Yoxuwa u rhangele vanhu va Yehovha malembe yo tala, naswona u fe a ri ni malembe ya 110. Loko a ha hanya Vaisrayele a va gandzela Yehovha. Kambe loko Yoxuwa a file, va sungule ku gandzela swifaniso swa hava ku fana ni Vakanana. Hikwalaho ka leswi Vaisrayele va nga n’wi yingisangiki Yehovha, u pfumelele Yabini hosi ya Mukanana leswaku a va tikisela vutomi. Vaisrayele va kombele mpfuno eka Yehovha. Kutani Yehovha u veke Baraka leswaku a va murhangeri wa vona lontshwa. A a ta va pfuna leswaku va tlhelela eka Yehovha.

Debora, muprofeta wa xisati, u rhumele vanhu leswaku va ya vitana Baraka. A a n’wi khomele rungula leri humaka eka Yehovha leri a ri ku: ‘Teka vavanuna va 10 000 u ya hlangana ni masocha ya Yabini enkoveni wa Kixoni. U ta fika u hlula Sisera murhangeri wa masocha ya Yabini.’ Baraka u byele Debora a ku: ‘Ndzi ta famba ntsena loko wo famba na mina.’ Debora u te: ‘Ndzi ta famba na wena. Kambe swi tive leswaku a hi wena u nga ta dlaya Sisera. Yehovha u vule leswaku u ta dlayiwa hi wansati.’

Debora u fambe na Baraka ni masocha yakwe eNtshaveni ya Taboro va ya tilunghiselela ku lwa. Loko Sisera a swi twa, u hlengelete makalichi yakwe ya nyimpi ni masocha enkoveni wa Kixoni. Debora u byele Baraka a ku: ‘Namuntlha, Yehovha u ta endla leswaku u hlula.’ Baraka ni vavanuna vakwe va 10 000 va suke ehenhla ka ntshava va rhelela va ya lwa ni masocha ya Sisera lawa a ma ri ni matimba.

Kutani Yehovha u endle leswaku nkova wa Kixoni wu tala hi mati. Makalichi ya Sisera ma bodlhomele endzhopeni. Sisera u siye kalichi yakwe a tsutsuma. Baraka ni masocha yakwe va hlule masocha ya Sisera, kambe Sisera u balekile! U tsutsume a ya tumbela etendeni ra wansati loyi a vuriwaka Yayele. Wansati loyi u n’wi nyike ntswamba leswaku a nwa kutani a n’wi funengeta hi nkumba. Nhenha leyi a yi karhele yi nambe yi etlela. Kutani Yayele u nyandlamerile a yi tlhava enhlokweni hi mhandzi ya tende. Yi file.

Baraka u tile a lava Sisera. Yayele u hume etendeni rakwe a ku: ‘Nghena haleno. Ndzi ta ku komba wanuna loyi u n’wi lavaka.’ Baraka u nghenile ivi a kuma Sisera a file. Baraka na Debora va dzunise Yehovha hi risimu leswi a pfuneke Vaisrayele ku hlula valala va vona. Eka malembe ya 40 lama landzeleke tiko ra Israyele a ri ri ni ku rhula.

Hi nkarhi wa ndlala eIsrayele, wansati wa Muisrayele loyi a vuriwaka Nawomi swin’we ni nuna wakwe va rhurhele etikweni ra Mowabu ni vana va vona vambirhi va majaha. Hi ku famba ka nkarhi nuna wa Nawomi u file. Vana vakwe va teke Rhuti na Orpa lava a va ri Vamowabu leswaku va va vasati va vona. Khombo ra kona, hi ku famba ka nkarhi vana va Nawomi na vona va file.

Loko Nawomi a twa leswaku ndlala yi herile eIsrayele, u anakanye ku tlhelela ka rikwavo. Rhuti na Orpa va fambe na yena, kambe loko va ri endleleni, Nawomi u te: ‘A mi ri vavasati lavanene eka vana va mina naswona a mi ri vingi lavanene eka mina. Ndzi lava leswaku havumbirhi bya n’wina mi tlhela mi tekiwa. Tlhelelani ka rikwenu eMowabu.’ Vavasati lava va te: ‘Ha ku rhandza! Hi lava ku famba na wena.’ Nawomi a a tshamela ku va tlherisa. Eku heteleleni Orpa u tlherile kambe Rhuti u fambe na Nawomi. Nawomi u te: ‘Orpa u tlhelela eka rikwavo ni le ka swikwembu swakwe. Famba na yena u ya ekaya ka mhani wa wena.’ Kambe Rhuti u te: ‘A ndzi nge ku siyi. Vanhu va wena va ta va vanhu va mina, naswona Xikwembu xa wena xi ta va Xikwembu xa mina.’ U ehleketa leswaku Nawomi u titwe njhani loko Rhuti a vula sweswo?

Rhuti na Nawomi va fike eIsrayele loko ku sungula ku tshoveriwa maxalana. Siku rin’wana, Rhuti u ye a ya hlengeleta maxalana lama saleke ensin’wini ya wanuna loyi a a vuriwa Bowazi, loyi a a ri n’wana wa Rahava. U twe leswaku Rhuti i Mumowabu loyi a nga swi lavangiki ku hambana na Nawomi. U byele vatirhi vakwe leswaku va siyela Rhuti maxalana yo hlayanyana.

Madyambu wolawo, Nawomi u vutise Rhuti a ku: ‘A wu khwaja ensin’wini ya mani namuntlha?’ Rhuti u te: ‘Ensin’wini ya wanuna loyi a vuriwaka Bowazi.’ Nawomi u te: ‘Bowazi i xaka ra nuna wa mina. Yana emahlweni u khwaja ensin’wini yakwe ni vanhwana lavan’wana. U ta va u hlayisekile.’

Rhuti u ye emahlweni a khwaja ensin’wini ya Bowazi ku fikela loko ntshovelo wu hela. Bowazi u xiye leswaku Rhuti a a tirha hi matimba naswona a a ri wansati wo tlhariha. Enkarhini wolowo, loko wanuna a fa a nga ri na vana, xaka rakwe a ri teka nsati wakwe leswaku a va nsati wa rona. Kutani Bowazi u teke Rhuti a va nsati wakwe. Va ve ni n’wana wa jaha la thyiweke Obede loyi hi ku famba ka nkarhi a veke kokwana wa Hosi Davhida. Vanghana va Nawomi a va tsakile swinene. Va te: ‘Yehovha u rhange a ku nyika Rhuti, loyi a veke n’wingi lonene eka wena, sweswi u ni ntukulu. A ku dzunisiwe Yehovha.’