Hi ku famba ka nkarhi, Vaisrayele va tlhele va tshika ku gandzela Yehovha ivi va sungula ku gandzela swikwembu swa mavunwa. Vamidiyani va yive swifuwo swa Vaisrayele ni ku onha swimilana swa vona, ku ringana malembe ya nkombo. Vaisrayele a va tumbela etintshaveni ni le mabakweni leswaku va balekela ku hlaseriwa hi Vamidiyani. Va kombele Yehovha leswaku a va ponisa. Kutani Yehovha u rhumele ntsumi eka jaha leri vuriwaka Gidiyoni. Ntsumi yi te: ‘Yehovha u hlawule wena leswaku u va nhenha ya matimba.’ Gidiyoni u vutise ntsumi a ku: ‘Ndzi nga ri ponisa njhani tiko ra Israyele? A ndzo va nchumu.’

Gidiyoni a a ta swi tivisa ku yini leswaku u hlawuriwe hi Yehovha? U veke xipetlu xa voya emisaveni kutani a byela Yehovha a ku: ‘Loko nimixo voya byo va byi tsakama hikwalaho ka mberha kambe misava yi omile, ndzi ta swi tiva leswaku u lava ndzi ponisa Vaisrayele.’ Nimixo voya a byi tsakama kambe misava a yi omile! Kambe Gidiyoni u tlhele a kombela leswaku eka siku leri landzelaka nimixo voya a byi ve byi omile kambe misava yi tsakama. Endzhaku ka loko sweswo swi endlekile, Gidiyoni a a tiyiseka leswaku hakunene Yehovha u n’wi hlawurile. U hlengelete masocha yakwe leswaku ma ta lwa ni Vamidiyani.

Yehovha u byele Gidiyoni a ku: ‘Ndzi ta endla leswaku Vaisrayele va hlula. Kambe leswi u nga ni masocha yo tala u nga vona onge mi hlule hikwalaho ka matimba ya n’wina. Byela hinkwavo lava chavaka leswaku va tlhelela ekaya.’ Masocha yo ringana 22 000 ma tlhelele ekaya kutani ku sala ya 10 000. Yehovha u tlhele a ku: ‘Ma ha tele masocha lama saleke. Ma tise enkoveni kutani u ma byela leswaku ma nwa mati kwalaho. Siya masocha lawa ma nwaka ma ri karhi ma languta valala va wona.’ Ku sale masocha ya 300 ntsena lawa a ma nwa mati ma xalamukile. Yehovha u tshembise leswaku vavanuna lava a va ta hlula masocha ya 135 000 ya Vamidiyani.

Hi vusiku byebyo, Yehovha u byele Gidiyoni a ku: ‘Sweswi i nkarhi wo hlasela Vamidiyani!’ Gidiyoni u nyike masocha yakwe timhalamhala ni makhuwana lamakulu swin’we ni mavoni lama fihliweke endzeni ka wona. U va lerise a ku: ‘Ndzi languteni kutani mi endla leswi ndzi swi endlaka.’ Gidiyoni u be mhalamhala, a faya khuwana rakwe, a ndziwikisa rivoni rakwe a tlhela a huwelela a ku: ‘Banga ra Yehovha ni ra Gidiyoni!’ Vavanuna lava a a ri na vona va 300 na vona va endle leswi fanaka. Vamidiyani va sungule ku chava kutani va tsutsuma va hangalaka ni ndhawu hinkwayo. Va sungule ku dlayana hi xivona. Yehovha u tlhele a pfuna Vaisrayele leswaku va hlula valala va vona.

Muisrayele loyi a vuriwaka Elkana a a ri ni vasati vambirhi, ku nga Hana na Penina, kambe a a rhandza ngopfu Hana. Penina a a tshamela ku hleka Hana hileswi a a nga ri na n’wana kambe Penina a a ri ni vana vo tala. Lembe ni lembe, Elkana a a teka ndyangu wakwe va ya gandzela Yehovha etabernakeleni eXilo. Siku rin’wana loko va ri kwalaho, Elkana u xiye leswaku Hana nsati wakwe loyi a a n’wi rhandza swinene a a nga tsakanga. U te: ‘Hana, ndzi kombela u nga rili. Mina ndzi kona. Ndza ku rhandza.’

Endzhakunyana, Hana u suke a famba a ya khongela. U khongele eka Yehovha a ri karhi a rila a kombela leswaku a n’wi pfuna. U tshembisile a ku: ‘Yehovha, loko wo ndzi nyika n’wana wa jaha, ndzi ta ku nyika yena, u ta ku tirhela vutomi byakwe hinkwabyo.’

Muprista Lonkulu Eli u vone Hana a ri karhi a mpfikula, kutani a ehleketa leswaku u dakwile. Hana u te: ‘Hosi yanga, a ndzi dakwanga. Ndzi ni xiphiqo lexikulu naswona ndzi vulavula na Yehovha hi xona.’ Eli u xiye leswaku yena a a hoxisile kutani a ku eka Hana: ‘Onge Xikwembu xi nga ku nyika leswi u swi lavaka.’ Hana u titwe a antswa kutani a famba. Ku nga si hela ni lembe, Hana u ve ni n’wana wa jaha kutani a n’wi thya vito ra Samuwele. Anakanya ndlela leyi Hana a a tsake ha yona.

Hana a nga xi rivalanga xitshembiso lexi a xi tshembiseke Yehovha. Loko Hana a lumule Samuwele, u n’wi yise etabernakeleni leswaku a ya tirha kona. Hana u byele Eli a ku: ‘Hi loyi mufana loyi a ndzi n’wi kombela eka Yehovha. Ndzi n’wi nyikela eka Yehovha vutomi byakwe hinkwabyo.’ Lembe ni lembe Elkana na Hana a va endzela Samuwele va n’wi yisela nguvu leyintshwa yo pfumala mavoko. Yehovha u nyike Hana vana van’wana vanharhu va majaha ni vanhwanyana vambirhi.