tsala Bibele a va ri va xiviri naswona a va tsala leswi a va byeriwa swona. Mayelana na muapostola Yohane hi hlaya leswaku ‘Xikwembu xi n’wi nyike’ Nhlavutelo hi ku tirhisa ntsumi leswaku yi ya n’wi komba yona hi “swikombiso” naswona Yohane u “nyikele vumbhoni eritweni leri Xikwembu xi ri humeseke ni le ka vumbhoni lebyi Yesu Kreste a byi nyikeleke, ina eka swilo hinkwaswo leswi a swi voneke.” (Nhl 1:1, 2) Kahlekahle a ku ri “moya lowo kwetsima” lowu “yiseke [Yohane] esikwini ra Hosi” naswona u byeriwe leswaku: “Leswi u swi vonaka swi tsale ebukwini.” (Nhl 1:10, 11) Hikwalaho, Xikwembu xi vone swi ri swinene ku pfumelela vatsari va Bibele ku tirhisa matimba ya vona yo ehleketa leswaku va kota ku hlawula marito lama nga fanela ku hlamusela swivono leswi va swi voneke (Hb 2:2) naswona mikarhi hinkwayo a xi va kongomisa leswaku emakumu va humesa timhaka leti kongomeke ti tlhela ti va ntiyiso ni ku tlhela ti fambisana ni xikongomelo xa Xona. (Swiv 30:5, 6) Matshalatshala lama katsekeke lama endliweke hi vatsari hi lama boxiweke eka Eklesiasta 12:9, 10, kwalaho a va fanele va anakanyisisa, va lavisisa ni ku hlela ndlela leyi va nga ta humesa “marito lama tsakisaka ni ku tlhela [va] tsala ntiyiso” naswona a va fanele va endla tano hi ndlela leyi hlelekeke.—Ringanisa Lk 1:1-4.