Xiviko Xa Vahuweleri Va Mfumo

Mintokoto Leyi Humaka eTuvalu

MAHUNGU lamanene ya Mfumo ya karhi ya huweleriwa eswihlaleni leswo saseka swa Tuvalu, Pacific Dzonga, naswona vumbhoni lebyinene byi nyikeriwe hambi ku ri eka vavanuna va xiyimo xa le henhla. Makwerhu wa le Australia loyi yena ni nsati wakwe va tirhaka ntirho wo famba-famba eTuvalu u hi byela ntokoto wa yena a ku:

“Mina ni nsati wa mina hi rhamberiwe eswakudyeni ekaya ka Holobye-nkulu wa Tuvalu. A ku ri nkarhi wa ku endza ka Holobye wa Timhaka ta le Handle wa Australia. Hi nkarhi wa swakudya, mina ni nsati wa mina hi ve na nkarhi lowunene wo veka vumbhoni eka holobye wa Australia ni nsati wa yena. Loko a hi tivisa, Holobye-nkulu u boxe leswaku i ntirho lowu hlamarisaka swonghasi lowu Timbhoni ta Yehova ti wu endlaka eTuvalu, ngopfu-ngopfu mayelana ni ku hundzuluxeriwa ka tibuku ta hina ti ya eka ririmi ra Xituvalu. U te: ‘Ndzi na tikopi ta tibuku ta vona hinkwato elayiburari ya mina, naswona ti kahle ngopfu!’ Holobye ni nsati wa yena a va tsakela ku twa nhluvuko wa ntirho wa hina eTuvalu.

“Endzhakunyana nimadyambu, hi ve kona eka ku tirivatisa ka kwalaho ka ku cina ka xintu. Endzhakunyana Mulawuri Jenerala wa Tuvalu u hi tshinelerile kutani a vula leswaku Timbhoni tin’wana ti endzele muti wa yena vhiki leri hundzeke naswona ti siye tikopi ta timagazini ta Xihondzo xo Rindza na Awake! U xiyile xinavetiso xa New World Translation of the Holy Scriptures endzhaku ka yin’wana ya timagazini naswona u lave ku tiva leswaku a nga yi kuma njhani ekusuhi. Hi vule leswaku hi ta n’wi nyika kopi hi ku tsaka. Sonto leyi landzelaka, ndzi yile emutini wa yena ni Bibele, naswona hi ve ni bulo lerinene ku ringana kwalomu ka awara. U hlamusele ndlela leyi a tlangelaka ntirho ni tibuku ta hina ha yona. Entiyisweni, loko hi fika emutini wa yena, nsati wa yena a a ri karhi a hlaya buku leyi nge Hanya Hi Masiku hi Xituvalu. Kutani a hi tsakile ku kota ku veka vumbhoni eka ‘lava nga eka xiyimo xa le henhla.’”—1 Timotiya 2:1-4.

Hi nkarhi wun’wana Holobye-nkulu wa Tuvalu u endzele Swihlala swa Solomon. Vanhu va Vatuvalu lava tshamaka kwalaho va endle nkhuvo wo n’wi xixima. Exikarhi ka lava rhambiweke enkhubyeni a ku ri ni makwerhu un’wana wa xisati, loyi a vikeke ntokoto lowu landzelaka:

“Eku heleni ka nkhuvo, Holobye-nkulu u nyike nkarhi wo vutisa swivutiso ehenhleni ka minhluvuko leyi ya ha ku humelelaka eTuvalu. Xivutiso xin’wana lexi xi vutisiweke a xi ku ‘Xana ku ni vukhongeri byin’wana lebyintshwa eTuvalu?’ Holobye-nkulu u hlamule leswaku ‘ku ni vukhongeri byin’wana lebyintshwa lebyi pfumeleriweke eTuvalu kambe i byin’we ntsena lebyi nga kahle.’ Loko a vutisiwile leswaku byebyo a ku ri byihi, u hlamule a ku, ‘Timbhoni ta Yehova.’

“Un’wana ni un’wana u hlamarisiwile hi nhlamulo ya yena, naswona xivutiso lexi nga erivaleni xi tlakukile xa leswaku ha yini Timbhoni ta Yehova ku ri byona ‘vukhongeri lebyinene byi ri byoxe.’ U te: ‘Hikuva varisi va hina va tshama ekaya siku hinkwaro naswona va hi bela nsimbhi hi Tisonto ntsena leswaku hi ya va yingisela. Kambe Timbhoni ta Yehova ti ta eka wena hi xiviri, naswona hambi loko u nga yi ekerekeni, ti ta ku dyondzisa hi Bibele ekaya ka wena.’”

Kutani, hambi leswi van’wana a va sola vutirheli bya hina bya yindlu na yindlu, swi le rivaleni leswaku van’wana va tlangela ku tisa ka hina rungula emakaya ya vona.—Mintirho 5:42.