Vantshwa Va Vutisa

Xana Ndzi Nga Swi Antswisa Njhani Swikhongelo Swa Mina?

“Loko u tshikilelekile swinene exikolweni ni le ntirhweni kumbe u karhatiwa hi vanghana ni ndyangu, minkarhi yin’wana u rivala munhu wa nkoka swinene, ku nga Xikwembu.”—Faviola, wa malembe ya 15 wa le United States.

“KHONGELANI minkarhi hinkwayo.” (1 Vatesalonika 5:17) “Mi phikelela exikhongelweni.” (Varhoma 12:12) “Tivisani Xikwembu swikombelo swa n’wina.” (Vafilipiya 4:6) Loko u ri Mukreste a swi kanakanisi leswaku u ti tiva kahle tindzimana leti. A swi kanakanisi leswaku wa swi xiya leswaku xikhongelo i ndlela yin’wana leyi hlamarisaka swinene yo vulavurisana ni Xikwembu. Anakanya hi mhaka leyi—u nga vulavula ni Xikwembu xa Matimba Hinkwawo nkarhi wun’wana ni wun’wana, ninhlikanhi kumbe nivusiku! Kutani Bibele yi ri: “Xa hi twa.”a—1 Yohane 5:14.

Hambiswiritano, ku fana ni muntshwa la tshahiweke eku sunguleni, u nga ha anakanya leswaku swa tika ku khongela. Loko swi ri tano, xana u nga endla yini? Xihloko lexi xi ta ku pfuna leswaku (1) u vona xihinga xa kona, (2) u tivekela pakani malunghana ni swikhongelo swa wena ni (3) ku lwa ni xihinga lexi ku sivelaka ku khongela leswaku u kota ku fikelela pakani ya wena.

Xo sungula, a hi vone xihinga xa kona. Hi xihi xiphiqo lexikulu eka wena loko swi ta emhakeni ya ku khongela? Tsala nhlamulo ya wena laha hansi.

․․․․․

Goza ra wena leri landzelaka i ku tivekela pakani. Laha hansi, fungha pakani leyi u lavaka ku yi fikelela, kumbe u tsala yin’we eka ntila lowu nga kusuhi ni “Yin’wana.”

□ Ndzi lava ku khongela nkarhi na nkarhi.

□ Ndzi lava ku papalata ku phindha-phindha marito eswikhongelweni swa mina.

□ Ndzi lava ku khongela swi huma embilwini.

□ Yin’wana ․․․․․

Ku Lwa Ni Xihinga Lexi Ku Sivelaka Ku Khongela

Xikhongelo xi fana ni nyangwa lowu u nga wu pfulaka nkarhi wun’wana ni wun’wana. Hambiswiritano, vantshwa vo tala va vula leswaku a va tshameli ku wu pfula nkarhi hinkwawo nyangwa wolowo kumbe a va wu pfuli va ntshunxekile hilaha va faneleke va endla hakona. Loko swi ri tano eka wena u nga heli matimba! Se u xi vonile xihinga xa kona naswona u tivekele pakani. Lexi lavekaka sweswi i ku lwa ni xihinga xa kona. Xiya swihinga swin’wana leswi u nga ha langutanaka na swona swin’we ni swiringanyeto swa ndlela leyi u nga swi hlulaka ha yona.

◼ Xihinga: KU HONISA. “Minkarhi yin’wana hikwalaho ka leswi ndzi faneleke ndzi endla swilo swo tala, ndzi tikuma ndzi honise ku khongela.”—Preeti, wa malembe ya 20 wa le Britain.

Ntlhantlho: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.”—Vaefesa 5:15, 16.

Xiringanyeto: Hlawula nkarhi lowu nga vaka wunene leswaku u khongela ha wona siku ni siku. U nga ha tsala ni le phepheni ku fana niloko u tsala xitsundzuxo lexi nga ta ku tsundzuxa mhaka yo karhi. Yoshiko wa le Japani la nga ni malembe ya 18 u ri: “Loko ndzi nga tivekeli nkarhi lowu kongomeke wa ku khongela ha wona, ndzi khomeka hi ku endla swilo swin’wana.”

◼ Xihinga: XIKAVANYETO. “Loko ndzi khongela ndza kavanyeteka naswona ndzi anakanya hi swilo swin’wana ematshan’weni ya leswi ndzi swi vulaka.”—Pamela wa malembe ya 17 wa le Mexico.

