Hi nkarhi wa dyandza Yehovha u byele Eliya a ku: ‘Yana eSarepta. U ta kuma noni leyi nga ta ku nyika swakudya.’ Loko Eliya a fika enyangweni ya muti u kume noni leyi nga xisiwana yi ri karhi yi rhotela tihunyi. U kombele mati eka yona. Loko ya ha ya ku n’wi keleni ka mati, u yi huwelerile a ku: ‘Ndzi kombela ni xinkwa xitsongo.’ Kambe noni yi te: ‘A ndzi na xinkwa. Ndzo va ni fulawuri ni mafurha, leswi ndzi nga kotaka ku endlela mina ni n’wananga swakudya switsongo ntsena.’ Eliya u te: ‘Yehovha u tshembise leswaku loko wo ndzi endlela xinkwa, fulawuri ni mafurha ya wena a swi nge heli kukondza mpfula yi tlhela yi na.’

Noni yoleyo yi tlhelele ekaya kutani yi fika yi endlela muprofeta wa Yehovha xinkwa. Hilaha Yehovha a tshembiseke hakona, noni yoleyo ni n’wana wa yona va tshame va ri ni swakudya hi nkarhi wa dyandza. Khuwana ra fulawuri ni ra mafurha a swi kalanga swi hela.

Endzhaku ka sweswo, ku humelele nchumu wun’wana wo vava swinene. N’wana wa noni yoleyo u sungule ku vabya swinene ivi a fa. Noni yi kombele Eliya leswaku a yi pfuna. Eliya u teke n’wana yoloye emavokweni ya noni ivi a ya na yena ekamareni ra le henhla. U n’wi etlerise emubedweni ivi a khongela a ku: ‘Yehovha, ndzi kombela u pfuxa n’wana loyi.’ Xana wa swi tiva leswaku hikwalaho ka yini ku pfuxiwa ka n’wana yoloye a ku ta va nchumu wo hlamarisa, lowu Yehovha a ta wu endla? Hikuva ku fikela hi nkarhi wolowo, a ku nga si tshama ku pfuxiwa munhu eku feni. Xin’wana hi leswi noni yoleyo ni n’wana wa yona a va nga ri Vaisrayele.

Kambe n’wana yoloye u tlhele a hanya! Eliya u byele noni a ku: ‘Waswivo! N’wana wa wena wa hanya.’ Noni yoleyo a yi tsakile swinene ivi yi byela Eliya yi ku: ‘Hakunene u munhu wa Xikwembu. Sweswo ndza swi vona hikuva u vulavula ntsena leswi Yehovha a ku byelaka swona.’

Hosi Akabu a a kota ku vona nsimu ya vhinya leyi a yi ri ya wanuna loyi a a vuriwa Naboti, loko a ri efasitereni ra yindlu ya yena ya vuhosi leyi a yi ri eYizriyele. Akabu a a yi lava nsimu leyi ya vhinya naswona u ringete ku yi xava eka Naboti. Kambe Naboti u arile ku n’wi xavisela yona hikuva a swi lwisana ni Nawu wa Yehovha ku xavisa ndhawu leyi a yi ri ndzhaka. Xana Akabu u n’wi xiximile Naboti hikwalaho ko endla leswinene? Doo! Akabu u hlundzuke ngopfu. A a hlundzuke ngopfu lerova a kala a nga humi ekamareni rakwe a tlhela a ala ni ku dya.

Nsati wa Akabu, ku nga Hosi ya xisati Yezabele wo homboloka u te: ‘Hi wena hosi ya Israyele. U nga kuma xin’wana ni xin’wana lexi u xi lavaka. Ndzi ta endla leswaku u yi kuma.’ U tsalele vakulukumba va muti mapapila, a va byela leswaku va hehla Naboti leswaku u rhukane Xikwembu ni leswaku va n’wi khandla hi maribye a fa. Vakulukumba va endle leswi Yezabele a va byeleke swona kutani Yezabele u byele Akabu a ku: ‘Naboti u file. Nsimu ya madiriva i ya wena.’

Naboti a hi munhu wo sungula la pfumalaka nandzu loyi Yezabele a n’wi dlayeke. U dlaye vanhu vo tala lava a va rhandza Yehovha. A a gandzela swifaniso a tlhela a endla swilo swin’wana swo biha. Yehovha u swi vonile swilo hinkwaswo swo biha leswi Yezabele a swi endleke. A a ta endla yini hi yena?

Endzhaku ka loko Akabu a file, n’wana wakwe Yehorama u ve hosi. Yehovha u rhume wanuna la vuriwaka Yehu leswaku a ya xupula Yezabele ni ndyangu wakwe.

Yehu u fambe hi kalichi a ya eYizriyele, laha Yezabele a a tshama kona. Yehorama u fambe hi kalichi yakwe a ya hlangana na Yehu kutani a n’wi vutisa a ku: ‘Xana ku ni ku rhula exikarhi ka hina?’ Yehu u te: ‘A ku nge ve ni ku rhula ntsena loko Yezabele mana wa wena a ha endla swo biha.’ Yehorama u ringete ku jikisa kalichi yakwe leswaku a baleka. Kambe Yehu u n’wi cope hi nseve ivi a fa.

Kutani Yehu u ye endlwini ya vuhosi ya Yezabele. Loko Yezabele a twa leswaku Yehu u le ku teni, u tisasekise xikandza, a lunghisa misisi kutani a yima hi le henhla efasitereni. Loko Yehu a fika, Yezabele u n’wi xewete hi ndlela ya tihanyi. Yehu u huwelele malandza ya Yezabele lawa a ma yime etlhelo kakwe a ku: “N’wi lahleleni ehansi!” Ma lahlele Yezabele hi fasitere kutani a wela ehansi ivi a fa.

Endzhaku ka sweswo, Yehu u dlaye vana va 70 va Akabu kutani a basisa tiko leri a ri tele hi vugandzeri bya Bali. Xana wa swi vona leswaku Yehovha u tiva swilo hinkwaswo ni leswaku hi nkarhi lowu faneleke, u xupula lava endlaka swilo swo biha?