Xingheniso Xa Xiyenge 8

Yehovha u katekise Solomoni hi ku n’wi nyika vutlhari lebyikulu ni lunghelo ra ku aka tempele, kambe Solomoni u hetelele a fularhele Yehovha. Loko u ri mutswari, hlamusela n’wana wa wena ndlela leyi vagandzeri va swikwembu swa mavunwa va endleke leswaku Solomoni a fularhela Xikwembu ha yona. Mfumo wu avanile naswona tihosi to homboloka ti endle leswaku vanhu va fularhela Xikwembu va gandzela swifaniso swa hava. Hi nkarhi wolowo, vaprofeta va Yehovha vo tala vo tshembeka va xanisiwile va tlhela va dlayiwa. Hosi ya xisati Yezabele u endle leswaku mfumo wa le n’walungwini wu nyanya ku xandzukela Yehovha. Hi nkarhi wolowo tiko ra Israyele a ri talele hi vagandzeri va swikwembu swa mavunwa. Hambiswiritano, a ka ha ri ni malandza yo tala yo tshembeka ya Yehovha exikarhi ka Vaisrayele, man’wana ya wona i Hosi Yehoxafati na muprofeta Eliya.