Tihosi to tala leti a ti fuma emfun’weni wa tinxaka ta khume ta Israyele a ti hombolokile kambe Akabu a a ri un’wana wa tihosi to homboloka swinene. U teke nsati wo homboloka, loyi a a gandzela Bali. Vito rakwe a ku ri Yezabele. Akabu na Yezabele va tate tiko hinkwaro hi vugandzeri bya Bali va tlhela va dlaya vaprofeta va Yehovha. Xana Yehovha u endle yini? U rhumele rungula eka Akabu hi ku tirhisa muprofeta Eliya.

Eliya u byele Hosi Akabu leswaku hikwalaho ka vubihi byakwe, a ku nga ta va na mpfula eIsrayele. A ku nga rimiwi ku ringana malembe yo tlula manharhu naswona vanhu a va sika hi ndlala. Endzhakunyana Yehovha u tlhele a rhuma Eliya eka Akabu. Hosi leyi yi te: ‘Hi wena u hi vangeleke swiphiqo leswi!’ Eliya u te: ‘A hi mina. Kambe swi vangiwe hi wena hikwalaho ka leswi u gandzelaka Bali. Hi ta vona leswaku Xikwembu xa ntiyiso i mani. Hlengeleta tiko hinkwaro ni vaprofeta va Bali ehenhla ka Ntshava ya Karimeli.’

Vanhu va hlengeletanile entshaveni. Eliya u te: ‘Hlawulani. Loko Yehovha a ri Xikwembu xa ntiyiso, n’wi landzeleni. Loko ku ri leswaku Bali i xikwembu xa ntiyiso landzelani yena. Endlani leswi: Vaprofeta va Bali va 450 va fanele va endlela xikwembu xa vona gandzelo va tlhela va khongela eka xona, mina ndzi ta endlela Yehovha gandzelo ndzi tlhela ndzi khongela eka yena. Xikwembu lexi nga ta tisa ndzilo hi xona Xikwembu xa ntiyiso.’ Vanhu va pfumerile.

Vaprofeta va Bali va lunghiselele gandzelo. Va hete siku hinkwaro va ri karhi va huwelela xikwembu xa vona, va ku: ‘Oho Bali, hi hlamule!’ Loko Bali a nga va hlamuli, Eliya u sungule ku endla xihlekiso hi yena. U te: ‘Huwelelani hi rito leri tlakukeke. Kumbexana u etlele u lava ku pfuxiwa.’ Vaprofeta va Bali va huwelele ku kondza ri pela. Kambe Bali a nga hlamulanga.

Eliya u veke gandzelo rakwe ehenhla ka alitari a tlhela a ri chela mati. Kutani u khongerile, a ku: ‘Oho Yehovha, endla leswaku vanhu lava va swi tiva leswaku hi wena Xikwembu xa ntiyiso.’ Hi ku hatlisa, Yehovha u tise ndzilo hi le tilweni ivi wu hisa gandzelo ra Eliya. Vanhu va huwelerile, va ku: ‘Yehovha i Xikwembu xa ntiyiso!’ Eliya u te: ‘Khomani vaprofeta va Bali, va nga baleki!’ Hi siku rero ku dlayiwe vaprofeta va Bali va 450.

Loko ku humelela papa leritsongo ehenhla ka lwandle, Eliya u byele Akabu a ku: ‘Ku ta va ni mpfula ya matimba. Khandziya kalichi u muka.’ Endzhaku ka sweswo, mapapa ma bohanile, ku ba moya naswona ku sungule ku na mpfula ya matimba. Wolawo ku ve makumu ya dyandza. Akabu u tsutsumise kalichi yakwe hilaha a nga kotaka hakona. Yehovha u pfune Eliya leswaku a tsutsuma a siya kalichi ya Akabu! Xana leswi a swi vula leswaku swiphiqo swa Eliya se swi herile? A hi voneni.

Yezabele u twe leswi endlekeke hi vaprofeta va Bali naswona sweswo swi n’wi hlundzukise ngopfu. U rhumele rungula eka Eliya, a ku: ‘Mundzuku na wena u ta va u file ku fana ni vaprofeta va Bali.’ Eliya u sungule ku chava swinene kutani a balekela emananga. U khongerile, a ku: ‘Yehovha, swi ringene. Ndzi tshike ndzi fa.’ Leswi a a karhele, Eliya u khomiwe hi vurhongo kutani a etlela ehansi ka nsinya.

Ntsumi yi n’wi pfuxile kutani yi ku: ‘Pfuka u dya.’ Eliya u vone xinkwa xa xirhendzevutana emaribyeni lama hisaka ni gula ra mati. U dyile ni ku nwa mati kutani a tlhela a etlela. Ntsumi yi tlhele yi n’wi pfuxa kutani yi ku: ‘Dyana hikuva riendzo ra wena ra ha lehile.’ Eliya u tlhele a dya. Kutani u fambe riendzo leri ringanaka masiku ya 40 ni vusiku bya 40 a kala a fika eNtshaveni ya Horebe. U fike a nghena ebakweni kutani a etlela. Kambe Yehovha u vulavule na yena. U te: ‘Eliya, u endla yini laha?’ Eliya u hlamule a ku: ‘Vaisrayele va tshove xitshembiso xa wena. Va hirimuxe tialitari ta wena va tlhela va dlaya vaprofeta va wena. Sweswi va lava ku dlaya na mina.’

Yehovha u te: ‘Famba u ya yima entshaveni.’ Ku rhange ku ba moya wa matimba wu hundza ebakweni. Endzhaku ka sweswo ku ve ni ku tsekatseka ka misava kutani ku va ni ndzilo. Eku heteleleni Eliya u twe rito ro rhula. U tifunengete xikandza hi nguvu yakwe kutani a yima ehandle ka bako. Yehovha u n’wi vutise leswaku hikwalaho ka yini a balekile. Eliya u te: ‘Ndzi sale ndzi ri ndzexe.’ Kambe Yehovha u te: ‘A wu wexe. Ka ha ri ni van’wana lava ringanaka 7 000 eIsrayele lava ndzi gandzelaka. Famba u ya tota Elixa leswaku a va muprofeta a siva wena.’ Hi ku hatlisa, Eliya u ye a ya endla hinkwaswo leswi Yehovha a n’wi leriseke swona. Xana u anakanya leswaku Yehovha u ta ku pfuna na wena loko u endla leswi a lavaka leswaku u swi endla? Ina, u ta ku pfuna. A hi tweni leswi humeleleke hi nkarhi wa dyandza.