Vaisrayele va tlhele va tshika ku tirhela Yehovha va gandzela swikwembu swa mavunwa. Loko va hlaseriwa hi Vaamoni, swikwembu leswi a va swi gandzela a swi va ponisanga. Vaisrayele va xaniseke malembe yo tala. Eku heteleleni va byele Yehovha va ku: ‘Hi dyohile. Hi kombela u hi ponisa eka valala va hina.’ Vaisrayele va herise swikwembu swa vona swa mavunwa kutani va sungula ku gandzela Yehovha. Yehovha a a nga swi lavi ku va vona va ya emahlweni va xaniseka.

Ku hlawuriwe nhenha leyi vuriwaka Yefta leswaku yi ta rhangela Vaisrayele loko va lwa ni Vaamoni. Yefta u byele Yehovha a ku: ‘Loko wo hi pfuna hi hlula enyimpini leyi, ndza ku tshembisa leswaku loko ndzi tlhelela ekaya, munhu wo sungula loyi a nga ta huma endlwini ya mina leswaku a ndzi hlanganisa ndzi ta nyikela hi yena eka wena.’ Yehovha u yingise xikhongelo xa Yefta kutani a n’wi pfuna a hlula.

Loko Yefta a vuya enyimpini, munhu wo sungula loyi a n’wi hlanganiseke a ku ri n’wana wakwe wa nhwanyana, loyi o va yexe. A a ri karhi a cina ni ku chaya xichayachayana. Xana Yefta a a ta endla yini? U tsundzuke xitshembiso lexi a xi endleke kutani a ku: ‘Yo, n’wananga! U ndzi vavisile. Ndzi endle xitshembiso eka Yehovha. Leswaku ndzi xi hetisisa ndzi fanele ndzi ku rhumela leswaku u ya tirha etabernakeleni le Xilo.’ Kambe n’wana wakwe u te: ‘Tatana, loko u endle xitshembiso eka Yehovha u fanele u xi hetisisa. Kambe ndzi kombela ku rhanga hi ku ya tshama ni vanghana va mina va vanhwanyana etintshaveni ku ringana tin’hweti timbirhi. Endzhaku ka sweswo ndzi ta famba.’ N’wana wa Yefta u tirhe hi ku tshembeka etabernakeleni vutomi byakwe hinkwabyo. Lembe ni lembe vanghana vakwe a va n’wi endzela eXilo.

Muprista Lonkulu Eli a a ri ni vana vambirhi va vafana lava a va ri vaprista etabernakeleni. Mavito ya vona a ku ri Hofini na Finiyasi. A va nga yingisi milawu ya Yehovha naswona a va xanisa vanhu van’wana. Loko Vaisrayele va tisa magandzelo eka Yehovha, Hofini na Finiyasi a va teka nyama ya kahle yi va ya vona. Eli u swi twile leswi vana vakwe a va swi endla kambe a nga endlanga nchumu. Xana Yehovha a a ta tshika mhaka leyi yi ya emahlweni?

Hambileswi Hofini na Finiyasi a va ri vakulu swinene eka Samuwele, a nga va tekelelanga. Yehovha a a n’wi rhandza swinene Samuwele. Siku rin’wana nivusiku loko Samuwele a etlele u twe rito ri n’wi vitana. U pfuke hi ku hatlisa kutani a tsutsumela eka Eli a fika a ku: ‘Hi mina loyi!’ Kambe Eli u te: ‘A ndzi ku vitananga. Tlhela u ya etlela.’ Samuwele u tlhele a ya etlela. Kutani u tlhele a twa rito ri n’wi vitana. Loko Samuwele a vitaniwa ra vunharhu, Eli u swi xiyile leswaku Samuwele a a vitaniwa hi Yehovha. U byele Samuwele leswaku loko a tlhela a twa rito ri n’wi vitana u fanele a ku: ‘Vulavula Yehovha. Nandza wa wena u yingisile.’

Samuwele u tlhele a ya etlela. Kutani u twe rito ri ku: ‘Samuwele! Samuwele!’ U te: ‘Vulavula, nandza wa wena u yingisile.’ Yehovha u te: ‘Byela Eli leswaku ndzi ta n’wi xupula ni ndyangu wakwe. Wa swi tiva leswaku vana vakwe va endla swilo swo biha etabernakeleni ya mina, kambe a nga endli nchumu ha swona.’ Hi siku leri landzelaka nimixo, Samuwele u pfule tinyangwa ta tabernakela hilaha a a endla hakona masiku hinkwawo. A a chava ku byela muprista lonkulu leswi Yehovha a swi vuleke. Kambe Eli u n’wi vitanile a n’wi vutisa a ku: ‘N’wananga, Yehovha u ku byele yini? Ndzi byele hinkwaswo.’ Kutani Samuwele u byele Eli hinkwaswo leswi Yehovha a swi vuleke.

Loko Samuwele a ri karhi a kula Yehovha u ye emahlweni a n’wi seketela. Vaisrayele etikweni hinkwaro a va swi tiva leswaku Yehovha u hlawule Samuwele leswaku a va muprofeta tlhelo muavanyisi.