Endzhaku ka loko Solomoni a ve hosi ya Israyele, Yehovha u n’wi vutisile a ku: ‘I yini leswi u lavaka leswaku ndzi ku nyika swona?’ Solomoni u te: ‘Ndza ha ri ntsongo naswona a ndzi swi tivi leswi ndzi swi endlaka. Ndzi kombela u ndzi nyika vutlhari leswaku ndzi kota ku fuma vanhu va wena.’ Yehovha u te: ‘Hikwalaho ka leswi u kombeleke vutlhari, ndzi ta ku endla wanuna wo tlhariha emisaveni hinkwayo. Ndzi ta tlhela ndzi ku endla u fuwa. Naswona loko wo ndzi yingisa u ta hanya nkarhi wo leha.’

Solomoni u sungule ku aka tempele. U tirhise nsuku wa xiyimo xa le henhla, silivhere, timhandzi ni maribye. Madzana ya vavanuna ni vavasati lava tivaka ntirho va tirhe ku aka tempele. Endzhaku ka malembe ya nkombo, tempele a yi lunghekele ku nyiketeriwa eka Yehovha. A yi ri ni alitari naswona ehenhla ka yona a ku ri ni magandzelo. Solomoni u khinsame emahlweni ka alitari a khongela, a ku: ‘Oho Yehovha, tempele leyi a yi ku ringananga naswona a yi sasekanga ngopfu lerova yi nga ku fanela, kambe hi kombela leswaku u amukela vugandzeri bya hina u tlhela u yingisa swikhongelo swa hina.’ Xana Yehovha a a yi teka njhani tempele yoleyo ni xikhongelo xa Solomoni? Loko Solomoni a heta ku khongela, ku xike ndzilo hi le tilweni wu hisa magandzelo lawa a ma ri ealitarini. Yehovha u yi amukerile tempele yoleyo. Loko Vaisrayele va vona sweswo, va tsakile.

Hosi Solomoni a a tiveka hikwalaho ka vutlhari byakwe eIsrayele ku katsa ni le matikweni man’wana ya le kule. Vanhu vo tala a va ya eka yena loko va lava ku pfuniwa hi swiphiqo swa vona. Hambi ku ri hosi ya xisati ya le Xeba yi tile eka yena leswaku yi ta n’wi ringa hi ku n’wi vutisa swivutiso swo tika. Loko hosi yoleyo yi twe tinhlamulo ta yena, yi te: ‘A ndzi nga swi tshembi swilo leswi vanhu va ndzi byeleke swona ha wena, kambe sweswi ndza swi xiya leswaku u tlharihe ngopfu. Yehovha Xikwembu xa wena u ku katekisile.’ Swilo a swi va fambela kahle Vaisrayele naswona a va tsakile. Kambe swilo a swi ta cinca ku nga ri khale.

Hi nkarhi lowu Solomoni a ha gandzela Yehovha, a ku ri ni ku rhula eIsrayele. Kambe Solomoni u teke vavasati vo tala lava humaka ematikweni man’wana naswona vavasati volavo a va gandzela swifaniso swa hava. Hakatsongotsongo, Solomoni na yena u sungule ku gandzela swifaniso swa hava. Sweswo swi hlundzukise Yehovha. U byele Solomoni a ku: ‘Mfumo wa Israyele wu ta tekiwa endyangwini wa wena kutani wu avanyisiwa wu va swiphemu swimbirhi. Xiphemu lexikulu xa mfumo wolowo ndzi ta xi nyika un’wana wa malandza ya wena, kasi ndyangu wa wena wu ta fuma xiphemu lexitsongo.’

Yehovha u tlhele a endla leswaku leswi a swi vuleke swi hetiseka. Nandza un’wana wa Solomoni, ku nga Yerobuwamu loko a ri karhi a famba endleleni u hlangane na muprofeta Ahiya. Ahiya u handzule nguvu yakwe yi va swiphemu swa 12, kutani a byela Yerobuwamu a ku: ‘Yehovha u ta teka mfumo wa Israyele endyangwini wa Solomoni ivi a wu avanyisa wu va swiphemu swimbirhi. Teka swiphemu swa khume hikuva u ta va hosi u fuma tinxaka ta khume.’ Loko Hosi Solomoni a twa hi mhaka leyi u lave ku dlaya Yerobuwamu. Hikokwalaho Yerobuwamu u balekele Egipta. Hi ku famba nkarhi Solomoni u file kutani n’wana wakwe Rehobuwama a va hosi. Yerobuwamu u vone ku ri nkarhi lowunene wa ku tlhelela eIsrayele.

Vakulukumba va le Israyele va byele Rehobuwama va ku: ‘Loko u va khoma kahle vanhu, va ta tshembeka eka wena.’ Kambe vanghana va Rehobuwama lava a va ha ri vantshwa va te: ‘U fanele u khoma vanhu hi voko ra nsimbi! Va tirhise ku fana ni mahlonga.’ Rehobuwama u yingise xitsundzuxo xa vanghana vakwe. U xanise vanhu naswona va xandzukile. Va endle Yerobuwamu hosi ya tinxaka ta khume, leti tivekeke tanihi mfumo wa Israyele. Tinxaka letin’wana timbirhi ti tiveke tanihi mfumo wa Yuda naswona ti tshame ti tshembekile eka Rehobuwama. Tinxaka ta 12 ta Israyele se a ti avanile.

Yerobuwamu a a nga swi lavi leswaku vanhu vakwe va ya gandzela eYerusalema, laha a ku fuma Rehobuwama. Xana wa swi tiva leswaku hikokwalaho ka yini a a nga swi lavi? Yerobuwamu a a chava leswaku va nga n’wi pfukela kutani va sungula ku seketela Rehobuwama. Hikokwalaho, u endle marhole mambirhi ya nsuku ivi a byela vanhu vakwe a ku: ‘I kule swinene eYerusalema. Mi nga gandzela kwala.’ Vanhu va sungule ku gandzela marhole ya nsuku va tlhela va rivala Yehovha.