DYONDZO 32

Mfumo Wa Xikwembu Se Wa Fuma!

Nkandziyiso Lowu Printiweke

Mfumo wa Xikwembu wu sungule ku fuma etilweni hi 1914. Wolowo ku ve nkarhi wa ku sungula ka masiku yo hetelela ya ku fuma ka vanhu. Hi swi tivisa ku yini? Kambisisa vuprofeta bya Bibele ni leswi endlekaka laha misaveni namuntlha ku katsa ni ndlela leyi vanhu va tikhomeke ha yona ku sukela hi 1914.

1. I yini leswi Bibele yi swi profeteke?

Buku ya Bibele ya Daniyele yi vule leswaku Mfumo wa Xikwembu a wu ta sungula ku fuma eku heleni ka nkarhi lowu vitaniwaka “malembe ya nkombo.” (Daniel 4:16, 17) Endzhaku ka malembe yo tala, Yesu u vule leswaku nkarhi wolowo i “nkarhi lowu vekiweke wa matiko,” naswona u dyondzise leswaku a wu nga si hela. (Luka 21:24) Hilaha hi nga ta dyondza hakona, malembe ya nkombo ma hele hi 1914.

2. Ku sukela hi 1914 misava yi njhani naswona vanhu va tikhoma njhani?

Vadyondzisiwa va Yesu va n’wi vutise va ku: “Xi ta va xihi xikombiso xa ku vuya ka wena ni xa ku fika ka makumu?” (Matewu 24:3) Loko Yesu a va hlamula, u va byele hi swilo swo tala leswi a swi ta endleka endzhaku ka loko a sungule ku fuma etilweni tanihi Hosi ya Mfumo wa Xikwembu. Swin’wana swa swona swi katsa tinyimpi, ku kayivela ka swakudya ni ku tsekatseka ka misava. (Hlaya Matewu 24:7.) Bibele yi tlhele yi vula leswaku ndlela leyi vanhu a va ta tikhoma ha yona “emasikwini yo hetelela” a swi ta ‘tika ku hanya eka wona.’ (2 Timotiya 3:1-5) Swilo leswi hinkwaswo, swi sungule ku vonaka ku sukela hi 1914.

3. Hikwalaho ka yini misava yi nyanye ku biha ku sukela loko Mfumo wa Xikwembu wu sungule ku fuma?

Loko Yesu a ha ku va Hosi ya Mfumo wa Xikwembu, u lwe na Sathana ni madimona yakwe etilweni. Sathana u hluriwile. Bibele yi vula leswaku ‘u lahleriwe emisaveni ni tintsumi ta yena.’ (Nhlavutelo 12:9, 10, 12) Sathana u hlundzukile swinene hikuva wa swi tiva leswaku u ta herisiwa. Hikwalaho ka sweswo, wa hi cangarisa namuntlha. A swi hlamarisi leswi swiyimo swa misava swi yaka swi nyanya ku biha! Hambiswiritano, Mfumo wa Xikwembu wu ta herisa swiphiqo leswi hinkwaswo.

ANAKANYISISA

Kambisisa leswaku hi swi tivisa ku yini leswaku Mfumo wa Xikwembu wu sungule ku fuma hi 1914 ni ndlela leyi sweswo swi faneleke swi hi khumba ha yona.

4. Vuprofeta bya Bibele byi kombisa leswaku Mfumo wa Xikwembu wu sungule ku fuma hi 1914

Tlanga VHIDIYO.

VHIDIYO: Mfumo Wa Xikwembu Wu Sungule Ku Fuma Hi 1914 (5:02)

Xikwembu xi endle leswaku Hosi Nebukadnetsara wa le Babilona a lorha hi leswi a swi ta endleka. Norho wolowo ni leswi Daniyele a swi vuleke hi wona swi swi veka erivaleni leswaku a wu fambisana ni mfumo wa Nebukadnetsara swin’we ni Mfumo wa Xikwembu.—Hlaya Daniyele 4:17.a

Hlaya Daniyele 4:20-26, ivi mi tirhisa chati leyi ku hlamula swivutiso leswi landzelaka:

(A) Nebukadnetsara u vone yini enorhweni wakwe?—Vona ndzimana 20 na 21.
(B) A ku ta endleka yini hi murhi lowu? —Vona ndzimana 23.
(C) A ku ta endleka yini eku heleni ka “malembe ya nkombo”?—Vona ndzimana 26.

Norho Lowu Vulavulaka Hi Murhi Wu Fambisana Njhani Ni Mfumo Wa Xikwembu?

VUPROFETA (Daniyele 4:20-36)

Vuhosi

(A) Murhi lowukulu

Vuhosi byi kavanyeteka

(B) “Tsemani murhi” kutani mi tshika “malembe ya nkombo” ma hundza

Xigodo lexi nga bohiwa hi nsimbi na koporo.

