Yonathani, n’wana lonkulu wa Hosi Sawulo a a ri socha leri nga ni xivindzi. Davhida u vule leswaku Yonathani a a hatlisa ku tlula gama naswona a a ri ni matimba ku tlula nghala. Siku rin’wana Yonathani u vone masocha ya 20 ya Vafilista entshaveni. U byele murhwali wakwe wa matlhari a ku: ‘Hi ta lwa na vona ntsena loko Yehovha a hi byela. Loko Vafilista vo hi vitana, swi ta vula leswaku hi fanele hi ya lwa na vona.’ Vafilista va huwelele va ku: ‘Tanani eka hina hi ta lwa!’ Kutani Yonathani ni murhwali wakwe wa matlhari va landze masocha wolawo.

Tanihi leswi Yonathani a a ri n’wana wa Sawulo lonkulu, a a fanele a va hosi endzhaku kakwe. Kambe Yonathani a a swi tiva leswaku Yehovha u hlawule Davhida leswaku a va hosi naswona a nga vanga ni mavondzo. Yonathani na Davhida va ve vanghana lavakulu. Va tshembisane ku sirhelelana. Ku kombisa leswaku Yonathani a a n’wi rhandza Davhida, u n’wi nyike xiambalo xakwe, tlhari, bandhi ni vurha byakwe.

Loko Davhida a ri karhi a baleka Sawulo, Yonathani u n’wi byele a ku: ‘U nga chavi, vana ni xivindzi. Yehovha u hlawule wena leswaku u va hosi. Tatana na yena wa swi tiva sweswo.’ Xana wa swi lava ku va ni munghana lonene wo fana na Yonathani?

Yonathani u veke vutomi byakwe ekhombyeni mikarhi yo hlayanyana leswaku a pfuna munghana wakwe. A a swi tiva leswaku Hosi Sawulo u lava ku dlaya Davhida, kutani u te: ‘U ta va u endla xidyoho loko wo dlaya Davhida; a nga endlanga nchumu xo biha.’ Sweswo swi n’wi hlundzukise ngopfu Sawulo. Endzhaku ka malembe yo hlayanyana, Sawulo na Yonathani va fele enyimpini.

Endzhaku ka loko Yonathani a file, Davhida u lave Mefiboxete n’wana wa Yonathani. Loko a n’wi kumile u te: ‘Tanihi leswi mina na tata wa wena a hi ri vanghana lavakulu, ndzi ta ku teka ndzi ya ku hlayisa vutomi bya wena hinkwabyo. U ta tshama na mina u tlhela u dya etafuleni ra mina.’ Davhida a nga n’wi rivalanga munghana wakwe Yonathani.

Loko Sawulo a fa, Davhida u ve hosi. A a ri ni malembe ya 30. Siku rin’wana loko a ri ehenhla ka lwangu ra yindlu yakwe u vone wansati wo saseka. Davhida u kume leswaku vito ra wansati loyi a ku ri Bati-xeba, naswona nuna wakwe a ku ri Uriya loyi a a ri socha. Davhida u rhumele vanhu leswaku va ya vitana Bati-xeba. U etlele na yena kutani Bati-xeba a va ni khwiri. Davhida u ringete ku tumbeta mhaka yoleyo. U byele murhangeri wa masocha yakwe leswaku a veka Uriya laha nyimpi yi hisaka kona leswaku a ta dlayiwa. Endzhaku ka loko Uriya a dlayiwile enyimpini, Davhida u teke Bati-xeba leswaku a va nsati wakwe.

Yehovha u swi vonile swilo hinkwaswo swo biha leswi endlekeke. A a ta endla yini? Yehovha u rhumele muprofeta Nathani eka Davhida. Nathani u fike a ku: ‘Wanuna la fuweke a a ri ni tinyimpfu to tala, kambe wanuna loyi a a ri xisiwana a a ri ni xinyimpfana xin’we ntsena lexi a a xi rhandza ngopfu. Wanuna loyi a a fuwile u teke xinyimpfana xa wanuna loyi a a ri xisiwana.’ Davhida yi n’wi hlundzukisile mhaka yoleyo lerova a ku: ‘Wanuna yoloye la fuweke u faneriwa hi ku fa!’ Kutani Nathani u byele Davhida a ku: ‘Wanuna la fuweke hi wena!’ Sweswo swi n’wi twise ku vava swinene Davhida lerova a ku eka Nathani: ‘Ndzi dyohele Yehovha.’ Xidyoho lexi xi endle leswaku Davhida ni ndyangu wakwe va weriwa hi maxangu. Yehovha u xupule Davhida, kambe a nga n’wi dlayanga hikuva a a titsongahata a tlhela a tshembeka.

Davhida a a lava ku akela Yehovha tempele, kambe Yehovha u hlawule Solomoni n’wana wa Davhida leswaku a n’wi akela tempele. Davhida u endle malunghiselelo ya leswaku Solomoni a kota ku aka, kutani a ku: ‘Tempele ya Yehovha yi fanele yi saseka. Solomoni wa ha ri ntsongo kambe ndzi ta n’wi pfuna hi ku hlengeleta swilo.’ Davhida u humese mali yo tala leswaku a pfuneta ku aka tempele. U kume vatirhi lava tivaka ntirho. U nyikele hi nsuku ni silivhere naswona u yise mikedari leyi a yi huma eTiri ni le Sidoni. Loko Davhida a ri kusuhi ni ku fa u nyike n’wana wakwe Solomoni pulani yo aka tempele. U te: ‘Yehovha u ndzi lerise leswaku ndzi ku tsalela swilo leswi. Yehovha u ta ku pfuna. U nga chavi. Vana ni xivindzi naswona u tiyimisela ku tirha.’