Ntlhantlho: “Nomu wu vulavula leswi mbilu yi taleke swona.”—Matewu 12:34.

Xiringanyeto: Loko u tshamela ku ehleketa hi swilo swin’wana loko u ri eku khongeleni, ringeta ku komisa swikhongelo swa wena—kukondza mianakanyo ya wena yi tshika ku famba-famba. Xiringanyeto xin’wana: Khongela hi timhaka leti u karhatekaka ha tona swinene. Marina wa le Rhaxiya la nga ni malembe ya 14, u ri: “Loko ndzi ri emalembeni ya kondlo-a-ndzi-dyi, ndzi sungule ku anakanyisisa hi mhaka ya leswaku ku khongela i ku vulavula ni Xikwembu hi ku kongoma. Sweswo swi ndzi khutazile leswaku ndzi khongela ndzi phofula ta le mbilwini.”

◼ Xihinga: KU PHINDHA-PHINDHA MARITO. “Loko ndzi khongela, ndzi tikuma ndzi ri karhi ndzi phindha-phindha marito.”—Dupe la nga ni malembe ya 17, wa le Benin.

Ntlhantlho: “Ndzi ta anakanyisisa hi mintirho ya wena hinkwayo, ndzi ta ehleketa hi ntirhisano wa wena.”—Pisalema 77:12.

Xiringanyeto: Loko u vona onge swikhongelo swa wena a swi tivikani, siku ni siku tsala ndlela yin’we leyi Yehovha a ku katekiseke ha yona. Kutani nkhensa Yehovha hikwalaho ka nkateko wa kona. Hambeta u endla tano ku ringana vhiki, kutani u ta va u khongele hi timhaka ta nkombo letintshwa handle ko phindha-phindha. Endla tano hi timhaka ta siku ni siku. Bruno wa le Brazil la nga ni malembe ya 21, u ri: “Loko ndzi khongela ndzi ringeta ku anakanya hi swilo leswi humeleleke siku rero.” Samantha wa le United States, loyi a nga ni malembe ya 18, u endla leswi fanaka. U ri: “Namuntlha ndzi ringeta ku tsundzuka swilo hinkwaswo leswi hambaneke ni leswi endlekeke eka masiku laman’wana, kutani ndzi khongela malunghana ni swilo sweswo. Sweswo swi ndzi pfuna leswaku ndzi nga phindha-phindhi marito loko ndzi khongela.”b

◼ Xihinga: KU KANAKANA. “Siku rin’wana ndzi tshame ndzi khongela hi xiphiqo xo karhi exikolweni, kambe a xi tlhantlhekanga. Entiyisweni, ndzi ye ndzi va ni swiphiqo swo tala. Ndzi te, ‘Swa antswa ndzi tshika ku khongela hikuva Yehovha a nga ndzi yingisi!’”—Minori la nga ni malembe ya 15, wa le Japani.

Ntlhantlho: ‘Loko u ringiwa Yehovha Xikwembu u ta ku nyika ndlela yo huma, leswaku u kota ku tiyisela.’—1 Vakorinto 10:13.

Xiringanyeto: Hi nga tiyiseka hi nchumu wun’we: Yehovha i “Mutwi wa xikhongelo.” (Pisalema 65:2) Loko u khongele hi mhaka yo karhi, ringeta ku twisisa xiyimo xa kona hi ku helela. Ematshan’weni yo rindzela nhlamulo leyi u yi languteleke, lava leyi ana se u nga ha vaka u yi kumile. Leswi wa ha tiyiselaka tanihi Mukreste swi vula leswaku Yehovha u xi hlamurile xikhongelo xa wena, a nga xi hlamulanga hi ku susa xiphiqo xa wena, kambe u xi hlamule hi ku ku nyika matimba leswaku u tiyisela.—Vafilipiya 4:13.

◼ Xihinga: KU KHOMIWA HI TINGANA. “Loko ndzi anakanya hileswi lava ndzi nghenaka na vona xikolo va nga ta swi vula loko va ndzi vona ndzi khongela loko hi nga si dya swakudya swa ninhlikanhi, ndzi khomiwa hi tingana.”—Hikaru la nga ni malembe ya 17, wa le Japani.