Vuhosi byi ya emahlweni

(C) “U ta tlhela u nyikiwa mfumo”

Loko vuprofeta lebyi byi hetiseka ro sungula . . .

(D) Murhi a wu yimela mani? —Vona ndzimana 22.
(E) I yini leswi nga endleka leswaku a nga ha vi hosi?—Hlaya Daniyele 4:29-33.
(F) Ku endleke yini hi Nebukadnetsara loko ku hela “malembe ya nkombo”?—Hlaya Daniyele 4:34-36.

KU HETISEKA KO SUNGULA

Vuhosi

(D) Nebukadnetsara, Hosi ya Babilona

Hosi Nebukadnetsara a yimile a ri karhi a titlhome tinsiva.

Vuhosi byi kavanyeteka

(E) Endzhaku ka 606 B.C.E., Nebukadnetsara u hlangane nhloko a nga ha koti ku fuma ku ringana malembe ya nkombo

Nebukadnetsara a ri karhi a dya byanyi ku fana ni xiharhi.

Vuhosi byi ya emahlweni

(F) Miehleketo ya Nebukadnetsara yi vuyile kutani a sungula ku tlhela a fuma

Hosi Nebukadnetsara a langute ehenhla a yimise mavoko.

Loko vuprofeta lebyi byi hetiseka ra vumbirhi . . .

(G) Murhi a wu yimela vamani?—Hlaya 1 Tikronika 29:23.
(H) I yini leswi nga endleka leswaku ti nga ha fumi? Hi swi tivisa ku yini leswaku a ti nga ri eku fumeni loko Yesu a ri laha misaveni?—Hlaya Luka 21:24.
(I) Mfumo lowu wu vuyeteriwe rini naswona kwihi?

KU HETISEKA KA VUMBIRHI

Vuhosi

(G) Tihosi ta Vaisrayele leti yimelaka Mfumo wa Xikwembu

Tihosi ta Israyele ti tshame eswiluvelweni hi ku landzelelana ka tona. Ehenhla ka tona ku ri ni miseve ya ku vonakala.

Vuhosi byi kavanyeteka

(H) Muti wa Yerusalema wu lovisiwa, leswi endleke leswaku tihosi ta Vaisrayele ti nga ha koti ku fuma ku ringana malembe ya 2 520

Muti wa khale wa Yerusalema wu lovisiwa hi ndzilo hi 607 B.C.E. Endzhaku ka sweswo ku hundza malembe ya 2 520.

Vuhosi byi ya emahlweni

(I) Yesu a sungula ku fuma etilweni tanihi Hosi ya Mfumo wa Xikwembu

Yesu a fuma misava a tshame exiluvelweni a ri etilweni hi 1914 C.E. A rhendzeriwe hi miseve ya ku vonakala.

Malembe ya nkombo ma lehe ku fikela kwihi?

Matsalwa man’wana ya le Bibeleni ma hi pfuna ku twisisa matsalwa man’wana. Hi xikombiso, buku ya Bibele ya Nhlavutelo yi vula leswaku mikarhi yinharhu ni hafu yi ringana ni masiku ya 1 260. (Nhlavutelo 12:6, 14) Hi ku ya hi vuprofeta bya Bibele, leswi swi vula leswaku lembe ri ringana ni masiku ya 360 kutani malembe ya nkombo ma ringana ni masiku ya 2 520. Mikarhi yin’wana eBibeleni siku ri yimela lembe. (Ezekiyele 4:6) Swi tano ni hi malembe ya nkombo lama ku vulavuriwaka ha wona eka buku ya Daniyele, ma yimela malembe ya 2 520.

5. Misava yi cincile ku sukela hi 1914

Tlanga VHIDIYO.

VHIDIYO: Misava Yi Cincile Ku Sukela Hi 1914 (1:10)

Yesu u hlamusele ndlela leyi misava a yi ta va ha yona endzhaku ka loko a ri Hosi. Hlaya Luka 21:9-11, ivi mi bula hi xivutiso lexi:

Hi swihi swiendlakalo leswi boxiweke eka tsalwa leri leswi u tweke ha swona kumbe u swi voneke swi endleka?

Muapostola Pawulo u hlamusele ndlela leyi vanhu a va ta tikhoma ha yona emasikwini yo hetelela ya ku fuma ka vanhu. Hlaya 2 Timotiya 3:1-5, ivi mi bula hi xivutiso lexi:

Eka leswi hi swi hlayeke, hi swihi leswi u swi xiyeke eka vanhu namuntlha?

