Coati Xihadyana Lexi Hlamarisaka

HI MUTSARI WA XALAMUKA! LE BRAZIL

U LE ku tifambeleni enhoveni hiloko wo na swi pfuketana u vona ntlhambi wa swihadyana leswi fanaka na vamanghovo leswi vuriwaka coati swi ta swi ku kongomile. Leswi u nga chuha, wa tivutisa loko swi lava ku ku hlasela. Kambe swona a swi lavi ku ku hlasela! Hambileswi swihadyana swo fana ni leswi swi tiveriwaka ku luma vanhu, kambe leswi swi lo tilangutela nkwama lowu u wu tameleke. Swi tshama swi ri karhi swi lavana ni swakudya. Kahle-kahle swi dya xin’wana ni xin’wana lexi swi xi kumaka, ku katsa ni swivungu, minkolombyana, mapume, timbeva, mihandzu hambi ku ri mandza ya tinyenyana.

Xihadyana lexi xi fana ni xihadyana lexi vuriwaka raccoon, kambe xona xi ni miri wo leha ni ncila ni nhompfu yo leha. Xihadyana lexi, lexi nga leha 66 wa tisentimitara kasi ni ncila wa xona ntsena wu nga leha 66 wa tisentimitara, xi kumeka etindhawini leti hisaka ta le Amerika ngopfu-ngopfu edzonga-vupela-dyambu bya United States ku ya en’walungwini wa Argentina.

Leswa xisati swi famba hi mintlawa ya kwalomu ka 20, kasi swa xinuna a swi fambi hi mintlawa. Lembe ni lembe hi nkarhi wa ku mithisana ka swona, xin’we xa xinuna xi famba ni ntlawa wa leswi swa xisati. Endzhaku ka mavhiki ya nkombo ku ya eka nhungu, leswi nga mitha swa suka entlaweni swi ya aka swisaka emirhini. Ha xin’we xa swona xi tswala vana vanharhu kumbe mune. Endzhaku ka mavhiki ya tsevu swi tswarile, leswi swa xisati ni vana va swona swi tlhelela entlaweni wa swona. Vana va kona va fana ni swibolwana leswi nga ni voya leswi nga tiyelangiki.

Loko ri xile swi tshamela ku nun’hwetela ni ku handza-handza kwale nhoveni. Varimi a va lavi no swi vona swihadyana leswi hikuva swa onha emasin’wini ni ku onha etihokweni ta tihuku hikuva swi dya mandza. Loko swi hlaseriwa swa swi kota ku papalata khombo. Van’wantlhadyana lava va baleka va khandziya emirhini. Swi ni ndlela yin’wana yo tumbela. Loko ku twala xibalesa kumbe ku phokoteriwa ka mavoko, swa badama swi endla onge swi file! Loko muhloti a tshinela u kuma se swi balekile!

Loko wo tshuka u endzele eBrazil, kumbexana u ta hlangana ni ntlhambi wa swihadyana leswi. Loko wo hlangana na swona u nga chuhi. A swi nge ku lumi. Kambe loko wo swi hoxela swakudya swi ta puluta mincila hi ku tsaka ngopfu!