Ntlhantlho: “Ku ni . . . nkarhi lowu faneleke wa xin’wana ni xin’wana lexi hi lavaka ku xi endla.”—Eklesiasta 3:1, Beck.

Xiringanyeto: Hambileswi minkarhi yin’wana vanhu lava ku vonaka loko u khongela va nga ku ndhundhuzelaka hileswi u khongelaka, a wu fanelanga u khongela hi xikongomelo xo voniwa leswaku u le ku khongeleni. Hi xikombiso, xikhongelo xo koma lexi endliweke hi Nehemiya wo tshembeka emahlweni ka Hosi Atazekiseki a xi ri xa le mbilwini, naswona a xi kona lexi kombisaka leswaku hosi yi swi xiyile leswaku Nehemiya a a ri ku khongeleni. (Nehemiya 2:1-5) Na wena u nga khongela eka Yehovha hi mbilu handle ko tikokela mahlo.—Vafilipiya 4:5.

◼ Xihinga: KU TITWA U NGA FANELEKI. “Yehovha se wa swi tiva swiphiqo swa mina. Kutani loko ndzi karhele ku swi tiyisela ndzi vona onge na yena u karhele! Minkarhi yin’wana ndzi titwa ndzi nga faneleki ku vulavula na yena.”—Elizabeth la nga ni malembe ya 20, wa le Ireland.

Ntlhantlho: ‘Lahlela ku vilela hinkwako ka wena eka Xikwembu, hikuva xa ku khathalela.’—1 Petro 5:7.

Xiringanyeto: Tanihi xiyimiso xa dyondzo ya munhu hi yexe, endla ndzavisiso u tlhela u anakanyisisa hi matsalwa lama landzelaka: Luka 12:6, 7; Yohane 6:44; Vaheveru 4:16; 6:10; 2 Petro 3:9. Tindzimana leti ti ta ku pfuna leswaku u xiya leswaku Yehovha wa swi lava ku twa marito lama humaka eka wena nileswaku a wu fanelanga u va Mukreste la hisekelaka etlhelo leswaku a ta yingisa xikhongelo xa wena. Mupisalema Davhida—loyi na yena a a vilela hi swilo swo karhi a tlhela a karhatiwa hi gome—u phofule ntshembo wa leswaku “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”c—Pisalema 34:18.

Leswi Yehovha a yingiselaka swikhongelo swa wena hi yexe, swi kombisa leswaku wa khathala hi wena. Nicole wa le Italy la nga ni malembe ya 17, u ri: “Yehovha a nga rhumanga tintsumi leswaku ti yingisa swikhongelo swa hina. Swi lo dlaa, leswaku leswi a yingisaka swikhongelo swa hina hi yexe, u swi teka swi ri swa nkoka.”

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

◼ Hi swihi swilo swin’wana swa nkoka eka Yehovha leswi u nga khongelaka ha swona?

◼ Hi tihi timhaka tin’wana leti khumbaka van’wana leti u nga khongelaka eka Yehovha malunghana na tona?

[Bokisi/Swifaniso leswi nga eka tluka 28]

LESWI TINTANGHA TA WENA TI SWI VULAKA

“Xikhongelo xi fana ni dayari, leyi voniwaka hi wena na Yehovha ntsena.”—Olayinka wa le Nigeria.

“A hi nge u ni munghana lonkulu loyi u n’wi nyikeke tinyiko to tala. Hiloko siku rin’wana, munghana yoloye a nga ha ku vulavurisi. Yoleyo i ndlela leyi Yehovha a faneleke a titwa ha yona loko hi tshika ku khongela eka yena.”—Chinta wa le Australia.

“Minkarhi hinkwayo a ndzi vona onge swi hoxile ku phofula ndlela leyi ndzi titwaka ha yona. Leswi Yehovha a hi pfumelelaka leswaku hi khongela eka yena swi ndzi pfunile leswaku ndzi xiya leswaku a swi hoxanga ku tiphofula eka yena loko ndzi tsakile, ndzi ri ni gome niloko ndzi pfilunganyekile. Sweswi ndza swi tiva leswaku ndzi nga endla yini loko ndzi langutane ni swiphiqo.”—Amber wa le United States.

[Xifaniso lexi nga eka tluka 27]

Loko u vona onge swa ku tikela ku khongela, tirhisa swilotlelo leswi nyikeriweke eRitweni ra Xikwembu, ku nga Bibele