Xifaniso: Xi kombisa ndlela leyi misava yi nga ha yona emasikwini ya makumu. 1. Murhangeri wa masocha a ri karhi a huwelela a yimise na xibakele. 2. Tiyindlu ti wile endzhaku ka loko ku ve ni ku tsekatseka ka misava. 3. Swihahampfhuka swa masocha. 4. Vanhu va famba va mbale timask. 5. Miako yimbirhi ya le New York yi ri karhi yi pfurha hileswi matherorisi ma hlaseleke. 6. Wanuna a ri karhi a titlhavela tidraksi. 7. Wanuna a ri karhi a holovela nsati wakwe. 8. Tidraksi na byala. 9. Vavasati vambirhi lava mbaleke swiambalo swa fexeni va ri karhi va teka xifaniso. 10. Vanhu vo tala va fumbane ekhonseteni. 11. Wanuna a ri karhi lahlela bodlhele ra bomo.

6. Swi kombise hi mitirho leswaku wa tshemba leswaku Mfumo wa Xikwembu wa fuma

Hlaya Matewu 24:3, 14, ivi mi bula hi swivutiso leswi:

Hi wihi ntirho wa nkoka lowu kombisaka leswaku Mfumo wa Xikwembu wu le ku fumeni sweswi?
U nga katseka njhani eka ntirho lowu?

Mfumo wa Xikwembu wu le ku fumeni sweswi naswona siku ra leswaku wu fuma misava hinkwayo ri tshinele. Hlaya Vaheveru 10:24, 25, ivi mi bula hi xivutiso lexi:

I yini leswi un’wana ni un’wana wa hina a faneleke a swi endla leswi hi “vonaka siku ri tshinela”?

Xifaniso: 1. Xichudeni xa Bibele xi ri enhlengeletanweni ya Timbhoni ta Yehovha. 2. Xichudeni lexiya xi chumayela munhu loyi va tivanaka. — Xana u ta endla yini loko u dyondze swilo leswi u swi tivaka leswaku swi nga pfuna van’wana ni ku ponisa vutomi bya vona?

UN’WANA A NGA HA KU VUTISA A KU: “Hikwalaho ka yini Timbhoni ta Yehovha ti vulavula ngopfu hi 1914?”

A wu ta n’wi hlamula njhani?

NKATSAKANYO

Vuprofeta bya Bibele ni leswi endlekaka namuntlha swi kombisa leswaku Mfumo wa Xikwembu wu le ku fumeni sweswi. Hi kombisa leswaku ha swi tshemba leswi hi ku chumayela van’wana hi mhaka leyi ni ku va kona eka tinhlengeletano ta vandlha.

Mpfuxeto

Ku endleke yini eku heleni ka malembe ya nkombo lawa Bibele yi profeteke ha wona eka buku ya Daniyele?
I yini lexi endlaka u tshemba leswaku Mfumo wa Xikwembu wu sungule ku fuma hi 1914?
U nga swi kombisa njhani leswaku wa tshemba leswaku Mfumo wa Xikwembu wu le ku fumeni sweswi?

Tsala siku leri dyondzo yi hetiweke ha rona

Tiyimisele ku endla leswi

Tiyimisele ku va muhuweleri wa mahungu lamanene.

Swin’wana leswi u nga swi endlaka

Swin’wana leswi u nga swi endlaka:

KUMA LESWI ENGETELEKEKE

Twana leswi van’wamatimu ni van’wana va swi vulaka hi ku cinca ka mahanyelo ya vanhu ku sukela hi 1914.

“Ku Hohloka Ngopfu Ka Mahanyelo” (Xalamuka!, April 2007)

Twana ndlela leyi vuprofeta lebyi kumekaka eka Matewu 24:14 byi cinceke vutomi bya wanuna un’wana ha yona.

“A Ndzi Rhandza Baseball Ku Tlula Hinkwaswo!” (Xihondzo xo Rindza No. 3 2017)

Hi swi tivisa ku yini leswaku vuprofeta lebyi kumekaka eka Daniyele ndzima 4 byi vulavula hi Mfumo wa Xikwembu?

“Xana Mfumo Wa Xikwembu Wu Sungule Rini Ku Fuma? (Xiyenge 1)” (Xihondzo xo Rindza, October 1, 2014)

I yini leswi kombisaka leswaku “malembe ya nkombo” lama boxiweke eka Daniyele ndzima 4 ma hele hi 1914?

“Mfumo Wa Xikwembu Wu Sungule Rini Ku Fuma? (Xiyenge 2)” (Xihondzo xo Rindza, November 1, 2014)

a Vona tinhlokomhaka timbirhi to hetelela eka xiyenge lexi nge, Kuma Leswi Engetelekeke xa dyondzo leyi.